男孩子夢寐以求的城堡

還記得小時候，我要跟我的嫲嫲一起睡。她的鼻鼾聲「擾」樑三日，到今日還弦猶在耳，所以 Jayson 可以獨佔一間房，我覺得他很幸福。不過另一方面，當然也少了一些跟家人的親密接觸。所以到今時今日，他都要我們留在他的房間，陪他到入睡後才離開。

最近發覺他床褥的承托力不太足夠，需要換一張可以承受他體重的，對脊骨健康也有幫助。相信有看我網誌的人都應該知道，我的中文水平不太好，「殺雞焉用牛刀」在我字典內的意思，是殺雞「何止」要用牛刀，要用更厲害得才可以一了百了。因此，我們來了一個徹底的改造，換一張床褥變成了起一座城堡！

其實我們心目中一直要想升高他的床，讓下面多一點儲物空間。另一方面，可以爬上爬落應該很好玩。上一手的業主也是這樣做，不過他那張床頗高，加上樓底不太高，好有壓迫感。因此當我們看到這張 Kids Fort，就立即愛上了。
首先，它是跟 Jayson 的書枱同一個牌子，同一種物料。另一方面，床不會太高，下面有大概一半是活動空間，所以才稱之為「兒童城堡」。床比一般的單人床大，可能是日本正常尺寸，1米（3尺3）x 2米（6尺半）。其實以 Jayson 的高度，並不須要這麼大張的床。但這張床的設計正正是讓這個歲數的小朋友去玩，等他大了之後才不願意鑽進下面玩。因此，我們便大出血去了。

買之前，第一個步驟當然是量度好尺寸。這是 Jayson 以前的格局（我用 iOS 的 MagicPlan 畫的）。

原本以為要犧牲大衣櫃，誰知竟然有位！Tavolo 的老闆還非常好人，給了我們很多好建議。除此之外，他更提醒了我們，這張床頗大和高，所以有機會令房間變得比較暗。但幸好房間的窗口和燈的位置都不會被阻擋，所以最後也沒有影響。

師父首先砌好下面的三個櫃（書櫃、衣櫥、衣櫃）。日本人的設計真的「無得彈」，用料更加不用多說。但由於高度的關系，儲物空間不算太多，只可當作輔助用途。

下面的設計，是以三個櫃的組合佔了一半的支撐空間，其餘的一半就可以讓小朋友爬入去玩。我相信當他長大之後，即使不再入去玩，也可以作額外的儲物空間。

兩位師父用了大概半小時的時間便完成了安裝！

起初我們也擔心 Jayson 不會爬上床，落床就更加難，但這條梯都算不難爬，而且爬上爬落正好用來做運動！床上面基本上有足夠空間讓一大一小一起睡，非常寬敞。

兩個小朋友就更加沒有問題啦。上面舒適，不過這張床的重點是下面的堡壘… 

首先，我自己裝了一支短短的 LED 光管照明，然後鋪了軟墊之後，最強的堡壘就形成了！

我覺得下面比上面更加舒服（和好玩）。雖然地方不大，但足夠讓我們在那裡看書。在這個地方講故事，特別另有風味。

以前陪 Jayson 睡，要在黑暗中看 iPad，非常壞眼。但我不再介意要陪 Jayson 瞓了，更非常自願地入去。在這裡看書簡直一流，光線充足又沒有人打擾！自此之後，這個地方就被我（和 Julie）佔領了。呵呵呵呵呵呵…

（其實買這張床，最後最開心的應該是自己。呵呵呵呵呵呵…）


~ Lindberg

市區藍色的士

星期六，Jayson 要到西環上游泳訓練班。我哋搭地鐵到中環，然後轉的士，避過金鐘一帶嘅路障。一上車，司機語氣好不耐煩，問我哋去邊。我好唔好意思咁話去中山紀念公園，因為路程好近，我驚會畀人詛咒。點知…

「好彩！」司機好興奮咁話。

「好彩啲乜呀？」我好奇咁問。莫非因為我唔係向東行，所以唔會遇到塞車？

「好彩你哋唔係去佔鐘咋！」

然後司機就開始滔滔不絕，咒罵阻住佢做生意，阻住佢接送個女返學嘅示威人士。我望一望自己，原來我著咗件黑衫，難怪一上車就感到一股濃烈嘅怨氣。

上次去台灣，有一位的士司機大哥跟我哋講笑咁話，喺台灣千祈唔好跟的士司機講政治，否則有機會畀人趕落車。估唔到今時今日，喺香港都體驗得到。我覺得其實大家有不同意見，甚至乎不同價值觀，只係非常閑事。做咗咁多年人，有乜人未見過呀。而要做到尊重他人嘅意見，除非係唔會阻住自己搵食，又談何容易呢。所以我都係用「喔…」、「係呀？」、「哦…」去回應。

的士司機講到最後，我感到香港人好悲哀。佢話：冇得鬥㗎啦，佢（上面）想點咪點囉。有時認命，都係冇可口非。如果我仲係做緊餐廳，我都會好慌。但認自己條命都算呀，幫阿仔認埋佢條命，我真係講唔出口。

最近喺網上睇咗一篇回應，其實我冇睇過篇文章寫啲乜，但回應嘅《新愚公移山》寫出咗好多身邊朋友近期嘅諗法（這個連結嘅第一個回應）。就算我唔抗拒國教，亦都唔介意23條，但睇住呢幾年香港發展得咁差（扭曲），如果之後鑊鑊都係冇得揀，咁唯有學愚公咁，送 Jayson 去米太婆嗰邊，相信以我同米太公嘅超友誼關系，米太婆應該唔會介意睇多一件…呱。只可惜明明係自己嘅地方，最後如果要行到呢一步真係好可悲囉。

落車嘅時候，司機都好有禮貌地向 Jayson 道歉，因為佢都知道自己嘅語氣及粗口嚇親細路。而我就不停咁話「唔緊要」、「辛苦哂」、「唔該哂」… 係未唱生日歌啫。


~ Lindberg