受網友的友好荼毒之後，終於抵唔住（屁股痕癢）要買部麵包機。眼前有兩個選擇：樂聲（
SD-BM103T）或 象印（
BB-HAQ10）。前者係台灣機，需要加變壓器。後者方便簡單，但欠缺前者嘅「獨家乾果酵母自動投入功能」，而且價錢比較貴。樂聲：大約 $1,870（包運費及變壓器），象印：大約 $2,200。
原先都諗住買象印，但竟然無（平）貨！加上我真係幾想要「乾果酵母自動投入功能」，所以立即
上網訂購：Panasonic SD-BM103T 麵包機。今日落單，第二日就到，真係快得厲害！
準備拆玩具嘅時候，先發現屋企冇整麵包嘅食譜。但原來一啲都唔洗擔心，因為
說明書上面已經有足夠嘅食譜。而且簡單易明，只要有材料、電子磅、麵包架、麵包刀，就可以開工！
製做麵包方法極之簡單。只要注意材料份量及水溫，將材料（除咗酵母或乾果）放哂入個兜裡面。同煲飯冇乜分別。
然後酵母就放落上面嘅酵母格。奇妙嘅事情就會發生。
麵團會因應程序，進行攪拌或靜止醒麵。到咗適當時候，酵母格就會打開，俾啲酵母跌落去。（提子乾等乾果，都係用同一個道理，喺放喺另一邊等佢自己放。）
落酵母嘅時候會有幾下「呯呯」聲，因為我哋廚房冇門，都有機會從睡夢中嚇醒。之後就會開始發酵。正因為有咗呢個功能，我就唔驚過度發酵（或者啲提子乾浸到出哂汁），可以喺臨瞓之前，預備所有嘅材料，然後預設幾點想有麵包食。
到咗我起床嘅時候，就一屋香噴噴嘅麵包味。早餐可以有熱辣辣嘅麵包食，太幸福啦！
呢個係我最欣賞呢部機嘅地方。不過真係好可惜，要配一隻咁大隻嘅變壓器。雖然佢話商品馬達係 83W，而加熱器係 370W，理論上兩樣嘢唔會一齊著，500W 嘅變壓器都已經足夠。不過原來變壓器只有八成左右嘅功率，所以只係剛剛好。500W 使用時間過長的話，加上半夜大家都瞓著咗，真係唔可以掉以輕心。
講番製成品。最基本嘅吐司已經好好味。麵包皮香脆，入面就軟熟。不過製成品嘅質素，跟用料有好大關系。
唔係話平嘢做唔到好嘢。不過焗麵包係一門學問，呢啲全自動機冇得俾我哋微調任何嘢，所以說明書上嘅建議，應該已經係最正路。不過麵粉嘅筋度，水溫室溫等，都會影響到麵包嘅嚼勁。一包英國有機麵粉，同一包日本麵粉，同一個食譜，做出嚟嘅麵包都有明顯嘅分別。
用日清麵粉（大約 $39 一包），做以上一球六片嘅麵包，材料費大約都要 $11。成本都唔平㗎。不過就保證新鮮，絕無任何添加！而且除咗普通麵包，仲可以扮麵包師父，向高難度挑戰添！好好玩㗎！
「Jayson，塊麵包好唔好食呀？」
（
睇個樣就知啦…）
~ Lindberg
P.S. 被人毒害咗之後，就好似網上流傳啲電郵一樣，如果收到的話，就要轉寄俾十個人，否則就咩咩咩喇。估唔到我呢篇文章未出，睇到我啲 Plurk 嘅朋友，已經有人中咗招！前幾日又有朋友上嚟俾我直接落毒。我覺得自己越來越接近幸福。嘩哈哈哈哈…
