由
洛杉磯乘坐「灰狗」巴士到三藩市，我覺得我地嘅美國之旅，先至係真正開始。
洛杉磯和拉斯維加斯，都係好「遊客」嘅地方，而且食同住都叫做有人照住。到咗三藩市，我地就真正接觸到美國文化。所帶來嘅沖擊，由我嘅皮膚開始。
我地坐咗一班好慢嘅「灰狗」，沿路停好多站。半夜上車，第二日中午先到！足足用多一倍時間。半夢半醒嘅時候，我見到 Oakland 大橋。落車之時，特然間發現條頸好痕，跟住全身都好紅。我一向都冇敏感嘅問題，但可能天氣比較涼到乾燥，所以全身敏感。痕到我死。好彩，我地臨行前有喺大學買咗幾個旅行藥包，入面有抗敏感藥。雖然食咗會好暈，不過冇計啦。
之後去嘅幾個地方，我都有同樣問題。最後，我食晒大家嘅抗敏感藥。仲要「唔夠喉」，要去藥房再買。唉…
我選擇咗一間叫 Globe Hostle。以下取錄自我嘅旅行日記：
「去到那裡才後悔。那間 hostle 很有 70 年代的氣味。在 lobby 中有男男女女在彈結他和抽煙。Lobby 的格局就更 70 年代。Receptionist 是一位有紋身和穿耳環的男人。」
「拿了床單之後，我們去了二樓的房間。樓樓有很多裸體照片，甚至乎是同性戀照片。房間是五人房。有個人已住在這裡，但他還沒有回來。房間令人有不安的感覺。」
其實除此之外，旅館附近嘅街道都幾「奇怪」。後來先知道三藩市有唔少同性戀者，每年仲會搞大遊行。
除咗好「基」之外，四周圍仲好臭，一陣陣臭口水味。所以令到我地對三藩市嘅印象好差。
安頓咗之後，我地就打電話返屋企報平安。鄧生有啲唔開心。相信大家離家十多日，唔多唔少都會掛住屋企。
受到一浪又一浪嘅沖擊，我地決定去 YMCA 睇一睇。見環境好一啲，第二日就搬咗過去。
我地去咗一般遊客都會去嘅地方。例如：金門橋。
三藩市有好多山路，上上落落。所以就有纜車坐：
我地仲去咗漁人碼頭（Fisherman Wharf）。呢個地方我又係會記一世。「漁人碼頭」應該寫成「愚人碼頭」！事源我地行行下街，突然有條友走上嚟，佢話自己係「邊個邊個」，話我地過馬路掛住笑，唔睇路。之後表明身份話自己係「乜野乜野」慈善行動，同我地玩下，希望我地可以捐啲錢。好明顯我地俾人呃，不過都係俾咗幾蚊…
我地明明有四個人，點都應該兇番佢轉頭。無奈當時係喺人地地頭。唉…
不過我覺得我地整個旅程都算順順利利。神眼蘇有個大學同學，同樣四個人去三藩市玩。喺我地行過嘅同一條街，俾人用槍指住個頭，搶晒啲錢。我估我地四個行得快，啲壞人追唔到我地呱。
而喺三藩市嘅最大得益，就係進行咗「終極補給」，我地去咗我三姨屋企。一餐飯，等於至少三餐嘅份量。足夠我地之後體力嘅需要。
三姨一家住喺市外。三姨丈開車載我地去。一家人移民到美國，生活都幾辛苦。不過一家人齊齊整整就得啦。我三姨好鐘意喺花園種果樹。我最記得有有檸檬。仲有養兔仔添。不過好似唔算係寵物………
整餐飯，我到依家都仲記得個西瓜有幾甜。正所謂：「他鄉遇故知」，可以見到好耐冇見嘅親人，最平凡嘅野都變得好可貴。
去三姨屋企用咗我地大半日嘅時間。第二日，我仲去咗探監…。（好）幾年前，Nicholas Cage 有套電影叫做「The Rock」。故事圍繞一個監獄島。就正正係我地去嘅「惡魔島（Alcatraz Island）」。由漁人碼頭搭渡輪，大約十五分鐘的航程就到。都幾得意，好多野睇，同好多雀雀嘅便便。可惜當時未有「Prison Break」，否則我地可以扮下野。
相中人好出名㗎。冇佢，張相入面嘅我就冇褲著喇。佢咪就係李華氏（Levi Strauss）囉！哈哈哈…
下一站，我地飛去東岸。一切由
奧蘭多市開始。
~ Lindberg
