要用學行車嗎？

婆婆早幾個星期前去了吉之島，當時正好是半年一度的吉之島日。婆婆見到一架學行車有減價，於是便問 Jayson 媽送一張給 Jayson 好不好。我第一個反應是滿腦子的問題：

• 四圍行，導致空降雜物的危險

• 對腰骨做成的壓力

• 對腿骨發展的問題

• 會否對行路養成壞習慣

其實健康院的姑娘都說不建議用。但 Jayson 媽一句：「我地以前咪又係咁用。」，再加多句：「兩個表姐依家咪幾好。」立即恍然大悟，重點是我們如何去利用這件工具吧。而當我見到婆婆幫 Jayson 影的這張相，無法不多謝婆婆。

笑得真開心呀。

其實只要用得小心，便不會構成任何危險。重點是不要依賴作一件安撫小孩的工具。亦要視乎個別小朋友的發展，留心地觀察和照顧，便應該不會對發展做成任何問題。

這些都是個人見解。因為那些「專家」建議，我覺得都是為了避免一些個別的事件發生。

「Jayson，坐得舒服嗎？」

「婆婆送嘅，梗係舒服啦！多謝婆婆！」

除了當學行（企）車，Jayson 也會坐在上面吃飯。因為婆婆那裡還沒有餐椅。應該是時候去舅父那裡拿表姐的餐椅來用吧。

「南瓜粥粥好好味！」

~ Lindberg

好多鴨鴨一齊洗白白

Jayson 媽見 Jayson 洗白白時喜歡四圍望，好像想找一些東西拿上手上玩。可以在浴盆玩的，最好都是玩具小鴨鴨吧。於是我便四出找尋。可是一直都找不到，即使找得到，手工卻很差。那晚忽然想起，想要找鴨仔，有誰會比 Sica 姑姐更清楚呢？！

Sica 姑姐對鴨仔情有獨鐘，家中有不少鴨鴨的玩具及擺設。於是我便「屈」她送了以上幾隻給 Jayson。

要她忍痛割愛，雖然有點過意不去。但見 Jayson 玩得那麼開心，相信她亦沒有所謂吧。嘻嘻嘻嘻…

（注意：片段有不雅鏡頭。）

~ Lindberg

比手指更好味的…

Jayson 媽期待已久的終於來臨！Jayson 踏進第八個月的第一天，立即便表演食腳趾給媽媽看。

「Jayson，係唔係好似鄒醫生話，腳趾鹹啲好味啲呀？哈哈哈！」

「爸爸，唔好嘈住我啦！人地要專心食真啲啲味呀！」

Jayson 媽說，見別的小朋友食腳趾，覺得很可愛。早幾天都只會把小腳腳拉到面前。隔天 Jayson 便會放入口了！哈哈哈…

~ Lindberg

從未如此令人失望的漢堡包

尋晚走咗去早前有線阿蘇介紹過嘅 Shake'em Buns。原本一心可以食到一個好好食嘅漢堡包，點知… 從未如此失望過。唉…

Shake'em Buns
地址：銅鑼灣開平道5號地下
電話：2572 6220

話說尋日睇咗 natchan 講 Burgeroom，睇到流晒口水。我好鐘意食漢堡包。燒得香香嘅漢堡扒、軟熟嘅麵包、茄汁、芥辣、酸瓜… 忽然間變成個道友咁。於是我夜晚就同 Jayson 媽去展開尋找漢堡包之旅。

我只係記得間野係喺加路連山道，但唔記得正確地址。於是用手機上網睇番篇網誌。行到加路連山道先發現，原來間餐廳喺一頭，我地喺一尾。因為冇時間行，於是就去咗附近嘅 Shake'em Buns。

入到去，自己興高彩烈。見個餐牌啲名都幾得意，而且樣樣都聽落幾好食。於是就叫咗一個普通嘅蕃茄生菜漢堡包（一開二）、炸魷魚圈、炸薯條、藍莓奶昔、同埋一支啤酒。多謝盛惠 $183。唔平，不過如果好食就一定可以接受。

買完之後見到個牌。上面寫住（類似）：我地唔係 Burger King。BK 出名你想點就點。佢話喺佢地餐廳，人客只可以食到佢地嘅做法。換言之，即係對自己產品好有信心，唔會照客人個人喜好亂咁改。好似好囂張，不過如果好食就一定可以接受。

可惜…

先講主角：漢堡包。我可以用「難食」去形容。漢堡扒非常鬆散，有啲汁，但冇肉味。以我經驗，應該係啲免治牛肉有過多血水，加咗蛋，或者放咗麵包糠。我估應該係太多血水居多。我唔知哩樣係唔係佢嘅特色，不過鬆散程度有啲似發水麵包。加上啲肉可能唔夠脂肪，所以冇乜味。食落口都唔似食緊漢堡包。但係都未算係最失敗嘅野。包裡面啲菜同蕃茄非常冰凍。放喺一塊熱漢堡扒之上，感覺非常曖昧。如果佢嘅賣點係冰火二重奏，只好怪我唔識欣賞喇。

炸魷魚圈，啲粉好厚，而且有啲「骨肉分離」。骨肉分離應該係因為上粉前冇將魷魚圈抹乾。不過睇個樣，啲魷魚圈應該係買番嚟已經上晒粉。魷魚本身冇乜味，同埋啲粉都幾滯。通常啲人會跟他他汁，因為入面有啲酸瓜，會冇咁滯口。不過佢地只有蛋黃汁，滯上加滯…
炸薯條，食第一條又熱又香，覺得好好味。不過我越食就越落得多茄汁。起初都不已為意，之後 Jayson 媽講咗一句，我就明晒。「啲薯條冇乜薯仔味。」果然好似個牌一樣，哩到唔係 BK。如果係 BK，啲野點會咁難食？我唔知用唔同嘅薯仔分別有幾大，不過 BK 用足「反式脂肪」去炸，所以特別脆同好味。雖然好似好唔健康，但試問成餐飯有邊樣野健康呀。食哩啲野就應該預咗啦，而且又唔係日日食。

最好味都係杯藍莓奶昔…

我好少可彈人地啲野唔好食，因為我覺得味道嘅野係好主觀。不過我嘅要求都好基本，亦都係一啲客觀嘅烹調要求。個肉餅仲鬆過個包真係好難接受。唉…

番到屋企上 OpenRice 一睇，第一個食評同我講嘅一模一樣。早知就… 唉… 有早知，冇乞兒。



~ Lindberg

祝 Kenny 叔叔生日快樂

今日係 Kenny 生日。首先祝佢生日快樂，生意興隆！上個星期六一眾出街食飯慶祝。適逢 Jayson 七個月大生日，當然要一齊去玩啦！

每次一班人食飯，都係笑到肚痛收場。Oliver 好鐘意飲可樂，以前平時每日兩三罐。但自從發現膽固醇過高之後，就嘗試戒飲可樂。但係…飲可樂同膽固醇高有乜關系呢？真係令人難以理解。

成班朋友都好鐘意同阿仔玩。但奇怪嘅一點係，之前剛剛六個月嗰陣，阿仔開始認人。一見陌生人起初會發呆，如果再行近啲就會喊。依家反而唔會！同 Raymond 叔叔、文公公玩到癲晒。搞到佢成晚都冇瞓過。

「爸爸，我終於搵到個人少頭髮過我啦*！」

* 註：此句乃文公公自己講，我同阿仔邊到敢咁大膽呀。嘻嘻…

之後返到屋企，阿仔剛剛瞓著就大喊喊醒。一定係之前玩得太興奮。雖然知道係乜事，不過都差啲嚇死我地。


~ Lindberg

謹記「伙計，走蔥」!

今朝收到 Fred 哥一篇文章。入面話，甲型肝炎禍首竟然係蔥！？突然間覺得自己唔食蔥係非常之正確。嘩咔咔咔咔咔咔…

以下係文章嘅轉貼。雖然我讀嘅係 Biochemistry，唔係 Microbiology，但係我都覺得生蔥喺處理上，真係好有機會唔乾淨。就好似通菜一樣，入面永遠洗唔到。如果菜嘅表面有傷口，啲污糟野走咗入去，就洗唔番出嚟。所以生食會食壞人，我覺得一啲都唔出奇。

除咗蔥之外，另一樣我唔食嘅蔬菜就係韭黃。要怪都係怪我小學老師。佢話啲韭黃係喺冇太陽嘅環境生出嚟，所以做唔到葉綠素，變成黃色。因為冇曬過太陽，植物會唔健康，而且會有蟲蟲。雖然之後我都冇證實過，但係就係因為咁，我就打死都唔食韭黃喇。

其實文章所提到嗰件事已經係好多年前嘅事。我相信只係個別事件。例如用啲唔乾淨嘅水去洗蔥。不過都叫得個知字啦。走蔥萬歲！哈哈哈哈哈…

謹記「伙計，走蔥」!
從來沒想過，但看起來，的確是有可能的．．．
最近數起A型肝炎的食品中毒事件，禍首竟然是青蔥。
青蔥最好別生吃，在顯微鏡下有好多噁心的虫虫。
沒錯，以前修MICROBIOLOGY 時，在顯微鏡下， 看過蔥管內有好多噁心的虫虫...蛋蛋...。
還有:香菜也是(常見大量 FUNGUS)， 而且與香菜同保存的食物也會遭到染污 ，而且更噁''''。
所以奉勸愛生吃香菜、青蔥的兄弟姊妹們，先把牠燙死再吃！
飲食衛生青蔥最好別生吃。
中國人愛吃脆皮烤鴨，往往將脆皮烤鴨肉包著生的青蔥段裹著甜麵醬吃；吃炒米粉、貢丸湯、肉羹湯、麵湯、餛飩湯、火鍋料理、燒烤料理及魚肉料理時，也免不了要來點兒青蔥花提味。
中國人生吃青蔥的機會實在太多了，麵攤、火鍋店，各個餐廳的VIP房裡索性就擺一大碗青蔥花，讓消費者自行取用，但是，愛吃青蔥花的人在下箸前可得三思了，因為美國食品藥物管理局日前呼籲消費者注意，最近數起A型肝炎的食品中毒事件，禍首竟然是青蔥。
A型肝炎病毒是一種肝臟疾病，通常在感染A型肝炎病毒六週後會有症狀，輕微者是發燒、腹瀉、噁心、嘔吐、無食慾、腹痛、疲倦、皮膚變黃。嚴重者則引發為肝臟疾病。
美國食品藥物管理局建議消費者應將青蔥放入鍋中加蓋完全煮熟，或在烹 煮魚、肉類或其他料理放入青蔥時，也應將青蔥完全煮熟後再吃，以降低罹患A型肝炎的風險。
再提醒一次
A型肝炎---禍首竟然是:青蔥及香菜
美國食物管理局(FDA - U.S. FOOD AND DRUG ADMINISTRATION) 網站上所公佈的警告。
關於青蔥，最好不要生吃。 這是FDA的網站，可供參考。
http://www.cfsan.fda.gov/~dms/hep-aqa.html
FDA QUESTIONS AND ANSWERS ON HEPATITIS
A OUTBREAKS ASSOCIATED WITH EATING RAW OR UNDERCOOKED GREEN ONIONS

~ Lindberg

我要搵契爺契媽

「阿仔，嫲嫲攞您個八字俾相士高人批命，高人贈咗您幾句。」

「爸爸，係唔係：一戰功成萬骨枯呀？」

「枯您個頭！您以為自己真係琛哥*呀！」

（*註：Jayson 的名字跟《無間道》的韓琛一樣，的而且確有個「琛」字。）

話說嫲嫲回鄉觀光，順道找了一位當地出名的相士為 Jayson 批命。他說 Jayson 的中文命改得不錯。那就當然的啦，名字是 Jayson 媽所改，再由阿托大師查核，當然沒有問題。

其次，相士說 Jayson 會有很多女朋友（！！！），但他會遲婚。那即是說我應該不會那麼早做爺爺，令我鬆了一口氣。哈哈哈！

其實整份批命，我都沒有認真對待。因為我相信命運掌握在自己手中。我們做父母的，用愛心去栽培，只盼健康快樂成長，我們已經心滿意足。但相士的說話，卻給我帶來一個借口。相士要我們為 Jayson 找個契爺契媽，條件是不能屬蛇。心目中立即有了人選！這非 Ardy 兩夫婦莫屬。

兄弟 Ardy 是讀 MBA 認識的朋友。起初以為在 MBA 不會找到一些交心的朋友，和自己一組的同學的性格出入比較大。但竟然在隔離組，給我找到一班情投意合好朋友。而 Ardy 更成為好兄弟。自 Jayson 出世之後，他兩夫婦已經很錫 Jayson。雖然不是常常見面，但對 Jayson 細心程度，我們自己有時也會慚愧。

其實一早我已經有這個意思，不過 Jayson 媽怕他們不想擔起這個名份。但因為有了這個借口，我便硬著頭皮去問 Ardy。而跟我想象一樣，他一口答應。於是，Jayson 便多了契爺契媽。

「阿仔，您發達啦！有 Ardy 同 Sophie 做您契爺契媽。」

「點解呀？佢地好有錢咩？」

「Err… 契爺成日話自己好窮喎… 不過第二時想玩啲乜（尤其是打機、睇足球），上契爺契媽到，就有佢地陪您玩啦！不過您記得要捧曼聯呀。如果第二時您鐘意車仔，都唔好出聲。俾佢地知道，即刻同您斷絕關系㗎。哈哈哈！」

契爺契媽，Jayson 就拜托你們了！


~ Lindberg

振完又點呢？

上星期係 Fred 哥生日。我問佢會去邊到慶祝。佢話佢叫咗女朋友將食飯啲錢捐咗去振災。捐錢，我相信 Fred 哥係唔係都會做。不過一向視錢財如糞土嘅佢，好難相信佢會專登留起啲錢去捐。當時我越諗越心寒。究竟有幾多人會咁做呢？

道理上應該唔少。其實喺電視機見到災區嘅情況，相信大部份人都會幫得就幫。不過收入冇乜突然多到，要去幫人，唯有用啲積蓄，或者自己慳少少。而第一件可以慳到嘅，一定係娛樂。同朋友食少餐飯，睇少場戲。經過一星期之後，我發現我嘅諗法應該正確。自從上星期起，餐廳啲生意差咗好多。唔知道的話以為又有 SARS。嚇死人…

最近我都有留意四周食肆嘅舉動。大致上可以分為幾種。有啲有心又賺到錢嘅，就會將收入捐出嚟。如果我有錢賺我都會冇乜所謂。另一種係見啲食物冇人食都會壞，索性薄利多銷，將啲錢又係捐咗去。最衰嗰啲，當然就只係搏宣傳嗰啲啦。

可能自己做餐飲，對於人嘅消費力比較敏感。因為消費力一差，經濟就好有壓力。所以覺得真係幾唔舒服。

另一樣令我擔心嘅，就係「近在眼前」有需要嘅人。記得之前南亞海嘯，好多香港人都有捐錢過去。不過之後，有好多慈善團體都話籌款難咗，尤其是係啲企業捐獻。各企業每年大概都有個預算，用咗就冇。南亞海嘯都唔算係切膚之痛，但係今次全部都係我地同胞。你捐一億，我唔敢捐三千萬。今朝睇報紙，國內外足足籌咗二百幾億！如果真係捐晒，咁其他有需要嘅人（同埋動物）又點算呢？但係見到人地咁嘅環境，有心幫人嘅，唔通仲會叫佢「留力」咩。真係矛盾…

積極啲去諗。其實我地去幫人，除咗「節流」之外，亦要不忘自我「開源」。我嘅意思係天災過後，當地人嘅生產力化為烏有，如果真係想出一分力，應該做好自己，出埋佢地嗰份力。咁先至算係真正幫到人，幫到自己。



~ Lindberg

我最喜歡的生果：水楊梅

咁多種生果之中，我最鐘意就係水楊梅。其實我唔係特別鐘意食生果，不過見到水楊梅就會好想買嚟食。近排啱季節，街市會見到一盒二盒。深紅色嘅就最啱食喇。

我鐘意水楊梅嘅香味，雖然都幾鬼酸，不過都食到一點點甜味。我叫哩啲做「人生」，酸中帶微甜，需要慢慢回味。嘻…

不過即使係深紅色嘅水楊梅，都仲係幾鬼酸。我阿媽會用鹽水浸一浸。除咗會帶出啲甜味之外，仲可以保存得耐啲。

上網見到有人將佢製成「糖水楊梅」，好似都幾特別。等有時間都試一試先！
http://blog.sina.com.cn/s/blog_5919b50e01000bnd.html



~ Lindberg

星期六一起打怪獸

今個星期六為朋友 Kenny 預祝生日。一班朋友約好咗去我屋企打 PSP 嘅 Monster Hunter ，一齊去打怪獸。但竟然冇預到 Kenny 一齊玩喎！哈哈哈！

「爸爸，您地玩 Monster Hunter，係唔係會捉埋我哩個「Little Monster」㗎？」

「邊到敢呀？唔驚您嘅節瓜飛拳咩？」

非常之期望星期六嘅來臨。不過講開 Monster Hunter，其實我都冇乜玩過。睇怕到時我都係喺企埋一邊，搖旗吶喊嗰種。邊到有時間操練呀。唉…

尋日見 Koko 畫自己一家畫得咁好玩，我又試下畫先！

齊晒人啦。有好乖嘅哥哥，好曳曳嘅 Julie，同埋 Jayson。我仲有機打添。呵呵呵呵！



~ Lindberg

營養食譜：菜心蛋黃米糊

綠色一堆嘅野當然唔係俾你同我食啦。我地俾 Jayson 食嘅野越嚟越多花款，除咗想令佢吸收唔同嘅營養之外，亦都可以用嚟鍛煉下佢嘅腸胃。喺食粥仔之前，我地試埋蔬菜米糊。

「阿仔，您係節瓜俠，食菜芯咪即係食自己啲同類？嘩哈哈哈哈！」

「爸爸，咁您又食豬肉？」

「………」

材料：
有機菜芯：2 條
日本雞蛋黃：半隻
米粉：3 湯匙
奶粉：2 湯匙

「阿仔，您睇下媽媽買俾您食啲野幾靚呀。我都冇份食呀！」

雖然話係有機，不過都將啲菜芯浸下好。

首先殺雞取卵，煠蛋取黃。凍水落蛋，一齊煠 15 分鐘至完全熟透。菜芯洗乾淨，用滾水煠四分鐘。然後用攪拌機，將半個蛋黃同埋兩條菜芯攪到稀爛。

另一邊箱，用熱水開好米糊。大約好似芝麻糊咁嘅稠度就得啦。

最後將啲菜醬倒落去，食得！

米糊有好香菜味同蛋黃味。我自己試咗一啖。奶味甜甜地，味道唔錯。但係顏色真係好好笑，有啲似人地卡通片啲放射性物質。Jayson 食到成隻花面貓咁。哈哈哈！

~ Lindberg

晚飯@泰妃雞

今次係第二次光顧這店。這店出名泰式海南雞飯，主要分別係醬汁同埋飯。價錢唔算平，不過質素都算唔錯。

泰妃雞
地址：灣仔三角街3號地下
電話：2838 8726

見係食晚餐，所以就豪少少。先來一個泰式魚肚羹。好多料，味道都唔錯。不過啲魚肚「爽」咗少少，我自己唔係咁鐘意。

串燒非常之有肉汁。好味！任選半打 $50。

海南雞飯的油飯都幾香，不過偏向乾身，所以我就麻麻地。雞已經去骨，好一碟適合懶人嘅「頹飯」。皮與肉之間有層晶瑩通透嘅油，雞肉嫩滑。加埋個辣辣地嘅汁，非常唔錯。

碟炒通菜就普通啦，熟咗少少。仲叫咗材椰汁三色冰，好味！


~ Lindberg


P.S. 食咗一半先記得影相，仲要得部手機。所以有啲核突。嘻嘻…

節瓜碌碌

正所謂：「節瓜碌碌，金銀滿屋」。我今晚都要去買張六合彩吧。哈哈哈！

Jayson 現在真的懂得反身，那麼就更加要注要，不要單獨留他在大床或沙發上了。

其實我都很怕把 Jayson 放上床上玩，或跟我們來個小睡。因為很怕跟櫻杏子一般的「賴嘢」。

「爸爸，唔好阻住我同媽媽細佬瞓回籠覺呀！」

早前郭生跟我說，他在咖啡店裡結識了一對父母。他們說為了改掉六歲大的女兒，不收拾玩具的壞習慣（因為有工人幫忙的關系），足足用了一整年的時間。學好三年，學壞真的只需三日。但作為父母，又沒有可能不讓小孩或甚至自己犯錯。從錯中學習，懂得分辨是非，將會是一個重大的挑戰。



~ Lindberg

花樣少年少女

跟排好鐘意聽 Orange Range 嘅《イケナイ太陽》：

原因當然係無線電視播送緊嘅《花樣少年少女》啦。正確啲講，應該係因為堀北真希先啱！
自從《交響情人夢》之後，都好耐冇試過星期日晚坐喺到睇電視。本來知道《花樣少年少女》係一套青春笑片，都冇諗住睇。不過一見到堀北真希，立即乖乖地坐低。堀北真希真係好可愛呀！

其實之前都睇過一集半集，堀北真希做嘅《鐵板少女小茜》。當時佢個樣……老實講，一啲都唔吸引。雙眼得個「大」字，演技就更加…

不過今次剪個短髮扮男仔，絕對可以俾十個「可愛」。如果佢真係男仔，我都會好似戲中嘅中津一樣，懷疑自己嘅性取向。可能係自己鐘意短頭髮嘅女仔啦。上星期日嗰集，堀北有個扮番女仔嘅長頭髮造型。個樣怪怪的，都係短頭髮好睇好多。嘻嘻…

講到女扮男裝，堀北喺戲中一定唔合格。比起《She's The Man》嘅 Amanda Bynes 差得遠。

不過堀北有「超可愛」搭夠。一定要繼續捧場！嘩咔咔咔咔咔…




~ Lindberg

我們也來振一振！

哩幾日不停聽見有關四川地震嘅新聞，網友亦都談論唔少。好多報導都集中喺啲小朋友身上。俾著我以前，我相信自己都會覺得好慘，不過只係留於表面。但自從有咗 Jayson，同埋失去咗威威之後，我徹徹底底地感受到父母嘅傷痛。

兒女係父母嘅精神支柱，乜野事都會將兒女放喺第一位，一生人就咁圍住心肝寶貝走。而喺內地嘅「一孩政策」之下，兒女仲係父母未來嘅經濟支柱。短短幾分鐘，所有寄託同希望都化為烏有。

每晚睇見啲新聞，都非常頂唔順。

我地用咗阿仔一啲錢去幫一幫啲小朋友同家長。雖然唔係好多，都算係一份心意。希望救援行動可以盡快完成。大家可以快啲重建家園，過啲新嘅生活。

莎莉蛋糕個網誌啲捐款連結好清晰。多少隨意，希望大家幫得就幫下啦！



~ Lindberg

拗柴記

今朝送咗 Jayson 去婆婆到，正當行樓梯落樓之時，唔知係眼瞓定係腳軟，唔小心定係叉錯腳，飛咗幾級樓梯，左腳落地即時拗柴，右腳膝蓋落地。都知道出事，見隻腳未開始痛，即刻衝落樓開車泊番自己屋企。如果隻腳開始痛，架車都唔知點算。

忍痛開車，突然間喺到諗，點解架車唔係自動波。唉…

返到屋企都仲未算太差，起碼都忍痛行得到。之後上樓狂搽跌打酒。見到有粒好似乒乓球咁大粒嘅野係腳面，狂捽之後好似消咗少少腫。諗住行到就返工，而且公司附近都有得睇跌打。

點知一落到樓，寸步難行，好鬼痛呀！第一時間再打俾 Jayson 媽。諗起阿托之前都試過，於是問佢點。佢話如果行到，可以去搵我地屋企附近個跌打師父，之前佢同樣拗柴都係睇佢。如果行唔到就要打 999，救護車會幫我打支針，打咗就行得到。

我於是慢慢試下行去睇下嗰個跌打。其間 Jayson 媽話要返嚟陪我去，我話唔洗啦。唔想佢擔心。

去到俾個跌打捽完又好番少少。仲有跌打（藥）丸食！

見唔行得，唯有向公司告假啦。番到屋企，個家務助理仲做緊野，於是就只好坐喺書檯做公司野。一坐就兩個鐘。當家務完成之後，我想起身送人。點知企都企唔到。勁痛！可能坐得耐，啲血走晒落去，所以腫多幾成。午餐想食杯麵，都差啲行唔到去攞。

後來整個下午都係瞓喺張沙發到過。不過就有好多公司電話，都係冇得瞓，休息一下。好灰呀！

今次事件搞到 Jayson 媽嬲咗我，仲要係好嬲嗰隻。我一心以為唔想佢膽心，唔想佢走來走去咁辛苦，原來大錯特錯！照顧唔到對方，咪更擔心。我知錯啦！



~ Lindberg

漁夫之寶

好耐冇用過哩部 Lomo Fisheye。雪姑話見我之前影啲魚眼相好得意，於是又攞出嚟玩。因為部機壞壞地，都唔知入面有幾多張菲林淨。

先來一張父子自拍：

出事… 唔記得部魚眼可以影近好多。越近就越好玩，所以反而正常距離冇乜特別。

而部 Lomo 校定咗光圈係 f/8 同快門（好似）係 1/250，用 ISO400 嘅菲林係室內都好難影。

哩幅 Julie 好笑少少：

媽媽跟節瓜豬肉飽：

姐姐跟細佬：

下次認真啲再影（玩）過！我都係比較喜歡用喺啲狹窄或者有壓迫感嘅環境，效果會得意好多。哈哈哈！

~ Lindberg

我要站起來！

「阿仔，您覺唔覺得自己有啲問題呀？」

「咩呀？」

「您好似身都唔係好識反，仲乜先學人企呀？」

「爸爸，咁我問您喇。您會唔會喺張床上面反來反去呀？」

「Err...」

「咁咪係囉！企下有乜問題喎！」

果然跟醫生說的一樣，冬天出世的小朋友，果然比較懶。

這幾天發覺 Jayson 雙腿越來越有力，所以便讓他站起來試一試。如果有些東西讓他扶著，他可以站五分鐘左右。好叻！

這是否叫做：「未學反，先學企」呢？

近排跟 Jayson 拍了幾張幾搞笑的相片。還因應雪姑的要求，影了一堆魚眼相，不過那些還要等沖晒。先看一些上星期和這個假期所拍的幾張相片。

《坐著扮可愛》

《看街》

《傻笑》

《兩姊弟在看書》

~ Lindberg

慶祝母親節

其實之前威威同 Julie 都有幫媽媽慶祝母親節，今年有咗 Jayson，本應該好好慶祝一下。不過我地兩個近排都攰到嘔，加上怪自己近排冇乜心情，星期日唔想出街同人迫，所以同嫲嫲講，話星期一先同佢去飲茶慶祝。星期六就去接 Jayson 媽放工，食一餐豐富嘅午餐，同埋陪佢剪個靚髮。

午餐去咗西環嘅「濤」，因為冇揸車，而且就近 Jayson 媽工作地方。

濤 Oonami
地址：西環堅尼地城加多近街39號地下
電話：2817-6626

其實早兩個禮拜都去過。當時我食咗個碎魚生飯。

雖然擺到明係啲頭頭尾尾，不過都幾新鮮。而且只係收 $55，想點呀？ 見隔離檯叫咗個 $138 嘅自選八件壽司定食，好似幾靚。喺銅鑼灣食開都要近 $180。心郁郁，所以決定再嚟過。
今次一人叫一份。可惜… 竟然比唔上 $55 嘅頭頭尾尾。

有幾件魚生嘅質素麻麻。帶子仲要唔係好新鮮。不過都叫做過得去啦。臨尾叫多個士多啤梨雪榚。據聞好好食，點知真係好好好好食！哈哈哈！

食完飯就去搵約翰。Jayson 媽剪碎啲頭髮迎接夏日，再加一個焗油。我就乖乖地，剪薄就算，冇電，冇整色整水。不過剪完，除咗發現塊面同 Jayson 一樣咁圓，仲發現自己好似「佬」咗好多添。天呀！唉…

Jayson 媽除咗係一個好媽媽之外，仲係一個好 Zoo Keeper。佢依家唯一嘅娛樂，就係喺休息嘅時間玩 NDS 嘅 Zoo Keeper。哈哈哈！

當日嘅晚飯就去同婆婆慶祝母親節。

星期日因為 Jayson 無端端發燒，所以更加要係留喺屋企。湊住 Jayson 簡簡單單過一日。晚飯原本想出街買啲野返嚟煮，不過都係得個講字。最後都係叫薄餅算數。唔知係唔係人人都等緊睇英超決賽，叫個薄餅等咗足足等咗兩個鐘！自己整的話，食完洗埋碟都仲得！

今次叫咗個扭扭批。上幾次叫嗰啲新款薄餅都好唔掂，對上一個迷迭香雞可以用非常難食嚟形容。不過最主要原因都係啲廚師冇心機整。

今次個扭扭批就正常得多。起碼啲料好味啲。不過都係嗰句，個大廚設計菜式冇為客人著想。薄餅上面放菠蘿，堂食冇問題。但係如果揸得唔夠乾水，外賣時就會出水，搞到個薄餅核核突突。可惜…

我冇為 Jayson 買啲乜野做母親節禮物，因為搵唔到乜野啱心水。都係等 Jayson 大個自己搞掂啦。但係又冇理由冇啲表示，唯有子債父還，錢債肉償，幫 Jayson 媽來個按摩啦。嘻…

希望各位媽咪都可以過一個開心嘅母親節啦！



~ Lindberg