沒有牛奶的牛奶餐廳

見雜誌寫，話銅鑼灣新開咗一間好似澳洲牛奶公司咁嘅餐廳，不過以日本北海道牛奶做招牌。咁我當然要去試一試啦。

北海道牧場餐廳 Hokkaido Dairy Farm Milk Restaurant

地址：銅鑼灣新會道6-10號京城大廈地下B舖

電話：9098 6922

地方好有日式簡約嘅感覺。望落去好似幾乾淨，不過啱啱過完午市，就好似打完仗咁。四圍都有用過嘅碗碟。

我叫咗 $35 一個北海道套餐，有例牌的火腿煎蛋、叉燒通粉、牛油多士、北海道咖啡。基本上同澳洲牛奶公司嘅一樣。侍應嘅服務，當然亦沒有澳洲牛奶公司嘅厲害。而且大家有冇發現，其實整餐都冇北海道牛奶。以為北海道咖啡有咩？其實都係用澳洲黑白淡奶。冇他嘅，係黑白先夠滑。相比之下，澳洲牛奶公司就名正言順得多啦。

不過喺餐牌上面，都有北海道 3.6 鮮奶。不過冇理由晏晝飲奶㗎。仲有 3 吋鮮奶炒蛋三文治，都話係用北海道鮮奶做。

食物上，只可以用失望嚟形容。煎太陽蛋，蛋黃凍嘅。新鮮用嘅雞蛋，唔洗放入雪櫃啫？火腿幾好味。不過都好難整到唔好味。牛油多士超失望。喺咁嘅環境之下，我會希望有塊有香香牛油味嘅靚多士。點知塊麵飽唔靚，牛油唔香。我屋企嗰啲好過多多聲。叉燒通粉落得太多胡椒粉，叉燒又只係得幾粒。唉… 最好係杯咖啡，香夾滑。

其實呢間小店，我覺得似啲外行人搞嘅。裝修格局上，包括眼睛所睇得見嘅野，都做得好啱。可惜抄啲唔抄啲，又唔係好識變通。最大問題係唔識煮野食。俾著係我，因為喺嗰一區，我會收多幾蚊。$42 一個餐都應該受得住。加上唔見佢做外賣，唔收貴啲唔得呢。俾啲好少少嘅野俾人。例如唔用港式叉燒，放兩片日式叉燒同粟米粒。麵包用好啲質素嘅，同切厚少少，用日本嘅牛油。再諗多一兩個同牛奶有關嘅套餐。咁先叫明正言順㗎嘛。而我最怕開放式廚房，係因為啲油煙。呢間小店嘅油煙好勁。試問一個喺附近做寫字樓嘅客，又點會想一身油煙味呢？



~ Lindberg

皺眉頭

不知從那裡學回來的…

影片中的皺眉頭，已經是比較輕力。拍片之前，Jayson 皺得更大力。但我覺得小朋友有時這些舉動，雖然有趣，但也不要太過鼓勵呢。

記得在我的小時候，發現媽媽衣櫃裡有一塊塊類似尿片的東西。我拿出廳，問媽媽是否我小時的尿片。當時媽媽跟朋友在打麻將，全檯大笑，然後媽媽叫我放回原處。那當然不是我的尿片。我以為是一件很有趣的事，拿了回去之後，又再拿出來問同一個問題。如是者，換來多兩三次的笑聲。之後當然是我的哭泣聲。唉… 大人們，那為甚麼起初你們要用笑來鼓勵我呢？



~ Lindberg

美肌 / 虐打 / 邊爐

尋晚一眾網友，原本諗住約去食一蚊雞。不過搞下搞下，可能覺得唔好食，所以轉咗去譚魚頭打邊爐。

（相片來源：莎莉。）

是晚網友，有杏子先生夫人、雪姑 & 王子、莎莉及莎翁、Maggie、Emilili、貓奴、熊貓俠同我。同一班咁嘅人食飯，真係要好小心。小心笑到啃死！

首先大家為咗睇 Laughing 哥還陽，所以搵咗個電視位。可惜都係離電視太遠，聽唔到聲。但多得王子，佢部電話可以收電視（勁！）。雖然畫面收得唔好，眾人就睇酒樓嘅電視，聽王子嘅收音。真係辛苦大家啦…

而我地發現原來貓奴真係一個好好嘅導電體。事關王子部電話條天線收得唔好，但只要俾貓奴揸住，就會收得好啲！絕對有天線放大器嘅功能！可能就係因為咁，啲貓就鐘意瞓喺佢身上「收風」。哈哈哈哈哈…

莎莉呢日還番一套《What's Michael》俾我，佢話原本諗住下星期去馬灣玩先至還。佢話我有車喎。天啊！馬灣點開車入去呀？佢另我想起一位「好」同學。我地相約去行山，佢竟然帶本字典還俾人！玩野啊…！笑死我。

阿 M  不停咁為我地整野食，流露出佢善良嘅一面。相信好快嫁得出啦。

而另一邊箱，當我地一路食，貓奴就喺我隔離，不停為他人出頭而虐打我。叫佢做「衰人一號」就係冇叫錯！

之後莎莉嘅美肌相機出場。我都唔知 Fuji 嘅相機有「美肌」功能。功能上，大概係利用面孔探測，然後整走面上啲細小嘅黑點，同埋順滑咗個表面。白雪被影完之後，真係後生咗幾十年，塊面滑到好似 Jayson 咁會反光呀！之後大家不停玩呢部部相機。有部咁嘅相機，真係妝都唔洗化。我睇我都係時候要出手買啦…

我地不停咁食，不停咁叫。最後食咗勁多野，超飽。雖然埋單嘅時候有啲勞氣，不過真係食得好開心。希望下次會約到更多人一齊玩啦！



~ Lindberg

回本自助餐 @ 港畔餐廳

食自助餐講回本，有兩個層面。理性啲嘅，只係希望樣樣試啲，食番「餐牌價」就滿足。兇狠啲嘅，就要食回「成本價」。我通常想做後者，因為好少自助餐嘅質素，係好到我會願意只係用「餐牌價」去買。但每次食得太兇狠，最後都係壞了肚皮。但估唔到今次去洲際食早午餐，我可以笑住話：「回本啦！」哈哈哈…

港畔餐廳 Harbourside Restaurant

地址：尖沙咀梳士巴利道18號香港洲際酒店下層

電話：2313 2323

早午餐由 11:30am 開始至 3:00pm。表面上，價錢一啲都唔平。$639 一位。如果唔飲香檳，就 $539。簡單嚟講，如果鐘意飲酒，$639 一定食到「成本價」，而 $539 食回「餐牌價」，一啲都唔難。

去到第一件事，當然要餵飽 Jayson 先啦。有牛油煎魚、西蘭花、小棠菜、龍蝦、日式蒸蛋、飯。

「快啲手啦，爸爸！」

今次係 Jayson 第一次全餐大人食物。好彩佢都食得幾開心。

另一邊箱，我地有大大隻波士頓龍蝦！Jayson 媽仲整咗半隻凍蟹。蝦、帶子、青口，全部都好新鮮。煙三文魚好好味！但因為上次出咗事，到依家都冇生蠔食。

凍肉都算唔錯，不過我鐘意君悅酒店咖啡室嘅多啲。

Jayson 食飽之後，有如大爺一樣咁坐。呢到啲服務好好。Jayson 唔鐘意第一張餐椅，經理姐姐就去攞過另一款俾佢坐。服務非常周到。

魚生好新鮮。三文魚、吞拿魚、章紅、甜蝦、帶子，樣樣都好甜美！

天婦羅就試咗幾舊。因為要安置 Jayson，所以都等到凍咗。不過都還可以啦…

最驚喜係燒牛肉。一入口，好香好嫩，好有肉汁，好好味！起初都冇為意，原來係用和牛做。超正！即刻攞多一塊。新鮮煎嘅鵝肝都好好味！雖然高膽固醇，一次半次冇所謂啦！哈哈哈…

Jayson 開始無聊，要玩 Thomas 喇。

薄餅個餅底有啲唔同，都幾特別。片皮鴨有人整埋俾你。而啲芝士，真係食到「嘩」一聲！飲多幾杯香檳都得！

面對靚靚嘅海景，慢慢食，真係好舒服。我覺得比食晚餐自助餐好好多！而且如果晚餐食得太飽，夜晚瞓覺都唔舒服。所以如果以後再食自助餐，我都會選擇午餐時間。

「Jayson，豆沙飽呀！」

冇幾耐，Jayson 食完生果就去咗瞓。

除咗以上食物，其實都仲有好多熱食、點心、粉麵等等。湯都有三款，其中一款係冇乜魚翅嘅魚翅。

大戰過後嘅場面…

對於一個大細路（我）嚟講，糖果一定唔少得。最正係有 Jelly Belly。哈！

整多球 Haagan Daz 雪榚。其實可以叫佢整班戟，但實在已經係太飽啦！

仲有好多好多甜品。當中包括十幾蚊一舊，顏色鮮豔，外脆內軟嘅法國 Macaroon。

以上所有食物，要回「餐牌價」，一啲都唔難。

凍海鮮拼盤：$120
魚生拼盤：$80
燒和牛兩片：$140
鵝肝：$80
甜品：$120
果汁：$30 x 2

係咁依，計平佢都已經 $600。如果唔貪心，主力食啲貴野，要回「成本價」都唔算妄想。但如果鐘意飲酒，回「成本價」簡直易如反掌。事關佢俾嘅香檳係 Moët & Chandon，三百幾蚊一支。我覺得好好飲。雖然我唔係好飲酒，但我都好興奮地飲咗一支！咁都仲唔回本？！呵呵呵呵…

好耐冇試過食得咁開心。可能因為飲多咗，轉個頭同 Jayson 瞓咗一陣。之後就精神飽滿，繼續去玩。真係要多得 Jayson 媽嘅安排。



~ Lindberg

Show Me Your Smile

星期日，我們帶了 Jayson 到九龍公園玩。

最近，Jayson 媽教 Jayson 展露笑容。他每次也有照著做，但效果好像有點出入…

「Jayson，show me your smile！」

「嘻…」

這張自然一點…

然後又來一個鬼靈精的…

「Jayson，我係話 show me your smile，唔係要 funny face 呀！」

「嘻…」

最後更不再理會我…

唉…

九龍公園有個大水池，上面有好多不同種類的鴨鴨。原本以為 Jayson 懂得甚麼是鴨鴨，但原來他只懂得那些在書本上，黃色的鴨鴨。指著實物，他不會叫。但指著池邊解說的圖片，他反而會叫「鴨鴨」。看來，看實物真的是教育的重要一課。應該要帶他去看一看「師奶人」吧。

在池塘邊，Jayson 看了很久。比較吸引他的，是那些飛來飛去的麻雀。慢遊的鴨鴨，沒有多大興趣。

之後去了兒童遊樂場。這裡的沒有維園的好玩，因為沒有 Jayson 最喜歡的鞦韆。只好玩滑梯，四處跑跑。Jayson 開始發現滑梯有趣之處，漸漸喜歡玩。見天開始陰，跟夾著他早點回家吧。

~ Lindberg

祝白雪生日快樂！

白雪，生日快樂！祝妳福如東海，壽比南山！

３月２２日牧羊座的妳，充滿自信，衝勁，勇往直前；叛逆性很重，爆發力很強；崇拜英雄，重視榮譽和責任，好勝心強。優點是知道自已在追求什麼，而且能夠充滿幹勁，全力以赴。

出生於這天的偉大代表人物有：安德魯‧洛伊‧韋伯（作 Phantom of the Opera 嗰位），同埋我。呵呵呵呵呵呵呵呵呵呵呵呵…

再祝妳心想事成，年中無憂，成日都開開心心，快啲生多（幾）個，青春常駐，同 Anson 出街，人地以為你地係兩姐弟，而最重要，當然係身體健康啦！恭喜恭喜…



~ Lindberg

老闆著草

近排工作好忙。先前忍痛裁走咗一個得力助手，啲工作要大家分咗佢。之後大肚員工突然去咗生產，啲野我自己攞埋嚟做。點知我老闆落井下石，話要離開公司，要我做埋佢個份。天啊…！

真係估唔到，我老闆比我更早離開公司。間公司係大家一手一腳搞出嚟。之前我想走，佢叫我留低。轉個頭自己為咗自己嘅前途而走咗去。真係講粗口都講唔切。不過當佢話俾我聽佢要走，我覺得鬆咗半口氣。佢係一個好好嘅「數佬」，有佢喺公司，感到有啲安全感。但依家啲生意咁差，邊到仲會有安全感呢。而且出少佢份糧，公司都易做些少。

但正係因為少咗個靠山，所以好大壓力。無時無刻都感到好似有舊大石壓住個心口，透不過氣來。好想同自己講，呢個係百年難得嘅機會，第二時就可以同 Jayson 分享一下啲經驗。眼前嘅爛攤子，唯有煮到埋嚟就食啦。


~ Lindberg

P.S. 以前一直以為自己已經升到頂。點知原來仲有「神檯」呢個位。唉… 老闆（淨低嗰個）話要加人工，我叫佢唔好玩啦。捱得過呢兩個月，鐘意點都得！


P.P.S 其實「著草」應該唔係指上面啲草，而係草鞋。穿上草鞋咪走佬囉！睇怕自己都要買定一對。唔知 Nike 有冇出呢？

花展 2009

上星期日，見朋友們都去過花展影相，所以我們也帶 Jayson 去花展看花花。

「爸爸，點解我睇唔到上面啲花花嘅？」

「梗係啦！我地都冇入到去！鬼叫我地遲起程，人山人海都入唔到去啦。」

「咁張相…」

「前幾年影㗎。都係嗰啲野啫。嘻嘻…」

當向會場進發時，我們經過兒童遊樂場。Jayson 見到遊樂場便非常興奮，不停地哼著歌。我們怕他要停著玩，急急步向花展會場去。

到會場見到人山人海，排隊買入場券已經叫人頭痛。所以只好放棄。轉身便帶 Jayson 去遊樂場玩。

「爸爸，一早就應該帶我嚟呢到啦！」

「鬼靈精！」

媽媽先帶他去玩滑梯。很明顯不太喜歡。

「驚驚…」

「媽媽，我要玩呢個！」

「得唔得呀您？」

「嗯…等我企高高睇下先…」

不一會，有人開始發現有點無聊…

「媽媽救命呀！」

「嚇死人咩…」

「又係您自己要上去嘅！」

之後又去了打他最喜歡的的「如意算盤」。算盤的兩邊，都有很多小朋友在玩。

「爸爸，對面個哥哥搞到我計錯數啦！」

「同妹妹一齊玩啦，J-boy。」

「唔要！我要米B！」

眼前一個鬼妹仔也沒有受到引誘，果然是一個好男人。

「梗係啦！（我知您影住我嘛…）」

最後，亦都是最精彩的節目：蕩鞦韆！

「好嘢…」

除了小朋友自己高興之外，父母看見這樣的一個笑容，都即時充電！

「媽媽，您充夠電未呀？」

其實都不需要特別帶小朋友四處去玩呀。相信他大個之後，也不會記得去過那裡玩。適當地接觸新事物，的而且確可以幫助小腦袋的成長。但一些高質素的親子機會，簡單之餘，大家又開開心心。


~ Lindberg


P.S. 但玩完之後，Jayson 又患上感冒。我們已經很小心，不停跟他抹汗。可能是之前的感冒未清，有機會又發作。唉…

十六個月報告

遲了很多的報告！

體重：25 磅
牙仔：10 隻
頭髮：唉…

發展報告：
行動方面，已經是獨個兒走動，也不用擔心。節瓜四圍走，非常自如。

最明顯的進步是在語言上。不像之前我們叫他說甚麼便說甚麼（那只可算是發音），Jayson 開始可以嘗試表達自己。不過有時都幾好笑。例如他知道「奶奶」是他可以食的食物，當他見到麵飽時，他會說：「奶奶」。他會叫餵他的女人做「婆婆」，包括媽媽在內。這令媽媽很生氣。只有叫「爸爸」比較準確，大概是因為家中沒有其他閑著的人吧。

另外一樣比較明顯的，就是脾氣大了。以前有些肯做的東西，現在都很費力。例如坐便盆、換片片、食飯等。但我們覺得都是一些正常的表現。雖然 Jayson 媽很擔心有沒有能力教得 Jayson 好，但我反而覺得有這些「反叛」表現，才可以給我們一些磨練。如果 Jayson 由頭到尾都是乖乖的，反而會令我們有些擔心。

這個月病了一次。這個應該跟有沒有上學沒有太大關系。幸好都算痊愈得快。沒有（機會）打流感針，下星期希望有時間去打水痘針吧。



~ Lindberg

Julie 想殺我呀！

做完一個問卷之後，原來 Julie 有八成想殺死我呀！

Is Your Cat Plotting to Kill You

我重複答過以上啲問題兩次，答案都係一樣！Julie 等我仲咁錫您！

「爸爸，唔好亂信人啦。我邊到會貪您好食啫」

有貓嘅朋友，不防玩下。睇下面啲解釋，好似幾有道理。不過當然搞笑成份居多啦。

http://www.catswhothrowupgrass.com/kill.php

但 Julie 真係成日都好似下面咁㗎！！！救命呀… 哈哈哈哈…




~ Lindberg