五十四日環遊美加 之 玩轉洛杉磯（二）

上次玩咗兩個主題公園之後，今次玩得特別啲。我地開車落咗聖地牙哥。當時點解會計劃落聖地牙哥，我已經唔係好記得。聖地牙哥再落少少就係墨西哥，不過我地冇落到去。只係喺聖地牙哥市四圍參觀一下。諗落都幾無聊，就當係之前玩得過激，依家調劑一下啦。

我地喺著名嘅聖地牙哥動物園（San Diego Zoo）外面影相。不過冇入到去，因為我地太過孤寒。去到聖地牙哥已經係中午左右，我地見唔係有太多時間行，而且入場費又唔平（印象中好似 HK$2XX），所以就冇入到去。

除咗聖地牙哥動物園，呢到仲有海洋世界（Seaworld）。我地一樣冇去到，因為預咗去奧蘭多嗰個。架車經過門口就算。哈哈哈…

行行下，俾我地發現咗聖地牙哥嘅主要景點舊城（Old Town）。入面有啲古舊啲嘅建築物，有個好得意嘅市雜賣手工藝品。我地見有啲俾錢嘅觀光巴士，帶遊客去睇一啲景點，於是我地就開車跟住佢尾。佢停邊到，我地就停邊到。然後四周圍睇下有乜野特別，有乜野可以影。勁「Cheap」。哈哈哈…

其實開長途車真係幾辛苦，尤其是對於「新牌仔」鄧生嚟講。每次我都係坐領航員嘅位置，點佢行左行右。而其餘兩位就喺後座大覺瞓。由於咁嘅原因，我地叫佢兩位做：「Natural Born Sleeper」（當時套電影：《Natural Born Killer》非常熱爆）。除咗帶路，我仲要跟鄧生傾下計，以防佢瞓著，否則就必定一鑊熟。車廂音響不停播放住我地由香港帶嚟嘅張信哲，真係聽到有啲想嘔。有一晚我都頂唔順，瞓著咗。正當朦朦朧朧之際，突然聽到有人大叫一聲。大鼻、神眼蘇、同我三個人嚇到彈起。原來鄧生都差啲頂唔順，所以大喝一聲。我嘅腦海上浮現出張飛企喺長板橋，大喝「燕人張翼德在此！誰敢來決死戰？」。曹軍嘅夏侯傑聽到之後，嚇到肝膽碎裂，倒撞於馬下而死。我地三個真係差啲俾佢嚇死。之後我就唔敢再瞓啦。

第二日，阿 Chow 帶咗我地去一個遊樂場（Amusement Park）。入面都幾多野玩，例如迷你高爾夫球、棒球、電視遊戲機、仲有以下嘅砲艇。悠悠閑閑玩咗一個下午。

而去到最尾嘅一日，當然唔少得重頭戲：迪士尼樂園（Disneyland）啦。迪士尼樂園，依家香港都有，所以冇乜好講。但當然嗰邊啲機動遊戲多好多，同埋刺激好多啦。Indiana Jones The Ride，玩三次都唔夠喉。而最值得一提嘅，係………阿 Chow 嘅朋友。 阿 Chow 叫埋幾個朋友一齊去玩，其中一個極似楊采妮。膽小如鼠嘅我地，竟然唔敢叫佢一齊嚟影張合照。令到我足足後悔咗十幾年。（不過確實有啲高不可攀嘅感覺呀嘛。）

左：白痴神眼蘇。右：傻瓜大鼻。哈哈哈…

喺暫別洛杉磯之時，我地約咗幾個喺洛杉磯住嘅舊同學出嚟食飯。去嘅並唔係乜野高級餐廳，而係吉野家。印象中食得好開心。而最重要嘅係，我地得到一件好有用嘅野：「調味霸王 2000」！話說我地見檯面有支萬字醬油同一樽七味粉，玩到冇野好玩就溝嚟試下。點知幾好味喎。有見之後好多時都會自己整野食，又唔知邊個飲橙汁有個膠樽喎，所以我地就攞咗「少少」醬油同七味粉，入落個樽到。得出嚟就係我地嘅：「調味霸王 2000」！之後嘅旅程，真係不可多得嘅良伴。放麵炒菜，一樣咁好味！真係要多謝吉野家。嘻嘻…

下一站：情迷三藩市。



~ Lindberg