五十四日環遊美加 之 夢幻的奧蘭多市（二）

來到佛羅里達州，主力當然係去主題公園。旅館有穿梭巴士帶我地去主要場館。但即使唔坐專車，自己坐巴士去都好方便。

之前喺洛杉磯，我地去過了迪士尼樂園（Disneyland）和環球影城（Universal Studio），所以我們不再重複。首先後去咗海洋世界（Sea World）。可以睇到咁多海洋生物，真係好令人感動。

我個人好奇怪。一去到動物園之類嘅地方，見到啲動物就會感動到眼濕濕。雖然困住佢地有啲可憐，但作為教育嘅一部份，我覺得比喺書本上，或電視上睇到有效得多。但當然，動物園要好好對待同照顧啲動物先得。養死晒啲國寶就真係大鑊啦…

然之後，我地就去迪士尼世界度假區（Disney World Resort）。當時入面只有五個主要場地。我地選擇去咗三個。由於神奇王國（Magic Kingdom）同洛杉磯嘅迪士尼樂園（Disneyland）差不多，所以我地冇去。

第一個參觀嘅地方，係艾波卡特（Epcot）。艾波卡特其實好似我地嘅科學館，不過大型好多。但好可惜，冇乜特別野玩。感覺上好似睇緊啲三、四年前嘅科技。毫無新意。我記得喺其中一個遊戲入面，我地坐喺間戲院入面，睇有關恐龍呀、石油呀、之類嘅影片。睇睇下，個銀幕升起咗，然後成間戲院嘅座位都郁起嚟，進入一條時光隧道，就好似一個巨型「小小世界」一樣。起初嘅感覺，非常震撼！不過睇睇下，發覺啲野好悶。即使係郁住，最後我地四個都瞓著咗…

艾波卡特嘅另一邊係「世界之窗」。都幾得意嘅，不過深圳都有囉…

懷住失望嘅心情，我地去咗迪士尼米高梅影城（Disney's MGM Studios）。基本上同環球影城一樣，不過係用迪士尼嘅戲為中心。好多野睇，好多野影。令我地對迪士尼重拾信心。

入面有一部「跳樓機」，我覺得好好玩。同普通嘅「跳樓機」唔同，佢好有故事性，仲同我成日發嘅夢差不多。夢中我坐住一部電梯，電梯可以睇到出面嘅環境。除咗會向上向下之外，部電梯仲會四圍穿梭。樓層之間嘅影像好嚇人，燈光又好奇怪，而我當然走唔出部電梯。通常都會被嚇醒。但呢個遊戲有啲唔同，我地去到大廈嘅頂樓，然後就由十幾層樓之上，跌咗落去…

非常刺激！抵我地排隊排咗成個鐘！

最後，迪士尼世界度假區有兩個水上樂園，我地選擇咗去颱風礁（Disney's Typhoon Lagoon）。因為我地冇防水相機，所以冇影相。非常好玩！有兩樣野有好深刻嘅印象。第一個係可以同鯊魚游水。一個大鹹水池，我地喺上面浮潛，睇住好多鯊魚喺下面游來游去。啲鯊魚唔會遊上嚟，可能係因為有溫差或者有塊玻璃隔住。而我唔係好識浮潛，所以飲咗好多鹹水。但真係好過癮！我地玩完一次又一次，到最後，我飲到一肚水…

另一個就係佢圍住個水上樂園嘅水道。我地坐住個大水泡，浮下浮下，觀看四周圍嘅森林佈局。都唔知喺上面游咗幾多個圈。感覺超級悠閑，乜野煩惱都冇晒。

雖然奧蘭多市有咁多野玩，我反而覺得係整個旅程，呢個係最悶嘅一站。只可以當作一個休息嘅地方。下一站：首都 Go 華盛頓特區（Washington D.C.）。



~ Lindberg