最後一日的 10am 至 6pm 拍攝，大多數的時間都是在…玩。
除了頒發紀念狀，還有逐一訪問小朋友的感受。Brian 亦作出對一班小朋友的評語。以下是我在門外偷聽到的…
「…咁呢兩個小朋友呢… XXXXX 就導演嚟嘅，對點樣拍攝係好清晰。」Brian 說。
「導演…咁即係王晶定王家衛嗰種呀？」主持人好奇地問。
「當然係王晶，快、靚、正！」Brian 回答說。「而 Jayson 就係有排諗嘅。」
「咁佢即係王家衛，一張相要影四年？」主持人問。
「咁又唔洗，四日都得㗎喇。」Brian 笑著回答說。
我在門外笑到流眼水。
Jayson 聽到工作人員都讚他可愛，「產量」多（得到我的真傳：山大斬埋有柴），高興到不得了。
另一方面，我們大人又在不知情下，被捉了去做家長訪問。幸好，因為我買了一支新的電鬚刨，每天都有剃鬚。沒有梳頭亦可以去超級市場買一支髮蠟。但身上穿的 Canon T裇，真的會令人誤會我是內定的工作人員…。而額頭的大暗瘡已不可以算是暗瘡，是一粒大明瘡。如果在清朝，我相信會因「反清覆明」而被鎖入天牢。導演，真的要拍我的右邊面嗎？左邊面可以嗎？
這次家長訪問，是導演親自操刀…
「Jayson 做咗《童盟》之後有咩轉變？」導演問。
「佢比以前更加鐘意影相。影完之後，見有滿意嘅作品就會打印出嚟『貼堂』。」我這樣回答，令我更似一個內定的工作人員…。
「佢其實清唔清楚呢個係乜嘢活動？鐘唔鐘意呢？」導演問。
「佢當然知道啦！」我回答說。「每次都好期待嚟拍嘢學嘢。」
「Jayson 大個咗似做咩職業？」導演問。
「佢係一個感情好豐富嘅人，係九型人格中嘅四仔…（下刪千字）。我覺得佢會適合從事藝術創作。不過實際上會做啲乜，我哋冇真正諗過。」
而對於我們大人方面，亦很有得益。藉著這次拍攝機會，讓我們看到一些本以為 Jayson 未必能夠做得到而又做到的東西，讓我們看到 Jayson 堅毅的一面，讓我們多了很多「討論」的機會，明白他的不足和可以改善的地方。
最後，謹代表節瓜俠全體仝人，感謝各位童盟、工作人員、及家長們的幫忙及忍耐，令 Jayson 可以有一個愉快又寶貴的經驗。謝謝！
（以上照片還欠了多位工作人員，包括漢堡神偷哥哥和收音哥哥等。希望後會有期啦！）
~ Lindberg
