有賣點但未夠班的「近又」

尋晚落咗旺角，想搵地方食野。行下行下，行到朗豪坊。原來咁耐以嚟，我地都未行過朗豪坊。見佢有好多野食，我地被一張廣告海報所吸引，上面有塊炸得金黃黃嘅豬扒。於是就上去睇睇。

近又吉列黑豚專賣店
地址：旺角亞皆老街8號朗豪坊L11-13舖
電話：2363 6633 / 2332 6868

未入門口，先睇一睇個餐牌。見價錢比銅鑼灣嘅 Tonkichi 平 $20 左右，便安心入去試一試。
隔離張檯有兩個姐姐。其中一個話飽，所以唔想食。但餐廳經理話一定要一人叫一個。其實檯面都有張卡提示客人。但間餐廳又唔係滿，好心就算啦。最後佢地就黯然離開咗…。

我地叫咗兩個定食。一個係招牌菜：吉列千層芝士黑豚肉定食，另一個有炸蝦同炸帶子。一齊撈亂食。

原本我想叫兩個招牌餐，一個要芝士味，一個要另一種味。但 Jayson 媽問我，如果唔好食點算。好彩有聽佢講！其實我起初都有懷疑過。所謂嘅千層芝士黑豚，只係用一塊塊嘅薄切豬肉片疊起，中間放一舊芝士，然後上粉炸。問題在於薄切豬肉片，睇相已經見冇乜汁。可能啲肉唔夠肥膏，所以冇豬味。任何肉類嘅味道，都係來自脂肪。雖然薄片入口鬆化，因為唔見肉汁，食起上嚟，只有芝士味。唔值 $158。

而醬汁方面，人地 Tonkichi 會俾一碗炒香咗嘅芝麻，等客人自己慢慢磨。除咗新鮮磨會香啲之外，新鮮炸野係需要時間，磨芝麻不失為一個好好嘅消閑節目。可惜，呢到冇。只有一碗唔多香嘅芝麻碎。而加入啲芝麻碎嘅醬汁就偏酸。佢啲野食未至於要咁酸嚟消滯。而且佢有「任食」椰菜絲（同白飯），啲沙律汁已經夠酸啦。

另外個炸蝦同炸帶子就不過不失。有兩隻大蝦同兩隻大帶子。佢嘅炸粉，印象中比 Tonkichi 輕一啲。都算係一個靚嘅吉列。

當 Jayson 媽飲個麵豉，佢忍唔住笑咗出嚟。因為十足十去燒味店飲嘅例湯。之前一晚賣剩嘅燒肉就放晒入去。不過呢到又唔係咁差嘅。個麵豉湯入面有炒過嘅紅、白蘿蔔，仲有啲炒過嘅豬肉。係感覺似例湯，但飲落都唔錯嘅。

服務方面，除咗以上講嘅死板要求，都算幾好。埋單仲識問人攞意見。我差啲想同佢講：「我想保留我嘅意見…」要食吉列，去番 Tonkichi 食豬扒啦！



~ Lindberg

維園探索日

上星期六是學校的探索日。沒有正式上課，同學們可以自由參加。除了課室有不同主題的活動外，還有些高年班的同學表演。我們一心想帶 Jayson 去玩一下，而且可以更加熟悉一下環境。好讓今個星期六的面試順利一些。

上面的房間，做成森林一樣。小朋友可以入去觀察一下，然後在「作業簿」上，圈下所見過的動物。Jayson 當然不會做啦。

學校的牆上有些遊戲板，適合 Jayson 這個年紀去玩。

以下的那塊板，其實起初沒有想過 Jayson 會對得準確，然後把膠紐插入去。因為都幾實，需要頗準確和力度。亦都要懂得分辨出那是頭或尾。所以他做得到，並拿起我們要求的顏色，都覺得幾驚喜。

而這個室內遊樂場，Jayson 就最喜歡玩。爬上又行落。

讓他自己一個玩…

都算很安全。

有些遊戲很明顯是訓練小朋友的小肌肉。

把米鏟進碗內，除了是一個瞓練之外，亦讓他們認識食物。當日的特定時間，更有老師教麵飽製作！真厲害！

「波…」

「小朋友，睇下幾得意！會吸起喎。」

「等我又試下先！係喎…」

除了可以玩之外，這次更給我們一個好機會，觀察一下學校環境、校風、和老師的質素。而令我最欣賞的，正是那裡的老師。

「爸爸，您做乜眼金金望住老師呀？」

「Jayson，啲老師嘅「質素」果然唔錯。第二時等爸爸陪您返學呀！哎吔… 哎吔…」

「爸爸，叫咗您唔好啦。您當媽媽冇到咩？等我教您斜啤，媽媽咪唔覺囉。」

以下是 Jayson 的「斜啤」的示範：

這裡的老師，除了年青之外，還很有活力。最重要是面露笑容。我覺得這個是很重要。之前去的那一所幼稚園，那些老師比較嚴肅，沒太多笑容。如果是我自己，也不太願意來上課。但這裡的老師，（除了漂亮之外）很明顯帶著一顆對小朋友的愛心。喜歡跟小朋友玩，不會當他們是一種工具。可以開開心心地上課，我覺得比可以學到甚麼更為重要。

回家之後，疲倦的 Jayson 很快便睡著了。

希望星期六的面試，順順利利吧！



~ Lindberg

Julie 又大一歲

尋日係 Julie 生日。我倆準時放工，去街市買咗半斤新鮮蝦同 Julie 一齊食。而我地自己就買咗啲外賣壽司。當然仲有個生日蛋糕啦！

前半嘅慶祝，Jayson 冇份參加。佢仍留喺婆婆到，等我地九點先去接佢。咁我地就可以專心預備一下，同陪下 Julie 喇。

我地覺得 Julie 係識得睇月曆。每個月嘅 5 號同 23 號，我地會俾佢食罐頭。而一到嗰幾日，Julie 就會勁嘈，嘈住要食好野。真係唔好話佢豬。

當 Julie 一嗅到啲蝦味，就即刻異常興奮，跳上又跳落。等啲蝦凍咗，孝敬過威威，我親手撕開之後，Julie 終於有的得食啦！

記得以前真係好好笑。威威好醒目，對耳同個鼻都好靈敏。當佢一知道有好野食，就會第一時間飛奔入廚房。而 Julie 就懞盛盛，有樣學樣，跟住哥哥飛入去。其實佢都唔知發生乜事。然後就不停咁叫，就好似話：「哥哥，咩事呀？哥哥，咩事呀？」

食完之後，Julie 異常之滿足。好冧地瞓喺媽媽身上。幾冇儀態！

休息一陣之後，我地就去接細佬番屋企。人齊就切蛋糕啦！

我地一人餵一個。之後 Jayson 仲同 Julie 玩咗好耐。雖然我分唔清 Julie 係同細佬玩，定係俾細佬玩，但見到佢地咁親親，真係好開心。

每當問起 Julie 幾多歲，大家都唔多記得。阿威喺我地結婚嗰年出世（冇錯！我地係未婚產子！），所以好記得。Julie 就反而記來記去都唔記得。次次都要睇番啲相先知道。原來已經 5 歲女啦！希望 Julie 青春常駐、身體健康、長命百歲！



~ Lindberg

拆利是 2009

昨天是正月二十八，趁還是正月，我們趕及做一件很重要的事。就是拆利是！

不知道是否因為金融海潚的關系，即使辦了新春團拜，Jayson 今年的利是，雖然數量比之前多，但金額還是比上一年少了 $100！幸好，今年有公公婆婆帶 Jayson 上酒樓，收獲出奇地豐富！嘩哈哈哈哈哈…

上排是親友的，下排是酒樓的茶客和姐姐的。

家人及朋友，收到 68 封。酒樓由年初一收到年初七。竟然收到 47 封！發達！

Jayson 也來幫手，幫手搗亂。哈哈哈…

「爸爸，您會將我啲利是錢放喺邊？唔好洗晒我嗰喎！」

「放心啦，我啲錢第二時咪又係您嘅。問題係多定少啫。呵呵呵呵… 等爸爸幫您開個戶口啦。」

「爸爸，唔通您想向我推銷迷債？」

而我們二人相比之下，只有寥寥可數的這些。但總算可以用來買些東西給 Jayson 吧。

「爸爸，點解頭先我聽見您話聽日去買咩遊戲嘅？」

「冇…！您聽錯喇！」

~ Lindberg

女陪打機員

如圖：

我終於有 PS3 啦！之前經過紅表同綠表嘅申請，多年嚟都被否決。不過老實講，有機都冇時間玩。所以我一直都冇「lur」地。但上個星期，同學 May 姑姑竟然喺公司嘅派對中，贏咗部 PS3！仲超好人地平讓俾我。簡直有如再生父母，感激流涕。契爺 Ardy 更陪我一齊去提貨，之後一日，好似驚我太得閑，俾咗一大堆遊戲同電影俾我！哈哈哈…

當我一裝好部機，第一時間，就睇下我之前買嘅中島美嘉演唱會。冇錯！當時我連機都未有，就喺日本 Amazon 買咗番嚟。但好失望，可能因為環境太暗，所以冇我想象中咁高清。
我覺得最好笑係 Jayson 舅父。佢一見我個 Plurk 話有 PS3，佢即刻問我攞個會員名稱，約我一齊上網打機。但我都未搞清楚部機點用，所以一直都冇得玩。希望之後有機會啦！

Ardy 借咗隻遊戲俾我，叫做 Resistance，係一個第一身射擊遊戲。呢個遊戲勝在可以玩好短嘅時間。一晚十五分鐘，都不失為一個好好嘅娛樂。而每當我一玩，Julie 就會跳上嚟瞓。佢除咗係一個好好嘅「女陪打機員」之外，仲係一個好好嘅手枕。其實以前打 PS2 嘅時候，佢都會跳上嚟。但當時個操縱桿係有線，俾佢跳來跳去都幾麻煩。依家用無線，真係方便得多！呵呵呵呵…



~ Lindberg

摘士多啤梨 @ 新生互動農場

上星期日，米B召集大家一起到農場去摘士多啤梨。作為裙下之臣，Jayson 當然要報名出席。同行的還有米爺。

一大清早便要開車。先去接米爺，然後要 10:00am 去屯門的新生互動農場。去接米爺其間，因為心分心去找電話，不少心撞向前面的大貨車。因為只是很細力，對方完全沒有感覺，但我的車頭便有一片凹陷。唉… 真的是老貓燒鬚。幸好機件沒有問題。但車頭蓋就這樣報消了。唉…

接過米爺之後，便全速飛入屯門。一路上米爺都很多話說，而 Jayson 就在四圍望。米爺後來去了「充電」，所以之後亦能量充足。

這個有機農場是由一班精神病康復者所打理的。有導賞員帶領我們參觀農場。

農場其實位於青山醫院旁，四周有貨櫃場。環境清幽，地方很整潔。之前沒有來過這一邊。原來青山醫院是這麼漂亮，有如一所渡假村一樣。

導賞員先帶我們去看他們種植的花卉。

「Jayson，薰衣草呀。」

米爺又有。

「食唔食得㗎？」

Jayson 一落地便要四圍行。樣子甚為興奮！

千萬不要阻 Jayson 的去路，否則有人就會發脾氣！

「我要行呀！」

之後獨自先行，拉著媽媽行到老遠去。

「行行行…」

「Jayson，唔入得去㗎！您唔見有網咩？就係唔俾啲狗仔同小朋友仔走入去玩㗎！」

可能因為行得太多，所以消耗了所有體力。最後不支睡著了…

一對新鞋都是泥。早知就穿舊的一對來。

在採摘士多啤梨時，Jayson 繼續大覺瞓。雖然不是有很多士多啤梨，但 Jayson 媽總算摘了一小盒。導賞員說這是美國種，味道香甜。

米B好可愛！

醒過來時，Jayson 又開始四圍走。

「媽媽，我要食呀！」

「知啦，果王！今晚先洗俾您食啦！」

因為收成不足，導賞員讓我們收割其他蔬菜以作補償。我們見那些油麥菜很靚，所以每個家庭便落田收割了一斤半的菜回家。新收割的油麥菜很香，跟超級市場賣的完全不一樣！

最後我們去了茶水室休息。那時已經過了十二時，小朋友才有機會吃午飯。米太公更請我們飲新鮮的士多啤梨奶昔，和士多啤梨果醬多士。好味！

是次活動，多得米B媽安排。希望以後有更多一起外出的機會啦。

~ Lindberg