五十四日環遊美加 之 出發

經過上一次嘅序幕，今次真係要出發啦。我地嘅行程，大致上係先到美國西岸，由下而上。再飛到東岸，由下以上去到加拿大東岸。最後飛返去經美國西岸返屋企。洛杉磯係我地嘅起點，亦都係終點站。原因係我個好兄弟，阿 Chow，住喺洛杉磯。

其實哩個安排真係好一流。因為我地喺西岸都玩咗好耐，買咗唔少野。冇理由帶住四圍走。加上離開洛杉磯之後，一路都好刻苦。要帶住咁多野行，必死無疑。所以我地就留晒喺阿 Chow 屋企，回程時攞。

四名男丁去到咁遠，家人當然擔心啦。所以有啲屋企人都有嚟送機。非常感動…

我記得當時我地坐最平嘅 North West。自嗰次之後，我地打死都唔坐類似嘅航空公司。啲空姐真係…

一路心情真係好興奮，又有啲驚。話晒咁大個仔，真係未試過自己離開屋企，去到咁遠嘅地方。飛機上冇乜野做。佢地玩撲克同 Uno，不過我唔係好鐘意同人玩對戰式遊戲。所以大部份時間都係佢地三個玩。

到步之後，阿 Chow 為我地搵咗落腳嘅地方。嗰到係佢朋友打工嘅汽車酒店（Motel）。間房有兩張大床，一張檯，一部電視機。電視機有「精彩節目」二十四小時免費放送。但係四個血氣方剛嘅男仔瞓埋一齊，我地盡量壓制我地嘅「好奇心」，唔去開嚟睇。再加上兩邊房間不時傳嚟嘅「立體叫聲」，我驚貞節不保呀…

而喺張相入面，我身後嗰隻野就厲害啦。不過賣個關子先，遲啲先講。

第一次遠行去到地球嘅另一邊，所有野對我地嚟講都好有新鮮感。正一鄉下佬出城！

當時香港啲超級市場好細。第一次見到咁大間超級市場，覺得好神奇呀…

我地第一個去嘅遊樂場，就係 Knott's Berry Farm。其實開頭完全未聽過哩個遊樂場嘅名。阿 Chow 叫得我地去就去，而且好近佢屋企。原來都好好玩喎，有好多野睇，啲過山車又好勁。仲有史諾比坐陣。佢係美國第一個遊樂場，東主 Walter Knott 由賣漿果起家。之後開餐廳賣炸雞賺到錢，就起咗一個鬼城（同我地長洲東堤無關），最後變成依家嘅 Knott's Berry Farm。

我好幾年之後再去 Knott's Berry Farm，剛剛遇上萬聖節。果然係做鬼城起家，非常之好玩㗎！

但常言道：樂極生悲，我地玩咗一個機動遊戲，有人玩很過份興奮之後，我地就去咗下面一個地方。

睇得出係邊到嘛？應該都幾難睇得出。我地去咗差館！因為神眼蘇唔見咗個銀包。

當時我地玩一個飛船機動遊戲，其實都冇乜特別。好似迪士尼個小飛象一樣，轉下轉下。唯一唔同就係入面有支操縱桿，可以將飛船上下倒轉。所以都可以幾激。神眼蘇就係玩得過激，不停將佢自己嗰架飛船轉來轉去，十足十坐住部洗衣機一樣。可能就係因為咁，銀包飛咗出嚟都唔知。之後當然搵唔番啦。好彩入面唔係有好多錢，不過之後都去咗差館報案，之後先可以索取旅遊保險賠償。

下一站：暫別洛杉磯，轉戰拉斯維加斯



~ Lindberg