六個月的正式成績表

名字：節瓜俠
體重：7.99千克（即 17.64 磅）
身長：67 厘米
頭圍：43 厘米

體重上，比中等高出少少。節瓜俠之名果然名不虛傳。

「爸爸，您咁嘅身型，我超標少少都已經算係咁啦！」

每次到母嬰健康院，我們都選擇最早的時段（早上 9 時）。而那時正是 Jayson 要瞓「回籠覺」之時，所以都比較呆滯。但沒有辦法，因為我還要趕上班。

基本上，護士姑娘問的問題，之前見私家兒科醫生都已經問過。姑娘給他一個小搖鈴，呆滯的 Jayson 雙手拿著把玩。漸漸精神的他，開始對著姑娘笑。姑娘叫他嘗試坐起來，獨自也可以坐一會兒。雙腳有力，輕輕托著腋下也可以站得穩。

姑娘唯一關心的，就是 Jayson 比大部份的小朋友少吃一餐。Jayson 一天只吃四餐（早上八 時、下午一時、下午六時、和零晨十二時），每餐大約 7 安士。整體上是足夠的，但如果可以的話，她說寧願每餐吃 6 安士，吃五餐。我覺得這也有它的道理。雖然要起身吃多一餐，但餐與餐的時間密了，肚子不會太餓，睡也可以睡得好一點。我們覺得 Jayson 很多時都睡得不好，時間不夠長。除了吃完宵夜後的一覺有六七小時之外，其餘每餐之間都是睡大約兩小時。整天都是睡十三、十四小時，好像比較少。所以也會擔心影響發育。

上一個周末，我們嘗試午餐來一個胞肚的米糊，取代奶粉。可惜，可能是我調校得太稠，胃仔不能適應。所以之後那餐奶粉，吃過之後便把大部份嘔吐出來。晚上十時左右提前食宵夜，而第二日的早餐亦相應提早至六時。這個安排不成。所以只好跟從之前的時間表。

休息了一兩天之後，這兩天婆婆再嘗試把午飯改為米糊，好像都頗適應。都是婆婆比較在行。

而父母方面。我除了還有點坐骨神經痛和睡眠（嚴重）不足的問題外（我是一個得貪睡的人），見我還能夠寫網誌，應該還不錯吧。而 Jayson 媽亦有點體力透支，久不久便說周身骨痛。但我覺得每當她見到 Jayson，就好像立即充電一樣。音調提高八度，精神奕奕地逗他玩。自問沒有她那麼的能耐。

Jayson，希望您繼續以您的笑聲，為媽媽充電吧！但最緊要的還是身體健康，不要令我們擔心啊。

~ Lindberg

節瓜俠的斗篷

每一個超級英雄都有自己的特別服飾，最常見的，就是長長的斗篷。節瓜俠也不例外…

「爸爸，我型嗎？」

「阿仔，我睇怕您係未睇過《Mr. Incredibles》喇。著斗篷嘅超級英雄，通常都冇乜好結果…」

「爸爸，您太睇少我啦！您唔見我塊斗篷係加細碼咩？唔怕喎！」

Jayson 每次出街，頭仔都會不停左擰右擰，非常八卦。加上頸短（或節瓜）的關系，頸上的口水肩會不知不覺地轉到後面來，變成一塊斗篷。然後他便用他的口水在我們身上畫圖案！我看還是要找一塊 360 度的口水堅給他才行吧。

「阿仔，我有件好堅嘅新發明，叫做「圍巾蜥蝪口水肩」。顧名思義，即係 360 度嘅保護。顏色鮮豔，適合任何外出場合…」

「咁肉酸！媽媽，救命！」

「鬼叫您成日流口水，流到我一身都係咩！」

~ Lindberg


P.S. 經過以下一輪留言之後，我相信我嘅新發明：「圍巾蜥蝪口水肩」係原全沒有市場。班媽咪全部都話條蜥蝪核突，咁又點會有人買呀。算吧… 唉…（哈哈哈…）

登上推介！

「爸爸，我地做咗推介啦。」

「嘩哈哈哈！正所謂寫得雲開見月明。終於做到推介啦！」

「爸爸，您應該多謝我呀。唔係我，都冇人嚟睇您呀！」

「係啦係啦！知您「節瓜俠」出名啦。不過都要多謝新浪網全體仝人，同埋一班網友。唔係您地，我地冇今日！」

「爸爸，洗唔洗講到咁誇呀？」

「您識乜野呀。正所謂禮多人不怪。話唔定過多一排又上呢？嘩卡卡卡卡卡… 而且今次亦令我嘅征服地球大計邁向一大步！」

「又關乜事呀？」

「其實係字與行之間，我放咗唔少潛移默化嘅字句同符號。睇咗之後，就會推舉我做地球大統領。嘩哈哈哈…」

「爸爸，您唔好傻啦。咪以為我會唔知！您寫啲野，我一早 delete 晒啦！然後改晒啲愛與和平嘅訊息。」

「您… 您… 您… 好！您做初一，我做十五。我都 delete 晒您啲乜鬼訊息先！」

相信大家開始明白，點解除咗我語文表達能力有限之外，哩個 blog 點解會冇乜內容啦。哈哈哈！

多謝各位支持！如果你係第一次嚟我地個 blog，希望你會鐘意啦！簡單套用莎莉蛋糕嘅點子，哩個 blog 係：《一家、二貓、三人行》。有時間就番嚟探下我地啦！嘻嘻…


~ Lindberg


P.S. 希望新浪網睇完我哩篇之後，唔好以為我真係有乜「潛移默化」，立即將我踢走就好啦… 哈哈哈！

楊宗緯的洋蔥

近排睇無線其中一個高清台做番台灣嘅《超級星光大道》。《超級星光大道》帶好咗一班「星光幫」。而一眾「星光幫」裡面，我跟大隊鐘意聽楊宗緯。但係聽佢唱歌有時都幾辛苦，因為真係好用力。最近鐘意佢嗰首「洋蔥」。啲詞寫得好好，尤其係副歌，好鬼死慘呀。

楊宗緯 - 洋蔥
詞:阿信(五月天)
曲:阿信(五月天)
編曲：周恆毅　
合唱：周佳佑
如果你眼神能夠為我 片刻的降臨
如果你能聽到 心碎的聲音
沉默的守護著你 沉默的等奇蹟
沉默的讓自己 像是空氣
大家都吃著聊著笑著 今晚多開心
最角落裡的我 笑得多合群
盤底的洋蔥像我 永遠是調味品
偷偷的看著你 偷偷的隱藏著自己
如果你願意一層一層一層 的剝開我的心
你會發現 你會訝異
你是我 最壓抑 最深處的秘密
如果你願意一層一層一層 的剝開我的心
你會鼻酸 你會流淚
只要你能 聽到我 看到我的全心全意
聽妳說妳和妳的他們 曖昧的空氣
我和我的絕望 裝得很風趣
我就像一顆洋蔥 永遠是配角戲
多希望能與妳 有一秒 專屬的劇情

而我睇嗰集《超級星光大道》，楊宗緯唱「新不了情」。唱到咁用力，想殺死人咩？

~ Lindberg

我半歲大啦！

「爸爸，我今日半歲大啦！有乜慶祝呀？」

「有！去鄒醫生到打針啦！」

「媽媽！嗚嗚嗚…」

昨天 Jayson 半歲大。不知不覺便跟這新生命已相處了半年。每天他都為這家帶來不少歡笑，令我不禁常常抱著他，不停的說：「我愛您！」就趁在他懂事之前，兩個男人就講一些肉麻的東西吧。

這星期開始，我們讓 Jayson 開始坐汽車兒童座椅。起初自己都有點雞手鴨腳，不知怎樣放他落座位。但後來都可以了，而且 Jayson 好像都不會抗拒自己坐。

「阿仔，您就好啦，有筒椅坐。爸爸都冇…」

去到醫生那裡，首先磅重。18 磅。然後醫生問些進展問題。Jayson 還是很懶，不會反身，但當背向天時會自動反轉。原因是不喜歡玩 Tummy Time，我看他是不喜歡抬起他的大頭。左手交右手，甚至打鍵盤也可以。醫生問抱起他時，雙腿會不會伸上伸落，或在大人的腿上彈彈下。我說只要給他些少倚靠，他已經可以站著一段時間。但可惜上半身的運動不足，如果要他自己用手扶著東西站起，相信會很是一件很遙遠的事情。

這次總共打兩支針，六合一（白喉、百日咳、破傷風、小兒麻痺及乙型嗜血桿菌之外，還多添加了B型肝炎）、肺炎鏈球菌疫苗、和一劑輪狀病毒疫苗口服液。

醫生問我們有沒有給他吃其他食物。基本上我們一星期試一種新食物。我們發現到吃蕉蕉時，胃開始出現不適應。醫生說可以休息一兩天再試過。米糊每日可以吃三湯匙，但不要太多，因為很飽肚。雞蛋黃可以一天吃四分一隻，對製造血液有幫助，每星期可以吃三個蛋黃。當發現可以適應米糊，就可以立刻去吃粥粥。1 份米、1 份肉、1.5 份菜。很期待煲粥仔給 Jayson 吃。

我們發現 Jayson 的脷筋有點過長的現象。這個可以從脷尖的形狀得知。如呈現「W」形，脷筋就有可能過長。不過 Jayson 的情況比初生時已有改善。醫生說再大一點，出了牙仔之後，情況會更加好。不過如果一歲半之後還沒有改善，就要動一個小手術，切斷小小脷筋。希望不需要吧，否則切在兒身，痛在父母心。

看完醫生之後，原本想到「西苑」飲茶，但沒有位。只好到樓下的「王家沙」。Jayson 現在後喜歡玩檯面上的東西。在公公婆婆那裡，飯檯有用即棄膠檯布。Jayson 會不停的抓檯布，抓穿一個二個洞來。

「阿仔，唔準冇禮貌呀！」

吃過飯後，便到 Apita 逛逛。見到那裡有嬰兒用品特賣。正好想永別「雙酚A」，於是便買多六個 ChuChu 的 PPSU 奶樽，去取代家中的 NUK。

打完針之後，便吃了些退燒藥。但仍發了一點燒。不過一天過後便退了。

「好叻仔呀，Jayson！您要健健康康呀！」

~ Lindberg

再見 W's

第一次到 W's，佢仲喺時代廣場。應該都七、八年前嘅事。當時一餐二、三百蚊嘅牛扒餐已經覺得勁豪。依家地方轉咗，所有野都好似唔同晒。

法式牛扒屋
W's Entrecote, le steak house francais
地址 : 銅鑼灣霎東街33號6樓
電話 : 2506 0133 

記憶中嘅 W's，只賣炭燒肉眼扒，配菜係任食嘅薯條。薯條好好味，旁邊有張檯放咗隻碟，下面有一點蠟燭火熱住啲薯條。雖然只係一啲平價薯條，但係感覺好唔同。而且啲薯條又真係幾好食。

依家搬咗嚟霎東街。其實之前同一個舖位，橦樓起緊嗰陣我都有睇個，不過唔啱我地用。地方好大，不過地點就怪怪地。

一入餐廳，見到個類似經理嘅物體冇乜笑容，黑起塊面。心裡沉一沉，以為出事。不過之後啲侍應生又幾好招呼喎。

主要有兩個餐俾人選擇。$288 同 $328 。如果兩個人去，基本上大家都會一人叫一個。兩個餐就咁睇落去都幾抵。

$288 有鵝肝、龍蝦湯、主菜、軟心朱古力蛋糕、咖啡或茶。

鵝肝同龍蝦湯都冇乜特別。主菜叫咗炭燒肉眼扒。都幾香，不過唔係厚厚一塊嗰種，因為唔係美式餐廳呀嘛。薯條依然好好食，不過冇好似以前咁，任食之餘仲有個火熱住。可惜可惜… 甜品係軟心朱古力蛋糕，好濃朱古力味，個朱古力心溶晒出嚟。好正！

而 $328 就有海鮮拼盆、主菜、甜品拼盆、咖啡或茶。

海鮮拼盆有生蠔，螺、青口。都好新鮮，好有睇頭。主菜叫咗牛仔架。個汁鹹咗少少，而且啲肉都幾韌，麻麻地。而個甜品拼盆都做得唔錯，細細件，都好好味。

總括嚟講，我覺得以前間 W's 已經唔見咗。$300 左右食個扒，又唔係整得好好，我寧願俾多少少去 Ruth's Chris 啦。



~ Lindberg

一夜情

「爸爸，您又寫乜變態野呀？」

「今晚得您同我兩父子，之前未試過，之後都唔知幾時再有機會。咁唔係一夜情係咩呀？」


「媽媽！爸爸又傻咗，仲玩自拍添呀！」

昨晚 Jayson 媽要跟公公婆婆去參加一個親戚的喪禮，所以我提早了一點放工，接 Jayson 回家照顧。夜晚的 Jayson 很扭計，起初也擔心能否應付。

首先要自己坐的士回家。雖然路程短短，但司機的技術很差。幸好 Jayson 沒有多投訴。

「阿仔，唔係人人都好似您爸爸揸得咁好㗎。嘩哈哈哈…」

安全到達之後，以為可以放心下來。誰知那只是惡夢的開始。

電梯上到我們那層的時候，門竟然開不了！其實之前都試過，門只開了一丁點，然後就停下來。跟據之前的經驗，要等大概兩三分鐘，門就會關上。然後最安全的方法，就是返回地面，換過另一部電梯。我不停叫 Jayson 不要驚（其實自己最驚…），不過他都不知道發生甚麼事。過了幾分鐘之後，門關上了，但下降到某一層時，突然停了下來，然後忽然墮下！感覺有點 free fall，雖然只是一點點，但已足夠嚇死我。回想起來，其實之前也試過。

最後，電梯回到大堂。見有位姨姨想入電梯，我跟她說電梯有問題，然後去找管理員說一聲。原來管理員在閉路電視已經看見我被困在電梯內，正在打電話求救，這亦令我心安少少。

那位姨姨跟我們一起坐電梯上樓。她說原來今早亦跟我們坐同一部電梯，但我已經忘記了。她說記得 Jayson 今早跟她笑，然後 Jayson 又望著她，又再跟她笑。我覺得可能因為 Jayson 媽比較懂得跟他玩，所以他對女性比較有好感，但當然遺傳亦佔一個重要的原因。每當他見到女性的時候，就自自然然會跟人笑。有時真的令我有點兒滴汗…

安全回到家之後，但還未安頓好自己時，門鐘就響起。起初以為是管理員上來問之前電梯的情況，但原來是做問卷調查的。早前收過衛生處的一封信，被選做一項調查。那位姐姐說幸好我們在家，而正當雞手鴨腳的我，只好叫她在飯廳自便，我便坐在沙發上陪著 Jayson，去回答她的問題。那些問題其實都沒有甚麼意思，更不知道它想得到一個怎樣的結論。意外受傷，可大可少。我的少少被熱油燙傷，究竟對其他香港人，有甚麼實質意義和影響呢？

整個調查大概用了十分鐘。之後便是我倆的二人世界。Jayson 在婆婆那裡剛吃過奶，但還未有倦意，所以要跟他玩一回。我不太懂得逗 Jayson 開心。極其量都是玩舉高降下，和讀 flash card。正當玩舉高降下時，突然聽到「樸」的一聲，然後聞到一陣臭味…

「阿仔，您係唔係玩野呀？」

懷著緊張的心情，慢慢打開尿片… 竟然… 甚麼都沒有！真的「還得神落」。「開大」都是留給媽媽去處理吧。嘻嘻…

然後便繼續玩。

手上的那個球其實是應該放在腳的位置，讓他用腳踢，但他比較喜歡用手拿著把玩，所以我們把球換了上來。

玩了一回，見他開始有少少倦意，我便把他放落床，給他奶咀，希望他會自行入睡。但…

「爸爸，我邊到會俾您咁容易過骨呀！」

我還未踏出睡房，他便喊著叫我回來。見奶咀也沒有幫助，我只好抱他出廳繼續玩。玩看 flash card，玩玩具，玩（我）看電視。到八時左右，見他又再有倦意，我便靜靜地放他上床。他自己在床上玩了一回兒，便真的睡著了。這個小朋友真合作。那麼我便可以看《同事三分親》，和打 Mario Kart（終於完成 50cc！）。嘻嘻…

Jayson 媽九時半左右才回來，買了漢堡飽做晚餐。那我跟 Jayson 的「一夜情」就此告終。謝天謝地…

但可能因為昨晚睡得多的關系，今早 Jayson 很早便起了床。難為了媽媽要氹他睡多一兩小時才去吃奶。今天公公婆婆要繼續參加那個喪禮，所以我們請了一天假留在家中照顧 Jayson。吃飽奶之後，現在便來個「回籠覺」。之後便去醫生那裡打防疫針，「慶祝」他的半歲生辰。哈哈哈…



~ Lindberg

要開生日會嗎？

雖然半歲都還未到，但我已經常常在想，Jayson 的一歲生日要應該怎麼辦呢？

撇開身為福建人，嫲嫲要辦幾席去招呼親友，自己也想為他開個生日會。但早幾日，Fred 哥給我看一篇 CNN 的報導，大字標題：「 $10,000 for child's birthday party？」

文章大概是說，因為父母受到其他父母的影響，小朋友的生日會越辦越豪。小朋友很多時都根本不知道在發生甚麼事。而父母只是為了炫燿自己，或不想被別人比下去，所以辦一個大型生日會。但亦有很多父母是在不知不覺下花多了錢。有時所花的費用，更可以跟結婚宴會相比。

自己想為 Jayson 開個生日會，最主要是想跟朋友分享一份喜悅。一年的抗爭終於過了，雖然革命尚未成功，而且還有很多個年頭和更艱巨的東西要面對，但我認為都值得慶祝一下。而且身邊這麼多哥哥姐姐、弟弟妹妹，到時應該很有趣。加上幸好公司有地方可以利用，花費應該不會很離譜。嘻嘻…

很期待這一天的降臨。還有 6 個零 1 日…



~ Lindberg

P.S. 今晚又要獨個兒照顧 Jayson。晚上的 Jayson 特別扭計。我辦得到嗎？
P.P.S. 不知道為甚麼，Jayson 塊面越來越圓。雙眼旁邊的肉都漲起來，整塊面都變得圓上加圓！

了解‧關懷‧一百萬人的故事

尋晚無線電視做咗一集《了解‧關懷‧一百萬人的故事》，作為成個節目嘅預告篇。睇完之後個心好唔舒服，因為近排都係同朋友講同一個題目。但親眼見到一班窮人嘅故事，又係另一回事。

了解‧關懷‧一百萬人的故事
無線電視翡翠台
4月21日 至 4月25日
晚上 10:35 播放

一日做十幾個鐘，一個禮拜做足七日，都係得四千幾蚊人工。好難想象，亦覺得好恐怖。即係話大約 $11 一個鐘。而可以㩒得咁低，即係表示唔憂冇人做。好恐怖…（但點解我出雙倍以上時薪，都請唔到人呢？）

近排同郭先生討論啲經濟問題。其實自己對社會經濟都係一知半解，所以只好用常理去分析。我地覺得有幾個可能性。第一，老板「殘民以自肥」。我覺得有少少似自己公司。老板人工高，又唔多出力。不過試問邊間公司唔係呀…（不過佢地近排乖咗少少。）
第二，老板經營不善，成本高企，俾唔起人工。哩個情況比較常見。第三，當然工作本身唔值錢。

不過要去到咁極端嘅情況（$11 一個鐘），大概都係因為「困獸鬥」、「僧多粥少」。新市鎮嘅交通不便，資訊嘅不靈通。被迫接受，或甚至去爭取一份咁嘅工作，都無可口非。唉…

不過我自己唔係好贊成最低工資或者最低工時，除咗對做生意上都加添唔少麻煩之外，更重要都係所謂嘅自由經濟。多咗限制，少咗發展嘅空間，到時可能搵份工都冇。難聽啲講句：一個願打，一個願捱，關你乜事喎。而今日打人嗰個，聽日可能俾人打番轉頭呢。但可惜嘅係自由經濟係需要時間去調節，而好明顯仲有大把問題嚟緊。可能我比較悲觀，或者係諗多咗咁啦。

講返個節目，雖然只係睇到預告篇，但我覺得都應該多謝無線做一個咁嘅節目。除咗令我地睇到一啲（可能）知道，但又唔願意去面對嘅現實，仲可以叫其餘嗰六百萬人，唔好身在福中不知福。更艱難嘅問題都仲有人面對緊，自己少少嘅問題，仲埋怨啲乜呀。



~ Lindberg

眼火爆

今日坐地鐵放工，擠逼嘅車廂中，企係我面前係一對年輕男女。言行舉止，差啲睇到我眼火爆！

事先聲明，我冇特登去偷聽佢地講野。但個白痴男塞住耳筒大大聲係我面前講，我冇辦法唔全部接收。據理解，佢地仲係學生，並非男女朋友關系。但話題不外乎男男女女，身體經常有接觸。其實如果佢地細細聲耳邊講都冇乜野。但係佢地就要大大聲講，慌死車尾啲人聽唔到咁。我都冇咁好氣，擰歪面冇眼睇。

點知傾傾下，就開始玩。第一下我冇留意到，只知整到後面個阿姐。而當時人當然冇乜悔意。到個女仔就要轉車，個男仔就再玩過。原來玩彈 bra 帶。救命！大庭廣眾，迫到死，喺到玩啲咁嘅野。第一，我覺得好多野都玩得，但公眾地方，點都應該專重一下女性。內衣始終都係好私人嘅物件，唔應該咁玩法。佢試下俾人掹條底褲出嚟玩呀啦。而奇怪係個女仔又由得佢玩。令我好奇怪個女仔諗乜。乜唔洗保護下自己嘅咩？莫非我思想太過守舊？唔通依家啲學校唔教中國嘅傳統美德：禮、義、廉、恥？

就算話時代唔同咗，但係作為一個男生，基本嘅紳士風度，應該永遠都唔會改變。即使自己都唔算係一個百份百正直不柯嘅人，見到啲咁嘅事都眼火爆。如果第二時個仔係咁，真係寧願一掌打死佢。



~ Lindberg

差不多六個月啦！

再過多幾天，Jayson 便六個月大了。很久已經沒有記錄到他的進展程況，就在 28 號做檢查之前，自己記錄一下。

現在的體重大概是 18 磅。很喜歡笑，又很喜歡喊。見到媽媽便最開心。我不懂得如果跟他玩，但他媽媽只要簡單的跟他玩躲貓貓，他便立即開心得笑起來。而我只會把他舉起降下。

「Jayson 預備好未？1…2…3… 太空戰士，一飛沖天！… 阿仔，睇住您啲口水呀！滴落爸爸個頭到啦！」

飲食方面，每餐都吃 7 安士奶，而宵夜加一安士，即 8 安士。除了奶粉，亦都開始吃固體食物。11 時左右便吃少少米糊。

下午 4 時左右便是果肉。吃過蘋果、啤梨、紅葡萄。昨天試過雞蛋黃，再下去便試香蕉。幸好都沒有不良反應。

而昨天吃雞蛋黃，Julie 一直都虎視耽耽，因為她很喜歡吃雞蛋黃。

早前想找一些影片給他看。但 Fred 哥跟我說，某些研究指出，某些學習軟件，對學習根本沒有幫助，有些例子更發現會令學習更緩慢。只要是 Fred 哥說的，我一定會信。因為他是 geek of the geek of the geek。甚麼影片都好，我覺得父母的參與還是最重要。我最後找了一些 Barney 的影片給他看。雖然自己對 Barney 沒有太大好感或認識，但我覺得理論上，一些顏色鮮豔的「東西」在畫面跳來跳去，加上一些兒歌，應該對感官上的刺激會不錯。我是否正確，我不知道，但 Jayson 真的很喜歡看。當 Barney 和小朋友一起跳舞的時候，Jayson 母子也在一起跳。Jayson 開心已經足夠。而最後的「晚安歌」更是我們常常掛在口邊的歌曲：

I love you, you love me. We are Happy Family.
With a great big hug, and a kiss from me to you,
Won't you say you love me too.

唱完之後，便一家人擁在一起。

體能方面，Jayson 仍然很懶惰，不喜歡 Tummy Time 或轉身。但卻很喜歡站起來，很多時都不願坐。手部活動尚算靈活。經常把玩具左手交右手，右手交左手。亦會把奶咀拔出來把玩，然後再放回進去。



而且雙手很喜歡抓四周的東西。有時手指甲會抓到一些表面，發出一些如磨黑板的聲音，令人有點毛骨悚然。但他卻不以為然。

洗白白是另一件開心的事情。洗白白的方法跟以前一樣。雖然 Jayson 的體重令我有點兒吃力，但還算可以。有時會不停踢水，令我上半身都濕透。

婆婆很用心照顧他。幸好 Jayson 亦討人歡喜，為公公婆婆帶來不少歡笑。表姐經常也會到公公家中吃飯。兩表姐弟好像也相處得不錯。

公公婆婆還時常都為 Jayson 拍照，使 Jayson 的一日一照，得以繼續。

「乜公公婆婆幫人影張咁嘅肉照㗎？失禮死人啦！」

~ Lindberg

跟脂肪肝講再見！

一位漂亮的護士姑娘把我帶進一間暗黑的房間。她叫我解鬆上衣，臥在床上。微弱的光線下，看見她的花容月貌，心跳慢慢加速。緊張的我，笨拙地解開皮帶。她二話不說，一手便伸過來，把我的小褲褲拉下。我眼睛也不敢張開。然後…

「醫生好快嚟啦。你等一等啦。」

我要做肝部超聲波檢查。嘻…

護士姑娘將十幾張抹手紙塞入我件衫同小褲褲周圍，以防一陣俾做超聲波啲啫喱整污糟。
我好似好多亞洲人一樣，係乙型肝炎帶菌者。相信係阿媽「送」俾我。不過我唔知有幾多帶菌者會好似我咁乖，每年（或者半年）驗一次血，檢查肝功能。除此之外，每兩年（或者每年）做一次肝臟超聲波掃描。唔係自己怕死，只係想盡量對身邊嘅人負責，始終身體係需要自己去照顧。

前一兩年照超聲波，醫生話我有輕至中度脂肪肝。簡單講，即係個肝填積咗啲脂肪。肥人或者飲酒人士都會有。如果本身係肝炎帶菌者，肝硬化嘅機會會更大。問題係脂肪肝好難減。如果做運動節食減肥，減都係減咗皮下啲肥膏先。內臟嘅脂肪好難減。所以我一直都冇乜理佢。既來之，則安之。

「近排有冇野轉變呀？瘦咗？」醫生問。

「邊有呀？肥咗就真！」我答。

「啲脂肪肝冇乜囉喎。基本上係冇，有都係好少好少。」

「咁好？！」

真係喜出望外。我估可能有幾個原因。老實講，雖然工作量（家務）大咗，但係一定肥咗。不過飲食方面或許都小心少少。膽固醇含量高嘅野（如冇鱗魚、魷魚）可免即免，酒好少飲。補品方面，近兩年跟「聖記田徑王子」，人稱「三級王」… 打錯，係「三級跳遠王子」先啱，霍同學，食 Omega 3。自己又聽姐夫講，每日食一粒奶薊（Milk Thistle），據稱有護肝作用。但當然，補品不易服用過多。可能係咁，脂肪肝就慢慢唔見咗呱…

不過我冇因此而太高興。因為自知身體唔係太好，肥施大隻竟然有啲貧血！希望可以的起心肝，做番啲運動。近排 Jayson 媽好勤力，晚晚玩 Wii Fit，冇白費我嘅血汗錢。我唔鐘意玩 Wii Fit 入面啲瑜珈。跟排都只有打 Wii 嘅 Mario Kart。我睇要搵其他辦法先得啦…



~ Lindberg

搵到啦！

終於俾我地搵到啦！都係威媽醒目，估到崇光有得買。

威威，您鐘唔鐘意呀？

爸爸媽媽好掛住您呀…


~ Lindberg

P.S. 尋日買開玩具，Jayson 都有份。我地想買個有音樂嘅玩具俾佢。不過唔係好似綱琴嗰種，而係㩒一粒掣就有成首音樂嗰隻。覺得好似好玩啲，同埋對感官刺激多啲啲。Jayson 媽搵咗好耐，最後選擇咗哩隻：

尋晚太夜冇玩到。唔知阿仔鐘唔鐘意呢？

到期換奶咀

最近發現，那些 Chu Chu 的奶咀，流量越來越快。原來經過這麼多個月來的蒸洗，奶咀的膠已經一早硬化。加上 Jayson 的吸啜，原本的小洞，變成了一個大洞。

其中六個奶咀，我看要正式宣佈退役。

雖然流量快，可以減短吃奶的時間。但有時因為流得太快，Jayson 會差點被哽到。而且我發現可能啜得太容易的關系，面部肌肉沒有之前的結實。見他也不太喜歡那些破爛的奶咀，昨天便去買過一批新的。但沒有買 Chu Chu 的「疑似」母乳奶咀。因為不再吃母乳，買普通的便算了。

早幾個星期，我們嘗試於家中試坐親戚送的汽車兒童座椅。其實那張座椅是適合比較大的嬰兒。我看要再過多一頭半個月才可以用。現在只好繼續使用為 Jayson 度身訂造的座椅：媽媽的大腿。嘻嘻…

「爸爸，我要做《紅慧星》馬沙！」（小朋友樣子十分囂張！）

「您外表係紅色，但係內裡係節瓜綠。最多做普通嘅渣古啦！嘩卡卡卡卡…」



~ Lindberg

看到眼突的約翰蘭保

尋晚同 Ardy 幾個朋友去睇。四個字去形容：「血肉橫飛」。好多個月前，睇過啲預告片，已經知道好血腥。但係真係冇想象到會咁誇張。

首先，太古 UA 啲低音唔知仲乜校到咁勁。唔知情的話，仲以為坐喺個打樁機隔離。全片大約 90 分鐘，眼突足 90 分鐘。故事… 唔好問，諗極都唔明。究竟蘭保係為咗國家而殺人，定為咗自己呢？愛，係唔係真係救唔到世界呢？不過部戲嘅重點唔係哩到。係睇個 62 歲嘅大隻阿伯，用 T-Shirt 掩蓋住自己皺皮嘅身軀，通山走，一個打百幾個。最尾一幕，一車車嘅壞人，車到蘭保面前俾佢亂槍掃射。睇到目定口呆，只好講一句：「洗唔洗呀…」

睇完之後，我對現代武器有重新認識。以前以為一粒子彈射埋個人到，有個窿仔，啲血慢慢流出嚟，表情好痛，然後慢慢斷氣死。但原來依家一粒子彈，可以打爆人個頭（成個頭飛走咗），或者喺人個心口開個大窿。而且一個 62 歲嘅阿伯，仲可以徒手摙爆人條頸。 唔怪之得係三級片啦。

因為咁，我覺得以前嘅演技高難度得多。要扮俾火燒、扮痛、扮就死。依家？都變成肉醬喔，仲扮咩喎。

話雖如此，我都覺得史太龍這套《John Rambo》，好比之前套《Rocky Balboa》，一雪前恥。雖然都有唔少人鐘意《第一滴血 第三集》，但相比第一集嘅戲劇性，第二集嘅娛樂性同突破性，第三集真係好似失色少少。而今套蘭保，縱使冇乜故事又好鬼血腥，但的而且確令人血脈沸騰，娛樂性極之豐富。



~ Lindberg

P.S. 我諗諗下，套戲「應該」都係認為愛可以改變世界。雖然班傳教士最終都停止唔到殺戮，仲差啲俾人殺埋。但佢地改變咗蘭保。蘭保殺晒啲壞人，咁咪再冇打打殺殺囉…

P.P.S. 預告片係另一位阿伯，福伯（夏里遜福）嘅《奪寶奇兵》！雖然擺明食老本，66 歲仲玩皮鞭（？！），但都係非睇不可。

唔錯嘅三合一

雖然我唔算對咖啡好有研究，但係我一定唔會飲即溶咖啡。直至遇到佢…

唔鐘意飲即溶咖啡，係因為佢有一種好難飲嘅酸味。所以喺屋企，就算幾麻煩都好，我都會自己磨咖啡豆，慢慢沖一杯咖啡。

有一日，我喺街接到一份免費嘅三合一咖啡樣本：

當我喺公司好懶，但係又好眼瞓嘅時候，就會走去沖杯三合一。但次次飲唔夠一半，就會倒咗佢。因為真係覺得好難飲。對哩包樣本開頭都冇乜期望，但即管試一試。出奇地唔錯喎！
同平時啲三合一唔同，啲粉倒出嚟可以分辨到咖啡粉、糖、同奶粉。

沖出嚟之後，係一杯香滑嘅咖啡。最重要係一啲都唔酸，而且有陣陣嘅咖啡香味。依家屋企都買咗兩盒，以防有不時之需！

我發現我沖咖啡越來越懶。起初係自己煲 espresso 打泡做 cappuccino，但洗野好麻煩。之後玩 Syphon（虹吸），但洗野仲更加麻煩。後來學郭生用手沖，要磨豆煲水。而論技術，我覺得手沖最難控制。依家… 唉…



~ Lindberg

七情上面

既然大家覺得 Jayson 常常都「交足戲」。那麼試看看這個表情，又可算是「七情上面」呢？

「爸爸呀，個仔喊成咁仲掛住影！」

「佢扮野咋嘛！」

「咳…咳…咳…」哭泣聲中加了幾聲咳，表情上再加兩分楚楚可憐。

「喊到咳啦。仲唔抱起佢！睇下幾大滴眼淚呀。陰功仔，媽媽錫番…」

「好野！我贏咗…」

「您呃到您阿媽，呃唔到我㗎！」

「鬼叫我瞓醒覺，您唔理我呀！我再扁咀您睇呀嗱。」



~ Lindberg

貓食草

「姐姐，妳食乜呀？」

「食草囉。喵…」

「姐姐，乜貓唔係鐘意食魚咩？」

「唔知呀。我見哥哥食，我冇蝕底咪食埋一份囉！」

早幾個星期，見之前買落好多盒小麥草，於是種一盆俾 Julie 食。其實 Julie 真係唔係好識食，成日都咬唔斷，好多時都要佢阿媽餵。小麥草係威威最鐘意嘅食物。每當佢知道我喺廚房種咗小麥草，佢每朝都會喺廚房門口叫個不停。明明同他講，草草仲未大，佢都會望實盆草，望好耐好耐，好似等啲草生出嚟一樣。哈哈哈…

以前幫威威寫過一篇咁嘅 blog：

Call Me Vegetarian - July 20, 2006
I love barley grass. I love it more than any fishes in the world. My dad buys some barley seeds, and plant a some pot for us. It takes about a week to have some grass suitable for my taste. If the grass gets too old, it becomes too tough, and I don’t like it. Sometimes, my dad gets too lazy to plant any for me. So, I’d keep bugging him in the kitchen, where he keeps the pot, until my mom whines at him together with me.
Why do we like to eat grass? The main reason is for us to vomit. As we lick our body, a lot of hair gets trapped in our intestines. Without getting it out, we cannot digest the foods properly. My dad bought us some medicine to put on the paw. Supposingly, we should like the taste and lick the medicine, which helps us to vomit. But I lick it just because it’s making me uncomfortable!!! With grass, it helps our bowel movement. Then we can vomit the hairball easier. And it’s all natural, based on our instinct. I like it.

近排好想幫威威搵一件擺設，係一盆兩塊葉嘅草草，靠太陽能，兩塊葉就會擺下擺下。又係草，又會郁下郁下，放係威威身邊，佢一定會鐘意。之前喺「寵之天國」都見好多人放。唔知邊到有得買呢…



~ Lindberg

我是帶子

帶子
1.（名詞）：又稱扇貝，貝殼類海產的一種
2.（動詞）：照顧兒子，帶著他四圍去

今天婆婆要參加表姐的運動會，而媽媽早上要上班，下午一家要到尖沙咀去跟朋友吃午飯，慶祝 Ardy 的生日。因此，我便要獨自照顧 Jayson 一個早上，然後獨個兒帶他到尖沙咀。我做得到嗎？

「爸爸，您要加油呀！」

首先，一早起床便要餵奶和換尿片。餵奶和掃風都沒有太大問題，但我已經很久沒有幫 Jayson 換尿片。因為怕穿得不好而漏尿，除了出院時換過幾次之後，這都是 Jayson 媽一個人負責。

「爸爸，您得唔得㗎？仲咁得閑影相？」

「唔好同我講野啦！搞到我唔記得搽凡士林啦！」

幾經辛苦，終於換好。然後就抱出廳跟他玩。給 flashcard 他看，玩點蟲蟲，唱歌跳舞，等等。「玩過三巡」之後，見他開始發呆，我便放他上床。開莫札特音樂，播放下雨聲，給奶咀，之後便由得他在床上玩。理論上，玩一會兒之後，他便會自然入睡。可惜，事與願違。我行開去回覆了幾個留言之後，Jayson 便喊了起來。雖然睡房開了冷氣，但他仍是睡到一身汗。於是我便抱他出廳坐一坐，看看卡通片（其實是自己在看… 有幸看了《風之勇者》的大結局，非常感動）。抱著他一會兒之後，他便開始喊，而且越喊越厲害。給他奶咀仍然是喊。但再過了一會兒，他便哭到倦了入睡。放他上床之後又可以做自己的東西。

首先，當然是做正經事。收拾好一會兒要出街的行裝，奶樽、奶粉、冷熱水、衫、尿片、等等。之後自己便可以放心去打機。玩不過幾分鐘，就已經十一時了。早上八時起床，不知不覺便過了三個鐘！十一時半左右，Jayson 媽說要餵 Jayson 吃米糊。他這個星期開始吃米糊，但都是婆婆餵。我一個人，可以嗎？

「爸爸，快手啲啦！我流晒口水啦！」

「唔好催啦。您爸爸手忙腳亂啦！」

雖然吃一啖，「獲利回吐」四份一，但最後總算吃了一小碗。

然後全日最高難度的一環到啦，出街街！

出街街，要為他再換一次尿片，然後各自換衫。因為只有我和他，要去尖沙咀，唯有坐地下鐵。

先背上沈重的行裝，然後放 Jayson 上吊帶。過程比想象中容易，但前後都很重。總算行得！

我帶著一副緊張的心情，慢慢行落地鐵站。到月台不禁要來幅合照。

列車上，因為我不方便坐下，只好站在一旁。Jayson 不停四圍望，見到一班姐姐，便目不轉睛地望著人。而姐姐們見他這麼搞笑，亦不禁撩他玩。

「阿仔，做得好！」

吃午飯的地點在尖東的 LaVilla，幾經辛苦，終於找到了！我和 Jayson 半天的獨處，就此結束。雖然有點辛苦，但亦感到樂趣。

午飯過後，我們到了 Crema 找郭生。一杯香濃的咖啡，為這天的行程劃上一個完美的句號。

「阿仔，多謝妳今日咁合作呀！」

「唔洗客氣！」



~ Lindberg