為甚麼只統治地球，而不是宇宙呢？

今朝睇留言版，真係忍唔住笑咗出嚟。KHEHE 朋友的留言好搞笑，令我不禁要專登寫一篇嚟回覆。估唔到呢個世界上，仲有另一個人（最近）生咗個細路、屋企同樣有兩隻貓、同樣有個唔鐘意啲貓嘅阿媽、同埋最重要係…大家都想統治地球。哈哈！

（突然間想起 NANA，不過如果係兩個男人…好嘔心…）

其實都唔記得自己幾時講過話要統治地球，但係對於統治地球，老實講，我的而且確真係有一套「創新」嘅經濟理念同埋管治方式。同朋友傾過皮毛，可行性雖然有極大難度，但總可算係前無古人。即使我做唔到，我都可以學習「愚公」精神。我做唔到，仲有 Jayson！嘩哈哈哈！

但係征服宇宙就真係諗都未諗過。正所謂：「正心、修身、齊家、治國、平天下」。宇宙好似無人提過…

KHEHE，你問我做邊行，我相信要統治地球，就要從人類嘅基本需要做起。衣食住行，我唔識做衫，又唔識揸巴士，起樓就更加唔洗諗，所以我揀咗「食」。嘩哈哈哈！

對於自己嚟講，正心，自己總算係咁。雖然未必能夠日行一善，但亦無大奸大惡。不過修身，我睇就好難，因為個肚腩開始有啲失控，與日俱增，不過如果唔係講個身型，自我修養，都叫略有所成。齊家都算齊咗啦。之後就要…

~ Lindberg

臍帶的迷惑

Jayson 的臍帶遲遲都未脫落。都己經一個月有多，我們照足醫生的指示，保持臍帶四周清潔和乾爽，但它就是不肯脫落。

星期一到母嬰健康院覆診時，醫生說可以叫護士姑娘在臍帶上結一條繩，加速臍帶的脫落。當姑娘為 Jayson 檢查的時候，才發現臍帶上原本應有的繩不見了。原因不明，沒了那條繩，養份繼續供應，臍帶就當然不會脫落啦！激死…

繩子紮上去之後，凋謝速度快很多。今天再去覆診見姑娘，情況良好。星期一又要再去！真的不知道之前那條繩是怎樣失去的。唉…

星期一磅重，足足有九磅。今天沒有再磅重。但發覺 Jayson 越來越包包面啦。每當把他放上我肩膀掃風的時候，我的臉貼著他的臉，我忍不住不停「抽水」…

「救命呀！非禮呀！」



~ Lindberg

辦理出世紙

終於是時候申請出世紙（否則過期…）。問過葉大師（阿托） ，Jayson 的中文名跟八字有沒有相沖。原本對這些都不太在意，但還是查一查比較安心。

其實心裡很希望用現時的中文名，因為這個有些少意思。經大師指點之後，雖然他說「峻」比「浚」好，但後者亦無大問題，所以就決定用「浚琛」這個名字。

多謝葉大師的指點！

一早到金鐘的生死註冊處排隊。前面有十七個人！等了足足兩個多小時才到我們。

需要帶的，只是父母的身份證和結婚證書。醫院的證明直接送到註冊處來。這是以防有人走醫院數。不找清住院費用，醫院不會送證明到註冊處來，而小朋友就拿不到出世紙。

不計排隊的時間，其實辦理的時間很短。出世紙 $140 一張，我要了三張作分散保管之用。出世紙的號碼（即未來的身份證號碼）很容易記。

出世紙還有一個靚靚的紙袋裝起。（左邊是 Ardy 叔叔給 Jayson 的卡。 ）



~ Lindberg

一日之計在於…

今朝一早被 Jayson 吵醒。於是便起身梳洗「準備」一下。Jayson 媽問我做為甚麼這麼早起身。

我說：「一日之計在於晨…」

「想打機呀？」Jayson 媽答。

沒有東西可以瞞得過她的法眼…

「我就真係一日之計在於"son"啦！」Jayson 媽補充說。"son" 就當然是 Jayson 的意思。

我覺得幾好笑，雖然有些少爛，但是又很真喎。

Jayson 媽一天的時間表，全是由 Jayson 決定。如果吃得人奶多，三小時左右一餐。如果有補奶粉，就大約四小時。每餐連換尿片，最少需要一個小時。所以只有兩個小時去做自己的東西。餵人奶要多休息，所以 Jayson 食飽瞓時，Jayson 媽也會盡量利用這兩個小時去休息。但晚上的 Jayson 很會扭計（晚上七時至十時），睡得不好。很多時都在找人陪。

而我就會爭取這兩個小時去洗碗、洗奶樽、洗衫、洗自己、寫 blog、回覆公司電郵、打機、玩 msn、玩 facebook、等等… 好忙呀！

最近發現 Jayson 的喊聲開始比較複雜。雖然有些人會說小朋友的喊聲會令人很煩厭。但我們覺得那是他的語言，去明白他在說麼，其實也是一種樂趣。

忽然想起養和醫院的同房。她在我們最後一晚時入住。不是我有心偷聽別人說話，而是她跟她的丈夫的對話很奇怪。據我的推理，這是她的第二胎。之前有一個女兒，跟別個男人所生。這一胎亦是女兒，現任這個丈夫的佔有慾很強，而且很想要多個男丁。當然，這都是我的推理。

第二日開刀後，太太還沒推上房間，男人早已自己一個回房吃飯盒。記得同樣時候的我是焦急不已，不停問護士姑娘太太在那裡。推上來之後，他跟太太說，過程很簡單呢，快點來多一個。在 Jayson 媽生之前，我忘了那支半身麻醉的針是有危險的。打得不好，就會像我同事一樣，腰骨不時會痛。生小孩，又豈有簡單可言？轉個頭，他們有親友到訪，男人就跟他們出去吃午飯。我心想：又吃？！之後聽到太太叫護士姑娘，很不舒服地說想嘔。這是半身麻醉的副作用。我覺得她很可憐，最需要人的時候沒有一個在身旁。我很想去幫她，又不知應該如何處理。聽見姑娘叫她不要擔心，因為是正常的。然後便拿個嘔吐用的面盤給她。唉… 做母親的「眠乾睡濕」，這個男人會明白嗎？



~ Lindberg

痱滋救星

近排可能因為唔夠瞓嘅關系，個口生痱滋。飛滋仲要生係最賤格嘅舌頭底，仲要生夠兩粒！死未！好在有佢：

之前用過好多痱滋藥，都唔係好得。醫院診所俾開嘅 Bonjela 無料到。白兔牌吻百蜜又貴到飛起。另類方法又鬼死咁痛。有次有個朋友介紹我用 Oracort。佢成日生痱滋，仲生到一口都係。既然佢都醫得好，所以我都買支試下。

隻藥出奇地係香港製造。不過都幾難買。唔係個個藥房有得賣。二三十蚊一支。

揸上去感覺上好似 Bonjela，甜甜地，黏黏地。揸上去唔會大過痛。但係效力好好！揸兩三次一定好。值得一試！



~ Lindberg

40D 新 Firmware

唔係 Ardy 講，我都唔知 Canon 40D 出咗新 firmware：

http://web.canon.jp/imaging/eosd/eos40d/eos40d-firmware-e.html

其實都無乜大改動，最主要係 Auto Power Off 之後，睇相係息機之前睇梗嗰張。雖然好似係好小事一件，不過之前下下返到最尾嗰張都幾煩。

攞部相機出嚟升級，先發現部相機好耐無用。入面啲相係 Jayson 頭一兩日影嘅。之後都無用過。其實影 BB，最緊要方便，隨手可以攞到嚟影就最好。而且 BB 唔會走來走去，唔洗用大機，所以我都係用細機（GX100）影。

好想出街影下相呀…


~ Lindberg


P.S. 恭喜兄弟 Ardy，終於換老婆！我指係相機！哈哈！D300 好勁呀！做朋友嘅都感到自豪！哈！可以搵借口出街影相啦！！！

我們的第一次：出街街篇

其實第一次出街應該是出院後幾天，到兒科醫生那裡去覆診。不過那只是屋企附近，不需要準備，所以不算。那麼正式第一次，應該是去母嬰健康院。

之前都掙扎了很久，應不應該到母嬰健康院做檢查，或是到養和醫院做。後者雖然比較貴，但亦應該比較舒服。最後還是決定到母嬰健康院去看一看。

準備工作分兩方面。首先 Jayson 媽要著得暖。其次 Jayson 的東西要帶齊。因為姑娘告訴我們說，首次的檢查需要兩、三小時，所以要帶齊奶粉尿片。那我的新 allerhand 袋便大派用場了！

這個袋是早一個星期，在吉之島見到的。其實已經有朋友送了一個寶寶袋給我們。雖然那個袋是二手，但我並不是介意是舊的。而是這個 allerhand 實在太過適合我這個「屎忽痕」。所以忍不住手買了下來。之後跟 Fred 哥提起，他也很明白。「Gadget is in our blood！」

這個袋的特色是內袋夠多，而且用途清晰。2006年的限定版，更有有趣的圖案。

入面間格很好：

還有換片墊一張！勁！

allerhand 的網址：

http://www.allerhand.com/

以下是在它的網址找來的圖。可見功能甚廣，型爸必備！哈！

好彩吉之島沒有這個誇張大紅大橙的顏色。如果有的話，我可能會把它也買回來。嘻…
好像離了題… 嘻嘻…

第一次出街街，一切順利。但在健康院內等了很久。 磅重要等，見姑娘要等，見醫生當然要等。九時到健康院，回家時已經差不多十二點。我倆覺得有如去完跑馬拉松一樣。很累… Jayson 由頭睡到尾。總算乖乖啦！

之後都應該只會在健康院做檢查，打針便到私家診所打「六合一」。這樣便可以打少幾支針。原本都想過到養和醫院做檢查和打針。$7,000 兩年。雖然可以見楊教授，但想到分別不會太大，而且節省來的錢，亦可以留給 Jayson 用（如果我沒有拿去買自己的玩具的話…）。




~ Lindberg

火雞節快樂

聽日又係一年一度嘅感恩節，即鬼佬做冬。感恩節嘅來由周圍都有寫，舊年我都好似講過，所以我費時又講啦。如果想知係乜，可以參考以下網頁：

http://zh.wikipedia.org/w/index.php?title=感恩节&variant=zh-hk

感恩節當然要食火雞，但係唔好問點解。一講起火雞，我就諗起麥兜。佢話食火雞嘅高潮係當你叉起舊肉，到放入口之間。令我記得第一次係舊公司食聖誕大餐，亦都係第一次食火雞。心情好緊張，白色一大塊雞肉，見佢啖啖肉，熱切其待咁將佢放入口。一放入口，嘩… 好鬼「鞋」，仲好鬼乾呀！又無味！同食樹皮無分別（不過我都係講下，因為都未食過樹皮… 嘻…）。

自此之後，我再無食過火雞。直至我地自己煮。

舊年我記得好忙，所以無食到。今日下午大家心血來潮，提早一日成班同事落餐廳食感恩節大餐。唔係賣花讚花香，真係好好食。

（無帶相機，所以用手機是但影。）

雞肉唔「鞋」，嫩滑而且多汁。可能係因為我地唔用大火雞嘅關系，每隻都係得八磅左右（算細啦！）。配菜雖然簡單，但係好食到停唔到口。薯蓉好香滑，蕃薯香甜，個南瓜批真係不得了！不過南瓜批食唔得多，好鬼滯。而個火雞餡料就差少少，不過之後已經改咗，聽日嘅應該唔錯。正！

可能真係全部野都好新鮮嘅關系，樣樣都覺得特別好味。而我個肚腩就… 唉…

預祝各位（雖然唔關我地中國人事），感恩節快樂！



~ Lindberg

Jayson 的近況

一個字：「玩野」。呀…「玩野」應該是兩個字。

最近 Jayson 醒的時間開始比較多。夜晚七點至九點好精神，而且好想食奶。剛剛食完三安士，未夠要加多一安士。一安完又一安！有次食得太多嘔番出來，所以現在都不敢給他太多。

人奶開始吃得比較多，不是每餐都需要補奶。但因此大便亦都會多。真的換到手軟！

現在因為我要上班的關系，Jayson 媽就一個人負責 Jayson 零晨三點鐘的那一餐和換片片。如果「幸運」的話，她都可以有三至四個鐘頭的睡眠時間。

昨天去了做聽力測試。表現正常，Jayson 好叻！母嬰健康院的做法沒有私家醫院的複雜。母嬰健康院只測試耳內的回音，而私家醫院的測試耳朵聽到聲音之後的腦電波反應。但只要知道是沒有問題便足夠了。

一天一天的長大。初出世時 2920 克，上星期已經 3370 克！下星期要去覆診，不知道到時會是幾重呢？



~ Lindberg

點解阿媽無 facebook？

我尋日竟然不孝到唔記得阿媽生日！如果阿媽有 facebook，我就唔會唔記得啦…

死人頭阿哥又係嘅。夜一夜先傳個短訊嚟話我無搵阿媽，我睇唔到就去咗瞓，搞到今朝先睇到個短訊！

當然我有用自己嘅日曆去記住所有我識嘅人嘅生日。不過我尋日差啲俾 Jayson 玩殘。真係返工都無放假咁辛苦，先完全忙記阿媽生日。今朝打番個長途電話俾阿媽。好彩無嬲我，仲笑我有個仔就無阿媽。嘻…

提起 facebook，之前我都有玩 friendster。但係朋友多極都係小貓三四隻。但係 facebook 個加人方法好唔同。做得好好。好到好似病毒咁，個個都中招。因此亦都搵番好多失散多年嘅朋友。依家有成 77 個朋友。其實仲有好多人唔敢加，例如同事，Jayson 媽嘅朋友等等。見到我個 facebook 就會見到我個 blog。一陣笑我寫啲野點算？！哈！



~ Lindberg

自家製肉醬意粉

我雪櫃入面通常都會有包免治牛肉、肥牛、或者牛肋肉。所以即使唔出街，都唔會餓死，或者要食悲（杯）麵。今日午餐就來一個簡單的肉醬意粉。話雖簡簡單單，都有啲野要注意先煮得好。

材料好簡單，以下係大概三四人份量：

免治牛肉 - 1 磅
洋蔥 - 半個
紅蘿蔔 - 1 條仔
蒜頭 - 兩粒仔
罐頭茄肉 - 1 罐
忌廉 - 1/4 杯
鹽及黑椒粉 - 適量
水 - 1 杯
清雞湯 - 少許
意粉 - 三至四人份

今日屋企竟然無罐頭茄肉同忌廉。唯有用意粉汁同牛奶代替。意粉汁多咗香草，其實簡簡單單用茄肉已經會好好味。

其實心血來潮想煮肉醬，係因為前幾日偷咗少少師。所以想試下真唔真。

先輕輕炒一炒牛肉。

之後倒走晒啲油同水。之前我唔會倒，以為肉汁就係好野。其實唔係好野，會令肉醬比較羶同肥。

跟住就可以炒洋蔥同蒜頭。見我蒜頭切條係有原因。因為切條唔會咁搶火，變得好辣口。

炒洋蔥可以落少少糖，會靚啲。見金黃之後就可以落紅蘿蔔同牛肉。紅蘿蔔都幾重要。會令個汁甜啲。

全部見金黃就可以落茄肉同水。滾咗之後就可以落暖咗嘅忌廉。因為我無，所以落多些少奶。不過無忌廉咁好效果，滑又香。一定要先暖咗忌廉先好落。凍忌廉一落會變酸。個汁就咁就煮好。製成品應該橙橙地，粉粉地紅色。差啲唔記得，最後要落鹽同黑椒粉去調味。

意粉就簡單。跟包裝煮。如果包裝話八分鐘，我會等水滾，落意粉，水滾番之後計八分鐘。八分鐘一到，即刻過冷河。以免個意粉熱，餘溫將自己煮得過熟。咁樣做法，亦都容易控制一啲。

咁樣煮嘅意粉會生少少。之後等其他野準備好之後，就可以將意粉回鑊。 加少少雞湯煮一煮，等佢熟啲同有些少味。

之後就可以倒肉醬落去一齊炒。（無手影相…）
我會落淨汁去炒，等意粉可以吸收啲味道，乾身就可以上碟。再放熱嘅肉醬上面。咁咪靚靚囉！

~ Lindberg

張床我地都有份！

千祈唔好俾 Jayson 嫲嫲知道…

早幾日 Jayson 嫲嫲打電話嚟，話我表姐有野同我講。表姐係《微笑行動》到做醫生。原本以為佢只係想恭喜吓我，但係原來係叫我有細路就唔好養貓，真係講到我發火。

表姐話佢係外地嘅姪仔姪女，啲屋企都有養小動物，亦都好可能係因為咁，小朋友就有哮喘，所以叫我唔好養。我當然話唔得。跟住佢就好似幫我諗埋咁，叫我將佢地交俾啲乜乜動物會收養。我話如果阿仔（touch wood）有乜唔舒服，都無辦法。總之就無得傾。

不過我後尾都無怪佢。佢唔明白寵物同家人嘅分別。自從阿威同阿妹踏入我地屋企門口嘅第一日，佢地已經係屋企嘅一份子。如果有乜問題，咪一齊去面對同解決囉。邊到有可能話送走佢地喎！前排見兩隻傻野，因為屋企多咗個細路，又唔食野，阿威隻眼又唔舒服，個心好痛。依家見佢地無乜事，個心先好過啲。

講完電話之後嘅第二日，Jayson 嫲嫲嚟探 Jayson，講講吓又話不如送兩隻貓去佢到養。真係火都嚟。係唔係想激死我！

Jayson，你要健健康康呀，知唔知？

而 Jayson 婆婆就好唔同。一早就當埋兩隻貓係孫仔孫女，所以唔會講啲咁野。

不過話時話，佢兩隻野真係好好笑。唔會直接瞓上床單到，一定會搵張被之類墊一下。哈！當然俾佢地玩完之後，我都會換番張床單啦。

~ Lindberg

家務助理好幫手

早前到婦科大夫那裡去覆診，大夫見我們兩個的殘樣，便說要過兩招給我們。

「其實好簡單。」大夫說。「最緊要休息和保持心境開朗。將家頭細務交給工人啦。」

「大夫，我地無工人喎…」

「無工人？！」

這又難怪。大夫的客人大部份都是大富人家，無理由沒有工人。但我們就是沒有。唉…

一直沒有請工人是因為自己對清潔有點「要求」。但回家想清楚之後，還是決定給阿托的家務助理一個電話。希望她一星期可以來兩次，然後把吸塵、抹地、打掃、燙衫等工作交給她。

她每次工作三小時。其實三小時轉眼便過。雖然說是第一次，吸塵抹地完之後，還是見到東一粒，西一粒的沙。櫃底仍是貓毛滾滾。衫就燙得不錯。她走了之後，還是要自己掃一掃地。我心想，只要把自己的要求降低，還是可以接受。而且她一星期來兩次，第一次吸不走的毛球，第二次「應該」會吸得走呱…

提起毛球，不知道其他養貓的朋友有沒有這個經驗。我跟另一位養貓的朋友發現地上的貓毛會自自然走在一起（靜電的關系吧）。在客廳或走廊上，時不時會有一個毛球滾過。感覺就有點像以前的西部牛仔片，決鬥時總有一個草球吹過…兩隻貓四目交頭，大戰一觸即發…

把工作交給家務助理之後，人都輕鬆了不少。起碼星期天的早上，不要忙著起床做家務。$50一個鐘可以換來的，都可算是物有所值。



~ Lindberg

我愛草草

阿威，乜你鐘意草草鐘意成咁呀？

其實可能阿威實在係太攰啦。以前我朝早一醒，兩隻貓就會跟住起身。不過呢兩個禮拜就大覺瞓。無計啦，鬼叫細路晚晚嘈咩。Jayson 媽都盡量爭取休息時間。一家大細齊齊瞓！

不過好彩阿威隻眼有好轉。之前眼仔不停流眼水。阿威不嬲抵抗力差，每當屋企有轉變，隻眼仔就會出事。今次仲要大鑊到多咗個細路。無離家出走都算係咁啦。而我就日日同佢滴眼藥水。總算好番啲啦。


~ Lindberg


P.S. Jayson 星期一磅過重。3.37kg 啦！

Chee saw hai bean doe a?

前一排收到本 Servicemen's Guidebook。呢本小冊係放係分域碼頭，俾外國水兵到港時睇。入面有好多香港嘅資訊。但當然香港人自己睇番會覺得幾好笑。

而最精彩都莫過於入面教外國人講廣東話。我覺得好比我地《通勝》入面教人講英文！

（原本我諗住同大家玩下，將次序重新排列，俾大家配對一下。但係我發現實在太難，自己知答案都做唔到。嘩哈哈哈！）

English	Cantonese
American	May gwock yan
Bad, rotten	Mmh hoe / Hoe soih
Beautiful	Hoe lang
Chinese	Jungwok yan
Bristish	Yingwok yan
Go	Hoi / Faai dee jau
Good	Hoe, Hoe / Gay hoe
Bad	Mmh hoe
Not bad	Mmh chaw
Is it good?	Hoe mmh hoe?
Good-bye	Joy gheen
Good Morning	Jo san
Turn Right	June Yauh
Turn Left	June Jaw
Pardon Me	Doy um jew
Thank you (for service)	Mmh goi
Thank you (for gift)	Dough jair
How much money?	Gay doe cheen?
Too expensive	Tai gwai
Where is the toilet?	Chee saw hai bean doe a?
Stop the car	Teng chair
Excuse me	Mmh goy
Yes	Hi
No	Mmh hi
Is it?	Hi hmm hi?
OK	Duck
Not OK	Mmh duck
Is it ok?	Duck mmh duck?
When?	Gay see?
What?	Mutt yeh?
Why?	Deem guy?

~ Lindberg

奶樽的學問

經過一輪測試，原來選擇奶樽都很有學問。每一隻牌子都有它的獨特好處。但不外乎防止寶寶吞太多空氣入肚、訓練寶寶的口腔、或模仿母親的乳頭。而其實在香港的選擇並不多。每隻牌子都只是有最普及的幾隻。

（準備開餐！）

我們的第一個奶樽是 NUK 的。因為是我們買 NUK 的蒸奶樽器時送的。第一次用時，覺得很不錯。回氣孔令寶寶不會吞下太多空氣，而且其形狀對口腔發展都有一定的幫助。

但其實我們想盡量餵人奶。見 Jayson 對吃人奶並不落力，便怪罪於 NUK 的奶嘴。因為 NUK 的奶嘴，不用力吸啜也會自然流出。

後來聽熙爸說，Chu Chu 的奶嘴設計上模仿母親的乳頭，而且用得在 NUK 的奶樽上！其實模仿母親乳頭的還有很多其他牌子，而外形有些模仿得更好。但我不想浪費家中的 NUK 奶樽，所以便立即走到吉之島去買。$98 三個，並不便宜。

Chu Chu 的奶嘴有兩個特點。第一，要用力吸啜才會有奶流出；第二，用力的位置比較後，比較近似母親的乳頭。自己試過，真的要很好力！

用了兩日之後發現有個問題。奶嘴的回氣孔用不上，因為始終奶嘴環蓋不同。不能回氣，便會吞下很多空氣。

有見及此，便再走到吉之島買 Chu Chu 的奶樽。Chu Chu 的奶樽很貴。普通的膠樽也要六十幾。玻璃樽（$80）又太重。有隻用 PPSU 做的膠樽（$80），據報不含環境荷爾蒙，或內分泌擾亂化學物質。雖然貴了一點，但仍買了三個試一試。

果然奶嘴環位置有不同，回氣孔才用得上。再經自己測試後，Chu Chu 的奶嘴環蓋是放得上 NUK 的奶樽上！而 Chu Chu 是有淨奶嘴環蓋賣，還只是$15一個！

之後便買多六個嘴和蓋配合 NUK 的樽使用。但如果要再買奶樽，我一定會買 Chu Chu。如果不是看過 Chu Chu 的，我也沒發現NUK 內部原來是很花的。


~ Lindberg

P.S. Jayson 昨天挑戰5安士失敗，獲利回吐。不過都是怪我掃風掃得不好（零晨四點掃風是一件很疲倦的事情，掃到瞓著…）。


P.P.S. 白雪的奶樽分享

乜水豆腐

上星期行開 Apita，見到有日本豆腐減價。見佢十幾蚊（叫做平咗），講到用北阿爾卑斯山脈泉水制造，口痕痕就買盒返屋企試下。

（就快過期所以有得減！）

阿爾卑斯山脈泉水…即係都算係山水豆腐啦。入面有有埋一包汁料，一開就有凍豆腐食。

食得！

質地同我地食開嘅軟豆腐好唔同。好綿，有豆味。汁料味道都好配合。賣相好，而且營養豐富。作為一個方便嘅前菜都唔錯。



~ Lindberg

我們的第一次：掃風篇

還記得第一次為 Jayson 掃風，掃了幾下便聽到沉沉的打嗝聲。那種成功感是可以說是前所未有。（或者是表示我在其他事情上，從未成功過…很灰… ）

掃風是為了防止嘔奶的情況。因為寶寶吃奶時會把空氣一起吃進去，而這時的胃與食道之間的活門仍未發展良好，當氣越來越多，便會把喝下去的奶一並嘔吐出來。正所謂前功盡費。所以掃風是十分重要的。

掃風大致上有兩個方法：坐姿和肩式。坐姿是把寶寶抱直坐在腿上，用手托住寶寶下巴，寶寶身體往前。肩式是將寶寶抱直，臉轉向一邊，下巴靠在大人的肩膀上。兩者都是由下往上（據聞由上往下都可以）輕拍或摩擦寶寶的背部，直至聽到打嗝聲為止。

對住 Jayson，我大部份時間都會用坐姿。但如果不行，我便會用《四合一方法》。坐唔得用肩，肩唔得用轉，轉唔得便用 Joy 姨姨教的上下抖動。我覺得重點是坐得要直。

掃得不好，除了有機會嘔奶之外，風在小小的胃仔內亦會令寶寶很不舒服。而氣除了可以從口出之外，亦可以變成屁屁，從下面排出。但我覺得盡可能便從口出。否則要經過腸道，可能會不舒服。

吃飽飽，掃完風，舒舒服服的 Jayson 還會以表情表示他的滿足。

但最近我發現有時一次過給他吃太多，會特別難掃。他可以一次過不停吃三安士。如果吃一安士掃一次好像比較容易。

其實第一次餵奶掃風都是硬著頭皮。但自自然然做得好。我叫這個現象做「識洗洋芋的猴子」或「第一百隻猴子效應」。

http://www.cmtc100.com.tw/new/newscontant.asp?Index=27

我很喜歡用這個去形容一些明明自己是不懂，但自自然然會做得到的事情。



~ Lindberg

爸爸強壯的臂彎

Jayson，爸爸的臂彎好瞓嗎？好瞓便要多謝 Ken 叔叔啦！

爸爸的臂彎這麼好瞓，要多得 Ken 叔叔的禮物：枕頭仔一個！

起初我以為這只是一個普通（Chickeeduck）枕頭仔一個。後面有兩條帶，摸不著頭腦有甚麼用。昨天在自己洗白白的時候，突然想起它的作用。兩條帶或是用來穿在臂彎上。爸爸強壯的臂彎立即變成舒服的枕頭！多謝 Ken 叔叔。

但雖然我有強壯而又舒服的臂彎，很明顯不及睡在媽媽身旁般開心。

註 1：雖然爸爸的臂彎很舒服，但我希望盡量不要抱慣 Jayson，否則之後的日子便很難過。

註 2：平時當然不會給 Jayson 跟大人一起睡。只不過昨晚 Jayson 扭計（後來發現原來三安士不夠飽！），媽媽太疲憊，早上在床上小睡，我才把 Jayson 放上去。

註 3：衫仔是 Sophie 嬸嬸的禮物。著得 Jayson 幾靚仔！


~ Lindberg

每日早晨的開始：祥興咖啡室

上星期因為每日一早便要到跑馬地的養和醫院，所以都會來到《祥興咖啡室》吃個早餐。

祥興咖啡室
地址 : 跑馬地奕蔭街9號地下
電話 : 2572 5097

祥興是一間很舊式的茶餐廳。可能是在跑馬地的關系，經常有名人出入。牆壁上都掛滿一幅幅名人的簽名。

早餐先來一杯奶茶。茶走不錯，香滑無渣。我不太喜歡過濃的奶茶，有茶末的會令我有「鞋」口的感覺。而它的凍奶茶就如一般的茶餐廳一樣，被冰沖淡了，所以比較差。

食物方面，質素有點參差。一天有個暖暖的波蘿包，但一天就來個凍冰冰的火腿通粉。很難說合不合格。

之後有一日走去食午飯，聽 Ardy 介紹食豬扒蛋飯。碟飯一到，就發現出事！唔記得 Ardy 會食洋蔥！雖然有洋蔥（有個「蔥」字的我都不吃），但碟飯都算不錯。洋蔥汁帶甜，洋蔥本身炒到很甜，豬扒亦很嫩。

我覺得每間茶餐廳都有它自己的文化，它的靈魂。四周的環境、小二的態度、食物的種類等，建立一班忠實的食客。食物質素很多時都是其次。
食物質素可能不可以保持一定的標淮，小二未必能次次都當你是上賓，但我會覺得這些一點點的不完美，就是那間茶餐廳的性格。亦都因此而造就下次再光臨的原因。



~ Lindberg

可卡因包裝工場

這幾天，我都發覺自己像活在可卡因包裝工場一樣。不停把一定分量的奶粉放進「快速上彈器」之內。

記得第一次開奶，用奶粉罐內的殼，把奶粉直接倒進奶瓶裡去。因為 Jayson 哭著要食奶，所以手忙腳亂，倒到一枱面都是粉。之後記起有一個裝奶粉的容器，方便倒奶粉之用，我便稱它為：「快速上彈器」。

用了「快速上彈器」之後，再沒有倒到一枱面都是奶粉。但當為「快速上彈器」重新「上彈」時，枱面難免有些少奶粉。心想如果當這些是可卡因，用卡紙掃成一行，然後吸進鼻子裡。內有 DHA、Taurine、各種維生素及礦物質，直接上腦，一定非常有益… （湊仔湊到傻咗…）

因為發現 「快速上彈器」是個不能缺少的物品，所以買多一個。多一個之後便發現更加好用。因為 Jayson 每餐吃完人奶之後都要補奶，所以一個就裝上兩安士作補奶之用，另一個就入三安士夜晚食奶之用。簡直是完美呀！對嗎，Jayson？

（阿仔做乜強顏歡笑呀？阿爸講錯甚麼嗎？）



~ Lindberg

我們的第一次：洗白白篇

「吓？我洗？乜唔係阿媽（外母）洗咩？」

原先以為自己只是負責開水替 Jayson 沖涼，誰知原來是自己一手一腳處理。腦海中一片空白，完全忘記了上堂時學過的步驟。硬著頭皮去幹吧！

先洗頭。好似好舒服喎。先生，個頭有無痕呀？

再洗身。開始有點手忙腳亂。Jayson 喊到拆天。

來個高難度轉身！又乖乖無喊喎。成隻燒豬仔一樣。哈！

哥哥也走來看看有甚麼可以幫忙。（我很相信阿威不是想自己沖涼。）

沖完之後，我很明白為甚麼熙爸會堅持自己為熙熙沖涼，而不假手於爺爺嫲嫲或工人。沖涼這是個難得而又不可缺少的親子活動。

後來發現浴室的枱面實在太過亂，所以立即走去 Muji 買了一個架，向高空發展。現在整齊得多！

~ Lindberg


P.S. Jayson，對不起，放了您全相上網。不過放心，已經少過在《色戒》中的梁朝偉了！