我們魚缸的終極組合（二）

青苔生長嘅速度好快。厲害到好似一堆草咁，隨水流飄楊。其實一早已經用過「化學武器」，但啲去苔劑冇乜用，而且又驚傷害到我本身嘅水草。既然「化學武器」無效，「物理武器」嘅紫外光又唔用得，我只好選擇用「生物武器」！

上網查到有啲食青苔嘅魚及螺，於是就落街去睇下。我同老板話好嚴重，佢就建議我買呢隻（我已經唔記得叫乜名…），勝在夠硬淨。我好喜歡聽到「硬淨」呢兩個字！

我仲買咗一大堆水草。因為買二送一嘅關系，令我又忘記咗我個魚缸其實好細…。搞到啲魚越來越冇乜位游。

但效果好似唔太顯著。於是，我就加碼！我買多咗一隻食苔螺，同埋兩隻紅色嘅蝦仔。

但買完先發現… 點睇都唔似係螺。我覺得被搵笨，其實嗰隻係蝸牛。不過見佢勤力工作，所以我都唔太介意。

紅色蝦仔更加勤力，一對手冇停過，不停咁採摘啲青苔，而且仲喺咁食啲魚食剩嘅食物。有非常環保嘅感覺！

完成品。

但點都估唔到，原來蝸牛係單性繁殖。唔洗好耐，我就見到一兩隻小蝸牛嘅出現。起初見到啲小蝸牛喺到打交（或者可能係交配…），都覺得幾得意。不過，惡夢好快就降臨…。

由最初嘅三幾隻小蝸牛，好快就變成二三十隻。最高紀錄，Jayson 數到四十幾隻小蝸牛！我洗一次魚缸，隨時可以沖走十隻八隻！超恐怖！好彩魚缸係封閉式，佢哋走唔到出嚟。否則就真係嚇死人喇！

由於小蝸牛太多嘅關系，我需要將佢哋「放生」，以保持魚缸嘅整體健康。青苔生長嘅速度受到控制，每隔一個星期先要換下過濾綿、抹下玻璃，保養都非常簡單，Jayson 亦都有幫手餵魚。原來養魚都幾好玩喎！嚟緊天氣會暖啲，唔知魚缸又會變成點呢？



~ Lindberg