好耐冇報告自己嘅近況。前一排因為覺得個身體好似怪怪地，所以走咗去驗血。原來真係出咗小小毛病。
身為一個乙型肝炎帶菌者，我都算好乖。每半年至一年都有去驗血。今年年頭因為入院割盲腸，都有驗過肝功能。當時都好正常。上個月俾阿仔啲腸病毒搞一搞，胃口一直好差。而且個人好攰。所以就去驗多一次。報告一出，護士姑娘好凝重咁打電話俾我…
「你份報告出咗。醫生想你即刻番嚟睇一睇。」
「…」
「醫生啲 booking 好 full 添… 聽日下午啦。」
「好呀。」
「都係唔好啦。你個 case 都係快啲嚟好。你今日喺我地收工前嚟排隊啦。」
「Err… 好喇。」
當聽到一個咁嘅電話，正常人都會同我一樣。心入面叫一句：「大鑊…」
見到醫生，聽到佢嘅表情同語氣，我真係以為……。睇咗驗血報告，一大滴汗流出嚟。正常嘅肝酵素指數係六七十。Fred 哥年初因為膽發炎，試過二百幾。而我，就係五百幾。因此，醫生要我再驗多啲野同做超音波掃描。同埋幫我約見專科醫生。
原本胃口已經差。聽咗之後就更加冇晒心機。最慘係唔知情況差成點。心情就好似十五個吊桶打水，七上八落。
第二朝又返去診所抽血。驗血報告一出，又俾姑娘捉咗返去見醫生。
見醫生之前，我去咗做超音波掃描。做檢查嘅醫生幫我做完掃描就走咗。我都冇機會問佢有冇問題。搞到我心情好複雜…
返到診所，醫生仍舊用「嗰個樣」望住我。
「其他指數都好高…」我好似隱約見到聖彼得向我招手。
「不過個 virus count 好咗呀。前兩年，你有 5 億 5 千萬粒。依家得 1 億 4 千萬粒…」如果係錢幾好呢…
「咪住！原來兩次都係超過咗可量度嘅范圍。即係都係多到數唔到…」我又好似隱約見到聖彼得。
「不過幫你問咗個超聲波，你個肝仲係好正常。」好彩…！
因為醫生只係普通科醫生，都幫唔到我啲乜。咁過多幾日，終於去見專科醫生。原本想睇黎教授，因為佢應該係最有經驗嗰個，而且佢幾有型㗎。可惜佢唔睇新症。所以就睇另一位教授。
經過教授解釋，我開始明白我入面搞緊乜。作為一個帶菌者，平時啲病毒同我相安冇事。但唔知發乜神經，身體嘅免疫系統要攻擊啲病毒。但奈何啲病毒喺啲肝細胞入面，一打，就打埋個肝。肝細胞爛咗，就釋放出肝酵素。加上我本身冇抗體，根本就係一場打唔贏嘅仗。唔怪得打到咁攰啦！
教授話，因為我有咁多病毒，加上我冇其他毛病，所以應該係以上嘅問題。佢話我啲皮膚同眼白都未變黃，所以唔洗太過擔心。五百幾都唔算太高。到一千佢先會立即做野。兩個星期後再驗血，再過兩個星期之後覆診。如果到時都係高，就要開始食藥。藥可以減低病毒嘅數目，但唔可以殺晒。而雖然藥本身冇乜副作用，但一食，就要食一世。所以如果可以自己搞掂，佢都唔想我食藥。
我家姐同我講，如果喺菲律賓，第一時間就打支 Interferon，盡快減低病毒嘅數目。不過可能香港做法唔同啦。而某程度上，我都想食藥。起碼唔會成日有有幾億病毒，喺我個身入面玩野。
清楚咗之後，加上一直有 Jayson 媽陪住，都可以鬆番口氣。
最後要多謝一班親友嘅關心。病倒了要大家擔心，真係過意唔去喇。嘻嘻… 不過我都想同大家分享一下今次嘅經歷。如果係帶菌者，記得要每年驗肝呀！祝大家身體健康！
~ Lindberg
