上個周末，因為見屋企有幾個麵飽，所以就想簡簡單單煮個羅宋湯做晚餐。加上係
Julie 嘅生日，所以想陪佢多啲。
煮羅宋湯，我通常會落牛尾。去到百佳，見到有包牛尾。痴線地貴！要成 $58 一包！係唔係物價通漲成咁呀？！正當諗緊好唔好轉煲意大利菜湯之時，俾我見到份蕃茄薯仔湯料。掂啦！
包湯料有帥兩個好青嘅蕃茄、一包切好咗嘅薯仔、同埋幾大舊牛骨。據悉之前大陸雪災，所以上好多農作物都提早收割。所以即使我地餐廳用嘅蕃茄，有一輪都青啤啤。而好明顯，呢包料唔慌俾好野你。薯仔一定係發咗芽，所以先去皮同切粒。牛骨… 咪牛骨囉。不過 $28 一包，有齊幾樣我要嘅野，冇所謂啦。
材料：（六至八人份）
蕃茄薯仔湯料一包
椰菜一小個
西芹 1/3 棵
洋蔥一個
蒜頭四瓣
罐頭蕃茄肉一罐
月桂葉（Bay Leave）數片
檸檬兩片
紅蘿蔔應該有一條（我以為雪櫃有，原來冇！唔落都得，落咗就會甜啲啦。）
其實這一瓿都唔算係羅宋湯，因為冇咗羅宋湯主要嘅材料：紅菜頭（beetroot）。不過若以成本效益為重，唔係太大問題啦。但係真正問題，係之後發生…
首先將牛骨汆水，去除骨中嘅血水和雜質。唔係我驚會有腥臊味。跟住問題就出現啦。乜啲牛骨咁大舊，或者係我個瓿咁細嘅呢？之後點放其他材料落去呀？但係呢啲問題點難得到我呀？照煲！
汆完水要沖水，沖走啲雜質。
因為一個瓿唔夠大，我於是用夠兩個。一邊煮湯料，另一邊煲牛骨湯。我將一啲大塊嘅肉搣出嚟同啲已經炒香咗嘅切塊嘅洋蔥一齊炒。其餘牛骨就用嚟煲湯底。
等啲牛骨湯水滾之後，就要不停撇走上面層雜質。啲雜質係啲肥油、骨髓、血水，唔撇的話會越煲越臊。見冇乜雜質之後就可以收細做文火，繼續煲呀煲。（開頭又話簡簡單單嘅…？）如果切菜有乜菜頭菜尾可以放埋落去。煲完會好好味！
喺另一個瓿，炒香啲肉之後就可以放罐頭蕃茄肉。因為啲新鮮蕃茄唔靚，罐頭有保證得多。跟住就可以放埋啲椰菜同西芹。如果唔夠水份，可以放少少未煮好嘅牛骨湯落去。煲滾一陣，就放埋啲「青啤啤」蕃茄同「發芽」薯仔。
我將佢煲到大滾之後就放落真空瓿，慳番啲火。牛骨湯同樣煲到滾一滾，熄火。然後出街街。
三四個鐘頭之後，兩個瓿再開火煲過。此時啲牛骨湯已經變得白雪雪，有牛味得嚟，又唔會臊。湯料那邊有好甜嘅蔬菜味。呢個時候，正好二合一啦！
因為罐頭蕃茄好甜，冇乜酸味，所以我放咗少少檸檬。連皮一齊煲。
而且因為有薯仔，加上啲菜都溶溶地，所以濃稠度剛剛好。再煲一陣，落鹽同黑椒粉調味。飲得！
~ Lindberg
P.S. 瓿湯第二日番煲，啲檸檬味更加溶入啲湯到。仲好味！
