威威唔準眼濕濕

威威，尋日見您好攰，又眼仔濕濕喎。係唔係因為見到隔離房個病友唔喺到，所以驚驚呀？唔好驚啦。雖然大家都係有同一個病，不過人地好大年紀㗎啦。您會叻過人地好多好多好多！

定係您以為爸爸媽媽唔理您呀？唔準傻傻呀！我地一有時間就已經嚟陪您啦！您永遠都係我地嘅第一位。我地好愛好愛好愛您㗎。您要堅強呀！好多人都會為您嘅健康而祈禱。快啲好番啦！

好彩今日見妳都精神啲，不過都係有少少眼仔濕濕。您要加油呀！



~ Lindberg

iPod Baby

前幾天買了一部新 iPod，iPod Baby。這部 iPod 跟我以前擁有的 iPod 很不同。不能下載歌曲，不能任意選擇歌曲，聲音不能自由調節。明明有個 iPod 傳統的 dial，但就是怎麼按都沒有作用。其實功能上只有一個…

.
.
.
.
.
.
.
.
.
.

就是讓大家笑一笑。哈！

iPod Baby，喊聲不能跳下一首成為笑聲，大細聲不能控制，不能暫停，更不能隨時進入浸睡模式（Sleep Mode），而且耗電量驚人，每日要充電 5 次，每次 5 安士機械維單A。但具備特快下載速度，並有智能系統，往往做出你意想不到的事。

我覺得設計這些童裝的人非常之惡毒。當我們在那間「雞仔鴨仔」童裝看到這件衫時，Jayson 媽立即跟我說：

「你實買啦（你個低能爸爸）。」括弧中的字，乃是我從她眼神中看出。

於是乎銀包就不見了三百大元。嬰兒的兒服很快不稱身，三百元一件衣服不知可以穿得幾多次。但見它這麼「可愛」，又真的忍不住把它買下來。唉…



~ Lindberg

威威繼續努力！

威威，尋日晏晝見你精神咗，但係夜晚個樣又好攰。係唔係好辛苦呀？您要叻叻呀。醫生都話您好叻叻，雖然尋日個驗血報告未有改善，不過人地都話冇咁快㗎。您要加油支持住呀，一定要好番呀，知唔知？爸爸媽媽會支持您，錫晒您，不停為您祈禱。



~ Lindberg


P.S. 多謝大家嘅關心。呢幾日心裡好痛，兩眼通紅，所以唔多想說話。電話同 msn 都暫時失蹤。唔好意思呀…

口水堅

Jayson 近排開始流口水。起初用紗巾還可以，現在越流越多，所以今天開始跟他戴口水堅。

據聞以前我也流很多口水（雖然現在見到漂亮的女孩還會），Jayson 嫲要幫我戴上兩條（或以上）的口水堅，才可以擋得住「洪水」的沖擊。失禮失禮…



~ Lindberg

威威努力加油呀

威威，您要努力加油呀。我地知您好叻叻，又乖乖。我地好愛好愛好愛您，等緊您返屋企㗎。



~ Lindberg

逃過車禍一劫

今朝喺東區走廊，鰂魚涌對開，一幕交通車禍正正發生係我面前嘅 16:X 擋風玻璃上。其實用幾個字就可以形容晒：經驗不足、互不相讓、胡亂切線、跟車太貼、殃及池魚。而每個因素都出現喺唔同嘅出事車輛上，所以先會炒埋一碟。呀！漏咗一個，「禍根」就「逃之夭夭」…

東區走廊五車相撞1人傷 (星島) 01月 29日 星期二 10:06AM
東區走廊早上發生交通意外，1人受傷。早上近8時，五部車在東區走廊西行近太古城 對開相撞，消息指，1人受傷，送院治理。

我地就好好彩逃過呢一劫。而我可以避過呢一劫，最主要原因有幾個：技術精湛（笑…）、時刻保持警覺同禮讓、果敢及保持「應有」車速、確保與前車有充足距離。但係當然，運氣係好重要。如果我同前面㗎車對掉，我地就做咗池魚。而人地嗰㗎車好明顯硬磳過我架 Civic 好多。佢都俾架貨車剷咗個屁股，我實成㗎飛出東區走廊！好險…

可惜嘅係，雖然「禍根」係正我面前，但事情發生得太突然太快，睇唔到車牌。好彩（應該）冇人命傷亡。

大家道路使用者，禮讓啲啦！



~ Lindberg

阿威…

阿威，您要堅強呀！您係全家最乖嗰個。您一定要叻叻呀…


~ Lindberg

西苑的碗仔翅

今次去西苑食叉燒就麻麻地。唔知係唔係人多嘅關系，味道上好似少咗啲野。不過有新發現，就係個碗仔翅。起初叫碗仔翅，諗住會同街邊嘅差唔多。點知完全唔係嗰隻款，係真材實料嘅雞絲翅呀！

（開頭見冇乜特別，所以冇影相。食完先後悔… 失敗…）

碗野入面當然冇魚翅啦。有齋魚翅同粉絲。不過其實魚翅本身都冇味啦，食都係食佢彈牙之嘛。其餘啲味咪又係個湯到嚟。依家啲鯊魚咁慘，俾我地不停追殺，都係少食為妙。而且齋魚翅都唔算太差啫，個湯底煮得好，都可以好好食。

西苑呢個碗仔翅，十足十紅燒雞絲翅一樣。唔係街邊加麻油如醋嗰隻，湯底好好味，雞絲幼幼一條條游下游下，加埋浙醋，真嘅一樣。$18 一碗，抵啦！食完之後好開心…

Jayson，你幾時識得食呀？

~ Lindberg

Rock Your Baby

睇下 Jayson 幾型！

多謝 wingwing 姐姐！

其實件衫一早便收到，但到現在才穿得上。很型仔呀！穿上這件衫之後，跟之前傻傻樣的感覺很不同。我看我都要換一個外型去襯托一下！

~ Lindberg

不盡責的爸爸

尋日整個晏晝都坐立不安。一放工立即飛返屋企。一開門，就見阿威碗飯冇郁過。阿威，您仲乜又唔食飯呀？

同威媽傾過之後，見佢鼻仔有少少鼻水，可能聞唔到「飯香」，而冇晒胃口。雖然阿威唔鐘意出街，而且天氣又突然咁凍，但係都係決定帶佢俾醫生睇一睇先安心。

「3.2 kg… 之前有成 4.6 kg。嘩！乜你瘦咗咁多嘅？失戀呀？」靚靚護士姑娘問。

「冇失戀呀。失寵囉…」我答。

足足瘦咗三磅有多。個心好痛。

醫生話病徵唔多，最主要問題係唔知點解瘦咗咁多。可能因為瘦得太犀利，抵抗力差咗，先會染上傷風感冒。其實我地都係呢兩日先見佢冇乜食飯。之前我都仲鬧梗佢偷食埋阿妹啲野。最大可能就係多咗個細佬，全家人嘅主意力都去晒細佬到，而冷落咗阿威，所以唔開心，慢慢瘦落嚟。諗返起，都好耐冇抱過阿威啦。阿威同阿妹唔同，阿妹好黐人，有理冇理都逼你抱佢，俾個屁股你聞。到尋日發現阿威冇食野，一抱起佢，竟然仲輕過阿妹！

醫生叫我繼續觀察佢。如果仲係唔食野，安全啲就做啲檢查。驚就驚在係內臟有事，到時最好就抽下血，驗下尿。

醫生，你唔好嚇我啦。

…好辛苦咁忍住，忍住唔好俾啲眼淚流出嚟。

諗起 Lucky，當時我係一個不盡責嘅哥哥。冇乜養貓常識，佢鐘意食乜就俾乜佢食，搞到之後個腎有事，最後離開咗我。所以我依家更加唔想做一個不盡責的爸爸。

我好驚佢會有糖尿病或腎病之類。唉…

醫生開咗一啲抗生素，同埋開胃藥俾阿威。食完藥兩個鐘之後就嘔嘔。嘔啲黃膽水出嚟。只係見佢飲水，但就冇食飯。好彩唔算飲得太多，去廁所亦唔覺特別多次。仲見佢有少少大便去。希望只係因為情緒問題啦。今晚要買啲阿威鐘意食嘅野，早啲返屋企陪下佢。而 Jayson 就由得婆婆同媽媽湊住先啦。

~ Lindberg


P.S. 個護士姑娘（唔係之前靚靚嗰個），開錯隻收鼻水藥俾阿威，應該係開胃藥先啱。好彩我記得醫生話會有隻開胃藥，唔係就又有醫療失誤啦！唉…

膠袋取暖

有時會見到一啲露宿者，用膠袋穿上身取暖。估唔到同樣嘅事情會喺自己屋企發生…

廚房中一堆膠袋。入面好似有啲野…

行近啲，睇真啲…

再睇真啲。原來係阿威！睡房明明開咗暖爐，仲乜要瞓膠袋堆取暖呀？冇陰功。

近排阿威唔係好食野，成隻瘦晒。唔知係唔係之前我鬧佢偷食阿妹啲餅餅，或者係佢見我地錫晒細佬，所以患上抑鬱症。亦都可能係傷風，因為有兩聲乞嗤。我地都非常擔心。希望只係轉天氣嘅關系啦…

威威，您唔好唔開心啦，唔好病呀。即使有咗細佬，我地最錫都係您㗎！



~ Lindberg

擴大禁煙範圍一年後…

早幾日天氣凍行街，我同老婆話：

「妳發唔發覺呢，天氣越凍呢，啲咩就越犀利…」

「係呀，條街啲煙味就越勁。」

「係呀…係呀…」

其實我係想話天氣越凍，就越有啲女仔著啲短褲短裙出嚟。在嚴嚴寒冬，為我地男士送贈一股暖流。對此等衣著，深表感激。當然之後冇講到…

講開食煙，擴大禁煙範圍已經實行咗一年有多。唔知大家同唔同意，我自己覺得食多咗二手煙。

香港《吸煙(公眾衛生)條例》(香港法例第371章)，一般稱作吸煙條例或禁煙條例。條例於1982年訂立，是香港最主要的控煙法例。此法例旨在禁止在某些區域吸煙，並就煙草產品的包裝、售賣及推廣等方面作出限制和規管，並陸續修訂，2006年香港立法會通過大幅擴大禁煙範圍，在餐廳、酒吧、公園、扶手電梯以至室內公共地方等，均會作不同程度的禁煙。新禁煙令於2007年1月1日零時開始實施。

其實一直以來，我都覺得室內禁煙冇乜意思。喺一個開明嘅社會，我相信極少數嘅人會喺辦公室內煲煙。尤其是當你識得周圍嘅人，知道入面有人唔食煙。而且人天生係有一對腳，如果唔想同啲煙民困埋一齊，你可以行去第二到㗎嘛。例如我知道以前銅鑼灣某幾間茶餐廳特別多煙民聚集，而且通風做得唔係太好。知道咪唔去囉。雖然好似被迫避開咗佢地，對我地非吸煙者好唔公平，但如果食肆老板唔對我地體諒一下，我幫襯佢都費時。

如果間茶餐廳只係做煙民生意都夠做，當然要恭喜一下佢啦。但係如果只係得小貓幾隻，生意做唔住，佢自自然然會諗辦法去改善。加強通風設備、設非吸煙區、全餐廳禁煙、等等。所以食唔食得煙，最好咪由得個市場自己去淘汰同選擇囉。

我覺得之前未擴大禁煙範圍就好似困獸鬥，依家就似猛虎出籠一樣。個個都好似有大條道理咁，企喺條街到煲煙。公共米缸（即垃圾筒或煙灰缸）四周、商業大廈後門、食肆門口等等，往往都聚集一大班煙民。就好似幾個同事，或三五知己，啖天說地，你一口，我一口。漸漸演變成另一種社交活動。

有啲食煙嘅朋友仲懶衰，話係「我地」趕「佢地」出嚟。依家吹啖煙出嚟都小啲內疚感。當然，條街係空曠地方，煙好快會被吹走。但我覺得討厭程度真係仲差過以前。起碼一出街就真係好似聞多咗煙味。「濃度」係高至甚高。

其實 2006 年尾去新加坡都已經發覺呢個現象。佢地都有類似香港嘅禁煙條例。條街都係好煙。當時心諗如果香港實行又會變成點。答案原來係一模一樣。

莫非要做到好似日本咁，連一啲主要街道都禁埋？

而對餐廳生意上，其實都影響唔少。起初啲人會話，食煙嘅都會食飯㗎啦，影響都會有限度啫。其實對某啲食肆而言會係。即使話係茶餐廳，我相信（至少係自己所見）啲人都會照常食個下午茶餐，之後行出外面煲煙。可能因為咁，茶餐廳仲可以做多一轉半轉，生意仲好咗添。但係對於我地做西餐廳就慘啲。以前啲人食飽飯，都會留低食個甜品，飲杯咖啡。依家好多時都見，只要一張枱之中有一個煙民，啲人就會趕住走出外面，或去第二場，如可以食煙嘅酒吧或有露天位置嘅食肆。所以好明顯見到自己某幾間餐廳，餐後飲品係賣少好多。有間差唔多得番一半。而呢個亦都係新加坡一早証實嘅問題。

因為人為嘅干預（立法），我睇都要等個市場慢慢調節一下啦。唉…



~ Lindberg

每日一照

原來要跟自己的兒女每天都拍照是一件極難的事情。記得之前看過關於一個攝影師的文章。他為他的女兒，自第一天出世起，每天都拍照一張。當女兒出嫁的一天，把所有照片合成做一副大相作為恭賀女兒的禮物。真的超感動。

自 Jayson 出世以來，我都有每天為他拍照。目標跟那位攝影師不一樣，我只是很希望把他每天都在變的樣子拍下來。好讓將來可以回味一番。

「爸爸媽媽，我塊面燶啦！」

但那天在澳門滯留了大半晚，沒有跟 Jayson 影相。幸好 Jayson 的細姨姨正好那天有回家吃飯，為 Jayson 影了幾張相，使我的《每日一照》還得以繼續。



~ Lindberg

澳門之旅 - 大食篇之冠男軒美食

今期「食懵你」帶你嚟到澳門。（講到好似飲食節目咁…哈哈哈！）

喺橫過大海途中，一路諗午飯食啲乜。好想去啲舊式嘅茶樓飲茶。有諗過去龍華茶樓（罅些喇提督市北街5號），但可惜人地只係開到下午兩點。我地去到實過摸門釘。於是就決定去龍華附近嘅另一間老店：冠男軒美食。

冠男軒美食
提督馬路61號

睇雜誌介紹，此店出名食叉燒。就等我睇下佢比唔比得上我的至愛嘅「西苑」。

去到門口，見佢寫住：「吃一碗文化，享受半點人情味。」令人感覺唔錯。

但係另一邊，又有塊牌寫住：

「急尋：有名聲對社會有責任的人；有金錢對社會有貢獻的人…」

尋嚟做乜又冇講。係唔係我冇名聲就唔係佢地要嘅客人呢？怪怪的…

上到去，非常之舊式。或者用另一個形容詞，都幾「地踎」。可能因為剛剛過咗最旺嘅時間，地方非常污漕。但我勝在容忍力高，照食可也。

先叫個馳名嘅叉燒，同埋人地話幾好食嘅白糖糕。

叉燒係用碳燒，簡單蜜糖汁已經好香好好味。依家睇番張相都好想再食一塊。但係用嘅部位有啲似豬頸肉，雖然入口爽脆唔會乾，不過食多幾舊都幾滯。我個人認為呢到啲叉燒做得比較傳統地道，而我嘅至愛就整體上做得好啲。俾我揀，我都係愛我的「西苑」。

白糖糕就勁好味。唔會太甜，而重點係唔會酸。好正！

除此之外，就叫咗個豬膶燒賣，同一個鳳爪排骨飯。

不過不失啦。

埋單都幾貴。淨係碟叉燒都已經八十蚊。其他野食都要香港普通酒樓價錢，小點要成十蚊。唔怪之得佢話要急尋：「有金錢對社會有貢獻的人…」明白明白…


~ Lindberg

一天一天長大

現在為 Jayson 洗澡，大部份時間都是婆婆代勞。雖然很想跟熙爸一樣，每天為兒子洗白白，促進親子關系。奈何放工後，晚上即使有暖爐，氣溫都是比較寒冷，所以便把這個重任留給婆婆。每當放假，我便必定親自主理。而可能因為可次都相隔一星期的關系，我發現每次為 Jayson 洗澡，他都「大件」了很多。

記得剛出世時，每天都是我為他洗澡。Jayson 的個子很細小，全身無力，不太喜歡浸在水中。洗背脊會把他反轉面向水。他比較喜歡這個「泳姿」。有點像隻小青蛙。

一至兩個月大時已壯大不少，而且不再怕水，開始喜歡洗白白。但想把他反轉洗背脊會有點難度。因為頭仔大，頸還沒有力的原因，試過好幾次把他的頭浸落水。之後，口中還會吹出泡泡…

可能婆婆常常跟他說話的關系，Jayson 很喜歡聽人跟他說話。或許應該是說，如果你不跟他說話，他就會扭計。

「先生，我係您今日嘅服務員。水溫啱唔啱呀，先生？先生，要唔要聽歌呀？先生，你皮膚好靚喎。用開邊隻護膚品呀？」

現在兩個半月有多。那天跟他洗澡，見他突然肉肉了很多。想把他反轉已經不可以了。唯有聽婆婆話，把 Jayson 坐起來洗背脊。

幸好只是肉肉，不是太多肥肉。但下巴確實不見了。唉…



~ Lindberg

柚子爐端燒

今日下午去咗天后嗰頭。突然記起之前阿蘇介紹過嘅一間日式餐廳，見個午市餐牌都幾平，於是就入去試試。

柚子爐端燒
地址 : 銅鑼灣天后琉璃街15號地下
電話 : 3104-0066

個午市餐牌好簡單，我估係因為大師傅唔喺到嘅關系。有幾款拉麵同埋一個便當。我見隔離個細路嗰便當賣相唔錯，雖然唔知有乜食，又見肚餓費時問，於是就點咗一個。Jayson 媽就叫咗個拉麵。

呢個便當賣 $58，都幾抵。有四片魚生、沙律、煮物（炒豬腩肉）、炸物（炸雜菜魚塊）、白飯、赤麵鼓湯、咖啡或茶。味道都算唔錯。而拉麵就用蕃茄豬骨湯底，有少少怪。不過唔係唔好食。拉麵仲有配炸雜錦海鮮同兩隻餃子、咖啡或茶。

埋單冇加一，開開心心行出門口。

之後去番 openrice.com 睇下佢啲食評。不得了呀！簡直近乎「民憤」一樣。可能其他人係去食串燒，價錢唔平，要求當然唔一樣。但係以一餐簡單嘅日式午餐而言，都可以話好味夾抵食。



~ Lindberg

一週過後

把 Jayson 交給婆婆湊經已一個星期。每晚 Jayson 大約十二時吃宵夜。餵完奶掃完風之後，我們還要執頭執尾，有幸的話，大約一時半便可以上床。早上五時半 Jayson 會開始扭計。讓他扭一會，再給他一個奶咀，我們可以睡到六時正。

完成一切準備之後，七時半左右出門。這個星期很冷。雖然已經跟他穿了不少衣服，但還是怕他會凍。開車到婆婆那裡去不消四分一柱香的時間。

放下母子兩人，我便開車迫回家中的停車場，各自上班去。

婆婆因為要湊 Jayson，不能跟慣常一樣，到茶樓飲早茶。而公公就一個人繼續每天去，之後打包一些食物給婆婆。當 Jayson 睡覺的時候，婆婆就靠公公看著 Jayson，自己就去買餸做晚飯。見自己的兒子要麻煩這麼多人，心中不是那麼好過。

晚上再來到婆婆這裡湊 Jayson。吃過晚飯便回家。這個令我更過意不去，因為都不能幫手做飯或洗碗。

回家便坐計程車。我們發現 Jayson 很好笑。每當車子停下來的時候，就會扭計。而車子繼續開動的時候，就會乖乖的望著媽媽。

「司機大哥，我個仔扭計呀。可唔可以衝紅燈呀？」

可能 Jayson 喜歡的是震蕩的感覺。早知就不換掉車子的硬避震。哈！

回家之後會扭一會兒計。可能因為不停轉換環境的關系，所以因陌生而感到不安。希望這也算是對 Jayson 的一種鍛煉吧。

總括來說，這個安排還可以。但真的很很很很很疲倦，好好好好好眼瞓。



~ Lindberg


P.S. 現在是星期六早上十時。Jayson 媽要上班，Jayson 到了婆婆那裡去。我一個留在家。正好去睡一覺好的了… お休みなさい…

忽然書蟲

近幾日一次過睇完兩本之前睇開嘅書。一本係小川洋子嘅《凍結的香氣》，另一本係村上春樹嘅《人造衛星情人》。呢兩本書差唔多同一時間開始睇，但係用咗我好長嘅時間去完成。主要原因係實在太忙，冇時間好好停落嚟睇書。

先講人造衛星情人。睇埋呢本就睇晒村上所有嘅長篇小說：

1979年 聽風的歌
1980年 1973年的彈珠玩具
1982年 尋羊冒險記
1985年 世界末日與冷酷異境
1987年 挪威的森林
1988年 舞·舞·舞
1992年 國境之南、太陽之西
1992年-1995年 發條鳥年代記
1999年 人造衛星情人
2002年 海邊的卡夫卡
2004年 黑夜之後

其實我都冇依次序去睇。依家睇番個表，發現《發條鳥年代記》、《人造衛星情人》、同埋《海邊的卡夫卡》連續三套，都有個共通點。就係每本書都有一兩幕勁核突嘅場面。最核突應該係《發條鳥年代記》嘅生剝人皮。鐘意貓就最怕《海邊的卡夫卡》嘅食貓心（好想嘔…）。而《人造衛星情人》都睇到我叫救命，嗰條「木」簡直係酷刑之中嘅酷刑。
話雖如此，都係好鐘意睇村上。

呢本《人造衛星情人》，書評話係長篇戀愛推理小說。我就唔覺得推理得去邊。不過個故事都幾複雜。男主角鐘意咗個情投意合嘅女仔，奈何個女仔鐘意咗個有夫之婦。我冇打錯，係「有夫之婦」。唉…

書中有段係女主角寫嘅日記。我覺得村上有啲似寫梗佢自己。將好多好多野寫落嚟，旅行見到嘅野、對不同事物嘅睇法、甚至乎雜亂無章嘅念頭、等等，然後從寫作中整理自己嘅思想，最後咪變咗本書賣俾我地囉！嘻…

而《凍結的香氣》就係我睇嘅第二本小川洋子著作。之前睇過《博士熱愛的算式》。想睇呢本書，係俾佢嘅內容簡介所吸引：

我第一次收到他為我調製的香水。
他為那瓶香水取名為「記憶之泉」，瓶蓋上精雕著孔雀的羽毛。「孔雀是記憶之泉的使者。」說著，他取下瓶蓋，將手指滑入我的髮，在耳後抹上一滴香水。
然而，他在第二天自殺了──在我們共同生活滿一周年的第二天自殺了。
他瀟灑地離去，就像惡作劇般地從我的眼前徹徹底底消失了！
為了解開他的死亡之謎，我這才逐漸了解他，卻又隨著一步步的了解，益發感受到他的不可思議；在他的履歷表上，除了姓名之外，所有一切都是捏造的。他甚至謊稱家人都過世了！
人究竟背負了什麼樣的情感，才會如此與自己的過去切割開來？既然以全新的面貌面對這個世界，為何又選擇離開？
我所熟知的他，在我的眼前徹徹底底地消失了，而我所不知道的另一個他，也在他消失之後一點一滴地浮現了。
我終於明白──人是由記憶組成的，逃得再遠，終究還是原地轉圈。因為人逃不出記憶的形影相隨．．．．．．。

呢個係一個追尋記憶嘅故事。小川洋子對於記憶嘅描述好細致。除此之外，故事中亦有些少有趣嘅數學題目。不過就有啲似之前嗰本《博士熱愛的算式》「用剩」嘅野，依家攞嚟用番。哈！

另一樣有趣，就係書本嘅包裝。書面畫有一條孔雀毛。起初都唔覺得有乜特別，後來有一晚熄飯廳燈時，見到枱面上有野發光。嚇到我呀！原來嗰條孔雀毛係用夜光顏料畫。哈哈…



~ Lindberg

整齊的寫字枱

自從公司部 PC 壞咗之後，我好似都冇乜意識買過部。見自己部 macbook 都唔算用得多，就索性放喺公司用。不過部電腦就咁放喺枱面，搞到張枱好亂。有見及此，前日走去買咗個架，執好張枱。係唔係好整齊呢？（好彩影唔到右邊…）

（電腦雖然換咗，桌面壁紙依然係 Quist。嘻…）

因為部 macbook 行 Core Duo 嘅關系，所以好鬼熱。尤其是我會行 Parallels，喺個 Mac OS 入面行 Windows 2000 用公司啲軟件，因此部機好需要適當嘅散熱，所以我用咗 $238（公司錢）買咗個散熱器（白色電腦下面舊黑色野）。依家好好多！

除此之外，個鍵盤都係新嘅。原先想是但用個 PC 嘅鍵盤，不過成日㩒錯掣（借口），所以買咗個 mac 嘅鍵盤（又係昆公司錢）。同以前嘅 mac 鍵盤好唔同，分佈似我部 macbook，而且好薄好薄。真係做野都醒神啲呀！

見到個架上面有幾隻碟，其實都有啲來歷。早前上 amazon.co.jp 搵野，原本以為佢地唔送國外，但係唔知幾時開始，邊到都送！於是我就膽粗粗試下買幾件好想買嘅野。落單之後，大約一個星期就送到！（運費勁貴！四樣野要大約二百蚊港紙！）

包裝大致上同美國 Amazon 一樣。不過多咗幾份宣傳單張。

今次試買咗四樣野。一本 YUI 嘅結他譜、兩隻 Lindberg 嘅 CD、同埋一隻中島美嘉嘅高清（Bluray）演唱會。

結他譜係幫 Jayson 買定（-___-!!）。而兩隻 CD 係我以前買漏嘅。當時買 Lindberg 嘅大碟買到第九輯，因為見歌路有啲轉變，而且最重要係我冇錢買，所以之後嗰啲就冇買到。依家時不時都想蓄齊一套。今次呢兩隻係最後兩個專輯，仲差中間四隻！中島美嘉嘅高清（Bluray）演唱會係買嚟試機用，如果我有部 PS3。但因為申請無限擱置，只好（暫時）成為陳列品。哈！



~ Lindberg

5 個人的 Macworld Expo

尋晚，期待已久嘅 Macworld Expo 終於揭幕。香港時間零辰一點係 Steve Jobs 嘅簡報。原本都冇諗住睇，但係餵完個仔食奶都已經一點有三。行到電腦面前，不禁大叫一聲救命！因為發現幾位朋友都仲未瞓。擔定櫈仔等開 show。可能佢地見我冇離線嘅關系，又或者驚我唔死，送多我一程（叫我買新野），仲開定埋個 Adium 嘅 multi-user chat 等我。真係點「感激」佢地好…

五個人，各自各去到唔同嘅網站，等啲記者喺個 Macwolrd Expo 入面，一路聽 Steve Jobs 講啲乜，一路將啲野打上網俾我地睇。我地五個不停 refresh自己 個 browser，又不停互通消息，諗落都幾搞笑。

因為我上網上遲咗，要佢地講番先知有乜新野。iPhone 出新 firmware 1.1.3 對我無影響，因為唔似其餘四位，我都冇 iPhone。

另一新產品 Time Capsule 對 Leopard 嘅用家都算係一件恩物。Time Capsule 係一舊有 500G 或 1T 容量嘅 NAS（Network-Attached Storage）連 Airport Extreme，正好用來做 Leopard 嘅 Time Machine。Time Machine 係一個可以無時無刻幫你做備份嘅軟件。我亦都曾經俾佢救過一次。雖然唔算太貴（500G：HK$2,500；1T：HK$4,100），不過我唔會買（住）。

同佢地傾多一陣都已經差唔多兩點。部重點推介 Macbook Air 都未曾講。但係「周公」有急事搵我。再講，第二朝要六點起身開車，都要蓄些少精神。而且大概都知係乜。我唔洗成日帶 notebook 出街，所以 not my cup of tea。不過真係型得好緊要。

唯一失望就係 Leopard 冇新嘅更新。個 OS 真係有唔少問題，雖然唔係全部關佢事。仲等我諗住會有 10.5.2 添。唉…

今朝食住早餐睇番 Steve Jobs 個簡報錄像。真係好似睇明星一樣，台下觀眾睇到如痴如醉。（早餐係腸仔包加力保健…）

因為 iMac 冇新野加，我今日就好安心地落單，下星期有貨。正！嘩哈哈哈！



~ Lindberg

朱古力火鍋

前排係吉之島，見到賣呢隻 Truffettes 嘅朱古力火鍋。因為見 Truffettes 嘅朱古力好好味，所以就買盒嚟試一試。（唔記得幾錢…）

一盒入面有兩包朱古力，即係可以玩兩次。第一次煮，見說明書話可以用微波爐，咁方便當然要試試啦。我已經將個火較細啲，起初都以為無問題。說明書話如果溶好啲朱古力，唔俾火去熱住都可以玩一個鐘。於是咪戳啲士多啤梨同菠蘿落去囉。

我專登買啲普通嘅士多啤梨，太甜太靚就嘥晒。無乜特別驚喜。反而菠蘿就好好味。

玩咗一輪，發現啲朱古力開始硬硬地。於是就點著下面支蠟燭仔。點知越煮越硬，之後仲燶燶地。我睇係之前用微波爐煮朱古力嗰陣，煮過火咗，熟到實晒。唉… 失敗。

過咗幾日有朋友上嚟，送嚟一大盒日本士多啤梨。我就又擺個朱古力火鍋出嚟。今次我用說明書嘅第二個方法，隔水燉。朱古力溶咗之後好明顯滑好多。不過日本士多啤梨唔加朱古力都咁好食，落咗朱古力就好似之前咁話，有啲嘥。都係菠蘿加朱古力最好食！

呢隻火鍋仲有朱古力補充裝。$80 兩包。遲啲可以再玩過。



~ Lindberg

發現新大陸

因為之前去了澳門休息，有兩天沒有見過 Jayson，感覺他好像大了很多。昨日他有點像發現新大陸一樣，開始注意到他的手手。



「邊個打我個頭？嗚嗚嗚…」

之前兒科醫生看見 Jayson 的衣服都是連帶手套，她說她不建議父母為嬰兒帶手套。雖然穿手套可以防止鋒利的指甲摑花小蛋臉，但是即使摑花了亦會很快好。而看見自己的小手，能夠觸摸四周，都是學習的一種。所以自那次之後，我們都沒有再用「拳套」。現在他終於發現了這個新大陸。



~ Lindberg

P.S. 而且如果指甲鋒利，就應該要剪啦。哥哥和姐姐就最清楚。


P.P.S. 不過近排阿仔唔多鐘意食奶奶。莫非提早玩厭奶乎？天呀…

如何讓你的另一半讓你買新玩具

睇完 Ardy 俾我以下篇文章之後，覺得非常之有同感。更有如頓開茅塞，睇到差啲喊出嚟。原來男人想買玩具，其實就係咁簡單。

Why Your Wife Wants You to Get a New Camera：

http://www.kenrockwell.com/tech/wife.htm

中文轉貼：

http://blog.dcview.com.tw/article.php?a=Um5VNgVs

依家我明白點解之前我靜雞雞買咗部新相機冇俾人鬧（其實有，不過好快冇事）。因為部相機（Fuji F50fd）係（我話）用嚟影個仔。部 40D 下下要攞出嚟都幾麻煩，攞得出喺阿仔都笑完開始喊啦。而部 GX100 夜晚基本上用唔到，亦都大部咗少少好難放落褲袋出街用（幾多借口呢…）。雖然之前話對部 F50fd 好失望，都叫做好過冇。而且水貨唔洗二千蚊，非常吸引。亦個重點係，就如上面篇文章所講，Jayson 媽知道部相機係可以用嚟成日影 Jayson。

而事實上，依家好多相都係用 F50fd 去影，勝在就手同夠快，應該好快回本。又正如老外篇文章所講，有功課（靚相）交，乜都易話為好多。而我覺得影細路嘅重點，就係要影得夠多。因為小朋友表情多多，好難次次捉得準，影得越多，成功機會就越高。正所謂：「山大斬埋有柴」，見到有咁多「靚」功課交，部機幾多錢都已經唔係一個問題啦。嘻…

依家我明白點解 Jayson 媽會俾我（遲啲）買部萬幾蚊嘅 24 吋 iMac，但係都唔俾我買部二千幾嘅 PS3。如果自己想買玩具，只要同個仔有關，申請會容易批核好多。依家部 Mini 已經到咗極限，五勞七傷，買部 iMac 就可以「更有效地」用嚟處理阿仔嘅相同影片。係唔係好有說服力呢？忽然間有啲「挾天子以令諸侯」（或「挾豬仔以令媽咪」）嘅感覺。嘩哈哈哈！（希望 Jayson 媽睇唔到我寫乜… 妳睇我唔到… 妳睇我唔到… ）

等我認真諗一諗部 PS3 同個仔有乜關系先。嘻… 講笑啫。我都知道有個仔，儲下錢好。不過如果大家諗到 PS3 可以為一個兩個半月大嘅 BB 作出乜野貢獻，請告知。感激不盡。



~ Lindberg

偷懶澳門兩天之旅

因為 Jayson 媽下星期開始要返番工，所以特別向婆婆請兩日假。請假嘅意思就係放 Jayson 係婆婆到過一晚，而我地兩個就「過大海」，去飲飲食食同埋休息一下。當然我都喺公司請兩日假，因為唔想撞正周末鬼死咁多人。

但係都唔知係唔係我地偷懶嘅關系，尋日回程波折重重，個天好似懲罰我地一樣。不過好彩有驚無險。

之前其實一早已經應承咗 Jayson 媽過去澳門同佢一齊做個 Spa。講起做 Spa，第一時間就諗起我最鐘意嘅東方文華，因為佢地有個靚靚嘅 Spa & Resort。除此之外，我好鐘意好鐘意佢張床同個枕頭。雖然我係乜野環境下都瞓得著嘅人，不過喺呢到瞓，仲舒服過喺自己屋企。可以真係話「戀上你的床」。

今次喺東方文華，服務真係一流。唔知同近期行業之間嘅競爭有冇關系。今次我地都有些少特別要求，佢地都一一做到。我覺得非常之滿意同感激。

而對於東方文華嘅「偏愛」，係由以前做過嘅一份功課起。講到東方文華喺形象、包裝、推廣等各方面，落咗嘅功夫。所以好鐘意佢俾我嘅感覺，而且個 Spa 又真係做得唔錯。我今次做完之後好舒服。Jayson 媽就感覺都還可以，不過好似仲差一啲啲。可能佢真係太攰啦。

今次嚟嘅目的係做頭先講嘅 Spa，其次係以休息為主，俾 Jayson 媽喺冇壓力下可以休息一下，所以都唔會趕去食呢到、睇嗰到。食方面，去咗間舊式茶樓飲咗個茶，食咗兩餐自助餐（冇錯，又係自助餐！唔知邊個先幾日先話打死都唔會再食自助餐…），食椒鹽田雞同水蟹粥，仲有一餐冇預計嘅晚飯。

觀光方面，去咗游覽威尼斯…人。我覺得入咗去，真係同去咗有「水都」之稱嘅威尼斯冇乜分別。唯一嘅分別就係有冷氣同埋《東方紅》。

除此之外，內外每一處都令人嘆為觀止。厲害厲害…

不過我發現啲貢多拉船，原來唔係好似意大利嘅靠人力推動。呢到係靠馬達，然後用腳去控制向前向後。雖然如此，每位船夫都能歌善舞，令四周增添唔少氣氛。

見到個聖馬可廣場真係無話可說。最多都係一句：「洗唔洗呀？！」

今次嚟澳門，我發現基本上係唔洗坐乜野公共交通工具。喺碼頭去每間大型賭場，都有佢地自己嘅穿梭巴士服務。呢個一早都知啦。但又例如喺東方文華想去威尼斯人，只要行過兩步到金沙，就有穿梭巴士坐。非常方便。見坐咗咁多免費巴士，又影咗佢咁多相，於是入咗威尼斯人個賭場進貢咗少少。嘻…

原本坐六點鐘船返香港。點知去到碼頭，先話太大霧開唔到船。原來除咗打風，大霧都返唔到香港。唉… 負責人叫我地去「玩下」先。張飛聽日十二點前都用得。我見有啲人改走陸路，經珠海返香港。話晒都唔知要等幾耐。而我地都冇回鄉証，所以都唔去得邊。於是我地就打電話返屋企報告情況，然後四圍搵野食。由於無準備，最後都係是是但但食一餐，再去睇下情況點。

食飽飯返到碼頭，見啲霧散咗唔少，而所有賣船飛嘅櫃位都關晒，唔再賣今晚嘅船飛，以便疏導之前滯留嘅人。我地都叫做好好彩，一去到就剛剛開始俾人入去等船。原本應該係等九點鐘嘅船，不過過晒鐘都未放人落船。原來之前已經開咗一架，仲要同一架香港嚟澳門嘅船撞埋一齊！好彩我地冇早到，上咗嗰班船。見架船開返嚟碼頭，船頭爛咗啲，而且都有唔少人受咗傷。

等到十一點，終於有船開。一上到船，出奇地已經有好多人坐喺到。原來佢地就係坐之前嗰班船嘅人。我隔離兩個都話撞得幾應，見有人食食下碗麵，就成碗麵飛埋塊面嚟！之後落船，我仲見有啲嬸嬸行到跛下跛下。

滯留澳門五小時，終於開船返香港。不過開船時嘅心情都好矛盾。其實天氣仲係好差，越來越大霧。但係又好想返屋企。雖然已經講明叫 Jayson 留多喺婆婆到一晚，但係屋企仲有一對仔女。食物同廁所頂多可以用到今晚。所以一定要返屋企。上天庇佑，架船慢慢行，行咗個半鐘有多，終於安全返港。


~ Lindberg

P.S. 返到屋企，七國咁亂。兩隻野餓到連薑餅人都唔放過。超級冇陰功！阿威阿妹，阿爸阿媽都唔想㗎！

P.P.S. 雖然舊年因為要陪媽媽去玩嘅關系，都嚟過好多次澳門。不過每次嚟都覺得好唔同。亦都成日令我反思，以後嘅香港同澳門會變成點呢？

全家大覺瞓

公開絕密的床上照：

很明顯 Jayson 媽真的很疲倦。否則給十一磅的阿威睡在心口，是沒有可能睡得著的。

（當然，Jayson 是我放上去的。）

另一張床上照。全家的男士一起大覺瞓。Zzzz.....

~ Lindberg

火警演習

Jayson 媽下星期開始要繼續上班。因此，我們便會每朝抱 Jayson 到婆婆家中，爸媽上班之後，照顧 Jayson 的重任便落在婆婆身上。有見及此，今早先來一個「火警演習」，測試一下這個「物流」方法可不可行。

原先都為每天的安排而頭痛。但感激熙爸的提點，比起我原先的安排好好多。事源我住近太古城，而婆婆就住在鰂魚涌。奈何婆婆家又不近地鐵站。如果早上在我家附近截的士去婆婆家，有一定的困難。即使給我截到，我亦難免因為路程太短的關系，被的士司機咒罵而死。所以我原本想在婆婆那邊租多一個車位，早上開車到婆婆家，然後乘搭地鐵上班，晚上一家人駕車回自己家去。當然，多一個車位，家庭開支便大了。

熙爸的方案，就是我每朝開車到婆婆家，放低 Jayson 和 Jayson 媽，然後自己一個人駕車回家中的停車場，再各自乘搭地鐵上班。那麼我便不用租多一個停車場。而晚上從婆婆那裡截的士回家亦不會太過麻煩。所以今天便依照這個計畫進行。

早上六時正起床。Jayson 媽做得到，但我卻在床上扭來扭去，最後六時二十分才起床。去廁所、清理貓廁所、梳洗，換衫、餵貓、餵自己、餵 Jayson、幫 Jayson 穿上「勇闖玉珠峰」的行裝，七時四十分出門。

雖然之前已經將部份 Jayson 的車西送到婆婆家，但還是有很多東西要拿。婆婆家下面的停車場可以給我免費泊十五分鐘。誰知正當百忙中，不知道為甚麼車子的防盜器不停亂叫。因為要趕電梯 上樓，Jayson 媽一個人，一手抱著Jayson，另一隻手拿著兩個大袋，自己一個上樓。最厲害的是，電梯是去不到婆婆住的那層，還要行多兩層樓梯！母親的爆發力真的不能忽視。（後來才發現是因為 Jayson 媽關門關得不好，防盜器才會叫。）

據聞 Jayson 整天大致都算乖。不過始終陌生環境，睡和吃得有點不好。但以第一天來說，已經很好。唯一出事的，是忘了帶 Jayson 的小羔羊。婆婆那裡又沒有聽慣的音樂，所以 Jayson 好像有點不耐煩。但婆婆為 Jayson 做了個小豆袋。放在心口上睡亦有些幫助。

當我放工趕到婆婆家時，已經八時有多。大家都等著我開飯。除此之外，等著我的就是 Jayson 的笑臉。忍不住不停的吻下去。

吃過飯後，婆婆不需要我們幫手洗碗，叫我們盡早回家。有點不好意思的感覺。九時左右離開，用了一點時間才截到的士。回到家已是九時半。這就大概就是我們往後一兩年的生活模式吧。



~ Lindberg