蘋果汁汁好好味！

這個周末終於輪到親自餵 Jayson 飲蘋果汁汁。早幾天都是婆婆餵，現在就可以親眼看一看 Jayson 如何食得津津有味。

之前白雪給我的《嬰幼兒營養食譜》，製法頗仔細：

蘋果茸
1. 先將蘋洗淨去芯，待用。
2. 把蘋果放入沸水煲至軟身。
3. 用刀起肉。
4. 用木棍(烹飪專用研磨碗和木棍)壓爛至茸狀即可。

我估把蘋果放入沸水煲至軟身的主要目的，是消毒清潔蘋果。但這樣做會減少蘋果本身的營養。所以我都是用簡單的方法，把蘋果徹底浸洗乾淨，然後去皮去芯起肉，再放入攪拌機處理。我放了四分之一個蘋果進攪拌機，然後放同等份量的熟水，以防吃得太甜。

「爸爸，您唔係學啲果汁舖，攪果汁溝水搵我笨呀嘛？」

「… 冇咁嘅事！您有乜證據呀？我地哩到真材實料，唔會呃人嘅。」點解突然間，隻大牙有點痛…

Jayson 果然吃到津津有味。用匙羹餵，起初自己有點不知所措。但其實只要把匙羹放在口中多一點時間，他自自然然會把蘋果茸吞進去，而不會用脷頂回食物出來。

Jayson 還吃到「㗳㗳」聲。令到爸媽也想來一口！

他最後吃了半碗。見他開始慢下來，我們便沒有再餵。再吃多幾天蘋果，下一步就是啤梨汁汁！

~ Lindberg


P.S. 本篇原本的標題是：「初嘗禁果」。嘩哈哈哈…

寫 Blog 的奇妙

近排收到啲奇怪電話。其實都唔知應該點講，唔係收數佬、推銷員、或者祈福黨。只不過係一啲出乎意料嘅電話。源頭原來係我個 blog。引致我喺到諗，究竟有乜人睇我個 blog 呢？

簡單一個例子。前排去花展影相，都冇同屋企人講過。哩頭寫完個 blog，轉頭婆婆就打嚟問花展有冇野睇。一大滴汗流出嚟…

上星期仲奇怪。Jayson 媽個舊同學打嚟搵佢，問威威係唔係走咗。佢話聽到「阿邊個邊個」講。而「阿邊個邊個」雖然都係 Jayson 媽嘅舊同學，不過好似話唔係太熟，亦都冇乜聯絡，所以冇可能直接從我地口中得知。正當百思不得其解之際，原來「阿邊個邊個」睇到我寫威威篇文章，所以先估到係我地嘅威威。又一大滴汗流咗出嚟… 不過知道有咁多人因此而識得威威，我地都好開心。

自從多咗節瓜俠之後，就好似所謂嘅：「父憑子貴」，多咗好多朋友嚟睇我個 blog。識到一班「坐埋同一條船」嘅好姐妹，我個好友名單因此伸長咗好多。開心之餘，寫野某程度上小心咗。如果俾人睇穿咗我侵略地球嘅大計，到時就白費心機啦。

死啦… 有冇同事睇咗我寫啲白痴野呢？如果有，我嘅威嚴何存？

「爸爸，乜您有威嚴嘅咩？」

~ Lindberg


P.S. 真係要多謝《新浪網》選咗我們的威威做精選文章，令到多咗好多人識得我地威威。


P.P.S. 尋日同個仔去樓下公園睇啲哥哥姐姐玩（上圖）。好舒服，又搞到差啲瞓著咗…

朋友的貓貓病了

朋友的貓貓 Wulu 病了。跟威威一樣，腎功能出了問題。情況都頗嚴重，所以昨天入了醫院。希望吉貓有天相。

幾年前 Wulu 跟他的兄弟，柴柴，來過我們家跟威威玩。威威自小很少跟其他貓接觸，見到陌生貓會很緊張。相反 Wulu 本身是一隻街貓，自由進出朋友的家。見慣大場面的 Wulu，當然處一切於泰然。

威威為了守住自己的地頭，客人去到邊，他便跟到邊。

柴柴跟威威一樣是一隻黑白貓。但在我們心目中，當然威威靚仔很多很多。嘻…

見威威不知所措，想起也覺得好笑。難怪我們會這麼愛這隻小貓。

有一次 Wulu 被狗所襲擊，朋友花了心機去治理傷勢。自此之後，便「收服」為家貓。但仍會用帶去帶他出去行公園。

之前的皮肉之傷都捱得過，我相信 Wulu 也可以過得這一關。Wulu，你要加油呀！威威會保佑你！



~ Lindberg

遊花園記

「今日，爸爸媽媽同我去行公園。咁大個仔都係第一次去行公園，所以心情好緊張。緊張到…瞓咗。」

星期一，我們帶了 Jayson 去行公園。出街飲茶食飯行商場經常都會做，但行公園還是頭一次。

到公園前，我們去了商場逛一逛，想找一頂帽子給 Jayson。在 Chicco 找到一頂合心意的，雖然貴得有點不合理，但仍然買了。借口是出面有太陽，不要曬到 Jayson 的小蛋面。

進入公園之後，第一時間便是開啟「節瓜號」。Jayson 有兩架座駕，「早晨號」和「節瓜號」。「早晨號」是每朝車他到婆婆家爸爸的車，而「節瓜號」就是表姐給他的手推車。

「媽媽，我郁唔到啦…」

「您仲想郁去邊呀？咦…乜您戴咗頂帽成個日本仔咁㗎？！」

「そですが？私は日本姉が大好きです！」

「爸爸又用佢啲半鹹淡日文亂教您講乜呀？！」

「どうも　ありがとうございます...」

其實我們極少用手推車。大多數時候都是用背帶，除了比較方便之外，亦都可以跟 Jayson 親密一點。但當然吃力得多。

搞完一大輪之後，我們便去遊樂場看哥哥姐姐們玩遊戲。可能太過操勞的關系，Jayson 雙目漸漸向下垂。過了不久，便睡著了！溫暖的太陽，清涼的微風， 再過不久，我也睡著了。
不知睡了多久，我們被附近的小朋友嘈醒。

很悠閑的一個下午啊…

「您兩仔爺就悠閑得過啦！兩個瞓晒得我一個睇水！」

早一陣子，Jayson 媽問我一句：值不值得。指的當然是 Jayson。身心的勞累可以不計，大量金錢和時間流失亦可不計，但生活模式的轉變，為家人曾添的麻煩，甚至哥哥的離去，這一切都是我們意料之外。而每當渡過一個難關或階段之後，另一個更大的挑戰又接種而來。那到底值得嗎？但見一家人可以這麼共處一刻，甚麼都值得吧！

希望很快會有好的天氣，那時又可以帶 Jayson 到公園曬曬太陽，呼吸新鮮的空氣。



~ Lindberg

澳洲牛奶公司雙打

早前去咗兩次澳洲牛奶公司。第一次自己嚟，第二次帶 Jayson 媽嚟。兩次都行錯路，第一次仲好鬼驚，有神奇的風吹我左耳…

事原我記錯地方，自己一個人行咗去佐敦道嘅另一邊。行行下發覺得有啲唔對路，點解咁多五顏六色嘅光管嘅… 心知不妙。行到街角，見到有好幾個年輕男人企喺到，斯斯文文，好似等緊人咁。當我行過其中一個嘅身邊嘅時候，突然佢伸個頭過嚟，靠近我左耳講咗一句幾乎聽唔到嘅野。哩陣神奇的風，令到我左半身麻痹，短暫失去知覺。回過神之後，先理解到佢講乜。佢係問：「要唔要姐姐仔…」豈有此理！一睇就知我正直不柯啦，你當我係乜人呀？我當然冇理佢，雞咁腳就走咗…

（話自己正直不柯，自己都差啲唔係好信。呵呵呵呵…）

第二次同 Jayson 媽一齊又行錯路。不過冇行到去上一次條「光管街」，去咗另一個地方。好明顯我係一個路痴…

Jayson 媽終於見識過何謂「終極速度」。因為佢第一次去，所以諗咗一陣食乜。而整餐所需嘅時間，同佢諗食乜嘅時間差不多。死未！

試過炒蛋同煎蛋，我都係鐘意食煎香咗嘅雞蛋多啲。而牛肉通粉好食過叉燒意粉。茶走就一流啦。不過近排個胃又開始痛，有排都冇得飲茶啡喔…

~ Lindberg

P.S. 今日 Fred 哥俾咗條 YouTube 片我睇。勁搞笑。喺 Food Court 入表突然間有歌舞表演！

教 Jayson 反身

Jayson 很懶惰，經常都不願活動。試問之後怎樣保護地球？每當看到 Anson 這麼活潑，媽媽就會話 Jayson 懶。有見及此，在復活節期間，我們進行了特訓！Julie 見我玩得這麼興奮，也來參與一份…

我覺得 Julie 越來越似一隻馬騮，把我們當成樹幹爬上爬落。

之後我們便順便鍛練一下頸部的肌肉。而姐姐亦在一旁指導。

特訓成績：無進展。唉… 

Jayson 現在五個月大，重 18 磅左右。 雖然已經過了這麼多個月，但我仍然覺得他每天都有點不同。那天公公見他蝦人抱，說他曳曳，他立即扁咀，然後喊個不停。開始懂得聽大人說話嗎？

抱著他的感覺很溫暖。在這幾年，當他還肯讓我錫的時候（其實只是無奈接受），我會盡情地錫個夠。再過多幾年，恐怕再沒有機會吧。而我還是每天跟他拍照，希望可以維持下去。
昨天婆婆開始給他吃用新鮮蘋果磨成的蘋果醬。婆婆說，第一啖不知道是否覺得酸瞇瞇的關系，眼仔矇了起來。雖然他開頭有點不知所惜，最後還是完成了一湯匙。真的很想親眼看看他那時的樣子。



~ Lindberg

朋友的四隻小貓

前一排，Jayson 媽個同事一次過收養咗四隻貓。因為佢地勁可愛，所以我忍唔住，不問自取放上嚟俾大家睇下。

雖然話一次過，而且有兩隻仲未戒奶，不過主人好有經驗。所以即使貓仔開頭有啲問題，佢地都好有愛心去照顧。例如每日下午都要餵奶同食藥，自己唔食飯都要飛返屋企照顧四隻貓。貓貓有佢地做主人，真係好幸福。

前排因為天氣凍，所以隻隻貓都要著衫。而佢地著住啲衫，其實係用主人啲襪剪成。勁搞笑！

「邊個笑我地？等我攞定雞毛掃先得！！！」

今個周末，希望有機會去探下佢地啦！



~ Lindberg

節瓜俠勇闖實驗室

「媽媽，咁早叫我起身做乜呀？我仲瞓緊回籠覺喎…」

「媽媽要返實驗室呀。有人㩒咗緊急掣！」

「入實驗室㩒緊急掣？」

昨天一早，Jayson 媽被召返實驗室，我和 Jayson 臨急臨忙只好一起同行。

「阿仔您睇，哩到啲𨋢係唔俾米奇同米妮坐㗎。」

「爸爸，您又玩我啦。米奇同米妮嚟哩到做乜喎？」

「俾人做實驗囉。嘩哈哈哈哈…」

「嗚嗚… 媽媽！」

原本以為可以帶 Jayson 參觀一下媽媽的工作室。但因為實驗室正在裝修，有很強烈的天拿水味。所以只好留有 Seminar Room 休息。

「節瓜俠，今日仲諗住俾您見識一下，爸爸侵略地球嘅後援會，可惜您冇機會啦。哩到有 H5N1、SARS。問您怕未？」

「爸爸，您估您過到媽媽嗰關咩？」

「…」

媽媽以極速處理完緊急的情況之後，Jayson 便開始肚餓。平時媽媽也是在這個 Seminar Room 吃午飯，Jayson 這天也可以在此大喝一餐！

「飽飽…」



~ Lindberg

三月二十二日

三月二十二日，天陰有微雨。原本希望好天就帶 Jayson 去公園玩，可惜天氣唔好，唯有取消計劃。尋晚自己煮咗個日式牛肉飯食，見今朝有啲肚餓，就整個熱香餅食下。原來咁耐以嚟，我都未試過整—熱香餅。

屋企有包熱香餅粉，加蛋加奶就食得。但係準備好一切之後，先發現屋企冇奶！正當非常沮喪之際，見到雪櫃有包維他奶，心諗豆奶同牛奶咪差唔多，照去！

煎完之後除咗比較硬同個樣比較衰之外，都算係一份熱香餅。有過今次嘅經驗之後，下次應該冇問題。

洗完碟，無聊咗一陣，又係時候餵奶。餵完奶之後立即煮午餐。簡簡單單一碗肥牛雜丸米。食完就洗節瓜（幫個仔沖涼）！

沖完涼，大人就有小小時間休息。我地睇咗一集《Loss:Time:Life》，上野樹里的那一集。故事同我碗肥牛雜丸米一樣，簡簡單單，好可愛，好搞笑。人生就係有大多雞毛蒜皮嘅事，唔值得為咗啲小小事，就忘記好多好多美好嘅野。

之後阿仔醒咗，我要負責同佢玩。玩乜好呢… 玩睇電視呀！我開咗套 Robots 同阿仔睇。平時唔睇電視嘅 Jayson，出奇陪我睇咗 1/4 套！可能因為色彩鮮豔，同啲野郁來郁去嘅關系。阿仔俾佢阿媽接去瞓之後，我睇多 1/2 就出街食飯。

阿仔話今日要掩飾身份，怕俾人認出節瓜俠身份，所以學 Anson 佯裝一下。變身成一隻狸貓！

「阿仔，《狸貓換太子》我就有聽過。但係《狸貓換節瓜》呢… 您咁樣好似仲揚喎…」

「爸爸，我並唔係一隻普通嘅狸貓！我係一隻著 Adidas 波鞋嘅狸貓。」

「您俾我見到好啦！您著車仔嘅波鞋。俾 Sophie 嬸嬸見到，以後都唔彩您呀！」

因為前幾日食咗餐超勁嘅，今日就去我嘅「飛佛」：西苑。爵士湯賣晒改例湯（木瓜花生雞腳，好味！），叉燒（好味！），咕嚕蝦球（好味！），椒絲腐乳通菜（好味！），紅豆沙（送嘅都好好味！）。

酒樓啲哥哥姐姐不停嚟同 Jayson 玩。後面檯有位外表嚴肅嘅伯伯，笑住想同 Jayson 玩。Jayson 望得兩望就開始扁咀，跟住就大喊。勁搞笑。

「爸爸，又唔係靚姐姐，我驚驚呀嘛。」

埋單問有冇免費泊車，原本我地食唔夠錢就冇，但係姐姐見到 Jayson 就話冇所謂俾埋我地。阿仔真係有用！

食飽飽就去行街街。Jayson 一身搞笑造型引嚟四周不少目光。我地先去 Toy 'R' Us 睇下有冇野啱 Jayson。我嘅生日禮物就係扭蛋。見有新嘅聖鬥士，五隻之中，是但一隻，除咗係阿舜，都好呀。點知就真係阿舜！隻阿舜仲要係假㗎！有乜問題，明眼人一睇就睇得出！唉…

睇到嘛？星雲鎖鏈邊到係兩邊三角㗎？！一個圓圈一個三角呀嘛！唉…

最後去超級市場買一大堆野同埋一件生日蛋糕就返屋企。

~ Lindberg

祝白雪生日快樂！

祝白雪：

星座書話，3 月 22 日生日嘅人，天資聰敏，心地善良，美麗動人，誠實謙虛，人緣同運氣都好到不得了。人見人愛，車見車載，人之龍鳳就係哩隻啦！ 識到妳真係我地嘅光榮啦！（唔好問邊本星座書！嘩卡卡卡卡…！）

祝白雪妳越來越靚，皮膚滑過豆腐花，舊年 16 歲，今年亦都係 16 歲，Anson 聽教聽話，臣爸更加要聽晒妳話，最重要係全家都身體健康，開開心心！

Jayson 都話送件餅妳食呀。「雪姑生日快樂！」

~ Lindberg

P.S. 今日仲係世界水日，大家記得節約用水呀！


P.P.S. 祝願一班準備要考高考嘅朋友，（排名不分先後）可梨、Sica、Zita、Kayee、李雪苑、Helen、梁茜、張陽、Pang Pang、Bernard、Bill Bill、月兒、阿殘、Choco、Natalie，事事順利，識嗰樣，考嗰樣！ 大家一齊勁過！！！

直擊吞拿魚解體秀

據說鰂魚涌有間日本餐廳，每個月都會買條吞拿魚即場劏俾啲人客睇。劏完就當然會食啦！咁啱最近有啲特別日子可以慶祝，兩個人就走嚟試下。

伊藤酒菜處
Ito San
地址 : 鰂魚涌華蘭路25號大昌行商業中心G01地下
電話 : 2803 1803

一入門口，一條龐然巨物已經放在眼前。成條吞拿魚放係張壽司吧檯上，起初以為食黃鰭吞拿魚，但邊到有咁大條嘅黃鰭呀？問過先知原來係藍鰭。發達！

店鋪唔係好大，唔計吧檯，24 個位左右。我地坐低之後，時間都尚早。要七點過後人差不多齊先會開始。 我話同睇演唱會差不多。等待之際，就先食個前菜。

有四樣野，由左至右，燒響螺（有啲苦）、唔知乜野菜（滑潺潺，正合我意）、日本蠶豆（好味）、同埋三文魚芝士卷（放咗啲香草，好味）。

之後，師傅就開始表演啦！所有人都行出去吧檯睇野。行近咗，可以聞到少少嘅血腥味。好緊張呀！

師傅首先介下條魚，同埋一陣邊部份會點整。條魚來自日本九洲，重 66 千克。後來有人問條魚幾多錢。師傅話要港幣九萬大元！厲害呀！

整個過程都幾血腥。睇完差啲想轉行食齋。咁大條魚，我暗地裡話要幫條魚超渡一下先好食。

師傅三兩下手勢就切開晒條魚。嘩！好大塊　おとろ（大吞拿魚腩）呀！

當劏得七七八八，客人就開始埋位等食啦。

先嚟當然就係刺身啦！有 おとろ（大吞拿魚腩）同埋 中とろ（中吞拿魚腩）刺身！嘩…

先食 中とろ（中吞拿魚腩）。鮮味到完全唔識講。魚味好重，非常彈牙，無筋無渣。去日本都唔記得有冇食過咁好味嘅吞拿魚。

跟住食 おとろ（大吞拿魚腩）。油到呢… 救命！雖然有筋，不過塊魚肉嘅脂肪，俾口中嘅體溫慢慢溶解而釋放。越咬越香，非常好味！

食完收碟之時，侍應問洗唔洗添食。害羞的我，心諗冇理由有得免費添食，怕要收錢，於是簡單話唔洗就算啦。但原來真係有咁大隻蛤乸隨街跳！後面張檯問，原來真係免費添食！因為第二道菜已上，所以我地諗住食完先再問佢攞。

第二道菜係燒魚鮫。 即係兩邊魚鰭舊骨。一樣勁油！燒完都仲有咁多油，所以有醋汁同蘿蔔蓉俾我地點嚟食。不過一口仍然都係充滿魚油。我睇我有排都唔洗食深海魚油 Omega-3 啦。

食完魚鮫，就叫佢攞多四件 中とろ（中吞拿魚腩）嚟。真係勁好味！不過之後好後悔，因為仲有好多野食！

吞拿魚碎他他。西式做法，麵包有一陣好香嘅香草油味。洋蔥唔辣，仲好甜添！

跟住呢碟就勁啦。通常食魚，最矜貴就係粒面珠燈。吞拿魚面珠燈刺身真係諗都冇諗過。質地好得意，非常彈牙，不過好多幼筋，勁攝牙罅。

然後係燒茄子。上面有吞拿魚、菠蘿、蘑菇、芝士。雖然冇乜特別，不過我覺得隻茄子都好甜，幾好味。

食到哩到，其實已經好飽。魚油充斥咗每一個細胞，整個人非常呆滯…
但係重頭戲依家先上演：汁煮吞拿魚扒。 將吞拿魚煎到好香之後，用醬汁去煮。除咗啖啖肉之外，真係非常之好味！雖然都已經飽到嘔，我都完成我自己嗰份。

仲未完！我地可以選擇吞拿魚壽司或者蔥碎吞拿魚飯。壽司啲飯有啲乾，不過塊赤身就好好味。個蔥碎吞拿魚飯非常好味。個肚明明就爆，都全部食晒！

今次真係最後啦。甜品：芝麻雪榚。 好香好滑…

食後感： 餐廳細細間，兩個侍應服務得好好。但我相信我地有排都唔會食吞拿魚。亦都可能係哩個原因，師傅話表演埋下個月一次就唔玩（住）。玩得多，大家都厭啦，而且一條魚咁大條，我地食完之後肯定會賣好多日。一個唔好彩，冇人食就蝕埋！不過可以食到一餐咁新鮮嘅吞拿魚，真係勁開心！

有得食，有得睇，每位 $880。價錢都算合理。如果有興趣，就要快啲打電話去留檯啦！下一次好似係 4 月 25 日，已經有七八個訂檯啦！



~ Lindberg