十四個月報告

體重：23 磅
身高：78 厘米

「爸爸，我 24 號十四個月，有冇多一份禮物㗎？」

「您話呢？」

發展報告：
1) 行動自如。直行轉彎都沒有問題。但非常膽小，所以不敢在陌生的環境下四圍走，更需要家長在附近陪同。

2) 踎低、坐下、然後踎低、再起身。

3) 懂得敬禮（Salute）。應該是從表姐那裡學回來。但現在變了雙手敬禮，不知敬了那裡去…

4) 不太喜歡說話。但經常以「海狗叫」去表示他想要的東西。還喜歡自己唱自己的歌。

5) 每當見到牆上有告示，就嚷著我們要讀給他聽。例如在電梯內，他會指著牆上的告示，叫我們讀給他聽。「為人為己，升降機內，嚴禁吸煙。」讀完一張之後便要讀另一張。我相信除了 OTIS 本人之外，我將會是最清楚電梯使用守則的人。

6) 每當媽媽唱完歌，他會以掌聲鼓勵。

7) 每當吃東西到最後一啖時，我們會說：「Last」。吃完之後，他會張開手板，表示沒有了。然後就不會跟以前一樣，哭著繼續要。這個我們沒有刻意教過，不知從那裡學回來。但每當做得好，我們亦會以掌聲鼓勵一下。

8) 每晚都要在床上扭一大輪，要坐起，甚至企起身。到大約 11 時才能入睡。唉…

9) 每當一拿起一支筆，一邊亂劃，一邊說：「A」。有時會說：「H」。

10) 和公公婆婆飲茶，要自己劃點心，然後交給姐姐。但當然是亂劃一通。

「今日一定要食叉燒飽…」

11) 叫他：「Stomp Your Feet」，他會踏踏腳。

12) 問他：「Who is Jayson?」，他會拍拍自己的心口。
（影片後補…）



~ Lindberg

多功能皮草頸巾

作為一個愛護動物嘅人，我對皮草反而冇太大嘅反感。其實重點都係不必要嘅殺生啫。而我覺得就好似去打邊爐，如果叫多咗半碟肥牛食唔晒，其罪疚感同著件皮草出街應該冇乜分別。所以我唔會指住啲著皮草嘅人，鬧佢係殺人兇手。

突然有感而發，係因為每當入冬，我就會被迫穿上一條活生生的皮草頸巾…

呢條「頸巾」除咗啲毛好幼滑之外，仲會自動發熱。其微震功能，有效舒緩頸緊膊痛。但呢條「頸巾」都有其問題。第一，唔戴得出街。一出街就會一膊頭都係便便。第二，有時呢條「頸巾」去咗排便，然後就直接跳上嚟，用個屁股對住你。陣味都幾難頂㗎。哈哈哈…

以前一到冬天，威威就會跳上嚟。可能我嘅膊頭比較寬闊呱。阿威比較重，所以都幾辛苦。Julie 依家就獨佔我個膊頭。佢勝在唔係太重，而且瞓上嚟又真係幾舒服喎。哈哈哈…



~ Lindberg

樂極生悲

Jayson 現在一個人也可以四周圍行。雖然膽小一點，但向前、轉彎、掉頭都沒有太大問題。而且還行得很興奮。只是有時也會樂極生悲…

以前這種「驚心動魄」，只能在網友的網誌上看得到。現在我們也有了。哈哈哈…



~ Lindberg

我們的第一次迪士尼

今次去迪士尼，真的要做足準備。首先是 Jayson的飲食。要帶兩餐飯、水果、後備奶、和充足的冷熱水。後備衣物、尿片等更加不可以帶漏。為免有任何差錯，亦因為要準時到達迪士尼，所以決定自己開車。昨天原定10:30am 起行，最後 11:15am 才能離家。那時爺爺嫲嫲和二伯一家都已經到達香港，於迪士尼酒店安頓好，開始向迪士尼進發。

幸好一路沒有阻塞，大約半小時的車程，我們便到達迪士尼。

「爸爸，我地去邊呀？」

「我地去迪士尼呀！」

「咩係迪士尼呀？」

出事！我們忘記了。原來我們一直都沒有讓 Jayson 接觸過任何迪士尼的東西！哈哈哈…

第一件事，就是先拿一架嬰兒車。我們沒有用自己那一輪，因為我們的放不到甚麼東西。$60 用一日，都叫做化算。

我們約好了其他人於中菜館一起吃午飯，當進入菜館，我便堆 Jayson 到嫲嫲面前。不出我所料，Jayson 立即大喊。熱情的大家姐走過來，喊得更厲害。百厭的二家姐到來，更加嚇得收不了聲！但不出幾分鐘：

相隔一年沒有見面，兩位家姐都很喜歡 Jayson。逗了他一會兒，立即笑顏盡開。令整檯人都笑起來。

我們以極速餵過 Jayson 和自己吃過一些東西後，我們便出外四圍走。這天非常多人，熱門的遊戲都要排半小時以上。但我們志不在玩，只是想讓 Jayson 跟大家在一起。

起初一見到嫲嫲，旁邊有一張輪椅。心裡一沉… 難道嫲嫲的腰骨痛到行動不自如？我竟然還懞然不知，如此不孝！後來才知道輪椅是給二家姐的。因為她超過了 15kg，所以不能坐嬰兒車。嚇得我呀… 她們每天都有車出入，行兩步路便喊攰，所以沒有一架車都可能幾麻煩。

二家姐很喜歡 Jayson。而 Jayson 亦很喜歡二家姐。他們手拖手四圍走。

但有時很明顯，二家姐是當 Jayson 如玩具般的玩弄。哈哈哈…

「細佬，您食唔食奶咀呀？食？唔食？食？」

「細佬，抱抱！」

我們不是玩了很多遊戲。首先去了玩「森林河流之旅」。Jayson 在排隊時開始扭計，但上船之後就四圍望，對四周的環境表現得很好奇。但幸好他望向了另一面，沒有看到最後的火山爆發場面。否則一定會被嚇壞。

之後我讓 Jayson 騎著膊見巡遊。很攰呀…

然後讓他小睡片刻。我其間吃了幾餐。半個磨菇批、半杯咖啡、一碗牛肉麵、一隻熱狗、等等…

之後玩了「小小世界」。他又好像之前般四圍望。他喜歡聽音樂，所以我相信他都幾喜歡「小小世界」。

我們還看過了聖誕特別節目：「星閃皇家舞會」。雖然沒有甚麼特別，但當整座城堡的燈亮了起來，又真的很漂亮。

Jayson 的晚餐是之前準備好的飯。雖然用了保溫飯壺，但飯還是涼了一點。而家姐們想去玩「幸會史迪仔」，但可惜太多人排隊，所以都沒有去。

最後看了「星夢奇緣」煙花表演。我們早了半小時到廣場找個好位置，然後 Jayson 媽跟我輪流抱著 Jayson 等表演開始。當 Jayson 媽抱著他時，她後面有兩位漂亮的姐姐逗 Jayson 玩。為甚麼抱著他的不是我呢？

「爸爸，到您抱住我，啲姐姐就彈開啦！」

「衰仔！」

看煙花表演時，Jayson 感到很興奮，雙眼張開得很大。而我們便拿著一副迪士尼特製的眼鏡來看煙花。透過眼鏡，眼前的每一點煙火，會變成一隻隻的小天使，甚為有趣。

我們雖然不是玩了很多東西，但已有筋疲力竭的感覺。最重要的是可以與家人在一起，而且見到 Jayson 也玩得很開心。希望等 Jayson 大一點，我們可以再來玩個夠啦。



~ Lindberg

聖誕快樂！

「姐姐，做乜妳多咗對角嘅？」

「一睇就知我係被迫㗎啦！」

「唔緊要啦。咪幾好睇。」

祝各位朋友：聖誕快樂，新年進步！ 來年希望大家都好似節瓜俠咁，日日都開開心心，又好似 Julie 咁，天天無憂無慮。



~ Lindberg

寒冷指數

今日嘅寒冷指數係…

極高。請將身體盡量貼緊暖爐。要外出嘅朋友就要加多幾件衫啦。

而孝順嘅貓貓，可以效法黄香精神，為爸爸媽媽預先暖好衣服。咁就唔怕凍親啦。

以上資訊，係由 Julie 帶俾大家。祝聖誕快樂！


~ Lindberg

P.S. 自從 Julie 轉咗糧之後，好似食得唔錯。抱起上手都覺得重唔少，大約重番一磅左右。真係謝天謝地。

做節不見了 Jayson

上星期跟婆婆一家做節。當我抱著 Jayson 還在上自動電梯之時，已經聽到上面不停有人歡呼：「節瓜嚟啦！」（絕無誇大…）

因為公公這兩天要去做身體檢查，所以他們沒有去飲早茶。一班姐姐們見到 Jayson 立即很開心。當我踏出自動電梯的一刻，Jayson 便被其中一名部長姐姐抱走了…

一個自稱是 Jayson「外父」的部長，更不停叫著 Jayson，要他叫：「外父」（他有一個七、八個月大的女兒）。這令我有點兒氣忿，Jayson 的外父，不就是米B爸嗎？怎可以讓其他人亂認呢？

其實見有這麼多人疼錫 Jayson，心裡都覺得幾甜。但卻因為有些事情，違反了我們一些「原則」，所以都會有點不舒服。

例如去到酒樓食飯，我們是嚴禁抱去四周圍行。看魚魚更是「在我死去的身軀（on my dead body）」式的禁止。幸而 Jayson 都非常合作，餐餐都坐定定，令大家都有餐安樂茶飯。但這晚…

唉… 幸好只是四圍行，而沒有去看魚魚。

另一樣是飲食。我本身不是太過注重飲食健康的人（經常吃漢堡包），但對飲食衛生，我卻很重視。部長姐姐拿了一碟切好了的西瓜過來，預先切好的生果，對其處理的衛生操手，我們一點也沒有信心。大人吃還可以，但我們絕不會給 Jayson 吃。但見部長盛意拳拳地端過來，我們又不好意思叫她拿開。幸好 Jayson 很乖。當她叉一塊給他吃時，Jayson 竟然一手推開。我們心裡有如釋重負的感覺。Jayson 果然是個乖仔。超級抵錫！呵呵呵呵…



~ Lindberg

Blog Tag - 喜愛的卡通片

Koko 第一次點名 Kidad 王嚟踢我，再俾賞雨補多一腳，我點可以唔認真答呢？
玩法:

1. 當然就係答足六條問題……
2. 可以加問題, 但只限加一條, 每加一條就要減返一條 (6條好做過n條掛)
3. 當然要話俾我知你接咗tag啦
4. 要post相關的圖片俾大家知, 因為有一啲係大家記得公仔但唔記得動畫名……
5. 最後………梗係要tag人啦, tag幾多?? 3 - 5 位朋友啦不如
今次個 tag寫咗我幾日，因為都係好難答。開始答題!

1. 有啲咩卡通片你一定要追嚟睇, 如果有得錄的話仲會錄低呢? 同埋點解咁鍾意?
有兩套。第一套：《聖闘士星矢》。我睇無需要解釋太多，小宇宙燃燒吧！

想當年，車田老師嘅《聖闘士星矢》，簡直係格鬥動畫嘅一個里程碑。華麗嘅格鬥，淒美動人嘅情節，再加上友情、熱血、愛與和平。咁樣嘅一套卡通片，點可以唔追呢？

第二套：《鐵拳浪子（あしたのジョー）》。當時無線做下半部，叫《疾風鐵拳霸》。熱血青年，當然鐘意熱血拳擊卡通片啦。而且《鐵拳浪子》仲要係經典中嘅經典。真係每個星期六，又追又錄㗎。

2. 睇過咁多套卡通片, 最深印象係邊一套呢? 邊一part最有印象?
好多套都好鐘意。但出奇地，第一套諗起嘅係《JoJo的奇妙冒險》。因為空條承太郎真係型爆！亦都因為呢套動畫，我喺網上買咗一整套漫畫返嚟！

最有印象係佢同敵人玩撲克牌。清楚表現承太郎嘅智慧，白金之星嘅無限潛能。故事係講承太郎同一個好叻賭嘅人玩撲克牌。之前就連佢出名蠱惑嘅阿爺都贏唔到。派完牌，承太郎一句：「このままで！（就咁啦！）」，然後用有超級速度嘅替身：「白金之星」，做好多小動作，等對方以為佢換咗牌。但因為對方冇證據承太郎出術，最後真係俾承太郎偷到雞，贏咗。真係型得好緊要！

Youtube 竟然咁都有：

不過仲有另一套卡通片段！其震撼對年少嘅我，真係一個非常大嘅刺激。佢就係「普托哥車」！喺《超時空要塞》入面，一条輝同林明美俾祖拿達人捉咗返去研究，攪到要喺班外星人面前親咀。然後班祖拿達人好驚咁大叫：「普托哥車」！！

當年電視台譯作「普托哥車」，其實係指 Protoculture，即係原始文化。睇完之後，對當年天真無邪嘅我，沖擊不下於嗰班祖拿達人。

3. 有冇試過唔想睇套卡通片, 都會照睇? 點解要睇呢?
我見唔少人都有同一個答案。就係《龍珠》！Animax 重播完又重播。仲要每次睇都係嗰幾段！但都係會照睇。因為係《龍珠》囉！

4. 有冇試過扮卡通人物呢?
或多或少都有嘅…

• 試過喺手背畫個圓形扮「天眼急先鋒」。
• 買支.357 麥林（玩具槍）扮「孟波」。
• 扮黃金聖鬥士：水瓶座卡妙，出水瓶神拳。雖然威力達唔到「絕對零度」，但依家諗番起都打咗個冷震…
• 指隻食指出嚟，扮《幽遊白書》浦飯幽助出「靈丸」。都幾白痴…
• 「龜波氣功」！就連星爺（周星馳）都喺電影到出過，正常嘅男孩子又點會唔試下出呢？不過用特硬啫喱臘完個頭先出，我覺得自己有誠意啲囉。

5. 最鍾意邊個卡通人物呢? 點解?
好難答喎。好多都鐘意…

1. 《城市獵人》：孟波（因為佢唔洗用手舉得起張檯。呵呵呵呵… 睇過應該明白我講乜。呵呵呵呵… 其實我係鐘意佢無嚟正經嘅外表，入面有一個好溫柔嘅心啫。（註：暗示同筆者一樣。（註：現在變成明示。）））
2. 《我係小忌廉》：沈小桃（注意：我唔鐘意變身後嘅小忌廉。小桃可愛好多！）
3. 《百變小櫻》：木之本櫻（因為好可愛靚女…）
4. 《疾風鐵拳霸》：矢吹丈。青春與熱血！
5. 《聖闘士星矢》：一煇！
6. 《深山太保》：雖然都幾鐘意阿珍，不過都係泰山好啲。哈哈哈哈…
7. 《魔法小神童加旋》：加旋。有一個善良嘅心。
8. 《One Piece》：Monkey D. Luffy（路飛）。雖然傻頭傻腦，但勝在有情有義。
9. 《俏皮扮野貓》：米高和波波。因為太可愛啦！
10. 《櫻桃小丸子》：小丸子。因為同我細個好似。呵呵呵呵…
11. 《娛樂金魚眼》：華美子、牛同學、雞…等等。勁搞笑！
12. 未能盡錄…

6. 有冇邊首主題曲好熟?
仲唔係《宇宙大帝》？！

「神奇大帝穿咗褲窿，娶左三位妾士，有個放屁，有個痘皮，有個斷氣就嚟死 ...」

咦… 好似唱錯歌詞…

「神奇大帝主哉太空，三位忠心戰士；有勇氣、更有熱誠，似個正氣大孩子…」

我以前好鐘意《娛樂金魚眼》，鐘意到有齊佢嘅原聲大碟。入面最鐘意佢嘅主題曲，每次聽都覺得好開心。（注意：J2 12月22日 6:30pm 開始重播。）

《長腿叔叔》。我相信只要聽過一次，就已經識背。因為好聽又舒服。「藍色的天空任鳥飛，水邊青青小草讓我躺。心中永永遠遠懷念你，你是我家。」

同出一辙仲有兩首：《飄零燕》。

同埋恐怖片始祖：《星仔走天崖》。

《聖闘士星矢》當然有份啦！我有兩餅佢嘅錄音帶。以下第一同第三隻歌都聽到識背！

近排最鐘意，仍然係《穿越時空的少女》中，奥華子嘅《変わらないもの》。加上好配合套戲，所以超鐘意奥華子。隻歌真係百聽不厭！

唔踢番人啦。有興趣就一齊分享下啦！



~ Lindberg

遊樂場記

如果有機會，我們都想帶 Jayson 到公園玩。吸吸新鮮空氣，見一見其他小朋友，鍛煉一下大肌肉。上星期又來到鰂魚涌公園玩。

「Jayson，您試下爬入去玩呀。」

「爸爸，唔好玩啦。」

每次到公園，都是午飯後的時間。通常他都要洗白白和少睡片刻，所以都不是太過有精神。
但當見到鞦韆，他便立即回神過來。

「Jayson，點解今日您好似玩得特別開心呀？」

「因為有個妹妹陪我玩呀嘛。」

「Jayson，爸爸教過您幾多次！做人要從一而終呀嘛。俾米B知道唔要您，咁點算呀？」

「嗚嗚… 我知錯啦。我下次唔會笑得咁開心啦。」

而其次便是珠算：

不知是否每個兒童遊樂場都有這個玩兒。Jayson 每次都可以企著玩很長的時間。

~ Lindberg

吃意大利餐：茄醬字母粉

對於 Jayson 的飲食，我們都比較保守。始終奶粉已經可以提供一齊所需。味道上如果可以清啖些少，便盡量清啖。現在開始落些少鹽調味，早兩個星期試過用橄欖油炒蕃茄炒蛋。效果都不錯。

之前婆婆試過煮字母粉給他吃，但他不肯吃。這天到我親自出手。

煮字母粉，做法很簡單。只要做好一個醬汁，煮熟字母粉就可以吃。比起煲飯簡單得多。

今次我用上了新鮮蕃茄、碎牛肉、粟米粒和雞蛋。先用橄欖油爆香牛肉，然後放入蕃茄粒。因為見之前 Jayson 不肯吃婆婆煮的，怕是沒有甚麼味道。於是我落了兩茶匙的意粉醬。如果有材料，我會自己煮。但為了貪方便，而且只是用些少，現成的都沒有太大問題吧。加水煮成醬後，便放切碎的粟米粒。最後放一隻炒蛋，肉醬便做成。要吃的時候，把肉醬番熱，放進煮熟的字母粉裡。極之簡單方便。

「好唔好食呀？」

「好味！」

我煮了一大碗，Jayson 乖乖地把全部放入口。呵呵呵呵…



~ Lindberg

五十四日環遊美加 之 夢幻的奧蘭多市（一）

離開咗三藩市，我地乘坐飛機到東岸嘅奧蘭多市。自由行就係有樣好處。之前仲諗住要喺機場過夜，然後坐早機過去。點知好幸運地俾我地搵到班 11:45pm 嘅飛機，可以喺飛機上面瞓。實在太好啦！

盛夏嘅奧蘭多市同香港差不多，又濕又熱。

一落機就感受到主題公園嘅威力。機場四周圍都有迪士尼樂園（Disney World）、環球影城（Universal Studio）、海洋世界（Sea World）等嘅店舖。

我地嘅旅館位於市中心。非常安全，又多警察。但唔知點解有好多乞丐。記得仲有個年輕少女都問我地有冇錢。唉…

一入到旅館，我首先沖一個靚涼。一踏入浴室，竟然係一個超恐怖經歷嘅開始。到今時今日，當時嘅畫面仲歷歷在目…

當我踏入浴室，一扭開花灑，水慢慢流入去水渠口，「佢地」就湧晒出嚟。「佢地」就係我最怕嘅小強！一共十幾隻走晒出嚟！畫面係難以想象嘅恐佈。好比十幾個「貞子」（午夜凶鈴）一齊爬出嚟一樣。我估可能因為個浴室都有一排冇用過，啲小強避晒入去水渠裡面。冇著衫嘅我，加上走唔出浴室嘅小強們，十足十困獸鬥。當時真係有十萬個驚。好驚佢地爬上我個身。我用水力頗弱嘅花灑不停咁射佢地，不過一啲用都冇。好彩嘅係呢啲小強同香港嘅小強唔同樣。顏色烏黑，身比較圓同有橫紋。其實喺飛機上睇本《Let's Go USA》，都有提過呢到有好多呢種小強。但誓估唔到會咁樣遇上佢地…

喺冇幫法之下，我犧牲咗卷廁紙。我用好多格廁紙蓋住啲小強，然後一腳一腳送佢地去西方極樂。小強喺我腳下喪命嘅聲音，由我腳板底傳到我嘅心入面。如果係港版小強，我睇我會叫醫生切咗我隻腳。

當最後一隻俾我搞掂之後，我就幫佢地進行簡單而隆重嘅海葬儀式。廁紙當作棺木，經由馬桶送佢地最後一程。依家諗地都仲有啲驚。

因為奧蘭多市係一個遊客城市，交通非常方便。除咗可以坐巴士四圍去，旅館亦有旅遊巴士安排，可以載我地去主要嘅目的地。我地第一個去嘅地方，就係甘迺迪太空中心。

太空中心面有好多關於人類探索宇宙嘅展覽。而我地好幸運，遇正太空穿梭機回歸。當時大家都唔係好知幾時會著陸，全部人望向同一個方向呆等。而我地就靠有「神眼蘇」之稱嘅阿蘇為我地作明燈指引。過咗好耐都冇乜動靜。點知突然間有個老外大叫：「There it goes…（它飛到那裡去）」。四周嘅人都話：「係咩… 係咩…係喎…」。而我地就乜都睇唔到。見其他人好似睇到啲野，然後散晒，我地就知「香港神眼」已經輸咗俾「美國神眼」。所以自此之後，我地就冇叫過阿蘇做：「神眼蘇」。

除咗冇咗「神眼蘇」稱號之外，我地當中仲有人差啲盲咗！當日天氣非常之好，太陽好曬。四個人當中，大鼻漏咗副太陽眼鏡喺旅館。四周圍都係白色嘅太空中心，陽光反射入眼都真係幾刺眼辛苦。過咗一日，大鼻差啲盲咗。最後眼都睜唔大。

去完太空中心之後，因為時間尚早，我地去咗旅館附近嘅酒吧區：Church Street Station。呢到本身喺一個火車站，四圍開咗好多酒吧。夜晚有街頭表演，非常熱鬧。有穿蘇格蘭裙吹風笛，兩邊酒吧傳來各種音樂。大家喝著酒，啖笑風生。而我地唔好飲酒，所以就去咗火車站入面嘅商店買野。

下一回，我地玩盡奧蘭多市嘅主題公園！



~ Lindberg

飲茶茶

上星期跟爺爺嫲嫲一起到西苑飲茶。

「爸爸，咁大羹飯叫人點放入口呀？」

「而且冇滴水入口，好難吞呀，爸爸。」

「乜呢個小朋友咁識食㗎。好啦，飲啖嫲嫲煲嘅豬肉湯先喇。」

「好味！多謝嫲嫲！我同您握手呀…」

「我係唔係好得人錫呢？」

~ Lindberg

噢！聖誕樹

Jayson 媽每年都好想喺屋企放聖誕樹，仲要真嗰隻。但奈何屋企冇地方，所以我一直用呢個嚟做借口，側側膊，當冇咗回事。嘻嘻… 但雖然冇聖誕樹，我地都會有啲裝飾。

今年聖誕節又就快到。不過今年有啲唔同，Jayson 媽退而求其次，話買假嘅都得。再加上外來嘅壓力，唔買都唔得啦！不過喺屋企有啲靚靚野，大家都會開心啲嘅。所以上星期六，我托咗它歸家…

噢！聖誕節托它歸家，我呀媽話幾貴o架　　
噢！聖誕節托它歸家，放o係廳度閃閃o下！
聖誕樹o的膠氣幾臭o架！　　　　　　　　
我呀爸貪佢夠呀咋！　　　　　　　　
噢！聖誕節托它歸家，放o係廳度幾靚o架！

之前喺灣仔睇過啲聖誕樹，平到唔信。$44 有交易！不過唔係好靚。知道 Jayson 媽之前咁想要真嘅，買都應該買棵好啲先得。所以上星期六，我一個人靜雞雞走咗去四圍搵。吉之島得 $44 貨色，不過賣貴一倍。Toys 'R' Us 有，不過都係唔靚，而且貴。最後去咗 Apita，四尺高，$179。我就托咗呢一棵歸家。放好佢喺窗邊。

Jayson 媽返屋企嘅時候，竟然睇唔到棵樹！不過都難怪，因為乜都冇。

之後同佢去灣仔買咗啲裝飾物，佈置下棵聖誕樹。

亮燈！

我地都放咗好多野上去㗎。

屋企啲聖誕氣氛，突然濃厚晒。希望大家都會有個聖誕快樂啦！



~ Lindberg