烤帶骨肉眼

以前好鐘意食自己餐廳整嘅帶骨肉眼扒。每塊大約800克，入口彈牙，肉汁多且味濃，食過之後對其他牛肉都冇乜興趣。所以前幾日上網見到有得賣「澳洲天然草飼帶骨肉眼」，忍唔住買咗一塊。600克左右$200。入口一刻，咩回憶都返嗮嚟。



煮法有幾點值得參考：

1. 冷藏牛扒要2日前放到保鮮格（4ºC）解凍，並在烹調前45分鐘拿到室溫完全解凍，煮之前放鹽和黑椒調味；
2. 用中至大火把平底鑊燒熱，放些少油，煎4至5分鐘，反轉，放一塊牛油在剛才煎好的肉面，再煎4至5分鐘；
3. 煎的時候，可以用匙羹把鑊中的熱油淋在牛扒上，除了可以保持整塊牛扒的平均溫度外，感覺還很似高級餐廳的大廚；
4. 煮好之後，放在碟上閑置5分鐘才好切，否則肉汁就會濺到碟上，留不在肉中。

以上是煮一塊600克至medium-well的時間。其他溫度，可以參考我網誌上教過的秘技。

~ Lindberg

山系男孩

今次兩日一夜行山，聽老師講「無血有淚」，大家都咬緊牙根，堅持行畢全程。老師希望佢哋可以學得到何謂堅忍。我哋呢個「邪留丸」終日悠閑過日，係要畀機會佢鍛練下㗎啦。（相片來源：老師）#山系男孩

~ Lindberg

One Piece Mugi Mugi

「大家企埋啲！」呢堆嘢係上次去草帽店，不計後果血拼嘅成果。如果講得嗮佢哋啲名就讚你叻！#onepiece #mugimugi #今晚瞓廳

~ Lindberg

唔空肚食早餐

早幾日大佬嚟香港，食咗碗鵝瀨做早餐，搞到我忍不住都要學佢整番碗。呢度嘅燒鵝有好香煙熏味，不過湯底我都係喜歡避風塘嗰種，濃濃嘅鵝殼汁味。#大滿足 #燒鵝瀨 #第二頓早餐 #冇空肚食早餐

~ Lindberg

Tarza Drip Coffee

真係要寫個「伏」字畀佢。味道好似貓屎咖啡，但少咗隻貓同咖啡。齋苦唔香，難飲到一個點。故事教訓我哋，唔好為咗一棵樹，而買咗個森林。#伏

~ Lindberg

沖咖啡

比起提神，我會更加在意沖咖啡嘅過程。搞完一大輪之後，精神得到平和，屁股間嘅痕癢一掃而空。

~ Lindberg

兩個胃

佢話想食蛋糕，但我話食唔嗮碟粉唔畀叫。最後雖然真係食唔嗮，但食淨兩啖都算係紀錄，所以都叫咗畀佢。主食食唔落，甜品就食得落一大舊，莫非佢真係有兩個胃？！

~ Lindberg

平手友梨奈

最近喺網上睇過「欅坂46」嘅演出，一大堆女孩子當中，一個短髮令我眼前一亮，即時攞錢去買碟。平手（16歲）嘅霸氣好強，真係型到核爆！但佢唔係包包面嘅咩？點解會變咗我最喜歡的男仔頭㗎？

P.S. 欅坂46啲歌好易入腦之外，佢哋啲舞仲跳得好好睇。

P.S. 我不是蘿莉控，我只是Feminist。

~ Lindberg

作文題目：我的爸爸

題目：我的爸爸

我的爸爸是很強壯的，雖然他個子中等，但是他每天都會做三十分鐘運動。

我的爸爸有時做掌上壓，有時舉啞鈴，還有時行行山機，怪不得他胳膊粗壯。雖然他有時很嚴厲，但是他也很平易近人。他有時會教我做功課，有時陪我玩，還有時陪我砌模型。我很愛我的爸爸！

「Jayson，您寫成咁，爸爸會有啲面紅喎…」

「爸爸，其實我係為咗湊夠字數咋…」


~ Lindberg

性知識問答題

Jayson 問：「有兩舊石頭，生咗啲蝌蚪出嚟。蝌蚪經過一條河流，去到一個湖。佢哋喺嗰度練大隻，然後經過另一條河流，去到一支大砲，發射出外太空。您知唔知我講緊乜？」

有人一時間聽唔明。我於是搶答：「Neo Armstrong Cyclone Jet Armstrong Cannon。」

「吓？！」

好明顯全家得我一個睇《銀魂》。

性教育固然重要，但熱血漫畫也是青春期不可缺少的東西啊！

~ Lindberg

車上的物理治療

尋日去做物理治療，畀張電暖氈蓋住個屁股真係好舒服。令我今朝更加唔捨得離開架車。

（多得@kubosco，我先知呢個功能另有別名。）

#eggwarmer #eggfryer

~ Lindberg