Timberland 家族

（注意：呢個並非廣告特輯，更並非嗰啲咩健康食品推介，覺得食咗之後，睇到嘢嘅人會繼續睇得到嘢，所以要特登介紹俾朋友食。只係一個自己鐘意嘅品牌，一家人都試著過讚好，所以冇辦法唔分享一下。）

那些年的中學時代，有兄弟偷著 Timberland 嘅帆船鞋返學。雖然我都覺得幾有型，但當時除咗唔係好跟貼潮流之外，銀包有錢都會攞去進貢俾「雷電」或者「街頭霸王」，所以對衣著都好隨便。（因此，兄弟就追到女仔，而我，就只係可以同春麗做對手。唉…）

自從上兩年前嘅一個機緣巧合，我見 Timberland 減價，於是就買咗我第一對短靴去襯我嘅秋冬返工衫。自此之後，我就決定咗非 Timberland 不穿。

Jayson 契爺笑我老土，話 Timberland 只有老人家（如某位上咗年紀嘅同學）先會著。但正所謂：別人笑我太瘋癲，我笑他人看不穿。呢個「橙底」（Anti-Fatigue）真係非一般好著！

通常啲貨物賣點，都有啲誇張成分。我記得第一次見到架上嘅「橙底」，佢話舒服到企十幾個鐘都唔會攰。以我嘅英明，當然唔會輕易相信。不過見對短靴都幾型，所以就買嚟試下。（但可恨我阿媽唔生高我幾吋，否則我就可以買對經典長靴…）

以前未著過短靴，新鞋都幾刮小腿。但當著軟咗之後，對鞋包住隻腳又幾舒服喎。而最驚喜嘅就係個底，真係神奇到行成日街都唔會唔舒服。（那一刻我真係覺得每個巡邏警員都須要有一對！）其實我都唔係好明白佢嘅原理，感覺上就只係普通一塊軟墊，但即使係 Nike 啲運動鞋，行行企企耐咗都一定冇「橙底」咁舒服。我懷疑係因為 Timberland 整對皮鞋嘅用料，加上佢本身嘅造鞋技術，同埋一塊好嘅軟墊，所以先會咁舒服。

有見及此，我就推薦俾 Jayson 媽著。起初佢對 Timberland 啲款式都係唔多接受，但因為佢啲鞋成日話著壞腳，搞到腳痛腰痛，最終俾我強迫之下都買咗一對。自此之後，佢都成為咗 Timberland 嘅忠實支持者。腳痛，冇咗！腰痛，冇埋！（但肚腩就依然喺到…）

繼黑色短靴之後，我買多咗三對，配合不同嘅需要或場合。Jayson 媽都補多兩對，然後將啲波鞋掉哂。

但更令我始料不及嘅，就係啲童裝鞋。雖然唔係「橙底」，但款式好型仔！而且三百幾蚊一對（減價後），價錢都算合理。去 Dr. Kong 都係差不多。雖然唔知佢同啲「健康童鞋」有冇得比，但摸起上手，我覺得腳底嘅承托及對整隻腳嘅保護都做得幾好。而且用料方面，同 Timberland 嘅大人鞋一樣咁好。比起其他童鞋，就好似「勞斯萊斯」跟自行車嘅分別。我覺得一啲都冇誇張！

上面嗰三盒鞋，其中就係以下兩對。Jayson 嗰對，我覺得好靚。佢試鞋嘅時候，我哋問佢舒唔舒服，佢話好舒服。然後細細聲喺 Jayson 媽耳邊講：「可唔可以（就咁）著返屋企呀？」小朋友果然識貨呀！哈哈哈哈…

~ Lindberg

組合玩具

最近，Jayson 喜歡組合不同玩具，變成一個全新的玩法。

「首先，用個 Hammer 將啲 Pears 揼揼揼，揼哂落嚟。」Jayson 向我們解釋說。

「然後就跌落去個杯量裡面。」

「跟住就放入架貨車入面，咁咪可以送去俾人食囉。」

在家中，有時我們都會讓他自己一個人玩。除了可以訓練一下專注力之餘，也可以提供一個空間，讓他發揮一下創意。

四樣東西都是來自不同的玩具，小木鎚、樂高樹上的啤梨、層層疊的小杯、和閃電麥坤的司機：阿麥，原來他們可以也來一個 Cross Over。而今次的發現，我最欣賞的是他可以篇一個故事出來，用言語表達給我們聽。而且語氣還要可愛得很呢。哈哈哈哈…



~ Lindberg

借爸爸車車

「爸爸，我大個咗可唔可以揸您架車？」

「等您考到車牌，同埋俾到信心我，會揸得好，我就借架車俾您啦。」我回答說。

「不過都要等到十八歲先考得車牌㗎。」媽咪補充說。

「哦…」

跟著我便向他解釋甚麼是駕駛考試。希望他長大之後會跟他爸爸一樣，做一個有技術而又盡責的駕駛者。

「咁到時您會唔會車我哋四圍去㗎？」我笑著問。

「但您地到時已經死咗囉喎…」Jayson 回答說。

殺那間晴天霹靂！天啊！雖然我也相信自己不會太長命，但也不會那麼英年早逝吧？！

「唔好呱？！爸爸媽咪想睇到您結婚生仔喎。唔會咁早死呱… 嗚嗚…」


~ Lindberg

小學生閃卡事件

有一日，我同事好擔心咁行過嚟我個位，細細聲咁同我講：「我個女間學校出咗個陳冠希…」

好彩當時我口中冇嘢，唔係真係有乜噴乜。佢個女小學五年班咋喎！起初真係俾佢嚇死，但經過一輪隱晦嘅解釋之後，原來係除衫玩自拍，唔係發生乜嘢性行為（呱…）。但已經夠死！好彩及早發現，否則唔知下一步會變成點。

估唔到「閃卡」事件，竟然會發生喺小學五年班入面！啲細路有冇咁早熟呀？！我哋仲考慮過俾 Jayson 去讀嗰間小學㗎。靠…

詳細情況就不便多講。簡單嚟講，就同陳冠希或某富商懷疑非禮港男一樣，問得多，總有一個搭上。男童用 Whatsapp 廣邀同學「參與」，加上本身已經有女朋友參與其中，所以說服力就越大。

同事話間學校已經做哂性教育，叫啲男生要尊重女生，點解仲會有咁嘅事情發生。我覺得係兩方面嘅問題：1）意志力；2）道德觀念。

好多朋友都會話，邊到會有啲咁白痴嘅人㗎。轉運、整車呢啲嘢都會上當嘅？但我就覺得一啲都唔奇。正如嗰啲「乳房協會」、「消防中心」、賣文具等嘅電話，日日都會打嚟，就即係證明總有人上釣啦。只要咁啱符合到某啲條件，再加上無路可退嘅壓力，人嘅意志力就會崩潰。男生嘅背景地位、故事環境嘅配合、好奇心再加上群眾嘅壓力，腦袋入面就好似有一條幼幼嘅線，再加多少少力，斷咗！咁就幾咁唔理性嘅嘢都做得出。

而現時社會嘅道德觀念係點，我亦唔洗多講。我係極之討厭公眾人物行為唔檢點，再加上報紙雜誌嘅加鹽加醋或看圖作文，漣漪所產生出嚟嘅後果，係可以超乎想象。我仲記得陳冠希事件剛發生冇耐，我喺地鐵車廂內聽到兩男一女中學生嘅高談闊論。佢哋外表斯文正常，起初對於其深入討論，我可以當作對事件嘅客觀分析。但之後其中一個男仔話：「唓！佢有幾犀利啫，我都大過佢啦。」當時我雙眼一突。第一，我極之懷疑佢係真唔係。第二，我未試過跟人喺大庭廣眾談論我嘅性器官大小。第三，地鐵車廂中，知唔知個「醜」字點寫呀？之後更露骨嘅對話，我已經唔想記得啦。

「唓！阿邊個議員都講粗口啦！」「唓！阿邊個藝員都飲酒開車啦！」「唓！有乜大不了啫，阿邊個都有做啦！仲要幾個一齊上添！」

互聯網嘅發達，令資訊更容易傳開去。好嘅會傳開去，壞嘅就更容易。記得當我第一次睇《東莞的森林》嘅時候，第一個反應係拍案叫絕。用村上體（村上春樹嘅寫作方法），喺網上論壇連載嫖妓故事，真係叫人大開眼界。但睇咗幾章節之後，我就無法繼續睇落去。並非自命清高，但我真係接受唔到作者嘅寫法。嫖妓幾時變成咗一件以史詩式記載，可歌可泣嘅事情呢？！正如作者第一段所寫，佢打一個冷震，所有拜讀佢連載嘅大小朋友，價值觀都立即完全地崩潰。喺作者炫耀自己嘅豐功偉績嘅同時，有冇諗過對社會嘅道德觀念會帶來乜嘢嘅影響呢？

當然，有啲人可以話時代「進步」，思想開放係好難免。但只要係有子女嘅朋友，相信冇一個會希望見到會太「進步」。呢一個並非係保唔保守嘅問題，而係當上父母之後，都會希望好好守護下一代嘅問題。就例如講粗口係一種文化，但當自己講粗口，會唔會由得自己個仔爆粗呢？但如果有朝一日，個仔明白呢個粗口文化嘅背景，明白一句粗口嘅意義及象徵，而選擇去爆粗，我唔會有異議。如果只係受外界因素，而影響自己嘅決定，咁就唔希望見到囉。

見到同事個樣，真係幾愁。希望我有排都唔洗面對呢個問題啦。唉…



~ Lindberg

二刀流的悲哀

「二刀流 鷹波！」（註：這是索隆在《One Piece》內的其中一招絕技…）

利用以高速拔出兩把筷子而產生的風壓，可以把遠距離的食物夾入口。波狀的衝擊波會在擴闊範圍襲擊想夾同一件食物的敵人。

如果 Jayson 對食真的有那麼積極就好啦。唉…

原本以為能夠左右先並用是一件有趣的事。但有研究指出，左右開弓（Ambidexterity）並非一件好事。大約每一百個人，就有一個人真的能夠左右開弓。但除了身體協調性好一點，運動上有些幫助之外，對大腦發展其實有影響。簡單來說，因為可以左右開弓，所以左右腦的刺激都很平均。平均亦即是代表不突出，發展不足。左右腦各有其功用，可能因為刺激不足，發育不良，便會導致研究所發現的語言發展遲緩、智商比較低等。而研究更指出，青春期的時候，會有專注力不足的及過度活躍等的情況出現。跟據我有兩個學分的神經學知識，這個推論很合理。

「大鑊！」除非跟索隆一樣地練出三刀流，否則二刀流不像會有好結果。

幸好，Jayson 並未有出現那些問題，唯一是左右不分的情況，近幾個月才（倒退地）出現。彈琴時叫他用左手，他卻用起右手來。小時候反而沒有這個問題… 奇怪。在學校裡，老師一早已鼓勵他只用有力一點的左手去寫字。偶爾間也會見到他用右手，但主力都是用左手。而算術方面不錯（加減數都做得不錯），表達能力還可以（可以看圖講故事），希望腦袋的發育不會太差勁吧。



~ Lindberg

Eye-Fi SD 無線記憶卡的用途

早前 米爸 介紹我用 Eye-Fi。此卡如果放入相機，就可以將啲相無線傳送至電腦或手機上。但當時我冇落搭，因為覺得自己唔會多用。如果要即時放相上網分享，Instagram 已經夠用。但之後買咗 5D Mark III 之後，發現佢喺工作上可能有啲幫助喎！所以就拜托佢幫我買咗張 8G Pro X2 番嚟。佢跟普通 4G 版嘅分別係可以上載 RAW 及有 Geotagging（地理標簽）。等我喺呢到簡單分享一下呢張卡嘅用途。

首先，第一次啟動 Eye-Fi 卡需要直接用 USB 連接電腦，做一啲簡單嘅設定。上網用電郵及密碼去確認身份，咁就可以分享俾其他電腦、手機，透過 Eye-Fi 嘅軟件去攞相。對於我（咁勁）嚟講，都要搞一陣先知道做緊乜。

無線上載有兩個渠道：1) 經預設 Wifi Router；2) 由 Eye-Fi 卡自行建立 Wifi 網絡。後者比較容易明白，張卡可以自行建立一個無線網絡。當手機安裝好 Eye-Fi 軟件之後，跟據指示去完成認證，就可以喺無線網絡上搵到呢隻 Eye-Fi 網絡。就當佢係一隻 Router 咁連接，就可以經軟件攞相。

而前者係當相機見到預設嘅 Wifi Router，啲相就會自動飛去預設嘅設備。例如我屋企部電腦裝咗 Eye-Fi 嘅軟件，當我喺屋企影相，影完之後行去部電腦到，啲相就已經自動完成下載。就有如專業影樓設備一樣，超級方便！

（按完快門，行埋電腦就見到張相。影得好暢快！）

但有幾點值得留意一下：

• 如果預設咗屋企嘅 Wifi，並且選擇咗會飛去自己部電腦，咁就唔可以隨意改變，想飛番落部手機到。如果要更改設定，就要將張卡經 USB 連接到電腦上，更改傳送方法。超麻煩！
• 可以選擇自動上載全部相片，或選擇性上載。全部上載對於我呢啲「山大斬埋有柴」型攝影師嚟講，確實有啲問題。所以有選擇性嘅方法就非常之好。而佢嘅做法仲非常有創意。因為大部份相機都冇特別支援 Eye-Fi，所以佢醒到用相機固有嘅功能：Protect（保護）。保護張相嘅原意係以防唔小心刪除咗張相。Eye-Fi 就利用呢個特點，當佢見到你選擇保護咗張相，佢就會將佢上載到你嘅電腦或手機上。係一個冇辦法中嘅辦法，而且用起上嚟都算方便。好型！
• 不過以上唔可以隨意更改。全部上載就全部上，選擇性上載就選擇性上。要更改就又要將張卡經 USB 連接到電腦上，更改傳送方法。超級麻煩！
• 而我部 5D 竟然用唔到選擇性上載！可能因為部相機可以支援 Eye-Fi，但支援又支援唔哂。當選擇咗選擇性上載，就乜都睇唔到。而且佢仲會經常令到我部相部當機。勁灰！期待佢（Canon 或 Eye-Fi）嘅軟性更新。
• Geotagging 係從公共 Wifi 取得位置資料，但資料並非直接寫入卡內嘅相片檔案上。位置資料應該係放喺一個唔知收埋喺邊嘅檔案，然後當相片經無線上載到電腦嘅時候，Eye-Fi Center 軟件就會將資料插入相片檔案入面。所以如果直接經 USB 攞相，係唔會有地理位置資料。

整體嚟講，卡仔細細，可以喺冇相機支援之下做到咁嘅嘢，真係好有諗頭。雖然有啲嘢未能盡善盡美，不過佢嘅可塑性似乎唔錯。相信嚟緊嘅更新版本會做得更好。



~ Lindberg

陪瞓員

「Jayson，您幾時先唔洗爸爸媽媽陪瞓？」媽咪問。

「五歲先啦。」 Jayson 回答說。

「吓？！」這個數字是從那裡來？！

「您細個 baby 嗰陣都唔洗我陪瞓。」媽咪續說。

「幾時呀？」

「一歲囉！」

「唔係喎！我記得您唱 Twinkle Twinkle Little Star 喎。」

「又好似係喎…」

然後，他就做起動作來。小手一開一合，變成閃星星。令我回想起這個片段…

原來 Jayson 還真的記得兒時的東西喎。



~ Lindberg

母親節神秘小禮物 2012

星期五放學，Jayson 從學校裡帶回了他做的母親節禮物。我叫他回家之後，要好好收起，到星期日才好拿出來，給媽咪一個驚喜。於是，回到家之後，我們便收在我的床頭櫃之內。

（當媽咪發現書包裡空無一物的時候，表現得十分失望。以為 Jayson 漏了在學校。呵呵呵呵…）

星期六早上，Jayson 一起床便問媽咪：

「媽咪，您有冇睇過個櫃桶呀？」

「吓？哈哈哈哈…」媽咪已經知道發生甚麼事。

「Jayson，仲乜自己爆響口呀？」我說。「今日星期六咋！」

「噢…」Jayson 說。「媽咪，唔準睇！」哈哈哈…

星期日早上，Jayson 自己起床。跟我一起擦牙洗面之後，他便爬上我們的床，送禮物給媽咪。首先有自製賀卡一張。

上面寫著：「Happy Mother's Day.  Mummy I Love You… Because (you read) book (to me)…」這要聰明人才能看得到。

還有禮物一套。

起初以為只是一把普通的手提電動風扇。誰知一點也不簡單！Jayson 不停嚷說有特別效果。當媽咪一按著…

嘩！竟然是有 LED 顯示的高科技產品！看得我們目定口呆。我強烈要求父親節送 iPad！
最後一件禮物，就是 Jayson 自己。Jayson 說這個晴天公仔是他自己。哈哈哈…

而我亦跟 Jayson 預備了另一張賀卡。用 iPhone 的 Cards 做的。

印刷質素非常好，可惜因為知道需要大約兩個星期才能收得到，所以不能準確計算收卡時間。不過總算是母親節前收到。

裡面是簡單幾隻字，但相信已代表了我們的心意啦。希望各位母親都過了一個快樂的母親節！

~ Lindberg

環保小印

回收循環再用，相信大家都會做。最近，我對回收呢樣嘢越來越在意。一個膠蓋、一小張廢紙，我都唔想送去堆填區。

但當有啲印有自己地址及名字嘅文件、信封，我就唔多想送去回收。即使有碎紙機，感覺都唔係太過好，何況我冇…。所以我會搣咗印有個人資料嗰截出嚟，然後同啲餸汁送去垃圾筒。…直至我揾到呢個印！

呢個印會打出一排排亂哂龍嘅英文字。比起油黑佢，更有效遮蓋啲「機密資料」。即使有超人嘅眼力，都真係乜都睇唔到！而且仲好慳墨水添！

只要有些少價值，都應該好好循環再用，唔好留番啲「蘇州屎」俾下一代。有咗呢個印之後，就連嗰一截仔嘅紙都可以攞去回收啦。我真係叻！呵呵呵呵…


~ Lindberg


P.S.唔好問個印幾多錢…

Yr4Q2 報告

四歲的第二季，亦即是已經四歲半了！時間過得真快！但脫離「自主年齡的反抗期」仍有一大段距離。唉…

體重：36.6 磅
身高：102 厘米

體重有點進帳，但身高還是明顯比其他同學矮少。

發展報告：
飲食方面：

• 每朝都喝一杯 4 安士的「思敏傑」。除了可以淨飲，亦可以倒進粟米片內。
• 吃飯雖然還是很不專心，但食量有所改善。紫菜及納豆，還是少不得的助飯良品。
• 媽咪的芝士奄列是假期最好的早餐（我也沒有機會吃… 嗚嗚…）。

• 跟姐姐一樣，最喜歡吃布甸。

體能方面：

• 很容易沒有氣力。除了本身懶惰之外，運動量亦不算多。所以盡量讓他去活動多一點。踏入夏天，希望可以開始正式學游泳。

• 買了單車之後，雖然不是踩了很多次，但總算多一個運動的機會。

上學方面：

• 每天有兩份家課。英文和數學做得很不錯，但中文功課就做得很慢。

• 老師盡量要求他用左手寫字。
• 開始教減數。
• 好像很喜歡某個女同學。看過相片之後，也是我會喜歡的類型。加上經常避而不談，而且見面時表現得異常緊張，所以我極之有理由相信他對那同學有強烈的好感！
• 英文課程加入了要朗讀故事書。老師會給他一本簡單的故事書。如果完全能夠郎讀，就可以拿回去換一本新的。這樣除了可以訓練他的閱讀能力和興趣，亦省卻了我們去圖書館的需要。嘻嘻…
• 因為以上的功課，亦讓我們見到他的拼音能力。例如一句：「A freezer is cold.」他不懂「Freezer」這個字，見圖有個雪櫃，便讀出「Refrigerator」。但讀出之後，心知不妙便嘗試去拼音：「Fre…Free…zer」。

學習方面：

• 表達能力持續改善。
• 樂高是一個不錯的玩具。雖然以他的程度，沒有太大創意可言，但勝在可以鍛煉集中力和指力。

• 創意很不錯。會自製遊戲或遊戲規則。例如在他的「包、剪、揼」中，還有「槍」和「窿」。「槍」很有攻擊性，而「窿」就好似一個黑洞的東西。揼贏槍，包和槍可以贏窿… 好似是這樣吧。（我曾經想用博弈論去計算一下出那一個贏面會比較大，但因為可用的武器經常有變化，所以一早便放棄了。）

• 喜歡跟我們玩「文字接龍」遊戲。特別是在「辦公」的時候…

「早晨…」
「晨…神秘小小工具！」

問題兒童方面：

• 做事很慢，沒有以前的專注力。唉…
• 左耳入，右耳出的問題極之嚴重。
• 很在乎輸贏。早上如果知道自己比住同座大廈的師妹回到學校，可以生氣大半天。
• 某些情況下，欠缺主見。因此我開始交多一點責任給他，讓他建立多一點責任心和自信心。
• 偶然還會向我們無理取鬧，結果便是「家法侍候」。對於扭計的小朋友，我從不手軟。
• 喜歡看電視、Youtube 等。電視節目喜歡看 Barney、Mickey Clubhouse、及 Peppa Pig。Youtube 喜歡看字母歌及瑪莉奧的攻略…
• 「貼紙恐懼症」好像越來越嚴重。如果我們身上有賣旗籌款的貼紙，他會堅決要我們脫下。

藝術方面：

• 一個星期大約練三晚鋼琴。練習不足，因為總是找不到時間去練習。指法和指力還需要很多努力。
• 為了鼓勵學琴，如果他能夠專心上堂，放學後便讓他到百貨公司的遊樂場玩三個遊戲。起初 Jayson 媽極之反對，因為覺得開了先例，之後便後患無窮。但我覺得自己小時候也玩過這些機動遊戲，而且學習克制亦是重要的一課。除此之外，我要他計算一下，那三個他想玩的遊戲總共需要多少個代幣，同時應用一下算術。

• 而繪畫方面，畫功開始進步。除了畫畫班的作業之外，他亦有運用在每天的功課之上。這個是高山：

自理方面：

• 戒夜片成績不錯。雖然每晚仍有穿尿片（買一個保險），但早上起床都沒有尿濕。
• 每日午睡一兩個小時。晚上大約十時半才上床。因此，早上都不願起床。經常讓鬧鐘響過不停。

本季精選：

• 不知是否體重有點進帳，肥了些少的 Jayson，感覺好像可愛了一點。跟我們說電話的時候，語氣更是奪命。
• 孝順的時候，還真的很孝順。希望可以持續下去，直至永遠，阿門。

~ Lindberg

貼紙恐懼症

「爸爸，地下有貼紙呀！快啲搣咗佢啦！」 Jayson 的貼紙恐懼症又發作。

「喺地下好污糟㗎，唔好要爸爸搣啦！當睇唔到算啦！」      

「…」

入到電梯之後，Jayson 又驚見另一張貼紙！      

「咦…！爸爸，地下又有貼紙呀！！！您快啲踩住佢啦！」 他要我踩著，那麼他就看不見。天啊！ 

「嗄呀！一陣張貼紙黏咗落我鞋底點算呀？！唔好望就當睇唔到啦！」

「唔好啦，快啲踩住佢啦，爸爸。」   

「唔緊要啦，勞氣！」 

以前在《節瓜收成報告》中，亦提及過這個情況。 他非常怕見到貼紙。曾經試過不願意進入大廈的其中一部電梯，就是因為扶手的暗位有一張貼紙。最後，我要在他面前把它除去，才不用每次入電梯都爭吵一次。唉…

但那已經是一年前的事。他對貼紙的厭惡，很明顯並沒有減退。就算見到賣旗的人，亦會避之則吉。大概任何小朋友都會有些堅持，但 Jayson 的堅持就好似奇怪一點。因此我常常覺得他有某程度的強迫症。

媽咪問過他為何會怕貼紙。他回答說：

「啲貼紙貼到周圍好醜怪。」 

這就可以解釋為何他不怕自己貼的貼紙。自己貼的就不醜怪…

不過對貼紙有恐懼，亦有一個好處。如果我身上有貼紙，他就不願親近我。作用就似驅蚊貼一樣，那我就不用抱他啦。呵呵呵呵…



~ Lindberg

戰隊內訌

「我以後唔同妳玩呀！」從遠處行過來的我突然聽到 Mavis 這一句，不禁為之愕然。三個人當中，米B 熱淚盈眶，手中拿著 Jayson 的玩具，而 Jayson 就表現無辜。我很有理由相信這件爭執是由此玩具已起。

小朋友的事，大可以由他們自已解決。但我按不住心中的好奇，問 Mavis 發生甚麼事。原來他們在輪流玩 Jayson 帶來的玩具，但 米B 佔著玩，令 Mavis 十分生氣。還以為戰士們已經長大了，不會再爭東西玩。誰知情況比之前更為嚴峻！

Mavis 的氣忿程度，可以用「火山爆發」去形容。破口怒駡，可見她真的非常不高興。有見及此，我忍不住笑了出來。對於「扭計」的小朋友，我的容忍力是「零」。但遇到「發嬲」的小朋友，我反而覺得他們很可愛。分別是「發嬲」是有理由，換轉是我自己，我也會不高興。適當地宣泄情緒，也是一個重要的課題。

我跟 Mavis 說，他們願意讓她玩啦。但 Mavis 還是很生氣，說：

「我唔要啦！我唔同佢玩呀！」

米B 表現得更可憐。我叫她大人有大諒，原諒 米B 吧。但她說：

「我原諒唔到呀！！！」答案跟盛怒的 Jayson 差不多。

於是我說：「我明白妳依家好唔開心，平靜唔到落嚟。不如妳去玩一陣，唔嬲之後就返嚟一齊玩啦。」（如果是 Jayson，我會叫他計一條加減數。）

她點點頭，怒氣消了一半，便跑去自己玩了。過了一回，驅蚊手帶甩了，要找朋友幫手…

最後，小朋友當然沒有隔秒仇，大團圓結局！（Mavis 呢？！她只是不敢玩，之前的事已經忘了吧。）

~ Lindberg