2007 年自家事回顧

首先睇番 2007 年頭為自己定嘅目標，發現非常出事。

5：吹好小號，每星期都要練習。要吹到高音G！
唉… 年中開始停課，一停就練習都冇埋。懶到出汁。不過高音 G 有時都去得到。好想阿仔快啲大，可以同我一切練習。有個伴會勤力啲嘅。

4：寫好本書的其中兩章。
寫過鬼！不過 blog 就有成日寫。有朋友話好想好似我咁，當日記咁寫，不過就冇時間。我以前打中文慢，就真係冇乜可能做到。不過經過訓練之後，加上寫慣咗，都唔係好嘥時間。而且我真係可以當睇日記咁睇番自己，都幾好呀。

3：放多啲心機落公司到。希望搵到突破，如果唔係…
…就大鑊啦！好彩今年年尾公司都有啲轉變，明年年初繼續。希望會好玩啲啦，唔係阿仔就冇飯開啦！嗚…

2：保重身體。身體唔健康就無能力照顧周圍嘅人。
都算保得重。不過成日周身痛，又坐骨神經痛，都幾麻煩。

1：最重要都係…令身邊嘅人開心。

咁要問我身邊啲人先知啦！嘻…

其實睇番今年，真係好似冇乜特別野做過。買咗三部相機（GX100，40D，F50fd），去咗名古屋旅行，睇咗兩套好鐘意嘅卡通片（穿越時空的少女、秒速 5 公分），玩 facebook，坐骨神經好鬼痛，JA 告一段落，愛上 YUI 而同時失去了 ZARD，食咗好多好多野入肚，睇咗兩本小川洋子同埋幾本村上春樹，統治地球嘅計劃比軍曹嘅更加緩慢，仲有電咗個頭！

好似漏咗一樣好重要好重要嘅野…啊！生咗個 Jayson 仔！哈！

都係時候定一下明年嘅目標啦。



~ Lindberg

Jayson 笑笑樣

Jayson 最喜歡跟媽媽說話。一跟他說話，就會自自然然笑過不停。

不過每次見 Jayson 的樣子那麼得意，我都非常擔心。正所謂兒時可愛，大時丑怪。爸爸正是一個好例子。大個之後沒有女孩子喜歡，Jayson 會不會怪我呢？




除此之外，亦很擔心在他懂事之後，不會讓我像現在般錫錫他的蛋臉。雖然只是過了兩個月，已經很想 Jayson 永遠都停留在這個時刻，永遠都是爸媽的小寶寶。

忽然令我想起之前看過櫻杏子的一篇做媽媽的矛盾。養兒一百歲，長憂九十九。



~ Lindberg


P.S. 但亦要感激 Jayson 這張可愛臉，每次出街街都有很多女孩走來逗他玩。雖然受歡迎的是 Jayson，但爸爸可以沾一點光已經覺得很不錯。嘻嘻嘻…

一日食兩餐自助餐

先來一客自助午餐：

萬麗海景酒店咖啡座
灣仔港灣道1 號萬麗海景酒店閣樓
2802-8888 Ext 6970

再來一個自助晚餐：

Cheesecake Cafe
九龍灣宏照道38號企業廣場5期MegaBox L5 505號舖
2629 5008

月頭開始就想訂 25 號食自助午餐。因為唔想 24 號晚同人迫，而且下午同 Jayson 出街都方便啲。打咗好多個電話，所有大酒店嘅自助餐都滿晒。唯獨是萬麗海景酒店咖啡座有位。可能因為呢到要專登親自提早嚟買飛嘅關系。

$398 一位。老實講，聖誕節價錢想食到回本應該無乜可能。但係呢到嘅食物質素都好好。四款魚生好新鮮，生蠔好正。大螺都係第一次食，好厚肉同鮮甜。熱葷都唔錯，有火雞同火腿食，非常應節。整咗碗米線，米線太生，不過個魚湯湯底好甜。甜品又好正，我食咗一碗楊枝甘露、一球 Häagen-Dazs 雪糕甜筒、鮮果薄煎餅、同好多其他。我睇係我食得最多甜品嘅一次。

除此之外，仲有個好瘦嘅聖誕老人派禮物，每人都有個薑餅人。食得好飽，好開心！

而夜晚又食自助餐，全因識人有得平嘅關系。不過其實到依家我都唔知要俾幾多錢。

今次係我第二次嚟 Megabox。原來呢間 Cheesecake Cafe 都有幾個間接識嘅人喺入面做。好似話做甜品都有成五個師傅。但係老實講，唔係做開自助餐嘅餐廳走去做自助餐，食物質素始終比唔上酒店。唔係話用料唔夠好，而係人地日日咁做，安排食物上會做得好好多。而食自助餐最怕就係啲野食唔夠靚，所以經驗上差啲啲，食物個樣就會差好遠。

每樣食物都食咗少少。都算可以啦。而甜品就食多兩件，話晒啲芝士餅件件都真係真材實料呀嘛。

25 號晚呢到唔係好滿。六七成左右，仲唔計用咗小半個廳做自助餐枱。可能係 25 號晚比較靜嘅關系，又或者係收得貴啦。
你估下，連續食兩餐自助餐嘅後果係：

A) 神情呆滯
B) 發誓以後都唔食自助餐
C) 從此唔敢磅重
D) 第二朝起身勁肚餓
E) 以上皆是

答案當然係 E) 啦！哈哈哈！



~ Lindberg

對唔住呀，阿威！

今日一早帶阿威去愛護動物協會打預防針。見好似好耐無俾啲時間阿威同阿妹，雖然阿威唔鐘意出街，都算係兩仔爺活動。我唔會大細超，淨係錫 Jayson 嘅！而且，打預防針都係為阿威好之嘛。點知…

準時去到愛護動物協會。好多人…應該話好多狗。小貓真係得一兩隻。阿威好細膽，好驚驚…

得咗大概半個鐘，終於到我地。姑娘問我攞針卡，佢一睇就話：「先生，二月先打喎，唔可以提早打。」乜阿威唔係逢十二月打針咩？！

後尾威媽先同我講番，舊年我掛住玩 JA，到二月先有時間同阿威去打針。所以變咗二月。

對唔住呀，阿威！無啦啦要你出街嚇餐矇。係我唔啱啦！我冇心㗎！你今晚唔好唔幫我暖被窩呀！

「你梗係冇心啦！冇心肝呀嘛！」阿威話。



~ Lindberg

我的冬天記憶

中 wingwing 嘅 tag 呀！

玩法：到 http://green.sina.com.hk/game 選擇十項冬天回憶。
完成後，將Blog Part 放在文章或Sidebar。
到這裡，將那十項回憶的文字放到 Blog 中，再加上自己感受。

個遊戲入面都有好多選擇，以下10個就係我最喜愛的冬天記憶：

1) 熱維他奶
咁多樣野，第一眼就睇到支維他奶。以前讀書，最鐘意小息跑去小食部，買支熱維他奶同埋一包乾到哽死人嘅炒米粉。

2) 羊腩煲
除咗羊腩煲，我仲諗起蛇羹。不過蛇羹係秋天… 但係蛇羹又明明係凍先想食喎…

3) 海豹
好耐之前去過美國嘅 Sea World。買咗一隻白色海豹仔公仔，個樣好傻。自始之後就好鐘意海豹。

4) 臘味飯
無冬天又何來臘味呢？以下採錄自《維基百科》：
「中國製作臘味的歷史已有兩千多年之久。自古以來，農曆12月就被稱爲"臘月"，而這個月份天氣寒冷，肉類不易變質且蚊蟲不多，適合製作臘味，有人認爲臘味之"臘"即來源於此。中國人還喜歡準備臘味過年。」
不過淨臘味飯我就麻麻地，如果係臘味糯米飯就唔同！

5) 冷手套
細個好想有對手套。但係我以前手汗好勁，戴手套會搞到手套濕晒。唔戴仲大鑊，變成雪條手。真係慘痛嘅回憶。

6) 冬天呵氣
以前覺得好得意。仲會同同學仔鬥呵得勁。不過如果無擦牙就唔好玩。哈！

7) 棉被
冬天加一張棉被，人類都要冬眠啦。好想瞓呀…

8) 棉納
記得小學時期，見到有幾個同學因為「怕凍」，所以家長幫佢地申請著棉納返學。而我正是人有我有嘅人，所以好想好想要件棉納。不過記憶之中，奸計好似得唔到呈。要過咗好耐之後先得到我第一件棉納。好暖呀…

9) 孝子
除咗《臥冰求鯉》嘅王祥，我更鐘意《扇枕温衾》嘅黃香。因為我屋企都有個會温衾嘅黃香，就係阿威。冬天暖被窩，冇阿威又點得呢？

10) 虧佬褲
虧佬褲咁耐好似真係好細個嗰時先著過一兩次。雖然依家唔覺自己唔虧得去邊，不過要著兩條褲都有一定嘅難度。而且一入到室內，又無可能除面褲，或者唔除面褲而除到虧佬褲，真係可以幾大鑊呀。



~ Lindberg

母乳教學

早前因為餵人奶並不順利，經朋友介紹請來一位護士姑娘上門指導一下。我覺得這位姑娘真的可以稱為「現代奶媽」。

第一次見姑娘，她給我的感覺有點像麥玲玲。她先給我一張咭片，頭銜很長：英國註冊護士、註冊助產士、澳洲護士學士、愛嬰醫院香港協會嬰兒餵哺母乳證書（聯合國兒童基金會）。

首先她問 Jayson 媽在餵哺時遇到的問題。然後便要身體力行，餵 Jayson 吃奶。餵奶之前，姑娘用熱毛巾去熱敷乳房，然後出力地為她按摩。 之後便埋身餵。Jayson 尚算合作，不斷轉換位置也不會太過扭計，但可惜到最後都不太成功。

姑娘說問題出於 Jayson 身上。舌頭比較短，所以會咀型不太理想。要繼續訓練 Jayson 去正確地吸啜，才會令乳房出得更多乳。

過了一兩個星期之後，姑娘打電話給 Jayson 媽問近況，並在電話中解答問題。很不錯的「售後服務」呢。因為埋身餵實在太過難，每天只會於清早時餵一次，其餘的時間會用泵去吸出來。但吸出來的，合起來都只夠吃一餐半餐，不夠的還是要用奶粉代替。Jayson 還真的頗大食。現在有些時候可以吃五至六安士！但姑娘仍然鼓勵埋身餵。

護士姑娘每小時收費 $500。多數都是一兩小時就可以。除非太遲找她，那麼她可能要花更多時間去按摩，或者需要另外一天的時間去跟進。雖然收費並不便宜，但經過姑娘指點之後，對母乳餵哺有更深入了解，而且對此的壓力亦減少了。現在出母乳的情況都有些少改善。

回想起來，發覺之前在養和醫院之前母乳餵哺班，如同廢物。因為產前上的沒有實習，而且每位媽媽和嬰兒都有不同之處，不能一概而論。所以覺得有點被養和騙了 $400 的感覺…



~ Lindberg

Jayson 的第一個聖誕節

很多年沒有在香港渡過聖誕。之前都會回家探爸媽，或兄弟姐妹相約一起去旅行。今年因為 Jayson 還小，所以留在香港。雖然如此，但節目更加豐富，亦是挑戰 Jayson 的耐力的一個機會。

12月23日
先來殘叔叔這個聖誕老人。專程來送禮物給 Jayson。

然後約了兩組 MBA 的同學。下午先到港島西的摩星嶺，然後晚上再到元朗那一邊。真的可算是長途拔涉。

我們發現 Jayson 很喜歡坐車車。喜歡在於一開車便乖乖睡覺覺，可能是搖來搖去的關系。而我就正好表演車手的這個角色。

Jayson 逗得嬸嬸們很高興，除了笑和講 BB 話之外，還表演一個傻傻的「O」型咀。很好笑。

去完兩個同學的家之後，不知道 Jayson 會否覺得自己的家很細小。

12月24日
原本想一如往年，一家人在家中吃個便飯。除了不會花太多錢之外，亦可以跟兩隻貓一起歡渡佳節。但踫巧是 Jayson 爺爺的農曆生日，所以便選了一家上海店吃晚飯。

晚飯過後便各自回家。我們的平安夜並不算太過平安。Jayson 還是要扭扭計計。可能昨天出街經常要抱的關系，不知道是否抱慣了。放在床上很容易醒。

而我們自己慶祝聖誕節的方法，便是來一個朱古力火鍋。雖然 Jayson 媽不能吃朱古力（因為要餵人奶），還是偷偷地吃一次吧。「火鍋料」有士多啤梨和鳳梨，都幾好吃。但可能因為我貪方便的原固，用微波爐去溶朱古力，朱古力不是溶得太好。都是應該花點時間用水去燉。

聖誕節沒有買禮物給對方。就連 Jayson 也沒有禮物。最好的禮物，應該是我們一家人健健康康吧。

12月25日
這是我很期待的一天。我約了 Ardy 叔叔兩公婆一起到萬麗海景酒店的咖啡座去吃自助餐。很久沒有吃過自助餐了。之前 Jayson 媽要戒口，很多東西都吃不得。現在可以不顧一切，盡情地去吃。而我更早已忘記身段，豁了出去。

Ardy 叔叔抱抱 Jayson，一時間也雞手鴨腳。哈！

而晚上又是另一餐自助餐。因為識人的關系，我們到了 Megabox 的 Cheesecake Cafe 吃特
價的自助晚餐。真的是：「食食食，食懵你。」

Jayson 還表演「O」型咀助興：

12月26日
今早見 Jayson 很精神，於是便跟他玩。昨天從舅父那裡拿了一張表姐以前玩過的玩具墊。Jayson 可以臥在墊上玩上面釣著的玩具。Jayson 不知玩得幾開心。不停跟太陽伯伯說話。哈！

「太陽伯伯，太陽伯伯，你去咗邊，你去咗邊，快啲快啲出嚟，快啲快啲出嚟，照著我，照著您。」

下午有 Jayson 媽的同事來探訪。帶來很多朱古力和日本士多啤梨。可惜 Jayson 媽不能吃朱古力。再來一次朱古力火鍋！今次隔水燉，效果好好多。

12月27日
今天到母嬰健康院作發展評估。一切正常。身高57厘米，體重5.21千克。Jayson，您要快高長大，健健康康呀！

~ Lindberg

傷風定感冒呢？

早前因為喉嚨唔舒服，不停咳嗽。怕係傷風感冒，會傳染到 Jayson 或 Jayson 媽，於是就及早去睇醫生。醫生話可能係傷風，又可能係感冒。因為我太早去睇，症狀未出齊，好難斷症。見我話屋企有BB，就開晒抗生素同流感藥過我。原本我都好唔鐘意食抗生素，但為咗唔想傳染其他人無辦法啦。

除咗隻抗生素，隻流感藥原來係用口吸服，我都從未試過。醫生親身示範一次，佢又真係吸入去喎！之後睇番說明書，隻藥有少少似有病醫病，無病強身。如果無打流感針，都可以頂得一下。不過佢當然寫話唔建議啦。

好似少少病，要食咁多藥好似好誇張。不過食完三日藥之後又真係好似好番晒喎！希望唔好再病啦…



~ Lindberg

傷心的聖誕前夕

今朝落街返工，見有一班人圍觀一個女人。女人坐嘅地下，見一行鮮血，一點點由馬路旁伸延到行人路中心佢坐嘅位置。開頭我以為個女人受咗傷，行近啲，見佢抱住一頭玩具貴婦狗。原來係狗狗出咗事。

見現場環境，狗媽媽有兩隻狗，似係其中一隻走出馬路俾車車親，返魂無術。狗媽媽坐喺地下，哭不成聲。四周嘅人都付以關心同慰問。但係其中有人亂咁講野，叫狗媽媽唔知點樣去處理隻狗。雖然出於好心，但只會令狗媽媽更傷心。當中另一位自稱都有養狗嘅太太立即飛前，叫其他人唔好亂咁講，佢自己都有養狗，最明白狗媽媽嘅心情。之後是就上前俾紙巾俾狗媽媽抹眼淚。我都覺得只有「真正」養過寵物嘅朋友，先會明白對方嘅心情。唉…

身為路人甲嘅我，都不便八掛，繼續上路。

其實養小動物就有呢樣唔好。永遠都係白頭人送黑頭人（不過掉轉其實仲慘）。記得 Lucky 因為腎病仙遊嘅時候，我都唔開心咗好耐。希望呢位媽媽都唔好太過傷心啦。

祝各位寵物爸爸媽媽，聖誕快樂，仔仔女女身體健康。


~ Lindberg

聖誕快樂

各位親愛的朋友，聖誕快樂！

（每年幾間舖頭都會搞比賽，佈置得最靚會有獎。見佢地都裝飾得幾落力呀。）

而今年我最鐘意嘅聖誕歌，應該係呢隻。好好笑！嘻…




~ Lindberg

Jayson 愛爸爸

Jayson，我知您好愛我。但您寫到這麼清楚，爸爸會很難為情啊。

「爸爸，件衫好似你買迫我著嗰喎…」

Jayson 仔塊豬豬面令我諗起近排一個很有趣的廣告。軟…嫩…滑…




~ Lindberg

又喊又笑

Jayson 仔，是不是媽媽幫您改錯名？整天又喊又笑。我們真的要叫您一聲：「琛哥！」（如果不知道誰是琛哥，請看《無間道》。）

Jayson 的燒總算退得臣八八九九。然而晚晚仍然繼續喊和扭計。我看這就應該是所謂的「百日哭啼」，或西方叫的「Colic」（絞痛）。

絞痛的真正原因好似不太清楚。但大概是因為肚子痛、肚風、牛奶敏感或是胃酸倒流。如果有這個現象的話，過了十二、三週時，哭啼就慢慢的好了，可能是跟腸胃的發育有關。所以叫做「百日哭啼」。Jayson 就快兩個月大，希望時間過得快一點…

問過醫生，雖然有藥物可以幫助緩和絞痛。但她並不建議。如果大便沒有問題，也不需要轉奶粉。可以的話，最好用手跟他的肚仔按摩。用一點護膚油，順時針的打轉，幫他排出腸內的氣。除此之外，奶咀、搖床、帶他出街坐車走一轉，都有幫助。

除此之外，我們發現紅色的金魚，最能令他開心。

這隻是用利是封做的金。婆婆說 Jayson 的表姐很喜歡看紅色的東西，所以我們又試一試。誰知他真的十分喜歡這條魚魚。他會跟魚魚笑，又會對著它說 BB 話。樣子十分搞笑。莫非他跟爸爸一樣，十分喜愛紅色？

幸好每晚都有這麼一段的歡笑時光，否則如果每晚只有哭啼，對父母的壓力真的很大。

而掛著這條魚魚的，其實是哥哥和姐姐的玩具。正好姐姐走過來抓一抓，令魚魚游來游去，使Jayson 看得更加入神。這是否照顧細路的一種表現呢？哈哈！

~ Lindberg

打針針後記：康複中

康複中的 Jayson：

鬼靈精！

「來野」中的爸爸：

唉…又病。今次真的不知道病甚麼。不是傷風感冒，有點像是氣管敏感。唉…

我發現吹少了小號，氣管好像弱了…



~ Lindberg

Freshness Burger

這間日式連鎖快餐店聞名已久，不過都是前幾天才有幸光顧。

Freshness Burger
銅鑼灣皇室堡110號店

一見到餐牌，都唔知食乜好。見其名，就叫咗個 Freshness Burger。因為餐牌寫得唔係太清楚，我估計跟 Mos Burger 嘅差唔多，所以隨便同收銀員話要跟餐。佢問我係唔係想跟薯角同氣水。我話好呀。然後佢又問我要唔要加大。突然其來嘅「加大」，令我有點不知所措，為免麻煩，便是但叫佢加大。埋單 $48！都幾貴…

Freshness Burger 頗細，近乎好細。好彩叫佢加大薯角同氣水，唔係唔夠飽。雖然話加大，其實都唔見大得去邊，同老麥嘅中 size 差不多。有點被搵笨嘅感覺。

食落個包又唔錯。Freshness Burger 其實即係肉醬漢堡加塊蕃茄。個包好好味，非常的軟熟。好多生洋蔥，原本以為自己死梗，不過又唔會太辣太難食喎。係真係細少少同貴多多囉。唔怪之得午飯時間都無乜人啦。


~ Lindberg

打針針後記：衰咗

如圖。唉…

~ Lindberg

打針針

今日到醫生診所打第二次預防針，第一次是剛出世時打。

打前：

今天總共打兩支針，六合一（白喉、百日咳、破傷風、小兒麻痺及乙型嗜血桿菌之外，還多添加了B型肝炎）、肺炎鏈球菌疫苗、和一劑輪狀病毒疫苗口服液。正所謂：「唔怕一萬，最怕萬一。」要打預防針都是這個理由，所以有理無理，一次過全部都打。Jayson，您要乖乖呀。爸媽都是想您好嘛。

打後：

打的時候喊了兩聲很大聲，不過很快就沒事。Jayson 好叻好勇敢！但另一邊箱的媽媽反而哭得更厲害…（有點懷疑醫生有沒有打錯落 Jayson 媽的手上。）

希望 Jayson 不會發燒啦。醫生說現在的疫苗很好，發燒的機會比較細。十個有九個都沒有問題。不過她還是給我們退燒藥水。希望不需要用吧。

在這個醫生裡打都幾貴，$2,480。不過她是 Jayson 一出世便睇開的兒科醫生。令我們安心就好了。醫生還跟 Jayson 檢查磅重。有 11 磅半啦！比哥哥還要重半磅。難怪最近抱阿威，感覺好像輕了。



~ Lindberg

自家製意式蕃茄湯底打邊爐

我覺得最好味嘅打邊爐蕃茄湯底，一定係謙記。譚魚頭嘅都唔無咁好。而今次係屋企自己做嘅湯底好簡單。無魚頭、無牛腩、等等。有啲似自己餐廳嘅蕃茄汁，當然蕃茄汁用料多好多，不過做湯底都好好味。

材料：
蕃茄肉一罐
清雞湯一盒（375毫升）
洋蔥半個切件
蒜頭兩小粒切片
羅勒葉（Basil）數片切絲
水

做法更簡單。先炒香洋蔥蒜頭，但係唔好炒燶，再落蕃茄肉同清雞湯。加水到適當位置，以我個份量，大約一倍水。水滾後收細火煲十五分鐘。之後落羅勒葉，就可以上爐打啦！

我用嚟打牛肉，勁好味！今次無買海鮮，但係丸呀水餃呀都可以。手痕買咗盒小肥羊羊肉片。太過羶，自己都頂唔順。之後用啲橄欖油同迷迭香醃一醃，好少少…

而最好味係我臨尾得番大約一半水，我落咗一杯意大利 arborio 米落去煮，大概要煮十五分鐘。勁勁勁好味！啲米吸晒啲湯，加上意大利米比較硬身，唔會咁易煮爛。煮出嚟綿得嚟有咬口。同用嚟做煲仔飯嘅一隻泰國香米嘅口感有啲似，好彈牙。比起落粥落飯去吸好好多，唔會太過滯。


~ Lindberg

P.S. 如果第二時有火鍋店學我用意大利米，大家要記得係我做先呀！哈哈哈！

整頭髮送叉燒燒肉飯

幾經辛苦，終於說服到約翰幫我做個新髮型。 每當悶悶地，我都好想攞個頭嚟「較飛」。嘩哈哈！

「我仲等緊剪頭，要遲啲返。Jayson 無扭計呀嘛？」

「仲等？好多人呀？」

「唔係，已經做緊啦…」

「啊…你染髮呀。唔緊要啦。」

「Err…唔係染呀…」

「嘩！你個核突佬呀！走去電髮呀？唔好返嚟呀你！」

「嘻…」

約翰問我之前有無電過。我記得小學時期電過一次。幫我剪髮個姐姐話我啲頭髮好硬，次次都剪到手軟。於是阿媽就叫佢試下電一電，睇下會唔會好啲。有無好啲我唔記得，但係個頭就真係好想死…

其實我想電一電佢都有原因，因為近排同 Jayson 一齊吹波式增肥，所以唔敢剪短啲頭髮。諗住如果電一電，咪唔覺塊面好肥囉。嘻…

落完電髮水之後，約翰問我洗唔洗食午飯。開頭我以為好快，原來剪埋要成兩個鐘！於是就麻煩佢幫我買個飯盒。我話佢食乜，我食乜。之後佢買嚟大大盒嘅叉燒燒肉飯同可樂一罐。原本佢話請，我當然唔肯啦！

好懷念呢陣電髮水味。多年前係咁嘅味，依家都係咁嘅味。

電完之後個樣？一個字：「勁！」哈哈哈！多謝約翰！


~ Lindberg


P.S. 好彩之後都返到屋企…

陪媽媽覆診

昨天跟 Jayson 陪媽媽到大夫裡去覆診。想帶 Jayson 去見大夫，是因為是大夫抱這個健康小寶寶給我們，所以很想給他們見一見面。

最近 Jayson 不知不覺「染上」了吃奶咀的習慣。起初我們用奶咀，是想控制他進餐的時間。但發現他很喜歡吃奶咀。媽媽更笑說有點像吸毒的感覺。在的上很用力地吸，吸到面仔都有個印。哈！

媽媽檢查一切正常。Jayson 還跟大夫來了一張合照。

之後到茶樓飲茶。其實大人自己食飯是小，找地方開奶給 Jayson 吃是大！

吃飽飯就去了 Mothercare 買衫仔給 Jayson。雖然朋友已經送了很多，但始終還差少少。試過有幾次 Jayson 開「大」太過大（食母乳關系），弄到漏出片片外。差點無衫換！

回家時經過聖誕樹。原本想跟 Jayson 影幾張相，但很大風，而且他睡到不醒人事，所以算了吧…

~ Lindberg

架勢堂無聊IQ題

無聊得嚟又幾好笑。有啲真係要高智慧先明。（Highlight 反白睇答案）

Q：咩野要掉落水 4 次先會俾水沖走？
A：雀仔（有隻雀仔跌落水 跌落水 跌落水 有隻雀仔跌落水 被水沖去）

Q：黑貓同白貓一齊過馬路。白貓俾車撞低，咁白貓會同黑貓講既第一句說話係咩呢？
A：喵 ~

Q：一個女人去隆胸醫生話 : 兩個要1 萬蚊。跟住個女人話太貴，隆1個，問要幾錢。醫生答咩？（估成語）
A：一波三折

Q：牛驚咩植物？
A：葉（牛（怕）葉）

Q：有咩島唔係四面環海，除左安全島之外？
A：吉之島

Q：咩植物識溜冰？
A：花 （花（識）溜冰）

Q：皇后似咩？
A：廣場（皇后（像）廣場）

Q：有一塊火腿同一條腸仔放左落同一隻鑊度，點解佢地唔傾計？
A：因為佢地未熟

Q：讀完中五讀乜？
A：讀下午

Q：點解唔可以係船上講笑話？
A：因為個海聽到會笑，咁就會引起海嘯。

Q：食乜野昆蟲會瘦？
A：蟻（食蟻瘦）

Q：用身體上邊樣野可以修飾雙手？
A：毛髮（毛髮可修飾的一對手）

Q：機械人最鍾意扮咩？
A：扮焦。

Q：1+1 幾時會等於 3 ？
A：錯個陣。

Q：去小明屋企禁極門鍾佢都唔開，最後講左一句乜小明先去開門？
A：我來自德成。

Q：樹邊部份最得閒？
A：葉（葉德嫻）。

Q：達文西密碼上面是什麼？
A：達文西帳號。

Q：世界上最貴既係咩菜？
A：巴菜（隊波呀）。

Q：食得檸檬多會傷架喎，傷咩呀？
A：傷心囉。

Q：豬肉榮賣豬肉，菠菜蓮賣菠菜；咁衛蘭賣咩？
A：My love my fate…

Q：鯊魚食左紅豆會變咩？
A：紅豆沙（鯊）

Q：檸檬最怕咩生果呢？
A：柑（柑橘檸檬）

Q：小明自己做暑期作業，第二日，佢死左 , 點解 ?
A：因為自作業，不可活。（小朋友，唔好用呢個借口嚟唔做功課呀！）

Q：如果有日你同你女友分手，因為佢移情別戀,同個醫生拍拖。你好鐘意你個女朋友…咁你就日日都送左一樣野比個醫生，希望醫生可以離開你個女朋友。咁係送咩呀？
A：蘋果（一日一蘋果.. 醫生遠離我！）

Q：有咩動物係會撕死條鰻魚呢？
A：蛇（佘詩（撕）曼）

Q：話說清朝時，慈禧太后一直都想長生不老。於是命人研製長生不老的靈丹，卻失敗。後來有個外國使者帶埋長生不老的靈丹拜訪，慈禧太后就問佢靈丹用乜整嘅。咁你估佢點答？
A：佢話：「LONDON BRIDGE is falling down(for 靈丹）！」

Q：1隻雞，1 隻鵝，1 隻鴨，分 3 支汽水，點解分唔勻？
A：婀娜多姿（鵝攞多支）

Q：魚旦粉有魚旦，牛腩粉有牛腩…咁咩野粉有雪糕呀？
A：Seven（7-11）

Q：小明綠燈過馬路，點解最後比車撞死 ?
A：明明綠燈轉眼變成紅燈…（鄭融隻歌）

Q：巴斯光年殺左條龍，後世人幫佢改左個花名…知唔知係咩？
A：撒（殺）龍巴斯

Q：流星花園首主題曲叫流星雨，咁陶大花園首主題曲係乜呀？
A：陶大宇。

Q：咩動物識桌球？
A：鷹（英式（鷹識）桌球）

（多謝 Ardy sent 俾我睇！）



~ Lindberg

精神年齡鑑定

以下是我的精神年齡鑑定報告：

Myidk.com鑑定結果
您的精神年齡24歲
與您實際年齡差-XX歲
幼稚度48％
成熟度64％
老化度8％

如我所料，果然係一名白痴…

您的思想及觀念是否與您現在年齡相符？試試一下，看那一個較年輕：

http://myidk.com/age.php

~ Lindberg

您令人難以觸摸

當孩子開始長大，「清醒」的時間越來越多，開始對四周的事物感到興趣。亦因此而很容易感到不安。表現出來的就是：喊。「Jayson 仔，您喊咩呀？」

「係唔係肚仔餓呀？」

「嗚咩咩咩咩咩…」

「係唔係尿濕濕呀？」

「唔咩咩咩…」

「係唔係太熱太凍呀？」

「嘩嗚嗚嗚嗚…」

「係唔係想人陪呀？」

「嗚嗚嗚嗚嗚嗚嗚嗚嗚……」

「係唔係邊到唔舒服呀？掃唔到風呀？叫婆婆睇下…」

「嗚嗚…」

「爸爸，您以為我會咁易俾您估到咩！」

Jayson 仔，您真的很難觸摸呀。

不過話雖如此，我並無因他喊半聲而煩擾過。相反，理解和探索他的需要是一個很有趣的過程。而且他的一個微笑，一個古靈精怪的樣子，已經足夠讓爸媽疲倦的心溶化。

包包面加一個「O」型咀，笑到我流眼水。哈哈哈！

亦都可能是爸媽「對號入座」，我們總覺得當 Jayson 扭計的時候，總會喊著叫「唔啱，唔啱呀…」。都叫得頗準，所以很好笑。



~ Lindberg