加單

早前在網誌上寫過一篇文章，解釋日本Idol的單曲，為何會有Type-A、Type-B、Type-C、Type-D…。當時自話自說只會買iTunes的Complete Edition，因為實體碟只是有收藏及抽握手券作用。但今次欅坂46的第8單：《黒い羊》，我破例訂了一隻Type-A，因為有人想要HMV限定盤中的「生寫真」。 誰知可惡的營運昨天公佈，隨碟的Blu-ray中，除了有歌曲的MV之外，還有特典映像「KEYAKI HOUSE」，分前、中、後3編，分別放入Type-A、Type-B、和Type-C之中。看過預告片之後，欅宅就只有一個選擇…就是去「加單」。

~ Lindberg

不拒絕再玩

呢個小人有樣嘢跟我好唔同。我睇書快快睇完一次就算，打機快快打爆就開新遊戲，睇動作片亦都會直接飛到動作鏡頭…。 但Jayson就好唔同。佢最近睇完Harry Potter第5卷。20個星期之中，利用上車落車食飯嘅時間去睇書。因為佢仲有睇其他書，Harry Potter只佔大約四分之一，我估計佢用咗5個星期嘅空餘時間去完成呢5卷，速度看似不錯。但當你知道佢係點讀法，可能都會跟我一樣無言。 佢每睇完一本，都會從新由第1卷開始睇過。當佢睇到第5卷嘅時候，其實佢已經睇咗第1卷五次！即係5個星期嘅食飯坐車時間，佢已經睇咗15本書。速度並不是重點，而佢好鐘意重玩。打機亦都如是。打完一排之後會再打，直至100%完成，或發現有glitch為止。睇住佢都唔知好嬲定好笑。如果對住佢唔鐘意嘅學科都有咁嘅態度就發達啦，可惜…

~ Lindberg

HomePod

屋企一直都用Bose嘅mini Soundlink配iPod去聽歌。但自從iPod不受支援之後，再加上Soundlink出重金屬音樂好唔順耳，我就好想換喇叭。前兩日魔鬼朋友話豐澤網上買HomePod有減價！平50大元咁多！！！當然立即入貨。

好好聲！整個廳都聽得好清楚，聲音都好濃厚。低音比較弱，但兩位朋友都話「煲」一日之後會好啲。所以我今日就由得佢狂炸Babymetal，希望冇人會報警投訴。

其實如果冇用Apple Music或者喺iTunes買歌，HomePod只係一個可以用AirPlay嘅喇叭。但一個桶仔可以播到咁嘅質素，我相信都物有所值。

~ Lindberg