病 x 忙

記得最初寫網誌嘅時候，十世都出唔到一篇。但自從 Jayson 出世之後，每日都有新鮮事，多多時間都寫唔晒，一日出一篇都唔只。但近年 Jayson 大個咗，需要多啲時間陪佢玩，如果經常對住部電腦，我驚我會小命不保。但一個星期三篇，都應該做得到。

前排出得慢咗，就收到投訴電話：「喂，你病咗呀？！點解冇出 Blog 嘅？！」多謝熙爸嘅關心，雖然我真係病咗，最重要都係好鬼忙啫。

其實以上呢段野，已經係三個月前寫好咗嘅開頭，但一直無機會寫埋落去。自從新年以來，我都不停咁病。最初都係普通嘅傷風感冒。但大約喺六月嘅期間，突然有氣管敏感，之後仲變咗鼻敏感。由咳到甩肺，變到講唔到野（因為鼻塞）。搞咗足足三個月，先搵到個醫生醫得好。但以前明明無鼻敏感㗎…，做乜會無端端有嘅呢？莫非真係抵擋力差咗？！唉…

而工作方面，因為租約紛紛到期，我真係一個頭變成兩個大。做我飲食呢行，可以深深感受到社會變化帶來嘅沖擊。物價高漲，最低工資，人手短缺，問責氣氛等等，都叫人好頭痛。但最無奈嘅都係對住班業主。過去幾個月，分別處理咗五份租約。除咗一、兩個業主比較理性之外，其他都真係…無話可說。一個可以用白痴不切實際去形容（係佢自己啲員工所講），一個係社會嘅寄生蟲（係啲地產自己講），仲有個攞命嘅二世祖。我並唔仇富，但對住一班咁嘅業主，再望下現今嘅社會，眼角不禁都有啲淚光。唉…

其實除咗自己，身邊啲兄弟都遇到工作嘅問題。我曾經想用 My Little Airport 嘅《西西弗斯之歌 》去互相勉勵一下。但好可惜，我哋幾個都唔係西西弗斯。大家眼前嘅工作，即使我哋係心理變態，橫睇掂睇都好難用享受去形容。

（但呢隻歌有一個好唔要得嘅觀念。如果懲罰可以被享受，地獄就再冇意義㗎啦。）

唯一可以慶幸嘅，就係啲病好得八八九九。我仲發掘咗一樣新嗜好：烏克麗麗（Ukulele 夏威夷小吉他）。呢件樂曲好易上手，彈出嘅音調仲令人有開心愉快嘅感覺。每晚彈十幾分鐘，人都輕鬆好多。但最重要係有家人嘅支持啦。即使分唔到憂，有佢哋喺身邊，人生都開心有意義啲。哈哈…

~ Lindberg

我們魚缸的終極組合（一）

有一日，我發現魚缸出現咗啲啡色物體，黐咗嚟玻璃裡面。

一個普通人嘅想法，當然係抹咗佢就算。但身為一個走在科技最尖端嘅人，又豈會隨便抹咗佢就算？！當時，我覺得啲啡色物體好明顯係啲唔知咩藻類物。有箘就一定要殺！所以我就買咗… 紫外光殺箘霸王，型號 AAUV3W 嘅紫外光燈。

原理好簡單，就咁放入個魚缸裡面，佢會自動泵啲水經過內置嘅紫外光燈，以達殺箘效果。即使過濾 80 公升嘅水都無問題！

因為我個魚缸比較細，幾經辛苦先放到入去。咁細細個嘅魚缸，裝有各種應無都有嘅設備，真係可以稱之為最強嘅魚缸組合。

但係魚缸嘅環境一直都無改善到。仲有極速惡化嘅跡象，玻璃鋪滿咗啲咖啡色野。我懷疑因為我放得太近窗口，所以先有咁嘅問題。終於，我忍唔住手要換水。一換水就發現出事：點解啲水咁熱㗎？！

原來我計算錯誤，紫外光燈都會發熱。雖然人哋冇話最少要幾多水，但 80 升同我嘅 8 升相比，我個缸就真係細咗啲。即使我每日只開八個鐘頭，因為唔夠多水，所以散唔切熱。如果繼續唔理佢，相信啲咖啡色變成紅潮！而野水草之所以慢慢腐爛，其實就係因為太熱，被煮熟咗！而啲魚竟然無事！老闆娘果然無介紹錯，呢種魚真係養喺火山口都冇問題。

我曾經諗過幫個魚缸加個恆溫裝置。但我估命運會同紫外光殺箘霸王一樣。啲魚會喺一個一尺唔夠嘅魚缸裡面，親身體會到冰火二重奏嘅滋味。後果不堪設想…。

因此，我迫於無奈要熄咗支燈。但之後青苔就開始出現…

（待續…）



~ Lindberg

沾沾自喜

話說有一天，Jayson 放學（暑期班）回家，突然用普通話唸起《弟子規》來。我立即拿出收藏已久的《弟子規》，跟 Jayson 唸了一片。雖然《弟子規》部份內容有點過時（或過份），但一些基本價值觀，我還是很喜歡：

弟子規聖人訓 首孝弟次謹信
汎愛眾而親仁 有餘力則學文

Jayson 雖然不算唸得很好，但已令他媽咪沾沾自喜。

過了幾日，小巴前面的坐位，坐了兩個 N1 的學生。女的用普通話朗讀出《三字經》，旁邊互不相識的男孩，也不甘示弱，望著周圍的廣告牌讀起來：「Bank of China」！我跟 Jayson 媽互望一眼，笑笑口說了一聲：「輸哂！」

但最強的並非這兩位小朋友，而是那女孩的菲傭姐姐。她竟然可以跟著小女孩一起念《三字經》！果然厲害呀…（我是指父母的洗腦功力）

又有一日在小巴中，前面坐著同班的同學。正當 Jayson 傻傻的指著一架警察車，不停大叫：「Police！Police！」，他的同學很淡定地問媽媽說：「媽咪，隔離呢架係唔係 Honda 嘅新車嚟㗎？」幸好 Jayson 之後補了一句：「P 字頭，E 字尾…」

Jayson 媽曾經有懷疑過，是否應該讓 Jayson 遲一年才入學。當別人已經認得字的時候，他還是喜歡他的「A、B、C」。當然每個人都有自己的進度，但我覺得跟別人比較是有絕對的需要。這並不是要求自己的小朋友可以達到某個目標，而是從而了解他的需要和學習情緒，而作出各種調節。只要玩過「角色扮演（RPG）」的，都應該明白這個的重要性。哈哈哈…

但我並不覺得 Jayson 比別人慢，只是性格不同，喜好不同。Jayson 的表達能力的確比別人起步得遲，作為一個「四仔」，這並非一件太想見到的東西。而作為家中的另一個「四仔」，我會很努力去鼓勵他跟我分享。尤其是當他發脾氣的時候，更是一個學習的好時機。而且當發現他懂得一些我們沒教過的東西，或努力的計算加減數的時候，即使往往都忘記了數學的基本，但都可以令我們沾沾自喜一番。



~ Lindberg

意大利芝士餅 Tiramisu

上次整完拿破崙蛋糕，今次整意大利芝士餅。原因係… 要用埋上次用剩咗嘅材料。

意大利芝士餅中間嗰層芝士，我用咗同上次一樣嘅忌廉加芝士，亦大概即係自己公司嘅做法。淡淡嘅芝士香，加上打起咗輕飄飄嘅忌廉，極對無添加，真係有令人升上天嘅感覺。方法係打起 250ml 嘅忌廉，用糖調至啱自己嘅口味，加 1/4 茶匙嘅雲尼拿油，然後就推半盒義大利軟芝士（mascarpone）落去。慢慢推勻。呢個份量，剛剛好夠我呢個錫紙兜。

我覺得除咗中間嗰層芝士，咖啡亦係一個好重要嘅原素。理論上，四份咖啡加一份蘭姆酒。不過因為要俾 Jayson 食，所以我用咗脫除咖啡因嘅咖啡，及極小量蘭姆酒。每層手指餅要用上半杯咖啡。如果落得唔夠，啲手指餅就會好乾。

一層餅，落咖啡，一層芝士，再一層餅，落咖啡，一層芝士。之後就可以放入雪櫃，雪番硬些少，就幾時都食得。

起初我用錫紙兜，都有啲驚攞唔到出嚟。但以我嘅技巧，有咩難到我呢？取出成功！呵呵呵…

臨食之前，面頭就糝啲谷古粉。少少嘅苦澀味，更加可以帶出蛋糕嘅甜味。但好可惜，屋企冇谷古粉。而最近似嘅就係…三合一美綠！

「得唔得㗎爸爸？」

製成品：

雖然美綠嘅顏色淡咗啲亦帶有多餘嘅甜味，不過都可以接受啦！哈哈… 而蛋糕本身並唔難做，加上落足本錢，當然好好味啦。呵呵呵呵呵…



~ Lindberg

我驚浸親…

其實今年第一次下水時，曾經有過這一段對話…

「Jayson，不如一陣我哋去泳池游水呀？」我說。

「唔好。」Jayson 答。

「點解唔好呀？」

「我驚。」

「您驚咩呀？」我心知不妙地問…

「我驚浸親。」大鑊！原來他還記得舊年浸親的事。這莫非就是所謂的童年陰影？！

幸好，之後每逢周末有機會，我們都到屋企樓下的泳池玩。除了有丙丙姨姨送的浮衣，還有各種不同的浮具及鱷魚水槍。 經過一番鼓勵之後，不怕水之餘還對游水有些興趣。明年找個地方讓他正式學游水吧。

~ Lindberg

K2 開學了！

轉眼間，Jayson 已經開學了！連遊戲組一起計算，他已經上了兩年半學！這麼細少的一個「人仔」，真的有點匪夷所思。

K2 開學的第一天，Jayson 媽跟 Jayson 一起到課室聽班主任和中英文老師對這學年的簡介。我之後聽完 Jayson 媽的轉述，也感到有一點壓力。除了每天有兩份功課之外，老師們對小朋友的要求都甚高。有家長問英文老師，在完成這學年的時候，小朋友的英文水準應該去到那裡，老師回答說，應該可以用英文寫完整句子。Jayson 媽望著 Jayson，只好額角滴汗。

每次升班，兩班的同級同學們都會來一個大兜亂。今年的班主任是前年隔離班的班主任，英文老師是上年隔離班的英文老師。換句話來說，他們除了不懂得 Jayson，還對其他同學很熟悉。幸好，經過二個星期的觀察，他們都喜歡 Jayson。希望呆笨的他，不會被人忽視吧。另一方面，今年的英文老師好像不錯。之前跟了她一年的隔離班同學們，英文水平很明顯比 Jayson 這一班好。Jayson 加油呀！

然而在學校發生過甚麼，學過甚麼，Jayson 到現在也不太過會和我們分享。我們只好在他日常活動中，窺探一丁點。

~ Lindberg

拿破崙蛋糕

前一排因為睇咗小廚神，所以買咗啲酥皮返屋企，準備整乜乜 Wellington。但因為一直都冇時間去準備個「乜乜」，所以酥皮就一直放喺雪櫃嘅冰格。有一日，我決定買材料嚟整，並且買多額外嘅材料，準備做一個甜品。但到咗最後，因為突然患咗鼻竇炎，主菜完全冇心機整。不過就整咗個「拿破崙蛋糕」出嚟。

公司用開嘅「工業用」酥皮，都係一塊塊壓好。今次第一次自己整就要自己睩，好驚焗唔起。我將每片壓到 5mm 左右，然後搽牛油，糝糖霜。然後四合一，再壓番扁。一大塊開四，（希望）焗至金黃色。灶君庇佑，竟然俾我焗得起。不過就硬咗少少。下次可以再深入研究一下，睇下點先可以焗得酥啲。

拿破崙蛋糕中間嘅夾心，有人會放奶黃。我嘅食譜就放忌廉加芝士。打起 250ml 嘅忌廉，用糖調至啱自己嘅口味，加 1/4 茶匙嘅雲尼拿油，然後就推半盒義大利軟芝士（mascarpone）落去。慢慢推勻。呢個份量，應該夠做兩大個餅。

因為買唔到士多啤梨，我用嫲嫲買嚟嘅車厘子代替。原則上唔係咁理想，因為車厘子嘅味道比較溫和及甜，好難特出啲味道。原本有諗過煮煮佢，但覺得可能仲怪獸，所以就咁開半去核就放上去。

放多一層。

完成蓋頂儀式，再由 Jayson 幫手糝上糖霜。

最後當然要搵人試味啦。酥皮硬咗少少唔夠酥係有少少失敗，但都叫做脆，食得入口。忌廉夾心好好味。鬼咩！半盒芝士 $30，半盒忌廉又 $20，仲貴過出面食！不過淡淡嘅芝士味，香滑嘅口感，自己都要讚下自己。而嫲嫲買嘅車厘子實在太靚太甜，雖然唔算太夾，但都好味！

第一次整拿破崙蛋糕，總算成功啦！呵呵呵呵…



~ Lindberg

中秋節節目

自從搬到新屋苑之後，我們都很期望中秋節的來臨。屋苑會舉辦一些攤位遊戲，免費讓小朋友玩。這晚還有 Jayson 最喜歡的爆谷，所以他也很期待這個節目。

攤位遊戲由管理員主持。因為大都認得 Jayson，所以都有「特別待遇」。不過，雖然主持這個拋水泡的叔叔特別喜歡 Jayson，但他真的靠自己把水泡拋向柱裡去（即使是行得前了一點…）。叻仔！

這支槍，舊年也玩過一次。之後我們還買了一支給契爺做生日禮物，讓他（偷偷地）把契媽的玩具當為目標去射。

射箭這個遊戲是新的。手感好像很不錯。可以考慮明年買給契爺，好讓他在家中扮「蘭保」。但主持這個遊戲的叔叔比較…呆，所以我們排了很耐才可以射到兩下。

除了這些遊戲之外，還有猜燈謎（以我的中文水平，完全猜不到…）、新鮮爆谷、和派水果。可惜我們今年排得慢，所有水果一早已經派完了。

今年嫲嫲還特別提醒我們，要帶 Jayson 到維園的花燈會參觀一下。這次的花燈很有特色，除了有一條巨型金魚之外，還有依荔園造型而建的大型花燈。對於我們這個年紀的人，也算是一段很美好的回憶。但對於 Jayson 來說，他還是比較喜歡手中的特大螢光棒。有點像 Jedi Knight 呢。哈哈哈…

~ Lindberg

A for Aeroplane

中秋節的假期，因為 Jayson 和媽咪都有幾聲咳，我們便留在家中休息。午飯過後，Jayson 閑來沒有事做，於是又拿起他最愛的 ABC 來玩…

他在我的書房門外一直排。起初我見他走來走去，也不知道他是在做甚麼。後來才發現他是有找代表每一個英文字母的物品。

這個遊戲很不錯，但如果之後他肯自動自覺去收拾玩具，那會更加好。哈哈…



~ Lindberg

一支雪條棍

早前見到 Anson 自製「哈密瓜雪條」有啲心郁郁想整。但印象中，細個整嗰啲雪條總係冇買嘅咁好味。冰還冰，汁還汁，冇嗰啲落咗化學劑嘅咁好味。所以一直都冇實行。前幾日，Jayson 學咗 Popsicle 呢個字，於是我就買咗個整雪條嘅盒，重拾一下童年回憶。

因為 Jayson 同我自問都冇 Anson 兩父子咁好身材，所以唔敢露點去做雪條。加上我又冇咁好心機去用鮮果做雪條，只好用屋企啲現成嘢造：1）Jayson 最喜歡的利賓納；2）青森特強輻射蘋果汁。

每條 50 毫升，製作非常認真！

Jayson 負責試味及插入雪條棍。

跟住就可以放入雪櫃！其實應該先放入冷藏格，等液體有番咁上下凍之後，先放入冰格。咁樣就會雪得平均啲。不過當時兩個大細路，邊有諗得咁多呀。

過咗大半日之後…

~ Lindberg


P.S. 「一支雪條棍」：如果以前有玩過一個 PC 遊戲：《Sim Tower》嘅朋友，對呢句嘢一定唔會陌生。玩玩下，就會有把女人聲喺背景到講：「一支雪條棍…一支雪條棍…」佢到底講乜，我到依家都唔知道。就有如「壓力箍」（街頭霸王）一樣，究竟用嚟「箍」咩呢？！永遠都係一個謎… 但相信只要有玩過呢個遊戲，就一定唔會忘記嗰把女人聲。哈哈…

漏氣的日子

由他的「漏氣」，引至我們的「勞氣」，到現在慢慢引領他走出自我的中心，對付 Jayson，我跟 Jayson 媽的方法和態度都很不同。我對 Jayson 扭計的容忍程度是「零」。見到他一扭計，我便忍不住（不出三秒之內）鬧到他狗血淋頭，以致他爆喊收場。而 Jayson 媽會很耐心地慢慢氹他，以達到她的目的。

但她卻受不了他的「漏氣」。如果 Jayson 當媽媽的說話是耳邊風，只顧自己做自己的，我便會見到「未日浩劫」的上演。那個時候，我便會勇敢地站出來（如果在沒有性命危險之下）。「漏氣」這個問題燃點不著我的「導火線」，因為從 Jayson 身上，我看到了自己。我並非是一個很漏氣的人，問題是很自我中心。很多小朋友到這個年齡都會有這個毛病，老是覺得世界是圍著自己而轉。因此，經常會有他的堅持。

初時，我會去理解他的堅持，讓他完成了手頭上的「工作」，然後才跟我們走。慢慢就要他理解我們想他放下手頭上的東西，去做我們想他做的「重要性」。從經濟學上來說，就是要他明白「機會成本」（Opportunity Cost）。這一點令我想起最近讀過的《The Economist’s Guide to Parenting》。其中一位經濟學家有這個見解：

Melissa Kearney (Associate Professor of Economics): I’m a mom of three. The way I explain things to my kids, I hear an economist talking to them. I mean, I explain everything to my kids in terms of opportunity cost, and I say–My daughter when she was two in the grocery store, and I’m like listen you’re making choices and if you pick that you don’t get that. Right, there’s a cost to your choices. And I’ll hear my son tell my daughter, right, they’re toddlers speaking, they’ll be like, look you made a bad choice. You know, so I realize that I talk to them like economists.

但我們離這個目標還有很遠，並且有越來越遠的跡象。昨日吃晚飯的時候，彷佛有背景音樂，響起了羅文淒美的歌聲：「知否世事常變 變幻原是永恒…」。真的差點變成了家變。唉… 看來，我要把「機會成本」這四個字，狠狠的洗入 Jayson 的腦海中。



~ Lindberg

P.S. 最近，當 Jayson 穿起一身綠衣的時候，會說自己是「綠燈俠」。他當然不知道誰是「綠燈俠」，只是從媽咪隨口一句聽回來。而最搞笑的是其超能力，竟然跟朋友 Kenさん 所說的一樣！

「我係綠燈俠！」

「Jayson，咁您啲超能力係乜呀？」

「將紅燈變成綠燈囉…」


他相信會是職業司機的救星！嘩哈哈哈哈哈…

威威生日快樂

今日係阿威嘅生日。今晚除咗有蝦食，媽咪仲買咗個迷你蛋糕添！

Jayson 好主動咁唱咗首生日歌，仲附送普通話版！

Julie 都嚟講一聲生日快樂：「喵…」

美心嘅 Opera 蛋糕好唔好味呢？

Jayson 一嚟就食咗塊朱古力牌。相信只要有朱古力，佢都會覺得好好味。我就覺得普通啦，仲以為會濃啲朱古力味…

我成日都覺得，如果威威有機會嚟到新屋，佢應該都會幾開心…。可以陪住 Julie 曬太陽，有地方可以追逐，就連夜晚要去廁所都方便啲…。好掛住好掛住阿威，所以更加要珍惜眼前貓。祝阿威生日快樂，更希望佢保佑阿妹，身體健康，長命百歲！



~ Lindberg

二刀流

於我最喜歡的動畫《One Piece》之中，我最喜歡的角色便是「三刀流」索隆。雖然他經常周身傷痕，但是一個人可以用三把刀，實在太過型啦！

因此，我決定以 索隆 為目標去訓練 Jayson，成為一個男人中的男人。正如 索隆 的格言：「我不管這個世上的人怎麼說我… 我只想依照我的信念做事，絕不後悔，不管現在將來都一樣！」非常熱血呀！！！

那麼，一切便由「二刀流」開始！

注意：以上純粹虛構。我們並沒有鼓勵或阻止他用那一隻手。而其實在《One Piece》之中，每個主角我都喜歡。最鐘意的，當然是… Monkey D. Luffy 啦！



~ Lindberg