《媽咪食果圖》

這一晚，Jayson 問媽拿了一張紙，然後自己一個人入房，拿起筆來畫了這一個…

之後，他跟媽媽說：「呢個係媽咪。」他指著長頭髮，有兩點做眼睛，有一雙手，但沒有畫腳。

「呢條係地。」由左至右，有一條斷續的橫線。

「地下有車厘子。」

一番對話之後，原來他在畫這一個：

上一個暑假，我們到了北海道。當時媽媽在摘車厘子，有些腐爛的車厘子，可以隨便掉在地上。那是我很懷念的假期。想不到 Jayson 對此的印象，會是那麼的深刻。

看著小朋友的長大，感覺真的很神奇。之前還是亂畫一通，然後對自己說這個是甚麼，那個是甚麼。

但現在已經可以憑著自己的想法，畫出一些有意思的東西出來。在我們心目中，這副《媽咪食果圖》已是一副很漂亮的畫，絕對比得上《清明上海圖》。哈！而另一方面，它還提醒了亦是作為兒子的我，只是這小小的東西，已經可以感動自己的父母。希望 Jayson 不要看這個網誌，也明白我們的心意吧。



~ Lindberg

《與龍同行 震撼舞台》

今個聖誕假期嘅第一日 ，我哋就入咗迪士尼。但主要嘅節目，其實係去亞洲國際博覽館 Arena，睇：《與龍同行 震撼舞台》。我哋買咗 $595 嘅門票，坐右邊中間位置，都算唔錯。如果坐得太前，反而會俾啲假石假樹庶住。最初覺得要用五百幾蚊去睇啲機械恐龍，都真係幾肉赤。但當我之後了解多咗，就好熱切期待呢一日嘅來臨。

坐好之後，我哋心情都好緊張，目不轉睛咁，望住嗰個大口。喺呢個曠闊嘅舞台，一隻隻 1:1 嘅恐龍，好快就會呈現喺我哋眼前！

雖然 Jayson 知道係嚟睇恐龍，但佢對啲爆谷嘅興趣明顯係大啲。

出嚟啦！唔知咩龍！

劍龍呀！

場中有一位扮演考古學家嘅演員，介紹眼前嘅恐龍，同埋佢哋嘅生活習性。啲恐龍除咗會行來行去，仲有打鬥場面睇呀！

而佈景方面，都好有驚喜喎。我叫呢啲做「空氣樹」，只要一開馬達，啲樹就會生長出嚟。咁簡單嘅充氣道具，竟然可以變成咁有趣嘅裝飾。

臨半場完結之前，竟然見到超巨大嘅：腕龍。真係好難想象史前會有啲咁大型嘅生物存在過。

休息過後，翼龍就飛出嚟啦。相中好似好普通咁吊喺半空中，其實係配合背後嘅動畫，飛過高山海峽。動態都非常優美。

三隻速龍要開餐啦！

細少嘅恐龍，係由人扮嘅，可以見到恐龍腳之外，仲有一對人腳。穿上恐龍衣，配上機械嘅幫助，動作真係栩栩如生。完全唔覺得入面有個人喺到。而大隻嘅恐龍，唔能夠單靠四隻腳去平衡咁巨型嘅身軀，所以下面有一個支架，由下面嘅駕駛員操控。

我哋前面有一家韓國人，後面一家日本人。雖然聽唔清楚佢哋講啲乜，但間唔中聽到佢哋講啲恐龍名。好明顯對恐龍好有興趣同認識，先會俾錢入嚟睇。然而，我哋就…

「Jayson，睇下！Baby Bop 呀！」

「嘩！」

「Jayson，Barney 呀！」

「係呀，婆婆屋企都有。」

唉… 不過可以近距離望見到啲咁逼真嘅史前恐龍，絕對係值回票價！

「Jayson，好唔好睇呀？」

「我啲爆谷呢？」

即使對恐龍唔認識，可以親眼見到呢二十隻 1:1 嘅恐龍，真係非常感動。為佢哋呢啲奇妙嘅生物而驚歎，更為佢哋對人類嘅貢獻而感激不盡（但點解你哋要死喺中東呢？！嚟中國呢頭先入土為安咪好囉！）。



~ Lindberg

噢…聖誕樹

近年啲商場嘅聖誕裝飾佈置，真係一年早過一年。一踏入十一月，已經開始陸續見到。睇怕過多幾年，中秋一過，就已經要開始佈置。過咗聖誕，就立即準備農曆新年，之後就賣糉，賣月餅，然後又再賣聖誕老人…

今年第一次喺新屋過聖誕，一如往年，都係過咗感恩節先開始佈置。Jayson 媽好鐘意聖誕裝飾，床下底除咗一株聖誕樹，仲有幾袋飾物。喺舊屋，聖誕樹好似好大株。但去到新屋，就好似好細株。不過雖然好似細咗啲，其實都冇乜地方可以放。

Jayson 好落力幫手裝飾聖誕樹。除咗啲燈同彩帶，啲波波都係佢掛嘅。

接近製成品：

當然要加埋粒星星先叫做完成啦。

禮成！

我哋將佢放咗喺窗檯，其實高度都係啱啱好。樹下面放咗好多禮物。大部份都係 Jayson 嘅。我哋買咗件厚外套俾工人姐姐，但因為天氣關系，已經拆咗嚟著…。Jayson 陪我去買咗支護手霜俾 Jayson 媽，亦因為佢原本嗰支已經用完，所以都要拆埋…！我亦都偷睇咗我份禮物，上面寫住…：「70-200」…

喺呢到，預祝大家有一個快樂嘅聖誕節！Merry Christmas!!!


P.S. 明年我會記得換咗條睡衣褲先……



~ Lindberg

佐敦谷公園

早兩個星期，戰隊相約到佐敦谷公園進行特訓。聽聞這個公園的設施很不錯，而且今年九月才開始啟用。但可能因為這裡太新，Google Map 也找不到這個公園。結果，幾乎所有人都去錯了地方！有些戰士去了位於牛頭角的「佐敦谷遊樂場」。我的汽車導航，亦指示我去那個地方。原來完全是兩個不同的地方！幸好 Jayson 媽有看清楚地址，朝著「順利紀律部隊宿舍」，終於到達目的地。

這裡的兒童遊樂場設施，果然很新，而且極之適合三歲左右的小朋友。但因為隊長：紅戰士不在場，所以大家都只掛住去玩，而忘記為了保護地球的特訓…

「隊長唔喺到，我哋鐘意點玩都得啦！嘻嘻…」

「一齊玩啦不如…」

這裡的管理亦算不錯。例如若有些超重人士去玩這些兒童遊樂設施，他們會有禮貌地作出警告。

「嗰邊嗰位大嬸，妳咁重唔坐得㗎！」

「黃綠戰士出擊！」

「呢到好好玩呀！嘩…」

這裡還有一個「迷宮花園」，可以訓練戰士們的方向感和處理問題能力。而走迷宮，當然是節瓜俠的強項！

「米B俠！等我嚟救妳！」

「米B俠！有我喺到，唔驚蕩失路！」

公園中央有一個依山而鋪設的草坪。雖然有些高低起伏，但勝在夠大，可以讓戰士們在這裡踢踢球。這個公園果然是一個消耗戰士們體力的好去處！

「隊長，我好掛住你呀。希望你可以快啲出嚟領導番我哋啦！」

~ Lindberg


P.S. 這裡還有兩個遙控模型車場。其中一個，當日正舉行比賽。如果揸車來的話，這裡的停車場比較細。如果有賽事，很大機會沒有停車位。可以選擇停泊於「順利紀律部隊宿舍」，而最好當然是乘坐公共交通工具啦。

聖誕節：慢火烤火雞

今個聖誕節，我做咗一樣想做好耐嘅野：就係燒火雞喇！

燒火雞其實好簡單，主要問題係：點樣食。一隻似樣啲嘅火雞都十磅幾重。以前屋企冇地方，最多只可以容納六個人。好難對付得到咁大隻火雞。我唔想食剩太多，之後餐餐都要對住隻雞。好似麥兜一樣，最後用嚟端午節包糉，惡夢先至完結。搬到新屋，終於可以俾我一償心願，聖誕節燒火雞！

上個星期六，買咗一隻 12 磅嘅 Butterball（幾出名嘅牌子）火雞。叫咗契爺同班兄弟上嚟，做我嘅白老鼠。

菜譜方面，我係參照：

http://simplyrecipes.com/recipes/moms_roast_turkey/

煮嘅時候，有幾樣野值得注意：

• 材料要完全解凍。最好一個鐘前攞出，令隻雞達到室溫。

• 餡料唔好放入隻雞入面。因為好大機會唔熟。雖然如果咁做法，就唔可以稱得上係餡料（Stuffing），但用番啲雞頸、內臟煮嘅上湯，去煮個餡料，都唔算太過搵朋友笨。
• 雞入面雖然冇餡料，但可以照放啲菜頭菜尾、香草等。咁成隻雞都會好有味。
• 食譜教將雞胸向下。效果真係唔錯。雞胸整出嚟仲係好多汁。但賣相就冇咁靚。即使我將佢反轉，再用大火燒，層皮都冇咁靚。張相係背脊。如果個心口都燒得咁靚就一流啦。

• 溫度控制方面，我冇跟到個食譜。我先用最細火，燒咗大概三個鐘，然後見佢入面差不多，先再用大火燒多一個鐘，整靚個面。如果好似食譜咁一開始就用大火，我驚層皮會燶、肉會乾。而且開頭用慢火燒，會比較容易控制，又唔怕燒乾。
• 餡料方面，雖然我已經跟足食譜，但味道都係麻麻地。可能我大貪，份量預得太多。明年要好好研究一下。

經過半日嘅辛勞之後，總算冇令到朋友失望（及肚痛）。一頓豐富嘅聖誕大餐，加上無限笑料，九位好友陪我哋一家過咗一個愉快嘅晚上。今年錯過咗嘅朋友，明年唔好再病啦！

~ Lindberg

P.S. 因為忙住煮嘅關系，都冇影到乜野相添…
P.P.S. 多謝契爺契媽叔叔姨姨送俾 Jayson 嘅禮物。今次佢真係發達啦！哈哈哈…

猴棗末

前排 Jayson 有幾聲咳，朝早有一大舊痰。因為見問題唔係好嚴重，所以諗住自己處理一下先。之前 Jayson 咳，都試過食「猴棗末」。但一支要百幾蚊，都幾重皮。通常我有中醫藥問題，我都會問一下郭生。除咗因為佢係前化學家之外，而更重要嘅係：佢屋企有個中醫。

「阿仔有幾聲咳、痰同條喉嚨都幾緊下。我想佢食支猴棗末。佢食開余仁生，但好鬼貴。你個女食開邊隻牌子？」

「「末」就梗係貴啦。「末」係純猴棗。阿女食散咋。有其他中藥成分，一支唔夠力咪食兩支囉。效果都還可以，而且計落化算好多。猴棗末都係放一支喺屋企看門口㗎咋。」

「哦… 明白！咁我去睇下有冇散先。」

「其實你知唔知猴棗係咩嚟？」

「唔知…」

「想唔想知？都幾核突喎。」

「快講！」

原來「猴棗」，並非好似茶葉「馬騮搣 」一樣，用馬騮去採嘅棗。稱之為棗，只因佢嘅形狀似。其實佢係猴子嘅腸胃結石（Bezoar）！我心入面第一個疑問：究竟邊條友會咁變態，走去攞啲猴子嘅腸胃結石嚟食？！神農士嘗百草啫，結石都敢食？！真係要寫個「服」字！

上網一查，竟然除咗中國人之外，仲有其他人一樣咁變態！古阿拉伯人都有用結石嚟治病解毒。不過故事聽落都幾合理。話說啲鹿（唔知點解）會走去食蛇。食完之後，因為全身發熱，會走去浸水。我懷疑情況就好似我哋食蛇羹進補一樣。之後，喺佢哋嘅腸胃中，就會出現擁有解毒嘅功效嘅結石。但究竟邊個會「試食」，真係令人匪而所思…。我相信會係另一個殘酷嘅故事。

而猴棗，出自《藥物出產辨》：「猴棗生於老猿猴之胃及肝膽間，緣猿猴常食各種山果，積年累月，其精液所結成為石者，形如棗，猶如牛之生黃，狗之生寶。故治效亦相類也。猴棗為治熱痰最靈捷之聖藥，功勝西黃八寶散，暨諸祛熱痰藥。」

另見於《飲片新參》：「猴棗味苦性寒有消痰鎮驚、清熱解毒的功能，古代稱之為治熱痰之聖藥。臨床多用以治療痰熱喘嗽、小兒驚癇等病。中藥中的猴棗散就是以猴棗作為主藥。」
望住支猴棗末，真係好難令我相信啲馬騮會結咁多石！更加唔敢諗啲石係點樣「採」番嚟。唯有正面啲去諗，我哋都係幫啲馬騮去除結石啫。一家便宜，兩家著。

所以猴棗末都係有必要時先好食。除咗「心理因素」之外，猴棗仲非常寒涼，不宜長期服用。只係咳嗽痰多的話，可以考慮猴棗散。但猴棗散亦有多種配方，成份效能都唔同，所以要加注意。最後，猴棗嘅粉末會整黑啲牙，所以食用嘅時候最好避免同啲牙接觸太多啦。



~ Lindberg

鱷魚花

地球上，有得多肉食植物（Carnivorous Plants）。它們具有以下四種行為：引誘、捕捉、消化和吸收。捕捉的獵物，比較常見的有豬籠草、捕蠅草等。

而最近，我家發現一個新品種。我們稱之為：鱷魚花。

這朵花的特性，是用一張可愛的臉，誘騙獵物。然後在澆水的過程中，把獵物捕捉。而成功與否，獵物都會被溶化及吸收。看以上短片中，那頭大熊貓的收場，已可略知一二。這鱷魚花應該是世上（吃得）最大的肉食植物。

細心觀察之下，我極之有理由相信，鱷魚花是由這個演化出來的：

這個植物叫：食人花（Piranha / パックン） 。主要分佈於水渠的出口處。但問題是，Jayson 並沒有接觸過瑪莉奧，何來會懂得食人花呢？這是一個……謎。



~ Lindberg

學校旅行：大埔海濱公園

今年學校旅行的目的地，是大埔海濱公園。

相比上一次，我們準備了一些比較簡單的食物。有：芝士火雞三文治（選擇了火雞，因為當天是感恩節）、即食粟米、藍莓、餅乾、小蛋糕等。

因為路途遙遠，老師帶頭唱了幾首歌，便讓同學們小休片刻。

落車之後，便立即捉住他的好朋友：昊郎。見到 Jayson 在學校可以（自已）交到新朋友，心裡都感到很恩惠。

Jayson 因為戲弄 霞姐，所以她也裝表情去回應 Jayson。

在廣場中安定好之後，老師把班房的相機交給我，要求我替她影班相。當我接過來的時候，我興奮莫明。這部相機，便是經常用來拍攝班房活動的相機。每次看它影出來的相片，對其質素都非常失望。原來相機的鏡頭十分污漕！我立即拿鏡頭筆出來，把它抹乾淨。希望之後老師影 Jayson 的相，可以清清楚楚吧！哈哈…

影過班相之後，老師便帶我們另覓一個空曠的地方，來玩集體遊戲。Jayson 和 昊郎 的感情真的不錯。兩個人去到那裡，便玩到那裡。

「小朋友，你哋玩咩呀？喂… 仲乜唔應我？喂… 喂… 喂…」

當日除了我們，還有幾間學校在這裡旅行。但幸好這裡地方很大，所以要找一個空地，也不算太難。我們唱唱歌、跳跳舞。

老師過帶了一堆廢紙來，讓我們一起摺飛機。這裡發生了一件事…

老師準備數一、二、三，然後叫大家一地把小飛機飛出來。但 Jayson 可能因為太過興奮，所以太早飛了出來，而且很不幸地… 墜機收場。之後其他小朋友都聽老師的號令，把飛機飛出。感覺不爽的 Jayson，蹺起雙臂。老師叫大家再飛多幾次，但 Jayson 依然一聲不作，獨個兒站在一旁。

之後我們唯有跟他不停鼓勵，叫他先作出小嘗試。最後，他終於成功地「放飛機」。
「我飛…」

一齊玩過之後，老師便帶我們四處逛逛。她說這還是她第一次來，所以也不知怎樣行。哈哈哈…

「Jayson，您望下上面！好多紙鳶呀！」

來到這個公園，當然要去看一看這裡的地標「香港回歸紀念塔」。有得行上斜路，Jayson 就最興奮。

雖然行得比較慢，但最後都自己行到塔頂。

但下來的時候，便喊說攰，要我抱。真的要了我的老命。唉…

這裡的景色還算不錯。那些花圃都做得很漂亮。差點有去了北海道的感覺。公園更有地方可以出租，讓市民可以在這個環境下，舉行婚禮。

解散之後，我們便找個草地，開始我們的野餐。

「好！就呢到啦！」

「Jayson，快啲幫手！爸爸好肚餓呀！」

「食得！」

可以在那麼舒服的環境下一家人野餐，吃甚麼都覺得特別好味道。

Jayson 吃了半件三文治、幾塊餅、和一整盒藍莓。總算沒有白費我的心機。補充能量之後，便和幾個同學一起，在草地上奔跑。

玩了一個上午，跟上次一樣，大人和小朋友都已經筋疲力盡。上巴士之前，Jayson 還依依不捨，不願回家。但開車之後，不消一秒鐘，我們全部人都睡著了。



~ Lindberg