Lindberg 信箱：製作相簿

尋日收到一位朋友喺我個 Yahoo Blog 嘅留言。冇錯，我係有個 Yahoo Blog。但係唔係因為有個留言，我都差啲唔記得我有…

首先多謝泓仔媽媽留言。佢問有關製作相集嘅問題。

你好, 我見到你為你仔仔整左一本相集, 好靚, 我同你一樣, 已經整緊一本1歲BB相集, 所以想同你請教一下：
想問下
1) iphoto8 係咩黎呀? 用來做書既軟件?
2) 為何你不在香港印書呢, 台灣印都要運費,而且又難追,  香港真係好貴呀, 你有無問過A4或其他size 大約要幾多錢呀?
3) 你知唔知 Hypodot 公司印A4要幾多錢呀, 有幾多頁呀?
4) 另外, 唔知你有無試過以下台灣印刷公司呢? 以你經驗, 可否給我意見呀, 會否太貴呢?
http://www.prints.com.tw/newpage00.html
希望收到你的寶貴意見啦.
泓仔媽媽上.

請教就咁敢當。等我分享一下我啲經驗啦。

1) iPhoto 係一個 Mac 嘅軟件。佢係 iLife 其中一個部份，負責簡單嘅相片處理。相信妳咁樣問得，妳應該係用 PC。除咗處理相片，iPhoto 仲可以幫你列印相片。佢方便在按幾下就已經幫你整得七七八八。再按多幾下，就上傳去印刷公司去列印，非常方便。但缺點就係冇自由度，唔可以有太多嘅自製。

2) 當時我去台灣印，係因為香港未有對 iPhoto 嘅對應。

3) A4 即係大本平裝。喺 Hypodot，20頁要 NT$690，再加 NT$100 運費。詳情如下：

http://hypo.cc/products.html

其實價錢同快圖美差不多：

4) 冇試過呀。因為寄去港澳，我只知 Hypodot 肯做。而且自從香港 Apple 有支援 iPhoto 印相印書，我都冇考慮過出外面做。而且價錢又係差不多。硬皮書，20 大頁，HK$235，每多一頁 HK$7.70。詳情如下：

http://www.asia.apple.com/support/photoservices/hk/product_specs/

不過我都仲未試過用以上服務。朋友之前試過整一本細細本嘅。質素普通。我遲少少會試下印本大嘅嚟玩下。

總括嚟講，其實大家價錢唔相差好多。如果用 Mac 機，十個有九個都會用 iPhoto 直接俾 Apple 印，唔洗煩。快圖美都有朋友用過，效果唔錯。其實大約 $10 一頁連釘裝，可以做到一本心頭好都唔算貴呀。試想下我地影結婚相時做嘅相簿，貴十倍都唔只啦。



~ Lindberg

五十四日環遊美加 之 序幕

近排因為多咗幾位美加嘅網友，勾起咗當年遊歷美加嘅回憶。想當年，啲大學生一畢業，就好多時都會約埋幾個朋友，一人背住一個背囊去歐洲玩幾十日。話晒以後都未必有咁嘅機會。而當時我冇諗過去歐洲，反而想去一去美加睇一睇。於是就組織咗一行四人嘅「刻苦玩盡美加五十多日精華遊」。

先介紹一下另外三位團友先。三位都係我嘅中學同學。有大家熟悉嘅熙爸同阿托（阿托近排忙到就快死，所以網誌一直都冇再更新。），同埋阿蘇。不過為咗令自己寫得親切一啲，我決定用番以前我地叫開對方嘅名。希望佢地唔會介意。

阿蘇（右一）：原名「神眼蘇」。因為眼力過人，依家仲做咗我地偉大嘅消防員。可惜，佢喺是次旅程中途嘅甘迺迪太空中心，被「美國神眼」所擊敗。所以自從嗰時開始，我地冇再叫佢做「神眼蘇」。

阿托（左一）：原名「大鼻」。同佢性格絕無關系，佢係大好人一個。只係外表特徵。嘻嘻…

熙爸（左二）：原名「鄧生」。其實佢有另一個花名。不過我相信自己一直都冇咁叫過佢，佢自己可以證實一下。因為我絕對唔相信佢係一個「廢柴」。如果係，我又點會抄佢功課？！而且生理上就更加冇可能，否則邊會有熙熙呢？！嘻嘻…

其實我地四個人都有佢獨當一面嘅責任。我負責安排行程。神眼蘇勝在大隻好肉地，係我地嘅重要依賴。鄧生係（新牌）車手。而大鼻就負責我地嘅飲食。

五十多日嘅行程玩咗：
美國

• 洛杉磯
• 拉斯維加斯
• 大峽谷
• 聖地牙哥
• 三藩市
• 奧蘭多市
• 甘迺迪太空中心
• 華盛頓 D.C.
• 費城
• 紐約市

加拿大

• 多倫多
• 大瀑布
• 渥太華
• 蒙特婁
• 魁北克

雖然唔算行晒整個美國同加拿大，不過想去嘅，都算去咗。而且因為大部份都係靠自己睇書而去行，所以都行得幾徹底。如果我冇記錯，整個行程大概用咗港幣萬幾蚊。所以都非常刻苦。好在喺美加唔同地方都有親友接濟，否則一定營養不良，餓死異鄉。

我睇哩個題目應該都有排寫。希望慢慢寫，最後真係寫得晒啦。

「爸爸，您唔好掛住寫自己啲野唔記得寫我呀！」

「得啦！」

下一站：出發！



~ Lindberg

熊貓俠大戰牙魔王

「爸爸，媽媽牙痛咩？」

「唔係呀…」

「咁佢仲乜要去對付牙魔王呀？」

「咪多得您囉！」

「我？！」

「您又出牙仔呀。」

「係咩？嘻嘻…」

Jayson 下面兩隻牙出了良久，但還沒見上面兩隻的影蹤。前幾天 Jayson 有些微熱也不已為意，昨晚在婆婆那裡發現上面的齒齦有點腫脹。原來牙仔又要出來啦。

不過經觀察下，好像出得有點奇怪。腫脹的部位不是在正中，而是正中門牙的左右兩方。莫非先出那兩隻，或是跟 Anson 一樣，一次過出四隻？！

回家吃過宵夜之後，我們更發現 Jayson 痾牙仔屎。為甚麼有牙仔屎，我並不清楚。但以觀察所得，可能是因為牙肉不適，亂放東西入口而導致腸胃不適。

今早起床，發現身邊的 Jayson 媽突然化身為熊貓俠！樣子跟 Mrs. Incredible 差不多。只是眼罩是「真」的！

一問之下，原來 Jayson 昨晚不停哭醒。奇怪，為甚麼我聽不到呢？對啦，我跟威威和 Julie 一樣，有貓特強的「選擇性接聽功能」。嘻嘻…

一時醒過。二時醒過。三時完全醒來！玩了一回兒才再入睡。然後便是五時和六時。媽媽就連化學武器：「吳德勿次」也用上了。可惜也沒多大幫助。

大戰過後，Jayson 媽元氣大傷。今天決定告假一天，否則今晚都不知如何再跟牙魔王大戰。
有好幾位網友的公子小姐也在出牙仔，相信也是受著一樣的煎熬。希望大家的痛苦時刻會盡快過去吧！

「爸爸，您都唔知醒。有乜所謂喎。」

「唔好講到我咁咁負責任先得㗎！嘻嘻…」



~ Lindberg

花樣之延續：十月尾齊來哈佬喂！

好似好耐冇聲氣。但冇聲氣並不代表得個講字。「一個墟製作公司」並唔係咁樣做事嘅。大家期待已久（希望係啦…），花樣少男少女茶聚之延續：花樣迎萬聖！！！

花樣迎萬聖
日期：10 月 18 / 19 / 25 / 26 日（請投票！）
時間：12pm 至 6pm
地點：某會所
費用：未定…

「一個墟」所選擇嘅日子，都係星期六日。時間方面，我地預早咗少少，包括午飯時間。除咗想見大家耐啲，亦都方便大家早啲出門口，而又唔怕餓親自己同小朋友。

今次「一個墟」誠邀莎莉蛋糕出手，為我地搵地方。原定想搵一個屋苑會所嘅房間，叫到會食物，經濟實惠。一心以為已經搵到，點知個屋苑嘅會所裝修緊。唉… 但我地並冇氣餒！依家繼續搵緊好地方。最差嘅情況下，我地又去某意大利餐廳，最多今次去過第二間分店喇。

如果大家有乜地方可以提供，放得落 30-40 人，歡迎提出。感激不盡！而且時間冇多，所以我地要盡快訂好咗個日子先，等我地可以去訂地方。

但正所謂未出發，先興奮。當日時間表將會如下：

12pm - 2pm 到會形式自助餐
2:30pm 派對正式開始（e.g. 介紹自己 / 玩遊戲）
4:30pm 去兒童樂園玩（自由活動）
5:30pm 影團體相 / 抽奬時間
6pm 歡樂今宵再會

大家發現時間表上有一個好重要嘅項目：自我介紹。天啊！上次沖沖一會，都未有機會好好認識大家。今次一定要認清啲樣啦！

而我地都諗咗幾個遊戲節目：

1) 爬行比賽
顧名思義，鬥爬得快。
2) 扮鬼扮馬行 Catwalk
叫得 Halloween 派對，當然要扮下野啦。除咗有「最鬼馬BB獎」，仲有「最鬼馬家庭大獎」。所以大人都有份玩㗎。
3) 攝影比賽
哩個就所有人都有得玩。邊個影乜都冇所謂。所以全部人都玩得。之後將自己最有心水嘅三張相放上網，然後大家進行公投。禮物後送。

當然，我地「一個墟製作公司」絕對歡迎大家嘅任何意見！希望大家踴躍參加！除此之外，我地啲遊戲亦需要獎品。如果大家公司有乜好野可以贊助一下，咁就最開心喇。嘻嘻嘻嘻…
「好野！又可以見到大家啦！」

~ Lindberg

節瓜俠十個月回顧

體重：22 磅（非常節瓜）
身高：70 厘米 （不變）

進食時間表：

• 8:00am 奶（七安士）
• 1:00pm 飯（怎麼看我們煮的都是飯，不是粥…）
• 5:00pm 水果
• 6:00pm 飯、湯
• 9:30pm 奶（七安士）

動作方面：

• 拍手
• 搖頭
• 揭書（見下影片）
• 扶著企
• 扶著行
• 親親（把額頭親在你的面上）
• 張開收埋小手說再見
• 拍拍姐姐（見上圖）
• 拿著物件慢慢反複觀察

發聲方面：

• 爸爸
• 媽媽
• 姐姐
• 車車（發音跟「姐姐」很相近，所以我們分不清。但他真的很喜歡車。）

喜歡的人：

• 媽媽
• 樂基兒（每次有她的廣告，Jayson 都會集中精神地看。媽媽還曾經見過 Jayson 邊看邊微笑…）

「Jayson，點解您鐘意親嗰啲都係長頭髮嘅？之前就全知賢，依家就樂基兒。」

「爸爸，人家鐘意頭髮頭髮呀嘛。您鐘意嘅阿 Sa 姐姐都留咗長頭髮啦！」

不喜歡的東西：

• 臥
• 爬

Jayson 到現在還是不願意爬。如果玩具跌到自己拿不到的範圍，他不會爬去拿，而會嘗試找附近的其他玩具。媽媽說：如果在地上畫一個圓圈，他可以在那裡坐一整天。但現在學懂扶著行之後，整天都要我們扶著他四圍探索。

他間中也會發脾氣，尤其是我們不讓他放東西入口。有時還會幾惡，但都很快便平靜下來。晚上睡得不好，半夜會喊醒一兩次。但給奶咀便足以安撫。然後早上五六時左右便又會喊醒，而這次的安撫便比較費媽媽的功夫。

早前看過杏子給茄茄的十個月報告。看了之後覺得很慚愧。為甚麼 Jayson 甚麼都不懂得做呢？！

可能真的如一眾姑姑所講，Jayson 是一個觀察型的小朋友吧。其實當她們欣賞說 Jayson 乖的時候，我們反會因為他的「與眾不同」而擔心他。希望只是杞人憂天吧。

~ Lindberg

參見王子樣 之 愛的印記

當嗰日見到細細同藍藍，好難忍住手唔抱佢地。藍藍比較有威嚴（惡），比較難抱得好。相對細細雖然大舊，但係佢好溫純，所以可以抱到上手。反而係大家見到我抱起細細，過份驚訝，而嚇走咗細細。

當抱完一輪之後，Patsy 突然指住我手臂。原來細細同藍藍喺我嘅手臂上，留下咗幾道「愛的印記」。

（點解有啲似張笑臉嘅？）

愛貓之人，幾條血痕又算得係咩呀。

原來之前 Patsy 已經為兩位公子剪過指甲。但因為佢地都有番咁上下重量同氣力，所以都爪得傷人。

諗番起，都已經好耐冇哩啲「愛的印記」。以前威威同藍藍差不多大隻，意外時先可以爪得傷我。依家 Julie 細細粒，七磅半都冇，加上我地有同佢過指甲，所以都幾難爪得傷人。
威威啲爪痕已經一早好番晒。突然間覺得自己好似有啲變態，竟然會想留住所有「愛的印記」。



~ Lindberg

Jayson 食餅餅

Jayson 食餅餅，好像吃得很滋味呢。

令到姐姐也想來一份。

「細佬，您就好啦，有得食。」

「姐姐，我下次請您食呀！」

早幾日差點給 Julie 嚇壞。不肯食飯之餘，有一天回家發現嘔了好幾次。貓間中嘔吐是很正常，但又不見嘔吐物中有毛球。幸好最後也好似沒有大礙，慢慢開始進食濕糧，然後乾糧。 可能是天氣太熱，家中沒有人便沒有開冷氣，令到胃口大減。而且加上最近 Hill's 轉了配方。之前吃的是 Nature's Best，但現在的 Nature's Best 轉了一隻用糙米來做主要材料，據說會比較飽肚。因為不會再出舊的那一隻，我們唯有轉糧。其實我們已經慢慢溝新糧給她吃。可是 Julie 的腸胃都比較弱，所以可能還不能適應。打風過後，希望我還能買到舊款的，再慢慢溝給她吃吧。



~ Lindberg

參見王子樣 之 細細與藍藍

經過千山萬水，尋日終於有幸親眼見到細細同藍藍。其實除咗好想見到藍藍王子樣之外，我仲好想見一見細細。一隻二十磅嘅貓，企一個二十磅嘅 Jayson 埋去，究竟會係點樣嘅呢？
Patsy （雖然身為衰人一號）非常好人。專登落樓接我地。佢屋企附近環境好靚，可以見到一大片海，非常舒服。

上到樓，一開門就見到早到嘅莎莉。而莎莉面前就係瞓喺床上嘅細細。平時睇相冇得作比較。今次親眼見到，心入面突然想起以前讀過嘅一課書：「忽有龐然大物，拔山倒樹而來，蓋一巨貓也。」好大隻呀細細！都唔知 Patsy 改個咁嘅名係唔係想引人誤會，細細一啲都唔細！

睇哩一張獨照相，好似唔係好覺：

再放 Jayson 埋去：

好大舊呀！雖然大家都係二十磅（細細：20磅；Jayson：22磅），好明顯細細嘅「密度」高好多。一摸落去，實趯趯。虎背熊腰就係哩隻啦！而雖然身形似加德里奧，外表冷漠，其實內裡非常溫柔。幾經辛苦，我終於抱到佢上手。真係成個 BB 咁，可愛到暈！

「細細，你做乜咁驚青嘅個樣？」

「你個肥爸爸囉！係咁要捉起人！」

「細細，雖然我想強行抱下你，你都唔好五十步笑百步喎！大家個肚腩都係差不多啫！」

而藍藍王子樣真係靚到暈。俾佢一對藍眼睛電到得番半條人命。而且我冇幫佢改錯名，真係好有王子嘅性格。唔鐘意啲陌生人，我行我素。可能加上 Jayson，嚇到藍藍瞳孔放大，好似戴咗「大眼睛」咁。哈哈哈哈…

而 Jayson 可能同姐姐玩慣咗，不停好想摸藍藍。又捉腳，又拍頭。笑死我地。

希望尋日我地冇嚇親兩個少爺仔。等 Patsy 仲辛苦為佢地做聚會前的放鬆準備。希望有機會再去同佢地玩！



~ Lindberg

參見王子樣 之 出師不利

今日得 Patsy 邀請，可以參見我嘅藍藍王子樣。原本仲擔心尋日落雨，今日搞唔成。好彩今日天氣唔錯，聚會如常舉行。點知一起行就遇上出師不利。

Jayson 大約下午一點食午餐，而 Patsy 就住啲屯門。原本諗住早啲開車，希望十二點半左右可以去得到，咁 Jayson 就唔洗喊肚餓。點知遲咗出門口，十二點半先開到車，而且仲要去入油！不過以我手車，應該唔洗太過擔心。點知一上東區走廊就發現出事！

原本我地想行東隧，但見遲大到，所以就轉行西隧。一上東區走廊就發現出事，塞到完全行唔郁。起初仲以為係因為前面有架的士死咗火，所以就繼續行而錯過咗北角嘅出口。原來真係塞得好厲害。完全唔郁！

可能因為之前打風嘅關系，中環啲道路仲未暢通。行過北角之後，發現真係好唔對路，就轉向天后落橋。但從鰂魚涌到天后，竟然塞足四十分鐘！喺塞車嘅期間，Jayson 大喊肚餓。唯有喺車上面餵飯。而我亦因為剛剛病好，個人都好虛弱，一肚餓就好暈。所以就打俾 Patsy 話會遲大到，一落東區走廊就去茶餐廳醫肚。

充完電之後再起程。香港西行方向仍然非常塞。唯有照原定咁行東隧，一路暢通無阻，好快就去到屯門，而 Patsy 屋企亦都非常易搵。

玩完一個下午之後，因為怕 Jayson 會太攰，所以冇同其他人一齊食飯。我好少入屯門，原來比想象中近。四十分鐘車程就返到屋企。雖然龍翔道和呈祥道九曲十三彎，又上又落，但 Jayson 都係照瞓可也。相信同爸爸嘅超卓駕駛技術有關。前人有滕原拓海秋名山飆移送豆腐，今日有我龍翔道飛車載 Jayson。嘩哈哈哈哈…

~ Lindberg

非常時期食非常食物

上星期日，原本約了 Jayson 契爺等一班朋友食晚飯。但因為食完啲藥真係攰到手都舉唔起，縱使去得到，Jayson 都要 Jayson 媽全程獨力照顧。有見及此，唯有放大家飛機，乖乖地留喺屋企。見屋企冇乜糧草，想自己煮都唔得（而且都有心冇力）。而且當晚有大量奧運賽事，非常時期，就當然要食非常食物。Pizza Hut 外賣！只係冇諗過會係非常「難食」嘅食物。唉…

我地叫咗一個 DBS 特惠套餐。$215，有一個環球美味批（大Viva批）、車打海鮮焗飯、小食格格拼、和兩個蘑菇忌廉雞湯。所謂環球美味批，係一批有三個唔同國家嘅味道。我選擇嗰個有：京醬大蝦、芥末肉腸、沙嗲雞肉。而小食格格拼就有：雞腿骨、原味雞翼、繁星雞塊及脆炸薯角。以上兩樣食物，我可以用超難食去形容！

都唔知係唔係真係非常時期嘅關系，太多人落單，啲野係咁依煮熟就算。先講個小食格格拼。全部都炸到白雪雪，似白灼多過似炸。雞翼，冇味。脆炸薯角，又濕又腍。繁星雞塊，等 Jayson 媽仲以為係魚，爛肉一塊！雞腿骨，唔識形容…

個批仲大鑊！雖然自己近排食得多好味嘅薄餅，但未至於食到咀刁。哩個唔知乜野 Viva 批真係好難頂。我記得之前都試過一次，不過都冇咁差。今次哩個非常之乾之餘，仲冇乜味。我相信個批底係預先焗好，之後再放料上面。焗嘅時間會短好多，不過如果處理得唔好，個批底就會變成咁：勁難食。為咗充飢，我塞晒入個口入面。感覺非常可悲。

好後悔點解唔行幾步路落吉之島。肯行兩步，咪有好味嘅外賣薄餅食囉！不過鬼叫我行都行唔郁咩。唉…

我突然間記起我一個同學喺加拿大做薄餅店嘅經驗。佢話試過有人臨關門先打電話嚟叫外賣。有單就當然要做啦，而且仲非常「用心」去做添。個批底經過「特別」處理，保證味道帶有廚房地下嘅味道。如此行為，作為一個餐飲從業員，當然不敢恭維，因為真係會食死人。而作為一個食客，亦都令我知道幾時叫外賣先最安全。正所謂寧願得罪小人，都莫得罪廚師。哈哈哈…



~ Lindberg

二姨的喪禮

這兩日忙的是我二姨的喪禮。

二姨都離開得幾突然。本身係長期患病者，每星期都要洗腎。有一日，洗完之後頭痛。入院嘅時候都好地地。轉個頭，就已經去咗。

人走咗之後，雖然話有好多遺憾，例如未能見到自己個孫出世，或者參加自己個仔嘅碩士畢業禮等，但都可以算係一種解脫。手執兩支清香，心中只想到同佢講一聲：「辛苦晒…」
喪禮有大人去打點。我只好見有乜幫手就幫。

Jayson 放咗喺婆婆到過一晚。好似話都幾扭計。今晚接咗佢返嚟。一見我地就好開心。其實我唔係好相信死後會有啲乜野，但眼前見到嘅，就正好係生命嘅延續。突然間，又好慶幸生咗 Jayson。



~ Lindberg

清早起床

這兩日忙於—些家事，所以沒有時間寫網誌。只好放一個兩日前拍的影片給大家看。看我家三少如何起床。

好一隻懶瞓豬豬。


~ Lindberg

道歉聲明（二）

現特此通告，鄭重向 Jayson 作出道歉聲明…

「Jayson，唔好望住爸爸呀，今次唔關我事！我幫您媽媽寫咋。」

昨天，我們讓 Jayson 靠著沙發邊企。Jayson 想拾起地上的玩具，Jayson 媽一個不留神，讓他向前失足。雖然 Jayson 媽已經把他抓緊，但仍把眼撞向紙盒的角上。眼角撞損些少，慢慢地腫了起來。Jayson 當然又喊得非常厲害。不過比起上次，已經算很快便安靜下來。Jayson 媽緊緊的抱著他，雖然沒有大礙，但已經心痛不已。

到下午的時候，眼皮還越來越腫。心痛死爸媽。

額頭是爸爸的傑作，眼角就是媽媽的。

「您地就傑作得過啦！嗚… 嗚…」

家中活動空間不多。我看還是要積極找一個新的安樂窩。而在找到之前，要再徹底地清除家中不必要的雜物。盡量避免意外發生吧。



~ Lindberg

抱恙中…

其實前幾日已經開始發病。起初只係喉嚨痛。跟據以過往經驗，隨之而來，就會係流鼻水、鼻塞、咳嗽、病到七彩。所以今次我醒啦，做咗啲舒緩措施。

每次出現鼻塞情況，瞓覺就會好自然用口透氣。但因為本身已經喉嚨出現發炎，用口透氣會令發炎惡化，之後就會咳到飛起。所以今次我就盡量避免鼻塞嘅出現。用嘅係：

果然係有啲用喎。 個鼻真係透到氣，比起噴啲野入個鼻自然好多。

我以為頂得住，就食啲維他命C，希望自己會好番。

但係都係唔係好得。於是就開始食啲成藥。

最終都係唔得，要去睇醫生。我估我係俾同事傳染咗，因為我尋日同佢一樣，出現肚瀉。唉…

醫生啲藥好勁。收鼻水之餘，成個人散晒。尋日下午留咗 Jayson 喺婆婆屋企，我就大覺瞓。原本諗住返婆婆屋企食晚飯，但食完啲藥，真係攰到坐都坐唔起。唯有叫 Jayson 媽自己一個去，我就瞓多一個鐘先去接佢地。

而尋晚我就做廳長，因為驚傳染俾佢地。雖然 Julie 就成晚喺廳到玩，好彩我攰到理都理唔到佢，一覺瞓到大天光。起身時就周身骨痛。救命…



~ Lindberg

「搖頭丸」？

日本人的名字中，古時都喜歡用個「丸」字做尾。這是源於求一個吉利。日文中，「丸」是圓的意思，而日本人將圓視為吉利的象徵。所以他們為兒子起名時，都會用「丸」字做尾。
例子有得多。織田信長公的侍衛中，有位年輕的「森蘭丸」。豐臣秀吉公的乳名是「日吉丸」。犬夜叉的哥哥叫做「殺生丸」。幽遊白書中，有個「死死若丸」。火影忍者中，有位懂得影子模仿術的「奈良鹿丸」，和奸角「大蛇丸」。SNK 著名遊戲『侍魂』中，有我最喜歡的「霸王丸」。當然不能忽視的，就是王子「邪留丸」吧。

而我們家中，最近亦多了一個「搖頭丸」。

「爸爸，您又亂咁幫個仔改乜野名呀？！」

「對唔住！講下笑啫。阿仔，唔準食呀！打打！」



~ Lindberg

我的第一次

第一次給我的感覺是…很痛。是打從皮下傳上來的痛。俗稱：「肉赤」。上星期日第一次食「牛肉乾」，好肉赤呀！

嗰日同嫲嫲飲茶，入咗個半鐘頭咪錶。理應時間非常充足。點知叫多咗野，食耐咗。其實心裡都有啲不詳嘅預感，不過行到街頭又唔見有差人喺我架車前面，而且都只不過係遲咗幾分鐘，所以以為冇事。點知行近啲就見有個差人落緊簿，喝都喝唔切。唉…

個差人非常禮貌，而我都非常友善咁俾佢抄。但係唔係咁，仲可以點呀？唉…

我一直都係一個好守規則嘅司機。切線打燈、跟車唔會貼、唔衝紅燈、唔會亂咁泊車、條高速公路話 70，我就一定唔會慢過 70。今次真係令我嘅記錄，蒙上暗影。

「爸爸，您有冇打錯字？」

「有咩？冇呀…」

「您寫：人地話 70，您唔會『慢』過 70？」

「係呀。速度限制呀嘛。起碼要行 70 呀嘛。唔係咁解咩？」

「媽媽話最多行 70 呀，爸爸！」

「咦… 係咩？又好似係喎… 當我冇講過！您就當冇睇過。唔好同人講呀！嘻…」

近排架車都幾多事。前排見前面兩條呔唔夠氣，打完氣又係咁。於是叫個親戚幫我睇一睇，順便檢查一下架車。話晒日日載住 Jayson 四圍去，安全好重要。點知原來四條呔都俾一啲斷釘整穿咗！我估係之前泊一個大爛地停車場所致，唔係就俾人整估！唉…



~ Lindberg

婆婆的相機

昨天又把婆婆的相機拿回家去處理照片。在相機中，找到很多這兩三個月來，在婆婆家中拍下的趣怪照片。

有出浴照：

又是出浴照：

再有更多的出浴照：

以上出浴照全拍攝於不同日子。很明顯公公婆婆很喜歡出浴的 Jayson。
還有飲湯湯：

「好味呀！等我自己嚟！」

給媽媽看的罪證 — 不肯爬：

「出力啦 Jayson。」

「嗚嗚嗚嗚…」

「婆婆，唔好再迫我啦！」

原來昨天還去了參加表姐的畢業表演：

「表姐，我都要學妳『舞動奇蹟』呀！」

可以從照片中，拾起一些錯過了的片段，都算不錯呀。



~ Lindberg

排毒料理：那霸沖繩料理

前排去到太古城，食一間沖繩料理。沖繩出名啲乜？咪苦瓜囉。正好用嚟解下毒。
「中醫認為，苦瓜味苦，性寒；歸心、肺、脾、胃經。具有消暑清熱，解毒、健胃的功效。主要用於發熱、中暑、痢疾、目赤疼痛、惡瘡等。（資料來源：《維基百科》）」

那霸沖繩料理
地址：鰂魚涌太古城第十期耀星閣地下G1015號店
電話：2186-6969

起初覺得個名「那霸」幾得意。Jayson 媽後來先話我知，原來「那霸」係地方名。「那霸市」係沖繩縣的政治、經濟中樞。沖繩料理店名叫做「那霸」，最清楚不過。

人地話，如果開始鐘意食苦瓜，人生道路應該行咗一半。如果係咁，我嘅人生嘅一半，應該一早過咗。我鐘意食苦嘅野，因為想嘗試「苦盡甘來」嘅感覺。亦都希望除咗「甘」之外，仲有「金」都會來。而苦瓜仲可以解毒添，當然鐘意食。先來一杯苦瓜酒。攪碎咗嘅苦瓜，放入啲清酒入面。都幾得意，不過唔會飲第二杯，因為苦得怪怪的（我都唔係好飲苦瓜汁）。

我地叫咗個七道菜嘅二人套餐（$420）。苦瓜沙律。我未生食過我地啲國產苦瓜，沖繩苦瓜薄切加麻醬，好爽口，少少苦中帶甘甜，幾好食。而三款魚生都幾新鮮。

蒜香牛柳粒，天婦羅，賣相唔錯。不過正路野，冇乜特別。苦瓜炒豬肉，入面有啲豆腐卜、滑蛋。通常我地中國人炒苦瓜都會用豆豉去蓋過苦瓜嘅味道。原來就咁炒都唔錯呀。

三款燒壽司。有燒三文魚、燒帶子、同埋燒鰻魚。好味！甜品係雪榚，有綠茶同芝麻，兩款我都唔鐘意食。哈哈哈…

整體嚟講，都幾好食，而且份量充足。不過我又搵唔到乜野原因會再去。間餐廳俾我嘅感覺有啲似家常便飯。我都見都有啲單身男士（日本人、中國人） 去叫兩、三樣野自己食。不過價錢就一啲都唔家常便飯囉。

食咗咁多苦瓜之後，係唔係真係可以幫我解下毒呢？不過我中嘅係 PS3 毒，咁又解唔解到呢？



~ Lindberg

Blog Tag 30

見到飛天火羽哩個《Blog Tag 30》，令我想起《戰狼三百》。雖然冇乜關系，不過睇落又幾好笑呀。等我都嚟玩下先！

01) 你剛剛在做什麼呢？
睇咗飛天火羽個 Blog Tag。

02) 為什麼開電腦？
我部電腦長開，咁啱行過啫。

03) 對你而言最重要的事物是什麼呢？
統治地球。

04) 什麼人對你的影響最大？
宇宙大王。

05) 覺得最能代表自己的動畫人物是？
宇宙大王。

06) 最得意的一件事是什麼？
開咗幾間餐廳都仲未死得去。

07) 睡前通常在幹嘛？
除眼鏡…

08) 起床第一件事是什麼?
查閱電郵。

09) 樂透(六合彩)一直簽不中的感想？
一定係等下次多啲錢先俾我中！

10) 逛夜市時一定會吃什麼？
香港冇夜市喎。不過如果係台灣，一定係鹽酥雞扒！飽一飽都可以食多一塊！

11) 有沒有人說過你長的像誰？
我媽媽。

12) 覺得十年後的自己會是怎樣？
一模一樣。

13) 為什麼不交女(男)朋友？
唔想死住，因為感覺到後面有個人雙目隨時噴火…

14) 失眠怎麼辦？
基本上冇可能發生。不過試過有一次真係瞓唔到，最後都係眼光光等天光。

15) 如果你喜歡的人，不喜歡你怎麼辦？
有乜點算呀。習慣就會成自然啦。

16) 說出點你的人三個優點。
因為係自點，咁即係要講自己？三個？太少啦！三版紙都唔夠寫。得閑先慢慢講。

17) 說出你日常生活最享受的三件事？
瞓覺、睇靚女、同身邊嘅親人朋友嘻嘻哈哈。

18) 對高盛、花旗環球證券先後調降台塑四寶投資評等的看法？
唔關我事！

19) 和Honey去約會時踩到大型犬的便便怎麼辦？
當冇事發生過。然後去大商場門口嘅地墊行來行去…

20) 你和朋友出遊，朋友被捷運之狼襲擊而他竟是你主管，你會怎樣？
打爆佢個頭。正所謂事有可為，不可為。理得佢係邊個。

21) 如果發現自己的爸爸真實身分是金鋼狼你會怎樣？
Wolverine？！有冇 Hugh Jackman 咁靚仔先？！有就當然係叫佢帶我去識女仔啦！（突然感覺到後面有兩道好強嘅氣，同埋兩對隨時噴火嘅眼…）

22) 如果發現自己的媽咪其實是「魔獸世界」職業組世界冠軍呢？
乖乖地讀書，做個好孩子。

23) 和另一半結婚之後才發現對方其實是變性人你會怎樣？
大鑊… 都話上生物堂唔好瞓覺啦！

24) 對日前舉辦之CTIA Wireless大會的各公司高層一致表示，WiMax技術將取代電纜（cable）和DSL提供「最後一哩」的無線寬頻服務看法為何？
撞鬼你呀。等我真係走去睇下乜野係 WiMax。睇到我一頭煙！

25) 裸睡時發生13級大地震怎麼辦？
應該嘈我唔醒，繼續瞓。如果醒咗，咪著衫囉！

26) 連續拉肚子一個禮拜和便秘一個禮拜你會選哪個？
拉肚子一禮拜。就當清下腸胃啦。

27) 有一天自己暗戀的人忽然深情吻你，你的反應是？
一定有問題！鏡頭係邊到？！

28) 當一群流氓（五人以上）圍住你和女朋友勒索要錢，而且覺得他們似乎不只要錢而已，這時你會？
要劫色，就劫我啦！嚟啦！

29) 如何為地球盡一份心力？
喺統治地球之前，唯有盡量做好本份，留一個仲可以住得人嘅地球俾個仔。

30) 覺得這30問很煩嗎？
都幾得意呀。唔係就唔會自己叉隻腳落嚟啦。哈哈哈…



~ Lindberg

小二，攞酒嚟！

每次看見 Jayson 吃飯，都覺得他好想在說：「小二，攞酒嚟！」

「爸爸，算您啦。見您煮得幾好味，就唔嬲您住啦。聽日同我加多個蛋黃花唔該！」

「客官，冇問題。您話點就點啦。」

今天吃的是粟米豬肉粥。吃得非常興奮，可能是因為我放的是超甜粟米。我自己都覺得很好味。

大家有否發現 Jayson 的手腕上多了一件飾物？原來婆婆一早已經買了一隻玉鈪給 Jayson，但沒有為他戴上。但因有見前兩天的「意外」，再加上晚晚睡得不好，便希望可以為他定一定驚。但他的「節瓜手」穿起來，都有一點窄…

~ Lindberg

道歉聲明

現特此通告，鄭重向 Jayson 作出道歉聲明。爸爸對您不起，讓您跌了落地。

昨晚，我們讓 Jayson 坐在沙發上。因為我要再落街，所以沒有除鞋，坐在一旁扶著他。Julie 在睡房中不停地叫。Jayson 媽走過去看，原來窗外有一條繩索，被風吹得飄來飄去。當我看得入神之時，突然聽到隆一聲，轉過頭來，Jayson 由已由沙發跌在地上。見到這個情況，我腦海突然一片空白。回神過來，立即把他抱起。額頭撞損些少，慢慢地腫了一塊。Jayson 當然喊得非常厲害。兩頰通紅，流了一身大汗。我緊緊的抱著他，雖然後來發現沒有大礙，但已經心痛不已。

「Jayson，對唔住呀！我跌咗您落地！」

「嗚嗚… 好痛呀爸爸！起咗層樓啦！」

「痛在您身，痛在我心呀！爸爸以後都唔敢咁唔小心啦。錫番啦。」

近來 Jayson 晚上睡得不太好。每晚都會醒三幾次。早兩天，雖然不太喜歡這樣做，但還是讓他吃了一點珍珠末。昨晚不知是否因為跌一跌而嚇一嚇，半夜哭得很厲害。差不多一小時內，Jayson 媽不停安撫他，抱起又抱落。最後要抱著他入睡，然後放在我倆中間或才不再哭醒。辛苦了 Jayson 媽。



~ Lindberg

不美滿而完美的一天

今日雖然 8 號風球，不過好不幸地，因為有單工程今日要完成，所以點都要返去跟進。

一行出街，好彩冇乜雨。橫風就冇乜所謂，但加埋橫雨，有遮都唔知開唔開好。

落到地鐵站，平日嘅人群當然唔見晒。而列車都係唔見晒，要等八分鐘先有一班車。

首先要返一返寫字樓。為咗獎勵一下自己咁勤力，而且一陣又可能要體力努動，所以買咗份麥勞做早餐。肥呀…

做完一輪野之後，就坐地鐵去荃灣。因為好眼瞓，一喺金鐘轉完車就一直瞓到目的地… 好彩又係冇雨。不過都幾大風。

忙咗一整日，總算叫做將預期嘅工作完成。當 8 號風球除下之時，我就叫做可以收工返屋企，留番啲手尾俾人跟。

而回到屋企之後，晚餐又係麥勞，因為有人想食。

一邊食住個巨無霸，一邊開電影睇。雖然冇啖好食，但當見到 Jayson 媽開門、Julie 飛奔出嚟迎接、Jayson 可愛嘅笑臉，如何不美滿嘅一日，都變成完美嘅一天。



~ Lindberg