Yr2Q3 報告

體重：31 磅
身高：90 厘米

發展報告：
飲食方面：

• 早晚各一餐（八安士）奶。
• 正餐甚麼都吃，但份量不大。通常自己吃到一半便要人餵。唉…
• 不喜歡吃菜葉，可能是滑滑的關系。
• 吃很多水果。

• 但突然不太喜歡喝湯。

上學方面：

• 足足一年，也調節不到中午要睡覺的習慣。每當要上學，婆婆就要跟 Jayson 大戰一番。唉… 但上到學校，卻又很開心。問他喜不喜歡上學，跟 Ms. Fan、Ms. Jackie、Ms. Cheung、方老師玩，他又說喜歡。最喜歡的仍是群姐。但怎樣跟他講，也幫他改變不了這個時間上的問題。
• 有一天，我送他到學校。因為剛剛才睡醒，所以非常扭計。於是我抱著他到課室。班主任見到我，第一句便是叫我不可以抱，因為 Jayson 的大腿還不算太有力，應該鼓勵他行多一些。我這麼大個人，竟然還會給老師鬧，真的多得 Jayson 不少！
• 成績表派回來，總算樣樣合格。就是怕醜一點吧。

體能方面：

• 終於懂得雙腳離地跳。
• 會翻筋斗！
• 會做瑜伽…

學習方面：

• 懂得分左右。（我不明白有甚麼難度，但 Jayson 媽說她很大個之後才會…）

「我要做醫生！」

• 中文表達能力不錯，已經可以以完整句子對答。
• 但英文反而沒有多大進步。生字方面有很多，卻很少用來對答。可能是我們跟他少講和少鼓勵的關系。
• 學校有教普通話。懂得數一至十、「方老師午安」、「謝謝方老師」。但其他的，我們都聽不懂。哈！
• 繼續 Kindermusik。應該是最後一季吧。九月試試玩別的。

• 懂得以英文串自己的名字。
• 開始學加減數。但只是我貪玩半認真地跟他玩，還未有真正成果。
• 開始懂得觀察和運用邏輯。有時見他玩的遊戲，就可見一二。以下這個 iPhone 的《Feed Me》遊戲，即使我不喜歡他玩電話，但也真的幫助不少。

問題兒童方面：

• 經常會問下一件事會做甚麼：「跟住呢… 跟住呢…」。然後重整後說出來：「刷牙，跟住痾 wee wee，跟住 story time，跟往瞓覺。」
• 經常會問：「邊到呀？」。

音樂方面：

• 很喜歡唱歌，更喜歡唱自己的歌。
• 拍手的節奏不錯。
• 會彈著琴唱：Do-Re-Me-Fa-So-Re-Ti-Do。但往往去到 Re 已經太興奮而亂彈。哈！

自理方面：

• 會自己除面褲、底褲、趷高腳、小便、然後穿回底面褲。
• 懂得自己抹大便。真的要多得老闆娘的提醒。我覺得放手讓小朋友去嘗試真的非常重要。
• 還需要「積極鼓勵」下，才會去刷牙。
• 每晚都是上十一時才睡。唉…

• 睡覺還是要穿尿片。因為臨睡之前有一支奶，所以比較困難吧。之後會讓他早一點喝，希望有幫助。
• 突然戒了奶咀！雖然不算太過辛苦，但都需要一段長時間過渡。

性情方面：

• 仍很會扭計，但可以跟他平心靜理地解決。不會再大叫、拍檯、亂掉東西等。
• 要這樣，就一定要這樣。不要公公坐梳化，就一定要趕他走。有次還趕了他出街。唉…
• 還不會體貼別人。不喜歡的時候，會把人推開。雖然不經常發生，老師亦有叫我們多加注意。
• 繼續：「要媽媽、唔要爸爸。」唉…

~ Lindberg

向北海道出發

• 因為 Jayson 放暑假…
• 因為 Jayson 表妹出世，婆婆要照顧姨姨同表妹，我地要請假自己照顧番 Jayson…
• 因為好耐冇去旅行…
• 因為契爺契媽都可以一齊去…

所以我地決定玩盡佢！我地要去北海道！

一團五人：

1. 契媽：領隊兼導遊
2. 契爺：隨團攝影師
3. Jayson 媽：日語翻譯員
4. Jayson：小童模特兒
5. 我：烈火型司機

因為有契爺喺到，今次我可以唔帶大機！淨係帶完全體、ZS3、長條。輕便好多！呵呵呵呵呵…！

去嘅地點跟米B嘅差不多。我地因為有五個人，所以中間幾日喺富良野美瑛，自己揸車好似比較化算。而且我都好期待喺日本揸車。

• Day 1-2：札幌
• Day 3：旭川
• Day 4-5：美瑛、富良野
• Day 6-7：登別
• Day 8：札幌

早兩個月前訂機票，超難亦都超貴！最後得 Maggie 表妹幫忙，總算去得成。但三張機票加三晚酒店，已經差不多去咗二萬四。而訂車亦係超難！早一個月前，四圍都已經滿晒。最後整咗架七人車，四日要三千四蚊左右！

我地一家會玩八日，而契爺契媽就繼續玩多一個星期（佢發咗…）！原本叫契爺一齊去登別浸溫泉，而且喺嗰到，Jayson 可以睇熊人、企鵝、水族館等等，但契爺竟然話怕熱，所以打死都唔去登別！我極之有理由相信，之前一班朋友去台灣玩（我冇去到），浸溫泉嘅時候發生咗啲野，所以契爺唔肯同我去浸！哈哈哈…

提起浸溫泉，我唔知點解好鐘意喺大浴場跟其他人一齊浸。並非我想互相觀摩，而係我覺得好似成班馬騮咁，好搞笑。邊浸露天溫泉，邊對啤酒，邊聽人唔知講乜，人生呀！

因為契爺唔到我地去登別，所以我地頭六日會一齊玩，之後就會分開。未出發，已經超級興奮！整個星期都無心工作。哈哈哈… 希望 Jayson 會玩得開心，同影多啲靚相啦！



~ Lindberg

翻筋斗

想不到一向並不好動的 Jayson 竟然會做得到…

「Jayson，做得好！米B咁活力十足，您要加油呀！」

「知道！」

~ Lindberg

P.S. 還記得以前小學要我翻筋斗，會次練習都弄傷頸。唉…

P.P.S. 到農曆新年的時候，要叫 Jayson 打多幾個筋斗。正所謂：節瓜碌碌，金銀滿屋！哈！

Olympus E-PL1 完全體

買咗 Olympus E-PL1 好一陣子，但一直都冇寫到用後感想。原因係覺得總係差少少野。但依家，我部 PEN 終於成為「完全體」，再冇乜野欠缺啦！

未講何謂之「完全體」之前，仲記得當日四圍搵邊到有白色嘅 PEN。幾乎所有地方都話要等一兩個禮拜。但黃天不負有心人，竟然俾我喺合和間豐澤搵到。我立即話要兩部，一部幫 Jayson 契爺買。我同佢買 PEN 嘅原因都係一樣：

（廣告（同靚女）嘅威力真係大…）

用落之後，雖然覺得 QC 上有啲問題（契爺同我部機都分別有啲小問題），但對部相機都尚算非常滿意。機身非常輕巧，對一個好怕攞重野嘅人，我每日跟身都冇問題。簡單嘅操作上好得心應手，不過如果要自訂一啲野，個餐單都難搵。例如想喺螢光幕出個九宮格（幫助構圖用），我搵咗半日，最後都係要睇說明書先知道點做。

相片嘅質素非常好，顏色感覺都係我鐘意嘅。雜訊方面，ISO 去到 1600 都可以接受。啲藝術濾鏡（ART Filter）都幾好玩。我尤其鐘意針孔相機效果，不過因為自己有玩針孔相機，都係玩真正嘅針孔相機好玩啲。

標準3X變焦鏡頭 ED14-42mm F3.5-5.6 非常小巧，縮埋都只係得43.5mm。雖然光圈唔夠大，但個焦距範圍非常好用。而且影出嚟嘅相都好夠銳利。對於鐘意隨意拍嘅我，都唔需要買其他鏡。

對焦方面，固件升級之後，速度有明顯嘅改善。不過始終比唔上大機。如果要影四圍走嘅小朋友或動物，都係未必影得到。

另一樣比較特出嘅係個閃光燈。除咗可以手動模式之外，仲可以用手指一拉，射上天花都得。

唯一嘅問題，係個觀景器。雖然可以因應環境而自動調節光亮度，但我發現喺室外影相，觀景器點都唔夠光，睇唔清楚。契爺話我只係屁股痕，話其他相機仔咪又係咁影，又唔見話唔夠光。不過唔係得我一個咁講，我同事都有 E-PL1，佢話佢班朋友都覺得有咁嘅問題。如果要手動對焦，就更加冇可能。

因此，如果要稱得上「完全體」，就一定要有：VF-2 電子觀景器！

呢舊野真係好貴，$2,2XX，足以買一部相機。但相對 Panasonic GF-1 嘅電子觀景器，呢個真係物有所值。144 萬點高解像度及1.15x放大倍率，又光又清楚。效果可以比得上單鏡反光機嘅觀景器。仲可以拉向上，由上望落嚟，影小朋友就更方便啦！

我覺得如果要認真影相，始終都要出大機嘅…。但如果日常拍照，或者想有一個輕便嘅旅行，Micro 4/3 真係非常有用！



~ Lindberg

培生朗文書展優惠

早前網友 Catherine 送俾 Jayson 嗰兩套朗文英文故事共讀課程，真係唔好講笑，我覺得跟 Jayson 讀得多，自己啲英文會話都標准咗！哈！

喺嚟緊嘅書展（7月21 - 27日），套書會以優惠價發售。每套 Supermice 超鼠系列，賣 $118。8套故事有不同嘅學習範疇，我覺得家長可以因應小朋友嘅需要而選購。

除咗超鼠系列之外，佢都仲有好多其他圖書同教材。詳情可以睇一睇以下嘅單張（按圖可以放大）：

睇落真係幾多唔同嘅書，由學前到小學都有。

培生朗文送出以下嘅優惠券。如果嚟緊會去書展，印定幾張出嚟，希望大家會買到好野啦！

~ Lindberg

沖涼法寶：河童 X 節瓜

跟據《維基百科》：「河童是日本神話中的傳說生物，有鳥的喙、青蛙的四肢、猴子的身體及烏龜的殼，如同多種動物的綜合體。而河童喜愛的食物是小黃瓜、茄子、南瓜、油麻的莖，而河童討厭的東西是金屬（鐵）、玉米、大角豆、麻的灰燼、鹿角、牽牛花、葫蘆，興趣是跟小朋友玩相撲。」

河童除了在清水河澗可以找得到，原來在自己家中的浴缸也會找得到…

「爸爸，係 Jayson 嚟㗎！」

一直以來，我們都過於愛護 Jayson。洗頭時，都是抱著他，讓他面向天，輕輕替他洗。

雖然現在三十磅有多，但仍都是照樣做。即使放他在我們的大腿上，都足以令到婆婆腰骨痛。婆婆有見節瓜越來越大舊，所以於吉之島買了這個「河童」法寶。

用法非常簡單，只要把這個有伸縮力的軟膠套在頭上，水便不會流到面上。雖然有些位置洗不到，但可以除下頭套之後補洗。而且水柱一條條的流下，讓誰都會喜歡洗頭！

這樣跟 Jayson 沖過一兩天之後，Jayson 開始不抗拒用花灑沖涼。甚至在沒有法寶的情況下，直接用水沖頭，讓水流入眼睛內，他也覺得很有趣。婆婆果然有辦法！



~ Lindberg

Rainbow Song

「Red and yellow and pink and green,

Purple and orange and blue,

I can sing a rainbow,

Sing a rainbow,

Sing a rainbow too!」

Jayson 很喜歡 Rainbow Song。每當見到不同的顏色，就會唱起來。

但之後唱的那一首，就不知道是甚麼了… 哈！



~ Lindberg

鰂魚涌公園新遊樂場

前個星期六，Jayson 媽要開工。原本打算送 Jayson 到婆婆那裡去，但因為婆婆感到腰背不適，我便說讓我自己一個照顧 Jayson 吧。其實 Jayson 現在不太需要人專注地去照顧，如果大人走去做飯或洗衫，都沒多大問題。

早上是 Jayson 最活躍的時段。鰂魚涌公園遊樂場重開之後，也沒有去過。懷著挑戰自己的精神，我趕快準備好一切（包括為 Jayson 梳洗、食奶、換衫、還開了一個大…），然後便踏上征途！

「Jayson，今日好曬呀！戴頂帽，然後我地坐小巴去公園玩！」

「戴帽，然後去坐小巴去，然後到公園玩！」

（Jayson 近排很注重流程這個問題。每次問一大輪之後，然後便然後便然後…的說出來。）

新的遊樂場非常漂亮！

這個遊樂場分兩邊。原本這一邊比較適合一些年紀較大的小朋友。但現在變成全都適合 Jayson 這個年齡的小朋友！當他見到那些斜路，便立即飛奔過去。

雖然天氣很熱，而見當時已經是早上 11:00，但亦無減 Jayson 興奮的心情。

這裡用的物料很不錯。啡色地板是一些不太傳熱的物料，摸上都不會太燙手。

跑了上去，Jayson 便要滑滑梯。但我記起之前有小朋友因為滑下一條被太陽燒滾的滑梯而灼傷，我起初也有點擔心。

我摸過滑梯表面，跟之前的地板一樣，也不算太燙。於是便叫他滑下來。

「熱呀…」看他的表情便知道有幾熱。原來坐下來一會，還真的有些熱。

「咁仲唔快啲滑落嚟！」

滑過一次之後，便不再滑了。

這裡的地方真的很大。而且是星期六的早上，沒有太多人。Jayson 四圍跑，也不怕踫到甚麼。但之前這地板有一串 A 至 Z 的英文字，Jayson 很喜歡，現在新的地板卻沒有了。

不停拿著「E-PL1 完全體」拍照的我，也可以跟他玩搖搖板。

看著他跑來跑去，滿頭大汗的玩這個玩那個，都是一件賞心樂事。

那裡還有一些大 Jayson 少少的哥哥姐姐。小朋友間，竟然也有些交流！

「哥哥，呢邊…。」

玩了大概半小時之後，已經滿面通紅，流了一身大汗。

坐了下來，喝了一盒果汁，吃大半條丹麥條之後，便是回家的時候。

回到家後，我繼續挑戰自己，替他沖了一個花灑涼。沖慣浴缸的 Jayson，當然萬分不願意，但最後都還算合作，只是沐浴露搽得不太勻巡吧。然後我煮了一個通粉給我倆做午餐。吃完之後，疲憊的他就讓我抱他入房午睡。

除了一個「強」字之外，再也找不到別的去形容自己。呵呵呵呵呵呵呵呵…



~ Lindberg

《7-11 梗有您喺左近聚會》

一年一度，堪稱本港網誌上，最大型嘅親子組聚會又完滿結束。首先當然要多謝主辦單位「七師奶親子娛樂製作株式會社」，同埋 Fat Angelo's 意大利餐廳贊助部份食物。
是次參加活動嘅有：

Jayson，Anson，米B，哲哲，米爺，茄茄，Felix，Eason，小熊，Hayden，曉航，Chloe，蔚蔚，晴晴，Yan Chu，Hazel，凱蕎。

同往年一樣，因為大部份人都睇得對方網誌太多，或已經玩得太熟，有啲仲要係好似以下嘅「青梅膠馬」，所以唔記得咗自我介紹！有幾位新朋友，希望唔好見怪。

而唔同嘅地方，就係終於安排到集體遊戲啦！喺早幾日，米B媽已經帶頭，率領「七師奶」諗咗好多遊戲。

雖然場面有時會失控，但小朋友都算非常合作。白雪都應記一功，佢做主持人又做得幾好喎。

見到班小朋友玩得咁開心，班大人都不亦樂乎。踫撞同爭野玩當然會有，但亦都係一班小朋友可以學習相處嘅地方。

有啲遊戲都幾有挑戰性。例如「傳豆豆」，班小朋友玩得好投入。

有兩個人玩得投入到旁若無人嘅境界。呵呵呵呵…

仲有以下呢個遊戲，通常只有喺婚宴先會見到。但因為之前太多野玩，到最後只有一班「磨爛蓆」嘅朋友先玩得到。

「Jayson，呢個係唔係媽媽呀？」

「係！」

「係？你睇下！」

「嘻嘻…」

米太婆同 Jayson 媽嘅表情都好好笑！

最後，希望有咩招呼不周，敬請原諒！明年一定要再見到大家呀！！！



~ Lindberg