大叔和大嬸的愛：欅坂46 Keyakizaka 46

大約年多前，我無意中在YouTube看到一個日本MTV的頒獎節目，得獎者的是一個女團。其實我對這些女團一向都不感興趣，總覺得只是一大班女孩子在台上唱歌跳舞，台下就有一大班男觀眾發出奇怪的打氣聲，感覺有點兒心寒，甚至乎嘔心。但這個節目中，得獎的女團穿著整齊制服，非常師氣，跟之前認識的有很大分別。每個女孩子都是長長頭髮，當中唯一一個是短頭髮的。這個強烈的對比，對我這個短髮控，破壞力難以形容。這個女團就是：欅坂46。

第一曲《Eccentric》：Eccentric的字面意思是「古怪」、「怪人」。台上的女孩子們一時整齊地做出古怪的舞步，一時就好像「貞子」學會了忍術：多重影分身，披頭散髮地亂跳。大部份女孩子都看不清楚樣子，只有經常站在中間的短髮女孩，她除了見得到樣子之外，一對大眼睛也似在跳舞。這個女孩子的眼神除了有力之外，還好像會說話。隔著螢光幕，也有被石化的感覺。

第二曲《不協和音》：日本現場音樂節目的拍攝技巧，一向都非常了得。她們的舞步非常有力，每個女孩子都有一雙堅定的眼神。喝一句：「僕は嫌だ！」（我不想！），確實震撼人心。

從那時開始，我便喜歡了欅坂46。像我這種人，都被稱為「欅坂宅」。

重金屬音樂

最近迷上了重金屬音樂。對於心靈脆弱的人，重金屬音樂有一股莫名奇妙的救贖感。跑步的時候跟著耳筒傳出來的節奏「喪跑」，隱約有跑到西方極樂的感覺。

~ Lindberg

小心眼

因為這天有課外活動的關系，所以遲了放學，我可以接校車。下車後，他立即問…

仔：「點解今朝我上咗校車之後見唔到您嘅？我想同您Bye Bye嘛。」
爸：「因為我仲嬲緊您囉！」話雖如此，但聽了他這麼說之後，方丈的心已溶了一半。
仔：「嬲我啲咩呀？」
爸：「嬲您對尋晚做嘅事冇悔意囉！」
 仔：「咩係『悔意』？」
 爸：「『悔意』即係後悔的意思囉！」
 仔：「哦…我會反省㗎啦。」
 爸：「成日都話『反省』，轉個頭就唔記得！」
 仔：「…」
爸：「一齊去食雪榚囉。」
仔：「好呀！」

~ Lindberg

21人の未完成

今日終於收到貨！我覺得《21人の未完成》好貼切形容欅坂宅們最近的心情。21人剩下17，喜歡的人一個一個地離去。最令大家心疼的必然是志田。莫說她真的犯禁去拍拖而被畢業，即使她結婚生了孩子，只要她願意的話，我相信宅們仍會繼續支持。到底要懷著怎樣的心情去打開這本書呢？#21人の未完成 #我不要2期生 #還我志田

~ Lindberg

和牛尾湯

今日買咗條靚牛尾（其實係冇其他尾），煲和牛尾湯。

阿仔問：「仲乜您唔煲罐頭湯？」😭

~ Lindberg

升中面試題目

媽咪問：「您平時鐘意同屋企人做乜呀？」

Jayson答：「陪佢哋睇Keyakizaka46。」

今次都真的凍過水…

~ Lindberg

剪髮與稙髮

今朝主人叫我去剪呢個髮形。但如果我整到平手大人呢個頭，咁就唔係叫做「剪髮」，係叫做「稙髮」。

~ Lindberg

做了半年運動之後

睇條線好似唔錯，但實際上係呃人㗎！做咗半年運動，先輕得3磅？！外表上完全唔覺得自己健碩咗，更莫講話瘦啦。即使肌肉可能多咗，但我可以話你知，喺個大肚腩下面加6舊腹肌，只會換來更大嘅肚腩！唯一我覺得有分別係個籮柚，真係結實咗。果然「臀結實是力量」，手感仲唔錯添。

~ Lindberg

Babymetal

今次去日本，有好多時間徘徊唱片舖。除咗朝聖之外，仲有另一個得著，就係重新認識「Babymetal」呢隊重金屬樂團。雖然跟7年前出道已經有啲分別，14歲的Baby都已經變成Lady，而且其中一個主要成員仲要最近離隊，不過可以睇番佢哋過往的表演已經令我非常熱血沸騰。加上節拍非常洗腦，歌詞簡單易記。不知不覺間成為咗一名Metalhead。不過阿仔叫我都係聽番平手喎（因為重金屬真係嘈啲嘅）。

~ Lindberg

高山珈啡

尋晚為了抽平手大人的閃卡，搞到2點先有得瞓。今朝需要一個完美早餐做開始！一杯Kilimanjaro，煥醒全身每一個細胞，再加一塊芝士厚吐士，我感到我的脂肪細胞正在開狂歡派對。

~ Lindberg

群姐和霞姐

今日喺百貨公司踫到幼稚園照顧Jayson嘅群姐和霞姐。我立即攞咗呢張相畀佢哋睇。我話Jayson瘦咗好多。霞姐話：「爸爸你都瘦咗好多啦！」我答：「唔係呱？！（沾沾自喜中…）」佢又話：「Jayson媽咪都好瘦㗎。」我確認咗佢哋係講客氣嘅說話…。之後我哋談到升中，群姐和霞姐竟然講得出咩學校適合Jayson及其原因。我覺得除咗係三歲定八十之外，用心照顧咗Jayson四年半嘅姐姐可能比我哋父母更加了解呢個仔。阿仔可以遇到佢哋，都算係一種福氣。

~ Lindberg

少男的祈禱：11歲生日快樂！

今年的生日要在戰火中渡過。今天還要考最沒有信心的中文，縱使是EQ極高的他，亦面無表情。放學睡了一覺之後，才回復精神。雖然今天沒有慶祝的時間，但都準備了一個特別的蛋榚，讓他許一個願望。我們不知他許了一個甚麼的願望，但希望Jayson十一歲生日快樂，身體健康，明年可以入讀一間適合他的中學。#生日快樂

~ Lindberg

隆胸

曾經以為只要練到胸部大過肚腩，別人就不會覺得我有個大肚腩。於是我每天都搏命地用啞鈴做臥推，誰知我錯了。上星期碰到一位舊同學，他曾是校際跳遠紀錄保持者，外號「跳九里」就是他。他第一句就說：「阿截（我中學時期的簡稱），搞乜鬼呀你？！要做番啲運動喎！成個波咁啦！哈哈哈…」。我喝道：「我已經差不多日日做運動啦！」心裡用他的外號暗罵了七七四十九篇。但後來我才發現，當天我穿了一件細了一個碼的恤衫，滿以為「爆鈕」會有很「阿諾舒華」的感覺。再認真地去照一照鏡，原來運動並沒有帶走一丁點的肥膏，反而多了一層厚肉，把原先的絲絲緊扣的脂肪托了起來。整個人變成了一個完全體……完全的球體。果然，隆胸是解決不到問題。#benchpress #隆胸

~ Lindberg

足球小將

今個學期Jayson選擇踢足球，放學見佢全副武裝，非常威風。令我不禁唱起：「讓野火，燃亮我吧！」後來佢話大髀食咗個波餅（不過契爺話要用面食先算係波餅），不過冇事，非常勇敢！但見波紋咁清楚，莫非佢同學係小志強？！

~ Lindberg

望子成秋元康

Jayson見媽咪睇緊欅坂46嘅YouTube，問： 「媽咪，您做乜睇爸爸睇嘅嘢？」

媽咪答：「啲女仔跳舞好型好好睇嘛。」

Jayson 說 ：「但爸爸鍾意佢（平手）多過您喎！」

「爸爸鍾意佢但永遠得唔到佢，唔緊要啦！」

「您點可以咁講㗎？！人生滿希望呀嘛！」

聽到阿仔咁講，我真係好感動。爸爸所有希望都放喺您身上。揾唔到好似平手咁有才華嘅，都要揾到個好似Neru咁可愛嘅女仔！

~ Lindberg

男人最緊要有氣勢

「我想同表弟浸溫泉！」Jayson說。 「您問過爸爸先啦，佢未必想同舅夫佢哋一齊浸。」媽咪話。 Jayson答：「洗乜驚啫！男人最緊要有氣勢！」 阿仔，我極之有理由相信您唔知自己講緊乜。

~ Lindberg

捉貓在床

放工返到屋企，我通常都唔會用鎖匙開門，因為我想畀屋入面嘅人有心理準備。當按下門鐘，都總會聽到屋內有人滾水淥腳咁衝入廚房開抽氣扇扮煮飯，有人衝入房扮做功課。只有隻貓最處變不驚，繼續瞓覺。「喵…」

~ Lindberg

講粗口

尋日同班細路去玩槍戰，我今晚突然諗起，警告阿仔話：「你班男仔唔好借啲意講粗口呀。」

「咩呀？幾時有呀？邊個字係呀？！」

「唔好扮唔識喎！」

「我真係唔識中文粗口呀！您教我呀。」

「下次你見到Ken叔叔您叫佢教您，佢啲舞台劇發音標準啲。」

「您教我啦！如果下次有個高年級學生對住我講粗口，我聽唔明，唔通我答：『哦』咩？！」然後阿仔放咗塊菜葉入口，笑到我噴飯。

於是我就好認真咁教咗佢點讀，及其他借啲意嘅讀法。老實說，我都會用粗口作為助語詞。但人講我又講嗰種懶醒態度，我就唔太鍾意。用來惡意攻擊人就更加唔要得。希望阿仔第二時即使講粗口，都會字正腔圓，言之有理。

~ Lindberg

迷你即食麵

Muji呢隻「迷你即食麵」就咁揸碎食的話，會比較鹹。不過加熱水食的話就啱啱好！細細塊可以用一隻細碗沖，加少少XO醬或泡菜，味道立即幾何級數倍升！做宵夜或早餐都非常方便，值得推介。佢哋仲有另一款冬陰功味，直接揸碎食，酸酸地辣辣地好惹味㗎！#muji #minichickenramen

~ Lindberg

傷風治法

大約一個月前，Jayson開始流鼻水，似是鼻敏感和之前的傷風未清，所以醫生讓他吃了一個星期抗感敏藥。吃完一個星期藥後，鼻涕仍是黃黃的。於是醫生便開了抗生素。又過了一個星期，情況沒有好轉。醫生拿鼻涕樣本去種菌，再吃另一隻抗生素，並要我們用生理鹽水洗鼻。第一次洗鼻，感覺非常神奇。一大支生理鹽水分兩次，由一邊鼻孔噴入去，連帶鼻涕由另一邊沖出來。一點也沒有感到不適，沒有「洗壞鼻」的感覺。

因為我們見鼻水和咳嗽並不嚴重，沒有給他吃收鼻水和化痰藥（後來我們知錯了）。最後種菌測試沒有種出甚麼結果，但鼻涕還是黃綠黃綠的。醫生說有菌而種不出菌也是很常見的（加上他吃了抗生素），但我們應該讓他繼續吃收鼻水和化痰藥，因為我們未必看得到裡面的鼻水和痰，而菌就會藏在那裡滋生。要雙管齊下才能有效地殺菌。

於是再換另一隻抗生素，繼續洗鼻。醫生說如果情況沒有好轉，就要去找專科醫生。雖然Jayson的情況不嚴重，但他從未試過復診這麼多次仍未痊愈，所以我們都非常擔心。 正當躊躇要去找專科或中醫的時候，「巧合」的事情又發生了。我們隨便在誠品書店逛逛的時候，忽然讓我看到一本關於小朋友鼻敏感的書。書中提到尤加利及其他幾種精油，有效舒緩鼻敏感症狀。於是我立即到場內的一間天然精油店，買了一支尤加利的綜合精油。放了幾晚，Jayson的鼻水終於停了。

這種「巧合」經常發生在我身上，令我覺得身邊有一位守護天使在看顧我。不過，我懷疑這個巧合未必是令他痊愈的原因。他痊愈的真正原因，可能是把病傳染給了我（圖中是我自己的藥）。 到底是藥物的威力、精油的療效、自身的治愈能力、還是父親的愛治好Jayson呢？這是一個近乎信仰的問題。就有如把「童男童女」掉進火山去阻止火山爆發一樣。只要願意嘗試，火山總會有停止爆發的一天。

正因如此，除非我百份百明白箇中的原理，我不會分享沒有根據的結論，但父母的愛總是少不了。祝大家身體健康。


~ Lindberg

Goo... Goo... Good Morning

「Goo…Goo…Goo…」Jayson（飲奶）。 「Goo…Goo…Goo…」Julie（打呼）。#cat

~ Lindberg

週年驗眼

近視深咗50度，勉強可以接受。

~ Lindberg

聽自己的歌

我仲記得第一次要求我阿媽買畀我嘅卡式帶，係校長嘅《小生怕怕》，因為睇完套戲，覺得好搞笑。問阿仔聽緊咩歌，佢好大聲咁話：「咩話？！」原來係聽緊《妖怪手錶》。

~ Lindberg

條件反射

每次做運動，我都會聽住欅坂46啲歌。那麼痛苦時間就會好快過。不過我最近諗起巴甫洛夫嘅實驗。佢喺畀隻狗食物之前發出一些聲響，以後隻狗聽到嗰啲聲音就會自動流口水。如果我一路做運動一路聽歌，以後聽到平手把聲會唔會想作嘔呢？！ 腦細見我每次做運動都戴住大大個嘅Headphone，問我係唔係聽Podcast，我話我當然冇咁好心機啦。但一言驚醒，每日聽30分鐘Podcast都不失為一個好方法喎…

~ Lindberg

氹阿仔食藥

「阿仔，隻抗生素冇藥水，如果您同我吞咗粒藥丸，我就買LABO畀您！」 好明顯，氹阿仔食藥只係一個藉口。

~ Lindberg

多國語言

在迪士尼的小小世界，Jayson問：「我識得唱3種語言嘅《小小世界》，您知唔知邊3種？」

「唔知。」我懶得答。

「廣東話、英文、俄文。」

「俄文您都識？！」

「我識！GAP…GAP…GAP…GAP…」

「俄文係咁嘅咩？」我問。

「係！」佢指住隻鵝。

「（鵝文…）」（汗）

~ Lindberg

閒話家常 之 量子力學

尋晚跟兩位大學同學食飯。我哋大約每年都會聚一聚，每次都會食到好攰。因為兩個化學系加一個生化系，話題離不開醫學病理、進化理論、宗教思想、量子力學、環保議題、政治經濟等。每次傾完就好似睇完一年份嘅報紙（除咗娛樂版及馬經，但不排除有風月版），真係獲益良多。#鹹魚煎肉餅

~ Lindberg

68蚊的雷神身材

係唔係只要畀68蚊就可以擁有雷神咁嘅身材？！？！ 今日做咗3分鐘就已經好想放棄，不過為咗要喺阿仔面前，可以理直氣壯咁話自己堅持得到，點都都咬緊牙根撐落去。

~ Lindberg

響 ~ 小説家になる方法

雖然此「響」不同彼「響」，但為咗慶祝可以喺大銀幕見到平手，我决定飲住嚟預習整套漫畫書！#響小説家になる方法

~ Lindberg

生命小鬥士

兩日一夜，行夜山，露營，今朝再攻頂，受盡苦頭，老師半鬧半教，真係正到爆。希望阿仔學到嘢。#生命小鬥士

~ Lindberg

山治眼藥水

最近隻右眼到咗放工時候都會好唔舒服，可能工作上用眼過度。滴咗呢支眼藥水，唔知會唔會好似山治咁，見到靚女會變「心心眼」呢？（不過學佢噴鼻血就唔好啦。）#山治 #santen

~ Lindberg

日日運動

竟然仲未香，我都有啲驚驚訝。喺同事面前，點都唔可以縮沙…住。今日遇到「健身同事」，我叫佢教我點樣可以練個胸，但又唔似做掌上壓咁會整到我條頸。佢教我做一個動作。好！我决定每日加多呢個動作，目標7月到日本熱海沙灘表演「震波」！！！

~ Lindberg

Simmons 床褥

7年前搬屋嘅時候由Simmons轉會到Sealy，現在再轉會返Simmons。全日本製造，精神上都已經覺得會好好瞓。#simmonsbackcare

~ Lindberg

撐艇仔

Row, row, row your boat,
Gently down the stream.
Throw your teacher overboard
And listen to her scream.

由今日起，嘗試每日都去撐艇仔。不過45卡路里到底食得啲乜？！#三日香系列

~ Lindberg

重新適應生活

尋晚有人話：「我唔係好習慣香港嘅生活。」 衰仔，您係唔習慣要做埋啲假期功課啫！話雖如此，您爸媽又何妨適應得到呢？唯有攬住啲手信，努力工作學習，期待下一次嘅旅程！

（由左至右，上至下：糧食、家人代購、公司手信、My Precious、Jayson的、友人代購、同學手信、主人的）

#旅行後遺症

~ Lindberg

電鬚刨的學問

這是我第4把電鬚刨。試過Braun和Philips，最後還是回到Panasonic的Lamdash。正如武術一樣，剃鬚最緊要快。除了因爲早上的時間寶貴之外，長時間剃鬚亦會為皮膚帶來過敏。Lamdash的超高速磁力驅動電鬚刨，以每分鐘14,000次推動剃刀 ，之前平均剃一次要5分鐘，現在2分鐘已經乾乾淨淨！基本上刨幾下已經搞掂。現在每朝可以慳回3分鐘，相對於過去20年我便白白浪費多15日在剃鬚之上，不禁讓我感到一點唏噓。#panasonic #lamdash #電鬚刨

~ Lindberg

星之卡比

洗唔洗賣頭版廣告呀？慌死我個仔唔知咩？！如果政府將電競技加入小學呈分試，阿仔入硬Band 1！唔係賣花讚花香，阿仔打機嘅思路確實令我好有驚喜。真係青出於籃勝於藍。#kirby

~ Lindberg

π的計算方法

3月14日，食 Pie 去慶祝 Pi Day。老麥一如往年，每個批賣$3.1(4)。除咗「蘋果批」之外，仲有新口味「野莓吉士批」。我每款買咗兩個，為了與家人分享，將每個批切開一半。 放咗張相上IG之後先發現唔對路。點解我個批係方形嘅？！咁點去慶祝Pi Day呢？！突然我靈光一閃，如果我有好多份方形嘅批，咁咪可以砌到一個圓形囉。每個方形嘅面積都可以計得出，咁咪可以計到π係幾多囉！ 如果畀我早出世二千二百年，而當時老麥又開咗的話，阿基米德的96邊形計法都要行埋一邊！ P.S. 「野莓吉士批」幾好味。 #pieday #imlovinit

~ Lindberg

棋靈王爭霸戰

轉眼之間就輸咗一局，據報其他同學都全軍覆沒。不過輸唔緊要，最緊要唔好反枱！藤原佐為講過：棋品好，人品自然好。仲有5場比賽，加油呀，光仔！

第一次參加國際象棋比賽，個人獎就無份喇。不過用人海戰術，團體賽得到第2名。 阿仔話有一局將女對手嘅棋子迫向一邊，然後用一招「牆壁咚」贏咗… 希望對方家長見唔到。

~ Lindberg

4捨5入

有一日坐的士返屋企，咪錶顯示$46.1，媽咪畀$50，Jayson攞番找續。佢發現只係找得$3，落車好疑惑咁問，乜唔係4捨5入咩？

尋晚又喺嫲嫲度坐的士返屋企。半路中途Jayson突然間唱起歌來：「4捨5入…4捨5入…4捨5入…」，我哋都唔知佢搞邊科。咪錶同樣顯示$46.1，司機竟然主動收$46？！如果大家搭的士想有錢找，記得要學識唱呢首歌！

（其實點樣唱並不重要，夠薑唱就得，祝君一路平安。）

~ Lindberg

衰貓

邊度有貓咁衰格，趁你瞓著，揾條尾搔你鼻哥窿？！不過見妳今日生日，我就原諒妳啦。Julie，生日快樂，身體健康，長命百歲！#cat #貓

~ Lindberg