水泡媽終於開始放產假，我每日揸車返工的日子總算（暫時）告一段落。總括來講，每日揸車來回香港最繁忙的街道，加上時不時有坐骨神經痛，都真係幾辛苦。不過同懷孕相比，少少付出算得甚麼呢（懶豪！）。
而呢一兩個月來的駕車日子，令我有不少感想。如果有個馬路天使，可以俾我十個願望，改變一下香港的交通情況，，咁就好啦。
（隔離張相係周璇，套電影當然無睇過。只係見個名貼題，就借用一下。）
不過，呢十個願望只係我見過的交通情況。例如因為我沒有親眼見過醉酒駕駛，所以我不會包括在內。
我的十個願望：
1) 切線打燈
雖然係舉手（指）之勞，但有好多人都唔會做。除咗係一種交通安全，仲係一種禮貌。如果無打燈，我寧願「玉石俱焚」都唔會俾佢插入來！
2) 無人推車（跟車太貼）
跟車太貼好危險！因為每個人和車的反應都唔同。都見不少意外因此而起。早幾個星期先見到一串的士撞埋一齊。（個心好涼。嘻…）
3) 超白燈泡從未現世
如果我可以做部時光機同 Terminator 出來，我一定會叫 Terminator 去殺咗做超白燈泡出來的那個發明家。但係諗深一層，做超白燈泡出來的人沒有錯，錯的是亂安裝的那些人！
4) 唔好糊亂切線，因一己之快，左串右插
因為日日經過告士打道多次，所以好憎左串右插的司機。其實好多時都係因為呢班司機，先會塞車。點解大家唔可以乖乖地排隊行。你的一時之快，後面就要停住等你切線。最明顯係告士打道東行，新鴻基大廈對出。好多人貪快，行告士打道東行會先行左，到新鴻基大廈對出前由左切右，再去東區方向。所以一到鴻基大廈對出，右二線就會好塞。如果個個都排住隊行，可能就唔洗拆皇后碼頭。
5) 尾燈唔好太光
車尾燈太刺眼，對後面的司機很辛苦呢（尋晚又跟一架 Elgrand，差啲盲）。其實尾燈光亮度，應該跟天色配合。日頭，要光一點，後面的人先睇到。夜晚就唔洗咁光。而光亮度可以跟車頭燈連接起來。只要夜晚一開車頭燈，尾燈就自動調節，唔開咁光。應該好簡單啫。
6) 無人同我搶燈位
最憎人同我搶燈位。無人可以係我前面！！！講笑，唔算！
6A) 開車唔講手提電話
成日見有啲司機，開車開到好似舞龍一樣。我一定會爬頭，因為點知會唔會係醉酒駕駛，突然停或撞，對我都好危險。爬頭時我都會望一望，通常都係見到個司機講梗電話，仲要無免提裝置。好危險呀！
7) 車行車路，行人行行人路
好多行人都唔睇路。如果去到遊客區，有好多同胞會無端端行出馬路，唔睇交通燈。俾佢地嚇死。落得街，所有人都係道路使用者。大家都應該小心呀。
8) 道路指示可以更清晰，白線可以畫得更好
我好鐘意 Esso 句標語：「We are drives too」。但亦都令我懷疑路政處的人有無車牌。如果有，我就真係好唔明。點解有啲白線會畫得咁差，令到應切不能切，不應切又可以亂切。我唯一安慰自己的方法，就係記得以前讀數學，有講到行車安排。眼見以為最快最方便的畫線，可能到頭來會引至大塞車。不過每次行西區走廊到信德對出，三線匯合，我行中線，左右都要插入來，次次都變成三文治。唉…
9) 路上零意外
意外當然係人都唔想。而且之後塞起車上嚟，真係好辛苦。「嗰個落雨既晚上」唔係大問題，落雨咪揸慢啲囉。「嗰條濕滑既公路」都無問題，濕滑咪小心啲囉。但係「嗰個粗心大意既司機」就出事啦！因此咪搞到人地「趕到黎呢間咖啡室」會佳人囉。大家路上小心！（參照：留給最愛的說話 - 張麗瑾 / 鄭丹瑞）
10) 駕駛者可以互相體諒，和睦共處
如果駕駛者可以互相體諒，我就唔需要以上九個願望啦。所以希望包括自己在內，大家都可以忍讓，和睦共處。阿門。
~ Lindberg
