養和名物

每當諗起養和醫院，除咗欣賞佢嘅無敵馬場景之外，

都例必掛住佢嘅「貴妃雞飯」。第一次食，係當 Jayson 出世嘅時候。年初我自己入廠，冇咗條盲腸都要照食（好似冇咩關系…）。今次 Jayson 入廠都無忘整番碟。嘻嘻…

起初聽朋友推介，都唔多相信醫院會有好野食。但諗深一層，養和話晒都係俾唔少有錢人住嘅地方。啲野食當然要有番啲質素啦。

鐘意佢嘅貴妃雞，主要係因為夠味。因為夠鹹，所以胃口都好啲。

今次聽到隔離床話啲煲仔飯好食。雖然要耐少少（煮一粒鐘），我地都想試一下。除咗煲飯，我地再叫咗碟叉燒貴妃雞飯，同埋一碗雜錦冬瓜粒湯俾 Jayson。

煲飯真係冇要我地白等。好食到呢… 特別在啲飯同普通嘅煲仔飯唔同。食開嘅煲仔飯，啲飯好「白」。但呢到嘅好唔同，啲飯吸晒啲餸汁。我地叫肉片煲仔飯，每粒米飯都吸收到啲肉汁，呈啡色狀，所以一啲都唔會乾，唔會硬。Jayson 食得好開心。而啲飯焦當然要留俾番我啦。呵呵呵呵…

跟住我地又發現，原來除咗貴妃雞，佢啲叉燒都好有水準。肥瘦適中，同西苑有得比！而個瓜粒湯都唔錯，Jayson 都飲到停唔到口。哈哈…

但當然，醫院飯餸，基本上同監倉嘅一樣，望都唔會望去食啦！！！祝大家身體健康！



~ Lindberg

心痛歷程：悲傷背後

悲傷背後，原來是…

玫瑰疹！

玫瑰疹是由過濾性病毒所引起。因為身體要對抗病毒，所以會提高新陳代謝，導致有發燒的徵狀。通常「戰事」會持續四五天。當病毒被打敗，身上便會出一些紅點，而發燒亦會隨之而退。這些紅疹並不會引起皮膚的不適，再過兩三日便會退。

住院期間，Jayson 還真的很合作。除了一見到教授或護士姑娘便會自自然然地喊之外，打點滴的不適、食藥打針等，都很乖地接受。但清早醒過來便會扭計。後來才知道他要「出去」。跟在家中一樣，他要出「廳」玩…

病房外一個活動的空間。那裡有很多玩具。有 Jayson 最喜歡的：

就算只有一隻手能動，他都可以玩整天也不厭。

還有車子坐：

真的跟家校的遊樂場有得比呢。

而房間的設備很好。基本上跟我上次住的差不多。床上有娛樂平台，可供看電視或上網用。Jayson 迷上了 442。每晚都要看電視而不願去睡。（作為父母，如果不知道甚麼是 442，小心會跟時代脫節。哈哈哈…）

而我終於知道為甚麼 Jayson 有時會唱：「開心」，然後跳舞。原來那是從《米奇妙妙屋》學回來的。

我們亦帶了不少玩具，讓 Jayson 不會感到陌生或苦悶。

而他閑來便繼續看電視，玩腳趾：

因為他已經懂得叫去大小便，又加上飲了很多水和打點滴的原因，整天都忙著應付他的「Wee…Wee…Poo…Poo…」。而教授因不敢確定病因，而落重抗生素。這個令到 Jayson 腹瀉得幾厲害。見到也心痛。

三晚之中，替他沖了一次涼。

最開心的，莫過於可以拔走打點滴的針，然後一起回家吧。

再一次多謝大家對 Jayson 的關心。他能夠得到這麼多人的疼錫，我們一家都感到很幸福。藉此希望身邊所有人，都身體健康，龍馬精神。



~ Lindberg

星星同學會茶聚

雖然今次少咗幾個舊面孔，但又多張幾個生面口。尋日嘅《星星同學會茶聚》，真係可以用「火熱動感…啦啦啦」嚟形容！是次參加者有：Yan Yan Chu ，熙熙兩兄妹、Felix、哲哲、騫騫、靖天、凱淇、彭太、皓皓、瀅瀅、班長、貓奴、莎莉、米爺、茄茄、Emilili、火羽、米B、Eason、Anson、同埋 Mavis。

首先，要多謝一班贊助商，包括 Cake²、Huggies、海港城眾商號（特別係 Chicco、Elle、Mothercare、同埋 Nici）、荷花親子中心、Fat Angelo's（提供場地及部份食物）。

其次，本人非常抱歉。因為：

1. 節瓜俠因病唔可以同大家一齊玩。
2. 場地原本應該大啲，不過俾人偷咗一半我都唔知。激死我！
3. 因為 2)，所以之前想玩嘅遊戲都好難搞得到。
4. 原本 Toy R Us 有堆小禮物俾我地，點知佢地無啦啦缺貨！

敬希大家原諒。雖然有美中不足，相信大家都應該玩得幾開心呱… 起碼我就好開心喇。嘻嘻…

見到一班小朋友可以健康快樂成長，作為一個家長，真係一件好開心嘅事。

另外值得一提係彭太送嚟嘅蛋糕同杯形糕餅。個大蛋糕又靚又好味。而啲杯形糕餅真係靚到嘅捨得食呀！

臨別嘅時候，發生咗樣好搞笑嘅野。白雪抱住 Anson 喺到親吻大家拜拜。我收到一個香吻，真係甜到漏。跟住話要錫我手上嘅米B，我好自然地抱佢俾 Anson 錫一啖。錫咗之後，我同米B爸講：

「哎喲，你個女俾人錫咗啖呀！」

「問題唔係我到，係喺你到呀！你點對得住你個仔呀？」

「係喎！天啊！」

「錯晒呀你！」

「對唔住呀 Jayson…！」

希望好快又有機會同大家再玩過啦！



~ Lindberg

心痛歷程：節瓜入院記

以前都不太理解何謂：「身體髮膚受諸父母」。直至自己當上父母的時候，才明白這個道理。原來真的可以很痛很痛。

Jayson 星期四晚開始發燒。小朋友突然發燒，其實都真的見怪不怪。而 Jayson 只有發燒，並沒有其他病徵。吃過退燒藥之後，燒就退了，所以我們都沒有太過在意。Jayson 媽半夜為 Jayson 撿查一下，再要吃多次退燒藥。因為他醒來後都幾扭計，所以令媽媽很疲憊。第二天，Jayson 媽決定到婆婆那裡陪他一日，並且休息一下。

午飯過後，吃過退燒藥後還不退燒，所以 Jayson 媽為他塞肛。藥力理論上會快一點， 但燒還是沒有退下來。見勢色不妙，Jayson 媽叫我提早回家，一起帶 Jayson 去看醫生。但去到鄒醫生的診所，才發現她正在放大假！心目中沒有他選，而且擔心 Jayson 發燒太厲害會抽搐，所以我們直接到了醫院。

那時已經過了六時，兒科專科已經過了辦公時間，我們到門診看了個黃綠。他說除了喉嚨有點紅之外，便沒有見到其他病徵。但因為都燒到 40 度，都建議留院觀察。正當心裡十五十六之時，Jayson 輕輕抽搐了一下，然後大喊。我們便立即決定入院。

姑娘為我們辦理入院手續，並立即依主診醫生的指示，為 Jayson 打點滴。幾個月前，我都打過點滴。很不好受。打在 Jayson 的小手上，更加不好受。

主診醫生是 Jayson 媽以前的老闆。離開了大學之後，楊教授到了養和醫院的兒科應診。之前沒有看過教授，但有同事的女兒曾經看過，並且對他的評價很高。他檢查過 Jayson 之後，跟我們說：如果 Jayson 有其他病徵，他會安心一點。那些喉嚨紅腫，並非如那位黃綠所說的發炎。他又說：如果 Jayson 沒有那一下的抽搐，他也會安心一點。因為如果因高燒而抽筋，應該抽好一段時間，不會短短的一下。由開始到見到教授，Jayson 分別抽搐過三次，每次都只有一下。因此教授建議為 Jayson 抽取 CSF。

教授一直都跟 Jayson 媽說一些我不能太理解的醫學名詞。當他提到 CSF，我都不已為然。直至看到 Jayson 媽的眼淚不停流下來，我就開始明白。CSF 是指 Cerebrospinal Fluid，即腦脊液。教授怕 Jayson 染上了腦膜炎。

起初我們都很抗拒要為 Jayson 抽。教授說可以等驗血報告出了之後，看一看白血球有沒有特別高才決定。原本我們都希望先看報告，但教授轉頭又走過來游說。因為如果真的是腦膜炎，醫的方法完全不同，而且時間越早越好。因此我們忍痛讓他去抽。從手術室傳來的喊聲，門外的我倆都很心痛。一支針要插入脊骨間的軟骨，好比用刀插進我們心口般痛。

過了十五分鐘左右，教授出來跟我們說，Jayson 掙紮得很厲害。刺了三針都不能好好刺進去，最後只好放棄。等待第二天的驗血報告才決定。一刀不夠，還要三刀…

第二天的報告：白血球正常。真的要謝天謝地！雖然之前的三針好像令 Jayson 白受苦。但為求心安，如果給我們再選擇一次，都會讓教授去抽。

這天發現 Jayson 面上有些紅點。那並非玫瑰疹，教授說可能是對抗生素的反應。

照現時的徵狀（甚麼都沒有），應該是玫瑰疹。今天有些聲沙沙，可能因流汗太多，冷氣又比較凍，所以也可能染上了傷風。唉…

這幾晚都是 Jayson 媽陪著 Jayson。一間大房有六張床。一個小朋友哭醒了，就會弄醒另一個。真的辛苦了 Jayson 媽。希望星期天可以出院吧！Jayson，加油呀！

~ Lindberg

P.S. 很感激大家的關心和為節瓜俠打氣！

心痛

~ Lindberg

千篇一律

終於（竟然）寫到一千篇！

用咗將近三年嘅時間，寫咗一千篇文章。真係好難相信當開始嘅時候，我連打隻中文字都唔識。自問千篇都係一律用心寫，雖然錯字多，文筆唔好，但總算並非粗製濫做。

呢個網誌嘅原動力，係想記下身邊嘅事物。得到大家嘅捧場，更加令到《節瓜俠大戰 Kidad 王》成為我地一家生活嘅一部份。

呢兩年，我寫咗好多《我們的水泡》，記錄如何由一個「小水泡」變成一舊「節瓜俠」嘅過程。生活由「自轉」，變成「圍住 Jayson 轉」，過程點滴在心頭。作為父母係一件好有挑戰性嘅差事，所以希望可以將過程，同其他父母分享。藉此可以互相勉勵一下。
《旅遊日誌》自從有咗 Jayson 之後，都冇乜去過旅行。但最近回憶記錄番十幾年前嘅美加之行，回味得好回味。

而《Lindy Photos》就俾咗一個空間我，分享對攝影嘅興趣。希望大家唔好見笑。

自己已經好耐冇落廚，但《行家食評》繼續展示我為食嘅一面。希望有朝一日，可以再認真地煮過痛快。

而其他嘅日記同感想，就俾我自言自語一下啦。

心裡面，突然響起一首歌：

「來日縱使千千闕歌　飄於遠方我路上
來日縱使千千晚星　亮過今晚月亮
都比不起這宵美麗
亦絕不可使我更欣賞
啊　因你今晚共我唱…」

其實仲有好多野想寫，例如統治地球嘅大計、節瓜俠係天生保護地球嘅原因等等。希望以後有機會慢慢同大家分享。

最後，多謝大家一直以來嘅支持！



~ Lindberg

坐定定秘笈

好多朋友見過 Jayson 都贊他很乖，坐得好定。其實觀察過其他小朋友，他們只是比較有活力。都未至於真的有甚麼大問題。如果見過 Jayson 六七個月大的表弟，就知道何謂真正的頭痛。其實，如何才可以訓練到可以坐定定呢？

「爸爸，好明顯表弟唔多鐘意您抱。」

「邊關我事呢？！係佢要四圍跳咋嘛。」

我未知道坐定定是否一定是一件好事。因為同一個例子，不可以應用於每一個小朋友身上。我贊成這跟小朋友的性格有關。但除此之外，外來的因素也有很大影響。當父母的，像我們一樣跟小孩子玩得比較斯文，小朋友自然會也斯文一點。如果用一個相反的例子，可能會比較有說服力。例如家中提供一個活躍的環境，爸媽會讓小朋友多一點刺激（大動作活動，如：拋高高），小朋友自然會活潑一點。

但如果談到要避免令人頭痛的活躍，我覺得有幾點可以注意一下：

注意飲食：小朋友的腸胃比較敏感。要遵循醫生的指示，不要過早讓小朋友接觸大人的食物。因為如果導致腸胃不適，當然睡不好，坐不定啦。更加要盡量避免刺激性的食物，如可樂、茶等。

貫徹始終（例一）：食飯就要坐好，吃完也不應四圍走。要做到這個並不容易。到嘈雜的酒樓飲茶已是對小朋友定力的一項挑戰。父母可以考慮，盡量安排小朋友在大人用膳期間，有充份的「節目」，例如一起吃東西、吃生果。當大家都用膳完畢，除非要走，也不可以落地。當大人在閑聊時，可以給小朋友書或玩具。但我覺得次序是很重要。適當的時候做適當的事。不要一開始便拿玩具出來。

貫徹始終（例二）：茶樓是食飯的地方，不是水族館。昨天當 Jayson 想落地玩時，我很嚴肅地跟他說：爸爸坐著，媽媽也是坐著，那您一個人要跑到那裡去。之後拿些東西分散他的注意，一家人又可以安樂地吃飯。

不要過份遷就小朋友：雖然小朋友不明白道理，但我覺得「人之初，性本貪」。貪吃、貪玩、貪睡、貪注意…。因為這是動物的本能。如果他知道可以做某些東西，自然會嘗試去做。挑戰大人的「極限」，是他們每天都在做的東西。

雖然以上都是一些規律，好像在規限著小朋友的發展，甚至乎想象力。但我覺得都只要在規律上做得好，反而會換來更多時間和空間，讓小朋友可以去探索。做得好的話，能夠貫徹始終，規律可以不帶痕跡。是帶壓抑性的規限，或是有建設性的準則，都是靠我們如何去引導。

對著 Jayson，我們會有很嚴厲的「不」。事有可為，不可為。人生是要面對各種錯敗和拒絕。要喊要反抗，都會用耐性去堅持。但另一方面，我們會給他更多的正面支持和鼓勵。如果有需要改變小朋友的行為，人家說都要用上一年半載的時間。所以家長的耐性，始終都是最重要。

記住：不要玩您的食物，除非您是在吃自自己的玩具。這是加菲貓的金句。



~ Lindberg

抵食得離譜的「濤」

上星期六去接 Jayson 媽放工，為咗獎勵我，我地去咗西環嘅「濤」。記得以前去食午飯，已經好抵食。點知過咗一排會變成咁！變得離譜地抵食！

濤
地址：西環堅尼地城加多近街39號地下
電話：2817-6626

基本上我每次都係叫「角切魚生飯」。「角切魚生」令人嘅印象係啲原件魚生嘅頭頭尾尾，切定一堆放喺到。有人叫就俾，冇人要就掉。就好似「亂葬崗」一樣！而且因為切定，加上乜都有，所以其實都幾易壞。但呢到嘅做法好好。雖然都係啲頭尾，但每一粒都係由一整塊新鮮嘅魚生上面切出嚟。多款新鮮肥美嘅魚生，份量仲要大得驚人。一個大食嘅男人都係勉強食得晒。但都只係收 $60！死未？！

Jayson 媽因為唔想同我食同一樣嘅野，所以今次整咗個磯燒帶子吉列海鮮定食。海鮮有蝦、魚、蠔。雖然吉列未必算係最好，但都有一定水準。價錢就貴少少，但都係講緊 $80！

隔離間酒吧都係佢地嘅。如果人多，都會開埋嚟俾人坐過去。抵食又好味，難怪呢間野咁深受歡迎啦。



~ Lindberg

記憶

曾經因為自己嘅身世，胡思亂想過「記憶」呢樣野。

如果自己唔係細細個就嚟咗香港，會唔會有另一個小朋友踏入咗我所行嘅路。沿住我所有經歷，一樣咁成長。有著同一班朋友，讀完同一間中學讀大學，識咗 Jayson 媽，出嚟做野，之後生咗 Jayson，依家喺到打緊呢篇野呢？咁…雖然肉體上嘅「我」可能唔係同一個人，但精神中嘅「我」，有住同一堆記憶，所以都係同一個「我」。會唔會呢？

正當思考緊呢個問題嘅時候，收到一個都幾唔開心嘅消息。有一個大學同學失咗憶。我一直都以為失憶係講故仔先有嘅野。雖然以前讀書知道係會，但總覺得唔係咁神化。原來事實真係咁神化。而且仲比做戲痛苦好多…

近幾年嘅記憶冇咗。認得面前嘅男人，但唔記得大家已經結咗婚，更加唔認得面前嘅細路女係邊個。我地以前成日叫佢做野猴子，活潑開朗嘅性格，加上信仰嘅支持，令佢可以積極面對。護士姑娘同佢講，可慶幸嘅係佢忘記咗喺醫院最痛苦嘅時刻。聽到好心酸。

呢兩日好想打個短訊俾佢，但每當記得嘅時候，又覺得太夜唔敢打。正當《愛得太遲》嘅音樂前奏開始響起，尋日喺街上面俾我撞到佢… 嗯… 應該係佢撞到我。起初佢唔多肯定係我，後來見到喺我後面嘅 Jayson 媽（佢地係中學同學）先至可以認定。（其實都好難怪，即使唔係失咗憶，我都變咗好多。）我開心到捉住佢對手彈彈跳。見佢好精神同一家人行商場，真係好開心。因為腦炎有後遺症，對噪音同閃光有敏感，所以佢唔可以去人多嘈吵嘅地方。可以撞到佢，都可算係一種緣份。見佢帶住耳塞，一輪咀咁不停講野，除咗發福咗啲啲之外，就同我初認識嘅野猴子差不多。從佢媽媽眼中，還可以見到啲憂心。不時提醒我地，佢有啲野唔係記得好清楚。但見到佢咁，都覺得算係不幸中嘅大幸。

雖然野猴子睇唔會到我寫嘅野，因為佢唔用得電腦，但我都希望可以喺到祝福佢同佢嘅家人。我覺得佢真係好叻好叻。我會積極搞一次寧靜嘅聚會，等佢可以番新一下同我地一班傻人嘅記憶。



~ Lindberg

叫人食飯

前晚因為 Jayson 媽跟舊同學的聚會比預期的長，所以我們沒有接 Jayson 回家，讓他在婆婆家睡一晚。據悉他玩到十一時左右才睡，但幸好沒有特別的扭計。

昨晚回家吃飯，感覺 Jayson 好像突然成長了不少。以前跟 Jayson 玩：「Peek-a-boo…」他只會在望到我們之後傻笑。但昨天，他竟然跟我們說：「I see you！」我驚訝得下巴也掉了下來！之後叫他錫錫爸爸，他跟我來個咀對咀。整個人即時溶掉。果然士別「一」日，刮目相看。

「爸爸，我大個仔啦嘛！」

晚飯的時候，Jayson 還漸漸地學會自動叫人食飯。

同場加映：Jayson 的為食情況。哈哈哈…



~ Lindberg

提示：星星同學會茶聚

《星星同學會茶聚》

日期：2009 年 7 月 26 日（星期日）

時間：3 pm 至 6 pm

地點：尖沙咀某意大利餐廳（如果未知邊間，請電郵查詢：jojita@gmail.com）

費用：每位成人 HK$100（包括飲品及茶點）

參加人數已經去到：40a18b 啦！好想快啲見到大家呀！

除咗有美食同野玩之外，今次我地都搵嚟幾個贊助商，其中包括 Toys R Us、Huggies、荷花、某高級餅店等等。我地亦都預備咗一兩個小遊戲，可以同啲小朋友玩下。

1) 齊來逗貼紙
大人圍圈，每人有一堆貼紙。小朋友如果俾個 Hug，就俾一張貼紙佢。據悉 Mavis 好鐘意貼紙。大家鐘意 Mavis 的話就發達啦！嘩哈哈哈哈…

2) 講故事比賽
歡迎大人參加。需自備書籍或道具。希望大家踴躍參加，為小朋友增添樂趣。當然以邊位大人講得動聽，最受小朋友歡迎度評分啦。勝出者將會得到某意大利餐廳現金券乙張。

仲未報名？快啲啦！已報名的參加者：

Jayson：2a1b
火羽：1a
Anson：2a1b
Mavis：2a1b
米B：2a1b
哲哲：2a1b
Emilili：1a
米爺：2a1b
Hayden：0a0b皓皓：2a1b
茄茄：2a1b
Kimkim：0a
貓奴：1a
騫騫：2a1b
瀅瀅：2a1b
Felix：2a1b
Yan Yan Chu：4a2b靖天：2a1b
莎莉：3a
班長：2a1b
熙熙：2a2b
Eason：2a1b

到時見！


~ Lindberg

煩煩煩惱

近排有好多煩惱。有短期的，中期的，而當然還有長期的！

短期煩惱：家姐突然間話放暑假返菲律賓，叫我地一齊番去，來個一家團聚。對上一次係兩年前喺新加坡，Jayson 都未出世。所以兩個家姐都好想我地可以去。但奈何豬流感咁勁，要 Jayson 出門真係有一定嘅風險。最怕係一齊出去玩，成班細路好難管。先唔講八月中仲要開學，如果咁細個中招真係好驚㗎嘛。真係「好想死，但又唔想死」嘅情況。

為安全著想，都係唔好去啦。雖然都算決定咗，不過都係好煩。唉…

中期煩惱：之前因為份工好危，所以打消搵樓嘅念頭。但近排覺得應該死唔去，所以決定去睇一下。依家住緊嘅地方，老實講，我地非常鐘意。好好住，而且有好多美好嘅回憶（威威）。但住三個人真係細咗啲。周圍都係野，點清都清唔到。我每次見到如此慘況，心入面都唱住同一首歌…

「全場在　WHY　YA　YA　YA　YA YEAH，垃圾堆之內齊高唱…」



但估唔到只係短短幾個月，樓價可以升得咁多咁快。大家唔敢炒股，都唔好抬高晒啲樓價呀！以為自己仲買得起自己屋企附近啲大單位，但即使俾得起，真係唔值囉。仲有可能供到死。唉唉…

長期煩惱：間公司幾時先有錢賺呀？！唉唉唉…

「爸爸，唔好咁煩啦。」

「咪又係為咗您！」

「最多我幫您地叉電呀。」

「算您啦！」



~ Lindberg

每朝的例行公事

每朝六時半未夠，Jayson 便會醒過來。可能因為我們的窗簾不夠遮光，所以太陽的強光有可能弄醒 Jayson。之前試過找些東西去遮擋，情況有所改善。但只維持了一兩星期，Jayson 的「例行公事」，又開始故態復萌。

首先，Jayson 會叫媽媽抱他出來。有時 Jayson 媽不願起床，他還會拿起眼鏡要她戴。抱起之後就會說：「出去。」他要出廳，要看迪士尼影碟。雖然只是不停重複放其中三隻，但總是百看不厭。每當一開機，他會很有禮貌地說：「唔該。」

因為是剛起床的關系，奶咀是沒有可能拔得走。Julie 有時會一起看，但明顯地興趣不大。哈哈哈…

我們會利用這段時間處理自己的東西。然後一起吃早餐。當知道有東西吃時，Jayson 便會主動地拔出「救命奶咀」。然後說：「包包…」

我們會留待到婆婆家中，才讓 Jayson 飲奶。而 Jayson 的早餐就是提子包。首先他會挑出提子來吃，其餘的麵包就慢慢…慢慢…慢慢…地吃。有一天轉了果沾麵包，他竟然發爛地豪哭：「提子…提子…提子…」

自此之後，提子包便是家中常備之物。唉…


~ Lindberg

P.S. 很感激 Jayson 媽的同事，送我們一套迪士尼影碟。雖然被他們的兩個兒子用了多年，但還很新淨。要找個時候研究一下怎樣利用吧。

細路，您叫咩名？

「細路，您叫咩名？」

「爸爸，您抄人呀？」

「抄下未來師傅有乜所謂呢？」

我們一直都很少叫 Jayson 的中文名。但因為八月中就要開學，以防 Jayson 不知老師在叫誰，都是時候讓他學一學自己的中文名。

還記為 Jayson 起中文名的時候，曾經想過用單字。因為比較型，而且罰抄時會沒有那麼吃力！但小的是複姓，用單字的話，整個名又變回三個字，Jayson 媽說不夠特別，所以放棄了那個念頭。

Jayson 可以說到自己的名字，都算不錯。但那些高低音真的很搞笑。我覺得是因為聽得兒歌多，所以說話都有點像唱歌。哈哈哈…



~ Lindberg

遇上 Natural Born Killer

「Jayson，快啲跟爸爸一齊去拜師。」

「我地要去學做殺手呀？」

「殺您個頭！我地要去拜茄茄為師呀！」

「茄茄哥哥？」

故事要由去海灘開始講起…

上星期三，因為預見天氣唔錯。Koko 就約埋杏子同我地一齊去淺水灣游水。

Jayson 一去到就俾佢玩下沙，做下熱身。而我就當然要整番一碗餐蛋麵醫下肚先啦。奉政府諭：「肚餓就唔好落水啦。」

Jayson 好專心咁玩沙。相信如果我地唔搞佢，佢可以玩足一日…

見 Jayson 玩得差不多，就慢慢引佢落水。可能前幾日去過泳池玩嘅關系，加上對自己架「坐駕」都幾熟悉，所以 Jayson 都好快落到水。不過對大浪都係冇乜好感。多得 Koko 嘅新玩具，我地可以落水影相。

玩咗三個鐘之後，我地去咗 Pizza Hut 食午飯。食食下飯，突然俾我地發現有啲動靜。簡直係驚人嘅發現！茄茄原來係 Natural Born Killer！

「講乜呀，叔叔？」

就咁講大家可能唔信，但好彩我影低未來師傅嘅招數，好讓大家可以學習學習…
絕招一：借機搭膊頭

絕招二：迷人電眼

絕招三：輕撫髮尾

「茄茄大師，幾時收我為徒呀？」

「爸爸，您一對眼加埋都冇茄茄哥哥一隻咁大，又冇大板牙，個肚腩仲…。算罷啦您！」

茄茄真係可愛到暈。笑死晒我地啲大人。可能因為佢同 Mavis 一齊上堂，所以特別熟絡。但我並唔排除因為佢見爸爸媽媽咁恩愛，所以就有樣學樣。小朋友啲動靜真係好有趣。見到心都甜埋。見未來師傅咁溫柔，第二時一定係一個好好嘅男朋友。

但 Mavis 好明顯唔多過電。而我地大人就電死晒囉。哈哈哈…


~ Lindberg

P.S. 因為掛住食餐蛋麵，背脊嘅太陽油只係搽咗一半，所以嚴重燒燶。唉…

Somewhere Out There

這晚，月光很圓，很光。Jayson 忽然感性，要對著月光吃宵夜…

「米B，喺同一個月光之下，我地係唔係一齊飲緊奶奶呢？」

「Somewhere out there beneath the pale moonlight
Someone's thinking of me and loving me tonight
Somewhere out there someone's saying a prayer
That we'll find one another in that big somewhere out there
And even though I know how very far apart we are
It helps to think we might be wishing on the same bright star
And when the night wind starts to sing a lonesome lullaby
It helps to think we're sleeping underneath the same big sky
Somewhere out there if love can see us through
Then we'll be together somewhere out there
Out where dreams come true
And even though I know how very far apart we are
It helps to think we might be wishing on the same bright star
And when the night wind starts to sing a lonesome lullaby
It helps to think we're sleeping underneath the same big sky
Somewhere out there if love can see us through
Then we'll be together somewhere out there
Out where dreams come true」

每晚回家的途中，我們都會尋找星星和月亮。已經很久沒有見過月光的出沒。所以覺得這晚的月光份外漂亮。

「爸爸，抱。」

「做乜要抱呀？」

「睇 Moon。」

「咁要講乜㗎？」

「唔該…」

「仲有呢？」

「I love you.」（爸爸好煩呀！）

「好喇。」

「Moon 靚靚。」

~ Lindberg

二十個月簡報告

這個月發生的都是一些濕濕碎碎的。Jayson 媽覺得好像沒有特別教過 Jayson 甚麼東西。其實都不是沒有呀。起碼開始了如廁訓練。

發展報告：
如廁訓練：還是不懂得自己說要去「Wee Wee」。如果可以每隔一段時間，叫他小便，這是辦得到的。可以節省幾條尿片。但如果飲水多了，會比較難掌握小便的時間。

「冇著片片總係覺得好空虛咁嘅…」

有一天，公公發現 Jayson 在玩地上的栗子，還拿了一顆給公公。但家裡並沒有買栗子…

開始進入 T2：
「Hasta la vista, baby…」

「唔係 Terminator 2 呀！係 Terrible Twos 呀！」

「Oh... Chill out, Dad!」

因為對四周的認知開始加深，有獨立處事的傾向，但技能和語音表達能力不足，所以會經常說：「唔要…」，而且脾氣暴燥，會掟東西。唉… 有機會再詳談。

奶咀問題：我覺得 Jayson 有些時候真的有點像「煙癮起」。除了睡覺的時間外，如果覺得疲倦，又或者無所事是，便會喊：「咀咀…」亦因為此，我們要找代號去叫「奶咀」，以防他聽到之後會要。前一排我們跟 Mavis 叫它做「支支」，但好快便給 Jayson 發覺了。還是要找過另一個代號吧。

但除了「咀癮」和外觀這兩個問題之外，我們沒發現奶咀有帶來其他負面影響。相反，為我們的生活帶來不少平靜。而且面部肌肉亦得多更多的鍛煉，使發音有力而準確。最重要是那顆「蝦餃面」爽滑彈牙，真的很難有甚麼投訴呢。



~ Lindberg

跟海獅影相密技

要海洋公園啲海獅乖乖地停喺你面前，俾你任影，其實有一個密技。

除咗個攝影師本身要靚仔之外，仲要加埋以下密技：

睇到嘛？海獅望實嗰樣呢。冇錯，密技就係錢！

「海獅哥哥，你望緊乜呀？」

「噢噢噢…錢啊…錢啊…錢啊…」

海獅其實好市儈，只要見到有個銀仔，就會游埋去！萬試萬靈！哈哈哈哈…

但真正原因，當然唔係為咗錢啦。我估係因為為食。啲銀仔反光，佢地以為係魚仔，所以游過嚟。只要用個一蚊喺窗前滾動一下，佢地就好快游過嚟㗎啦。但玩時玩，都要小心喎。唔好引太海獅多過嚟，一陣太過興奮，令到佢地打架就唔好啦。

冇獎問答遊戲，上圖中有幾多隻「Sea Lion」？（提示）

答案：二！嘩哈哈哈哈哈…



~ Lindberg

一人價錢，五人同遊海洋公園

今年 Jayson 媽的生日，她想「享用」一下生日的福利，就是免費到海洋公園玩。我們見是星期五，又沒有甚麼特別的國內假期，公園應該不會太多人。所以我們請了一天假期，拉了公公婆婆一起到海洋公園。五個人之中，只有我要買票。而 Jayson 媽更預先為我買了一張特價票。一人價錢，五人同遊。非常抵哉。

還記得上年十二月來的時候，Jayson 還像「一舊飯」般，讓四位姐姐欺負得很慘：

現在要反過來欺負我們也綽綽有餘：

「媽媽，睇住我塊蝦餃面呀！」

正如一貫的行程，我們由大樹灣那邊開始玩。先去探望一下海獅。

Jayson 好像對海獅興趣不大。可能因為只是烏黑的一團東西吧。

看過海洋劇場的表演之後，我們到了餐廳用餐。之前我們到迪士尼公園玩，大家都喊飲品貴，但食物不貴而且好味。但原來海洋公園的飲品更加貴！而且食物又貴又不好吃。真的令人異常失望！

但食飯的時間，讓我們可以舒舒服服地，避過一場大風雨。

可能真的是 Jayson 媽這位「貴人」的關系，我們在室外的時候，總是陽光普照，微風送爽，非常舒服。而我們每當我們有瓦遮頭的時候，外面就刮狂風大雨。Lucky！

吃飽了，便繼續我們的行程，去看魚魚。公公婆婆一面看，一面說那條魚可以蒸，那條可以炸。Jayson 媽只好蓋著 Jayson 的耳朵…

「媽媽！啲 Nemo 同您同一日生日㗎！」

「係喎！」

整朝沒有睡過的 Jayson，終於筋疲力盡。在纜車的涼風下睡著了。下了纜車之後，我們到了亞洲動物天地外的餐廳小休，讓 Jayson 可以睡多一會。之後便去看熊貓。

Jayson 見到大熊貓，表現得很興奮。大叫：「Panda！」新的熊貓區可以比較近距離觀察牠們。真的很可愛。

「Jayson，圖中有幾多隻熊貓？」

「爸爸，您係唔係唔識寫個「死」字呀？」

小熊貓真的超級可愛。可以讓我養一隻就好了…

之後我們走了去看海獅表演。這邊箱，訓練員在餵大海獅：

另一邊箱，Jayson 媽在餵小 Jayson：

「提子乾…My Precious…」

那時已經掛起三號風球。所有活動都已經停止了。不能到兒童遊樂場那邊玩一下旋轉木馬，真的有點美中不足。我們見開始天陰，將會落大雨，所以讓 Jayson 玩了一會兒之後，便起程回家。

晚飯有 Jayson 媽一家為她慶祝，Jayson 細姨還做了一個漂亮的藍莓芝士蛋糕。

「爸爸，咁媽媽生日，您作出咗乜野貢獻呀？」

「有！當然有啦！參與都好重要㗎…」



~ Lindberg