學琴報告

一個半月之前，Jayson 開始正式學琴。學琴的目的有幾個：

1. 接觸樂器的機會（因為以前自己沒有…）
2. 培養對音樂的興趣（因為「四仔」有此需要…）
3. 爭取表演的機會（因為「四仔」有此需要…）
4. 加強手力指力的訓練（因為 Jayson 仍是「左右開弓型（ambidextrous）」，所以兩隻手的訓練都不足。）
5. 增強集中力（雖然 Jayson 現在沒有集中力不足的問題，但據悉「左右開弓型」有可能令腦部發展太過平衡，而出現集中力不足等的問題。）

（當然，以上的都是做父母的主觀意願。）

家中有了鋼琴之後，學琴就比較方便。我們「隨便」選擇了屋企附近的柏斯琴行，逢星期日早上，一對一學半個小時。原先幫 Jayson 找了一位年輕的女老師，我抱著一個很大的「期望」。但正所謂希望越大，失望就越大。上了四堂之後，最後決定換人。

起初第一、二堂還可以。Jayson 對樂理有基本認識，所以比較容易上軌道。有時還會「懶醒」，反過來要教老師。陪著 Jayson 一起上半個小時的課堂，比想象中辛苦很多。以前我去學吹小號，一個小時很快過。但一對一的鋼琴班明顯吃力很多，以 Jayson 的耐力，十五分鐘後也不支倒地。第三堂由 Jayson 媽陪上，她覺得 Jayson 的小手還未夠力，沒有興趣又不能專心。到了第四堂，終於也令我嘔血，痛罵了他一頓。

Jayson 媽建議暫停上堂，因為他真的沒有能力和心機。但我很不願意這樣便放棄，除了以上的「父母的主觀意願」，我知道放了下來，就很難再拿起來。而且我有別的客觀根據：

1. 女老師的廣東話不純正，即使會逗小朋友開心，但也得不到 Jayson 的注意。
2. 早上 11:30 的課堂，之前在家中已經玩了兩個多小時，集中力比較鬆散。
3. 手指實在太短小，彈得吃力。

我跟 Jayson 討論了幾天之後，我們決定繼續上堂。這次，我替他換來了一個男老師，並且將時間改為早上 9:30。雖然時間比較辛苦，但那是唯一老師有的時間。

結果：繼續不太聽老師的指示，十五分鐘後仍是不支倒地。不過，有明顯的進步，慢慢地提升基本功力。學完四堂之後，我亦對老師都頗滿意。我跟他說，我並非為了考小學而希望 Jayson 學琴。所以進度慢一點也可以，只要繼續提升他的興趣便可以。

另一方面，我懷疑如果沒有家長在場，Jayson 會表現得更加好。正如學校的老師們所說，沒有我們在左右的 Jayson，完全是另一個人… 但因為我不懂得彈鋼琴，不知如何在家中輔導，所以還是繼續陪他四個星期，慢慢細心觀察一下吧。

而練琴方面，我沒有用強迫政策。我會自己走上鋼琴上彈奏老師教的東西，他便會很自然地走過來一起練習。雖然練琴的時間不足，每星期只有三天，每次二十分鐘左右。但見他開開心心地自己彈，我已經很滿足。



~ Lindberg

第一次賣旗

早幾個星期前，Jayson 第二次參加義工活動。經學校的安排，替「香港傷健協會」賣旗籌款。近年來那些不知名的機構來賣旗，總是令人感覺怪怪的。但「香港傷健協會」當然值得支持一下啦。

學校可能明白到小朋友的耐力有限，所以分了三個時段，每段一小時，叫小朋友選擇並自己安排到那裡賣旗。星期六的早上，Jayson 要去唱歌和畫畫。唯一用得上的時段，就是上堂前的早上八時至九時。雖然好似早了一點，但亦是人流比較多的時間，所以我們就早一點起床，為公益盡一點綿力。

其實，我也只是賣過一次旗，應該是中三或中四的時候。當年賣旗得容易，很多人都樂意解囊。不消半個早上，便籌到大半袋善款。之後，我們還有時間去「娛樂」（玩電子遊戲機）一下…，才去銀行還錢袋。

這天 Jayson 媽非常落力。我們站在音樂學校的門口賣，人流很不錯。雖然只是大半個鐘，也裝滿了小半袋。之後 Jayson 要上堂， Jayson 媽繼續賣了一回兒，然後我才交回去銀行。

比起拍照「留念」，我花更多時間向 Jayson 解釋賣旗的意義。這個世界有很多需要幫助的人，而他是多麼的幸福。希望有機會再做多點義工活動，讓他親身體會一下吧。



~ Lindberg

蛻變中的商舖

以前屋企附近嘅轉角，有一間日式麵包店。我幫襯過唔係好多次，可能係價錢、品質、及形象都唔係好一致，所以唔太吸引。加上當時經濟麻麻，之後就頂咗手俾人，做薄利多銷嘅麵包店，主打街坊生意。當經濟慢慢「起飛」，麵包店不久就被淘汰。取而代之係一間化妝用品店。

我當時感到奇怪，點解會喺呢到開一間化妝用品店。可能自己唔洗用，所以更加百思不得其解。由街坊商舖變成化妝用品店，起初都唔太在意佢嘅演變。但最近化妝用品店結咗業，而新租客竟然係… 金舖？！

雖然附近係冇金舖，但真係有需求咩？估唔到一個住宅區，都會有好似黃金購物地段嘅情況出現。

見到呢個轉變，令我諗起關於人生需求層次嘅理論：「Maslow's Hierarchy of Needs」。首先，大家會祈求食得飽。食飽之後就會想裝扮一下，追求人與人嘅交流。然後就會希望炫耀自己嘅成就，用金光閃閃去得到其他人嘅認同。估唔到對人嘅理論，竟然對商舖都用得著喎。

不過問題係，好多人仍然係停留喺搵麵包食嘅階段。而為咗成就買到金嘅一少撮人，就要犧牲大部份人嘅利益。於是，我就要行去更遠嘅地方買麵包，甚至要付出一個更高嘅價錢去買一包工場生產嘅防腐劑麵包。真係好難叫人唔沮喪。

可能正如祖國嘅理念，首先讓陪份人富起來，最終就可以令整個國家富強。但眼前嘅環境之下，真係唔係好覺囉。因為道理好簡單，一個字：「貪」。我一直都覺得財富係唔應該累積，但喺「不等價交換」之下，我哋啲錢最終只會供奉咗俾啲有錢人，而有錢人嘅錢，就只會喺有錢人當中傳來傳去。最後，就累積咗喺部份人身上。唯一慶幸嘅，就係有時佢哋都會捐助下，支持學術研究等。雖然嗰啲都係香港人嘅血汗錢，但如果要集腋成裘，又談可容易呢。不過… 佢哋仍然係累積得太多太多啦。

依以上蛻變中的商舖嘅推論，下一步應該係要開教會之類嘅物體。其實當我草議侵略地球嘅第一步，就係要開宗立派！果真不謀而合呀！係時候開始「朋友計劃」啦！嘩哈哈哈哈哈哈哈…



~ Lindberg

Yr4Q1 報告

四歲的第一季。仍未脫離「自主年齡的反抗期」，但至少給予時間，耐心溝通，總會找得到出口。當找到問題的解決方法，便會令父母很有滿足感。

體重：36.6 磅
身高：100 厘米

因為早前肚痾，還擔心沒有增磅。幸好後勁淩厲，才可以有點進帳。但即使高了一丁點，也明顯比其他同學矮些少。

發展報告：
飲食方面：

• 每朝都喝一杯鮮奶。曾經試過買「美素佳兒」的奶粉，但他覺得太甜，不喜歡喝。
• 早餐都是以麵包及粟米片為主，有時「彈盡糧絕」，也會吃餅乾充飢。
• 吃飯還是很不專心，食得很慢。紫菜及納豆，是少不得的助飯良品。亦即是如果可以提高吃飯的「趣味性」，他會很樂意地吃。

體能方面：

• 大肌肉力量再有提升，可以玩難度較高的遊樂設施。但相比其他活躍的小朋友，還是差一點。

• 八字腳跑起上來不是太過平穩，跨步亦不大。需要好好注意一下。
• 買了一架單車，開始慢慢踏。

• 大散光，每隻眼都過二百度。要開始戴眼鏡了！

上學方面：

• 雖然收過女同學的情信，班中的好朋友好似不多。當同學熱烈地呼喚他時，我問他為何不理會別人，他回答說：「我諗緊嘢呀嘛！」
• 每天有兩份功課。學始多一點複雜的中文生字，如：今天、山羊、毛巾、耳朵，及中國數目字等。

• 左右手一起來填色，會做得快一點…

學習方面：

• 表達能力不錯。亦可能因為比之前有所改善，所以也發少了脾氣。
• 加減數都做得不錯。
• 我不知道學校教聲學（Phonics）教到甚麼程度，而我對聲學又不太認識。有時見到高年班的貼堂的習作，明顯見到有些同學是因為聲學的關系，而把那些英文生字串錯。但在閱讀上，是有一定的幫助。因為書本上的生字都不會很深，所以只要讀得出，他就會明白故事的意思，提高對閱讀的興趣。

問題兒童方面：

• 仍然會向我們發脾氣，但原因是可以理解。用心聆聽之後，發覺很少無理取鬧，所以事情最終都可以得到解決。
• 但當然也有會遇到無理取鬧的時候，我們便會強硬對待。當他心情平靜下來，就會跟我們道歉。
• 最有趣的發現，是 Jayson 有些行為，會令媽咪發瘋，但那些問題，我又覺得沒甚麼大不了。然而有另一些問題會令我破口大駡，Jayson 媽卻會很有耐性對待。可能大家慢慢懂得選擇性對待，所以問題也能夠更有效地解決。
• 藉口比之前少了，「耳邊風」亦有所改善。
• 但早上叫他起床總是聽不到…
• 很會「冧」人，但幸好個性單純，不會亂加利用。
• 跟家姐的感情很不錯。但有時 Julie 會玩到得意忘形，反過來咬 Jayson 一口。然後引來大喊一場。

藝術方面：

• 開始學鋼琴了！成績有待公佈… 之前也不太清楚他在葉氏那裡學了甚麼，原來已經學會了基礎的樂理。在學琴上很有幫助。

• 而繪畫方面，畫功也沒有甚麼改善…。但創意還是有的。

自理方面：

• 戒夜片方面，我們開始鼓勵他晚上如果急，就要叫媽咪（不要叫爸爸）。起初都有點成效。大約十二時左右，他就會喊要媽咪。去過小便之後，便繼續去睡。可惜之後可能天氣太冷，有暖氣的房間，使他不願起床。所以計劃最終都是失敗！希望天氣回暖之後可以繼續努力！
• 應該是時候要他自己洗澡了…

~ Lindberg

點解要俾啲「衰」人坐？

有一晚，我要帶 Jayson 到佐敦調較眼鏡。擠迫的地鐵車廂中，我們依靠在門邊的一角。站得久了，Jayson 開始有點疲倦。於是我跪下來陪他，聽他發牢騷。突然，他指著對面的坐位問我：

「點解要俾啲衰人坐嘅？」

「吓？！咩話？！」這句嚇得我有點不知所惜。

我心裡想，即使別人不讓位給小朋友，也不需要叫人做「衰人」呀。正當汗顏之際，我明白他想問甚麼…。

我大聲地反問說：「您係想問：點解要俾啲「有需要」嘅人坐得呀？點解食咗幾隻字㗎？」

「係呀。我咪咁嘅意思囉。」

幸好也沒有多人聽得到。真係不知好嬲或是好笑。

之後，我解釋多一次（之前解釋過），何謂「有需要的人」。即使小朋友也算是「有需要的人」，但站一回兒便嗌攰，我是不會隨便接受的！




~ Lindberg

情人節快樂！

給大家一個吻，祝各位情人節快樂！

~ Lindberg

不會讓您痛

可能因為我天生頭大的關系，所以久不久也會瞓捩頸。這幾天，脖子又痛得不能轉動。坐在公共小巴上，經過路面不平的地方，搖晃也令我感到很痛。

「爸爸，您做乜嘢呀？」坐在我大腿上的 Jayson 問我。

「爸爸整親條頸，頭先㗎車 bumpy，我咪好痛囉。」

Jayson 用他的小手扶著我的頸，然後望著我說：「爸爸，我唔會俾您痛㗎！」

我的眼眶立即被淚水填滿了。無論將來會變成怎麼樣，我也不會忘記這一刻的心情。

可能就是這種心情，以前長輩們總是希望我們會生小孩。雖然幸福並非必然，而且養兒防老這一套，我相信我爸媽也知道是不管用，但他們也沒放棄過催促我們。現在有了 Jayson 之後，才真正明白這一份心情。

回程的時候，小巴又經過那個路面不平的路段。Jayson 自動自覺地用小手扶著我的頸，溫暖的感覺長留在肌膚之上。（…跟被他媽咪發現我珍藏的《佐佐木希寫真集》，勒著而沒有血到的情況，截然不同。）



~ Lindberg

丼丼屋食堂試食會

上星期日，丼丼屋食堂邀請我哋一家到佢哋喺太古城嘅新店試食。自從佢開幕之後，丼丼屋一直都係大排長龍。既然咁近我哋屋企，我哋又想試下，當然一口答應啦！

丼丼屋食堂
地址：太古城中心1樓102號鋪
電話：2164 8636

公關公司嘅 Stephanie 及 Dora 非常貼心，喺我哋等候其他 Blogger 嘅時候，攞咗本書俾 Jayson 玩。原本都好擔心佢會悶，依家就唔驚啦。

其實之前都去過圓方嘅丼丼屋食堂。但因為嗰次食得趕頭趕命，無好好地了解一下。今次有 Stephanie 介紹一下，先能夠加深認識。顧名思義，丼丼屋係食丼（日式碗飯）。跟據 Stephanie 所講，丼丼屋嚴選日本新潟縣嘅秋田小町米，並用 RO 水去煲。以前我哋屋企都會買日本靚米，配以日本礦泉水去煲飯。但自從要養多個工人之後，已經冇咁有要求啦。所以可以食到一碗彈牙靚飯，真係可以好開心！

開始上菜啦！刺身盛合三款（$88）：我哋呢碟好新鮮。刺身唔係呢度嘅主打，所以無諗過可以食到咁甜美嘅刺身。

燒玉子卷（$28）：雖然蛋卷睇上去好似好易煎，但要做到厚身軟滑，都幾有技巧。蛋卷上面仲灑咗少少柚子碎，加添一陣清新嘅香氣。

吉列廣島蠔（$78）：剛剛先跟 Jayson 媽講起喺屋企炸生蠔有幾難，估唔到就有得食。廣島蠔炸得啱啱好，香脆之餘仲有好濃嘅蠔味。

配合酥炸食物，日式餐廳都會用即磨芝麻醬。Jayson 幫手磨芝麻，香氣噗鼻，立即食慾大增！

「Smell Good！」

滑蛋雞肉丼（$48）：我其實好怕呢個食物，因為佢有另一個名：「親子丼」。雞同雞蛋，媽媽同個仔，諗起都想轉食長齋。不過呢度嘅滑蛋雞肉丼做得唔錯。喺其他餐廳食，好多時候都會落好重鰹魚汁，蓋過其他材料嘅味道。雖然我哋呢碗係濕咗少少，不過味道剛剛好，而且啲米飯真係好好味。

兒童定食（$48）：好健康嘅一個兒童餐。有沙律、主食、果汁。咁嘅價錢，家長可以毫不猶豫咁叫俾小朋友食。不過我對沙律有保留，Jayson 咁大個仔都冇俾佢食。而白飯可能因為要「倒模」嘅關系，雖然都係靚米，但外面就風乾咗啲。

北海道咖啡特飲：因為今日好早起床，所以食到半路中途，我需要叫杯咖啡充一充電。但竟然發現咖啡只係配角，主角係上面嘅北海道軟雪榚！Jayson 食過一啖之後，立即精伶哂！功效仲厲害過啲咖啡（當然佢冇飲到啲咖啡啦！）！

明太子冷烏冬（$48）：太古城店獨家限定新品。明太子係用辣椒及香料醃製過的明太魚嘅魚子。冷烏冬好彈牙，加上辛辣嘅感覺，非常醒神！我用筷子將塊紫蘇葉撕開，跟啲麵一齊食。我唔知佢會唔會只係裝飾，不過香草嘅味道，可以減少明太子嘅腥味。怕腥嘅朋友不防試試。

忌廉蝦烏冬（$68）：同樣係太古城店獨有。呢碗嘢真係好攞命！漏到爆，但係香到忍唔住一啖一啖食落肚。罪疚感非常大。大蝦只係配角，啲忌廉湯底真係香滑得好緊要。我無諗過明明已經飽到發悶嘅 Jayson，都自動嗌住要食多幾啖。係一個好適合同小朋友分享嘅烏冬。

北海道雪榚新地（$38）：用北海道 3.6 牛奶做嘅軟雪榚，奶味非常濃郁。淋上抹茶、十勝紅豆、及煙韌嘅團子，好一個「宇治金時」。

因為抹茶帶有苦澀味，Jayson 麻麻地。呢到嘅哥哥好好人，整咗個甜筒俾佢喎。發達啦！

三得利角瓶威士忌梳打（$38）：對於「三得利（Suntory）」，即使我唔飲威士忌，都會記得 比爾默里喺《迷失東京》入面嘅對白：「For relaxing time, make it Suntory time…」而呢杯大大杯嘅 Highball，即威士忌加梳打水，據悉喺日本時下非常流行。清新香味及爽快口感，豪氣地大口大口咁飲，不禁「啊」咗一聲出嚟。爽呀…

同一個表情，果然係兩母子。

同場仲有幾「隊」Bloggers。場面都幾熱鬧㗎。星期日下午四點左右，餐廳唔算多人。呢度嘅裝修樸實簡單，令人坐得好舒服，唔會覺得拘謹。

最後，感謝丼丼屋食堂及公關公司 Waggener Edstrom 邀請我哋嚟享用咁豐富嘅一餐。總括嚟講，食物嘅質素總會有改善嘅空間，但呢到確實係一間不錯嘅家庭餐廳。睇佢個開心樣就知道啦…

~ Lindberg

台灣之旅： 第二天 Baby Boss

第二日仍然係自由活動。天氣麻麻地，有少少雨。其他人要去動物園，但我哋嚟台灣之前，已經一早買咗票去「Baby Boss 職業體驗任意城」。

喺佢哋嘅網站買票，一個小朋友加兩個大人，享有國外觀光客戶購票八折優惠後，共台幣 1,520 元。

食咗早餐之後，Jayson 唔知乜嘢原因發燒。好彩我哋有帶藥，食咗藥之後就要佢瞓一覺。到咗下午退咗燒，見佢幾精神先膽粗粗出發去 Baby Boss。

Baby Boss 位於京華城購物中心嘅七樓，占地八萬平方尺。入面提供 70 個職業角色俾 3 - 15 歲嘅「小市民」，佢哋可以選擇適合年齡嘅職業，體驗工作精神，賺取「 BabyBucks」去買嘢，學習真實社會嘅運作。

我哋去嗰日（星期二）唔算多人。一個下午都排到四個職業。首先，Jayson 要做「牧場主人」。佢要學習點樣去照顧一隻乳牛，仲要落手落腳搾牛奶。雖然只係模型，但真係搾得出水㗎！

之後就去咗做警察。每個職業都有哥哥姐姐用心講解。雖然係講普通話，相信 Jayson 都明白要做啲乜…呱…

「YES SIR！」

其實應該係巡警（交通督導員）。工作係幫其他職業嘅車輛開路。

每個職業都有佢嘅時間表。早半個鐘左右就要去排隊。大人當然唔可以代排，否則會俾人咒罵死。玩咗兩個職業之後，開始明白要點樣安排時間。於是就停咗落嚟，補充退燒藥休息一下。

其實呢到真係有好多職業玩。歌星、卡通配音員、考古學家、太空人、食品制作、法官、牙醫、加油員、保全員（保安）、造型設計師… 一日一定玩唔哂。我見有好多本地嘅小朋友，都似係常客。喺「工作」中所賺嘅錢（BabyBucks），會存入銀行。真係好似現實生活咁，儲夠錢先去買心頭好。

啲錢除咗可以用喺買啲（唔等洗嘅）文具、玩具，亦可以用嚟支付某啲職業嘅材料費用。
咁多個職業當中，我相信最好玩嘅，應該係消防員。有得跳鋼管舞… 我係指滑鋼管。

仲有得坐救火車！小小消防員出發！

去到火場，動用六條水喉，射水救火！水係真嘅，火就當然只係燈光效果。旁觀嘅大人都覺得好好玩，相信 Jayson 都樂在其中。

所有遊戲都只可以俾小朋友獨自參加。唯有一個係例外，媽咪都有得玩。仲有得坐飛機添！

Jayson 未夠歲數做飛機師，只好做空中服務員。空中服務員要上機啦。

見到佢一身裝束，加埋一個手拉行李，真係可愛到爆。可惜因為安全理由，機上情況無得影，而且只可以有一位家長可以上機。

一上到飛機，一班服務員就列隊歡迎乘客。有兩個小朋友教人著救生衣。然後就有一班服務員問各位乘客要唔要毛毯或雜誌。Jayson 係另一班服務員，負責收番啲毛毯、雜誌。飛機航程好短，眨眼就到達目的地。一班服務員又再列隊，歡送乘客落機。

呢到啲設備確實令我幾驚訝。喺一個購物中心嘅七樓，竟然會有迷你版嘅交通工具。所有嘢都好認真，真係值得帶小朋友嚟玩下，順便仲可以練下普通話添！

玩到關門之後，晚飯就向饒河街夜市出發！



~ Lindberg