一支竹仔易折彎

從前，有幾兄弟姐姊妹，經常因小事而吵架。初則口角，繼而動武。

他們的太公有見及此，便要他們坐下來，跟他們說一個道理。

太公謂曰: 「汝等各奉吾一支樹枝，放之地下。」

幾兄弟姐姊妹便四出找尋樹枝，拿到太公的身旁。

「咦！小朋友，搵支幼啲嘅好喎。（唔係我一陣拗唔斷點算？！）」

大家找來樹枝之後，便圍著聽太公的訓示。

太公曰:「汝曹知否？單者易折，眾則難摧，戮力一心，然後社稷可固。」

戰隊隊員們，大家都要緊記太公的教悔。正所謂：臀結實是力量。地球的和平，就靠各位啦！

一支竹仔《家和萬事興》的主題曲
曲、詞：周聰

唏..一支竹會易折彎
幾支竹一扎斷折難
孤單實太慘
團結方可免禍患 唏

我你間無恨與憎
與眾相安露笑顏
蒼蒼萬眾生
和氣不可有傲慢 唏

大眾合作不分散
千斤一擔亦當閒
齊集群力無憂患
一切都好易辦 唏

一支竹會易折彎
幾支竹一扎斷折難
孤單實太慘
團結一心無禍患 唏

花須好要葉滿枝
月雖皎潔有未滿時
孤掌莫恃倚
團結方可幹大事 唏

我你間要共靠倚
更要將宿怨盡掃除
安康過日子
和氣不可有妒忌 唏

大眾合作好相處
千斤一擔亦不辭
齊集群力無猜忌
一切都好順利 唏

花須好要葉滿枝
月雖皎潔有未滿時
孤掌莫恃倚

~ Lindberg

Club Med 布吉 之 Crazy Signs 篇

Club Med 其中一樣「名物」，就係 Crazy Signs。第一晚睇完表演之後，主持人走出嚟講咗一大堆唔知係法文定英文，之後強勁嘅的士高音樂就響起。我哋起初都唔知發生乜嘢事，但見所有人都聞歌起舞。而最神奇嘅就係，大家都跟到台上面嘅表演者一齊跳，仲要跳得好鬼齊！

原來全世界嘅 Club Med 都有一堆指定嘅跳舞歌，喺啲主要節目之後，主持人就會出嚟帶住大家跳。全世界嘅舞步大致都係一樣，好簡單，跳得一兩次，正常人都跟得到。
Crazy Signs 就好似一啲儀式，將大家嘅情緒推至最高。

雖然話舞步簡單，但我都極之有理由相信，其他住客係常客。有乜理由跟得咁足？！有啲仲熟到識得點歌！

而令我更加驚訝嘅，就係，Jayson 跳得非常投入。雖然下半身唔係好郁（因為懶），但上身都跟住節拍咁跳。一晚跳得興奮過上一晚。當音樂一起，就一支箭咁走出去跟其他一齊人跳。

「細路，洗唔洗走到咁遠呀？！」

高昴嘅派對情緒，令我深深感受到 Club Med 吸引人之處。而望住 Jayson 跳舞嘅背景，我感覺到一隻派對怪獸正在慢慢孕育嘅出嚟…。

而對於害羞嘅我嚟講，當然只好企埋一邊，扮影 Jayson 啦。呵呵呵…

（待續…）


~ Lindberg

我們的 Ukulele

由於一首歌，同埋老闆嘅引誘，我終於忍唔住手買咗支夏威夷小結他（Ukulele）。

當攞住支新吉他去接 Jayson 嘅時候，坐緊電梯有位太太問我：

「嘩！咁細個（小朋友）就學野啦？3/4 嘅小提琴呀？ 」

我好唔好意思咁答：「係呀… 不過係小結他。嘻嘻…」

好無奈地，都係入阿仔數。無咁尷尬呀嘛。嘻嘻…

我買嘅係高音 Soprano。Soprano 個子比較細，比較難按弦。起初店主及我老闆都叫我買支 Tenor 先，因為會易啲玩。但鐘意得 Ukulele，就係鐘意佢輕快嘅感覺。試過幾支之後，都係覺得 Soprano 啱聽啲。而且我隻手夠細，所以都唔係太過困難。再加上我買呢支係長頸版，所以好啱我玩。呵呵呵呵… 不過，唔好問幾多錢…

以前玩過幾下吉他，但好快就放棄咗。我怪我隻手比較嬌小，連啲基本和弦都㩒唔到。但彈過 Ukulele 之後，感覺非常興奮，非常有成功感！佢啲和弦除咗簡單好多之外，因為指板比正常吉他幼細，即使複雜嗰啲和弦都唔太難按。至少我唔會再賴對手細。

之後買咗幾本書嚟自學。起初手指唔多靈活，但慢慢都開始上手。本身冇節奏感當然係一個嚴重嘅問題。但用嚟自娛，已經好開心滿足。

而最開心就係喺 YouTube 竟然有我鐘意嗰隻歌嘅「Karaoke」！可以跟住嚟練習，真係無得頂呀！

Jayson 都好鐘意呢隻歌，因為佢覺得末段好好笑。佢都聽到就快可以跟住唱。不過佢遺傳咗父母手細嘅問題，所以未彈得到。我試過教佢按弦，或幫佢按弦叫佢自己掃，但佢都話手指痛唔肯玩。冇辦法啦，唯有繼續自己玩住先啦。哈哈哈…



~ Lindberg

波…並唔係咁踢

今年契爺送給 Jayson 的生日禮物，是一個很好的足球。他希望 Jayson 可以做多一些運動，而我亦可以跟他一起跑來鍛煉一下。可是，往往事與願違…

Jayson 好像對球於斜路滾動的物理原理更有興趣。怎樣也不肯把球放在地上踢。很明顯，我們這種文人對運動還是不太感興趣吧。哈哈哈…



~ Lindberg

Yr3Q4 報告

終於來到三歲的最後一季。上季末以為最黑暗的日子已成過去，誰知那只是暴風雨的前夕。這幾個月處於嚴峻的「自主年齡的反抗期」，隔幾天就要嘔一次血。即使掌握到跟他溝通的方法，亦無從入手。我以為自己的藉口已經算是層出不窮，但他的比我還要厲害十倍！果然青出於藍勝於藍！

體重：34 磅
身高：100 厘米

重了一點，高了一點點。

發展報告：

飲食方面：

• 小烏龜，食得慢，一粒米要吃三餐。為了鼓勵他，我們出動了紫菜（包飯），及納豆。結果是食飯不食餸，或食餸不食飯。
• 以前喜歡的食物，例如青豆，現在反而會抗拒。

上學方面：

• 老師說他除了害羞一點，大致上都不錯。英文老師好似很喜歡他。  
• 不是交了得多新朋友。大部份時間都是跟熟的朋友仔玩。 
• 他偷偷跟我說，有一位女同學每天放學時，都會吻別他。
• 每天有一至兩份功課。做功課還算用心，但右手控筆方面仍要多加努力。 

體能方面：

• 大肌肉力量稍有提升，但運動量不足。
• 背部肌肉訓量不足，經常坐不夠直。
• 坐長途車會嘔（之後發現跟視力有關）。 

學習方面：

• 現在，他會自然地用上左手寫字。如果鼓勵他用右手，他也會嘗試。
• 遊戲的規則都能掌握得到。
• 很努力地去表達自己。「因為呢… 所以呢…」
• 開始找資料，準備學游水及彈琴。

問題兒童方面：

• 脾氣大。如果我們向他生氣，他會掉過頭來向我們「反生氣」 。這招乾坤大挪移盡得我的真傳！ 
• 藉口異常之多，而且「耳邊風」情況嚴重。當遇到「十問九唔應」的情況，問他為何聽不到我，「我對耳聽唔到野」也說得出！但當他哭著說的時候，我們還差點被騙！ 
• 很需要人的注意。
• 但開始輸得起。
• 仍很怕別人貼的貼紙。
• 之前每晚都要人撥扇才能夠入睡。我已經駡說是慈母多敗兒！有一晚，我突然記起當他還是嬰兒的時候，在遊戲組跟他按摩，所以便輕按他的背脊和腳。誰知，每當我陪他睡，他就說：

「爸爸，我好攰呀。我要 massage。」

天啊！現在變了又要撥扇又要按摩！比做奴隸還要可憐啊！（但跟他以按摩來增進感情，都算不錯呢。）

藝術方面：

• 雖然不太清楚他在葉氏那裡學了甚麼，他又不肯跟我們講，但基本的總學到一點吧。而我們本身又懶，每天的功課已經夠我們忙了，所以很少跟他溫習。不過，每逢考試前夕，總要下一點功夫吧。

•  上了三、四個月的繪畫班。畫功沒有甚麼改善。但這間畫室並非注重畫功，而是對藝術的欣賞和自我創作。

「Jayson，鋒哥哥今日同您畫咗啲乜嘢？」

「我都唔知喎…」

自理方面：

• 很多東西都會做，問題是願不願意做。
• 非常懶床。每朝都不願起床。
• 但很神奇地，每逢假期，他都會一早起床。比平時還要早！天啊！我們還想睡多一會兒呀！
• 仍未有戒夜片計劃。

本季精選：

名正言順的「攞你名3000」。因為想跟他面對面談話，有時我會把他抱起，然後說：「Jayson，爸爸有啲嘢同您講。」兩父子慢慢地談心。

但自此之後，他久不久便會走到我的面前，抬起頭對我說：「爸爸，我有啲嘢同您講。」然後雙手高舉。

雖然明知很大機會被騙，我都會抱起他，細心聽他的說話。即使只是解答他一些無關痛癢的問題，我也感到很滿足。

~ Lindberg

海容：小學生殺人事件

前一排無線高清台做咗幾套日劇。雖然啲演員唔係好紅嗰啲，但都幾好睇。其中一套叫做：《海容：小學生殺人事件》。聽個名可能會以為係偵探故事，但其實「海容」嘅意思係「對於他人的過錯和罪惡用像是寬廣的海洋的心來容許他」，係一部俾家長睇嘅「摧淚彈」劇集。

故事主桿好簡單，一個平時好乖小學生（10歲）唔知點解殺咗另一個初相識嘅小朋友（7歲）。原來兩個家庭都有各自嘅問題。呢啲問題喺任何一個家庭都有機會發生，而故事就係圍繞住呢啲問題而發展。雖然劇情被誇張放大，但睇落都會有啲共鳴。

而令我感到最深刻嘅一段，就係發現「小學生」突然唔再講「我番嚟（屋企）啦。」嘅原因。原來有一日，佢受到好嚴重嘅心理傷害，全身濕透返到屋企，希望投入媽媽嘅懷抱。點知媽媽上緊類似 Baby Kingdom 嘅網上論壇，見到個仔全身濕透，驚訝之餘仲帶少少煩厭，因為搞到佢無得玩電腦。雖然媽媽最後都好溫柔咁幫阿仔換衫，但因為認定阿仔係玩到濕哂，係阿仔唔啱，所以忽略咗跟小朋友好好溝通嘅機會。

喺媽媽嘅角度，佢覺得喺網上論壇，都係同其他人分享自己小朋友啲野，亦係一個吐苦水嘅地方。自以為自己做嘅事情都係為咗個仔，其實就忘記咗，最重要嘅人唔係喺部電腦入面，而係喺自己身邊。

其實類似嘅事情，我都有做過。

有一日，因為掛住同 Jayson 爺爺講野，Jayson 不停咁叫我都唔應。之後佢好大聲咁叫我，我就喝咗一聲，叫佢要尊重爸爸同爺爺，等我哋講完先再同佢傾。Jayson 有本故事書都係講同一個情況，所以我以為佢會明白。

嗰晚，佢向我發脾氣，佢話佢嬲我。喺佢心目中，佢有啲事情好想同我分享。大人看上去可能係微不足道，但喺佢心目中，已經係好重要。我要求佢尊重我嘅同時，我都應該尊重佢。於是我同 Jayson 講：

「爸爸依家明白啦。爸爸同您講一聲 Sorry。但您都要明白爸爸真係有啲嘢需要同爺爺講。爸爸應承您，以後即使我同其他人講緊野，我都會應咗您先。但您要等我同人講完之後，先再同您傾。我尊重您，您都要尊重我。好唔好？」

之後，佢好開心咁同媽咪講番一次我嘅說話。我估佢真係明白我嘅意思。而媽咪都同樣應承佢。

諗番起自己嘅成長過程，都會有啲以前會做嘅野，突然某一日，因為某啲原因，就唔會再做。唔再做嘅原因，我已經唔係記得好清楚。相信並非一段愉快嘅回憶。睇完套日劇之後，希望我哋能夠做一對用心聆聽嘅父母啦。

~ Lindberg

Club Med 布吉 之 沙灘篇

離開酒店，橫過一條窄窄的馬路，就係一個公共沙灘。第一日去，已經係黃昏時份，一見到個海，不禁「嘩」咗一聲。一望無際嘅大海呀！

雖然係公共泳灘，但一啲都唔怕人多。因為實在係太大啦！亦都可能唔算旅行旺季，所以人唔算太多。

而最正都係啲沙，真係好似麵粉咁幼！對腳踏上去，好似海綿咁，超舒服！

海灘好大，而且啲水好淺。跑到好出都唔會過腰。不過佢就有一個警告，如果出到某一個位，就會突然好深。因為淺水嘅關系，Jayson 都唔怕跟我跑去海中心玩。

記得以前去過菲律賓嘅長灘島，雖然當時天氣唔係太好，但感覺上，布吉呢個沙灘好似靚啲。長灘島啲沙，只有近 Fridays（酒店）先比較幼細。其他都會粗啲。

從沙灘望番上 Club Med。佢用啲沙灘椅霸咗一啲位俾住客。我哋可以喺酒吧攞啲飲品嚟歎，非常享受人生呀！

除咗游水玩沙之外，Mini Club Med 嘅小朋友都會嚟呢度舉行活動。呢日就係玩親子堆沙比賽。Jayson 跟其他小朋友一齊留心聽導師嘅風趣講解。

堆沙嘅主題係動物。我哋叫 Jayson 自己選擇想砌啲乜。但佢好似唔係好明要點樣做。整整下，都係變咗我砌！！！

呢到啲沙真係好靚。好似泥膠咁，想砌乜都得。

「Jayson，要整得似，再緊要呢個位！」

我呢頭係到建設，佢嗰頭喺到破壞！不過到咗最後，佢都冇掛住自己玩，走嚟幫下我手。

「估下我吔整乜！」

「各位觀眾，魔鬼魚！」

魔鬼魚啲紋係佢整嘅。其實佢喺口前面仲整咗啲氣泡，不過張相影唔到。對自己嘅作品，我覺得非常滿意。

因為係比賽，咁就固然有獎啦。不過小朋友嘅比賽，自然每個人都有獎啦：證書一張！

我哋去呢幾日，天氣都算唔錯。第一日嘅日落可算係最靚嘅。配埋一杯雞尾酒，真係好似去咗天堂一樣…

喺沙灘流連咗幾日，我仲有一個發現，就係嚟呢度玩嘅西人媽咪，身材都非常好。帶住幾個小朋友，竟然仲可以保持得咁窈窕。最後，我得出一個結論：佢哋全部都係後母。一定係咁…

~ Lindberg

關心別人獎

有一天放學的時候，見到 Jayson 特別興奮。除了因為我手中的那袋「麥當勞」之外，我發現 Jayson 心口上多了一塊獎牌，上面寫著：「關心別人」。平時對人不啾不啋的 Jayson，何來會關心別人呢？

「Jayson，您好叻呀！攞咗個咩獎呀？」

「唔知呀…」Jayson 用例牌的語氣回答說。

「…（無言滴汗中）」我繼續問道：「咁係唔係人人都有㗎？」

「唔係…」

「咁有邊個攞獎呀？」

「婥瑜啦…」

「仲有呢？」

「其他啲人我唔識佢哋個名。」

「哦…」這令我心感欣慰，因為 Jayson 會被選中。

正當考慮如何贊美他之餘又不會令他自大而使沒有得獎的同學感到不愉快之際，他就接著說：「聽日仲有得派… 今日派唔哂。」

噢… 原來是「豬肉獎」。但即使每個小朋友都有獎，亦沒有減少我心中的喜悅和對 Jayson 的驕傲。

回到公公的家，Jayson 便跟公公炫耀一番：「我係第一個呀！」

公公說：「咁叻呀？做第一喎！」

我聽得出原因，於是我便問他說：「咁第二個係唔係婥瑜呀？」

「係呀！」

Jayson 一定感到我英明神武，料事如神。其實獎牌只不過是跟學號派的吧，Jayson 是1號，婥瑜是2號。哈哈哈…

學號排第一，也有其好處。除了有額外的優越感之外，作為一個「四仔」，亦可以得到特別的注意。我以前也是一號，所以對這點是最清楚。呵呵呵呵呵…



~ Lindberg

觀賞音樂劇：想做大個仔

每年葉氏兒童音樂劇團都會舉辦一個音樂劇。今年的劇目是《想做大個仔》。由 Jayson 的班級開始，就必定要由家長陪同去觀摩。因為沒有選擇，又見是兒童音樂劇，相信 Jayson 也會喜歡，所以我也沒有詳細研究這是一個甚麼的音樂劇。

小朋友除了要出席觀賞之外，還要答問題交功課。在場外拿過問題紙一看之後，就心感不妙。原來這一套音樂劇的原著，就是湯漢斯主演的 BIG。

首先，故事很長。原著本身都很多細節，我以為兒童音樂劇會簡化劇本。以小朋友的定力來說，一個半鐘已經是極限。誰知演到足本之餘，還要慢慢唱。看完兩個鐘之後，才到中場休息。Jayson 都算坐得定，但也受不了。我就睡了三個回合。而更「大鑊」的，就是讓他看到其他家長拿了電話出來「工作」，他差點也想問我們要！

除此問題之外，我不明白這套劇「兒童」得那裡去。我見學校之前演出過「花木蘭」的相片，那些年青演員做得好落力，感覺非常好。但今次用了好多大人，那些小朋友都只是當一些「過場畫面」。有點沒趣。

而最大問題，就是唱英文，就算以我的能力，也只聽得七八成（但可能七八成都沒有，因為大部份時間都是睡著了…）。就好像金剛（無線電視那位台灣演員）說廣東話一樣，真的想大喊一句：「唔該開字幕呀！」。加上對白多，動作少，像 Jayson 這個年紀的小朋友，真的不知道甚麼人在做甚麼。因為我看完之後令我懷疑自己的語文能力，我上 YouTube 看一些外國中學的表演。同一隻歌，咬字清晰得多。

強撐整整三個小時之後，還要 Jayson 答最後兩條問題，幸好他還算合作。但之後便扭計大喊肚餓。我們只好跑去鄰近的商場，隨便吃一個快的。唉…

要小朋友去觀摩藝術，確是一件好事。但那作品是否適合小朋友，會否帶來反效果，更值得注意。

雖然整個經歷不太理想，卻有意外的收獲。有一晚，當我陪他睡覺的時候，他突然問我：「爸爸，如果我大個仔，您會唔會唔認得我？」

起初我也聽到一頭霧水。

「如果我大個仔，您會唔會唔認得我，唔俾我返屋企？」原來他記起音樂劇的劇情。主角因為突然變了大人，媽媽不認得他，並把他趕出家門。

我走到他的身邊，讓我的臉貼著他的臉龐，然後輕輕對他說：「爸爸當然唔會唔認得您啦。即使您變成點嘅樣，爸爸媽媽都會認得您。即使爸爸睇唔到您，亦都會認出您嘅氣味㗎嘛。」

Jayson 攬住我的脖子，越攬越實，久久未放。聽到他低聲的飲泣，令我也忍不住流下男兒淚。Jayson 這個「四仔」，真的有如「攞您命3000」！要幾甜，有幾甜。


~ Lindberg

魚與熊掌

孟子說：「我喜歡吃魚，也愛吃熊掌；如果兩種食物不能同時得到，我會捨棄魚而選擇熊掌。」
魚與熊掌，不可兼得。孟子嘅教誨真係發人心省…

「Jayson 我所肉也；4s 亦我所欲也，二者不可得兼，舍子而取電話者也。」

因此，我決定明天11月11日11時11分去拿我的寶貝 4s。呵呵呵呵… My precious...

曾經有段時間好想轉台，離開3去Smartone。但之後發現Smartone又唔係接收好得去邊，而且限制又多。相比之下，3就好似星球大戰入面嘅 Dark Side 一樣，方便用戶好多。哈…

而且3今次對我嘅安排的確唔錯。當 4s 剛剛發佈，佢咁啱打嚟叫我續約，我當然打死都唔肯續，咁佢就幫我排隊出 4s。當開始公開登記嘅時候，佢就有短訊叫我去門市選擇月費計劃。原本都諗住第二日就去做，點知過咗一陣就有人打電話嚟，幫我喺電話做埋！星期五就可以直接去一個唔知乜野地方攞機！真係好有尊貴客戶嘅感覺。$398 可以 $0 機價攞走部 16G 嘅 4s，我要 64G，就補多 $17XX。都算非常唔錯。希望聽日去攞機唔會令我失望啦！


~ Lindberg


P.S. 選擇服務計劃嘅時候有一樣野值得留意。4s 嘅 Siri 需要上網先用得。如果每日問佢十樣八樣野，大約要預 30MB 嘅數據流量。多就唔算多。如果係現有 iPhone 用戶，咁就可以計一計邊個計劃啱用啦。

四眼雞丁

上星期一晚，我們帶了 Jayson 去拿眼鏡。不知是否一分錢一分貨的關系，看上去的感覺還頗舒服，Jayson 不似戴得好辛苦。

為了慶祝戴新眼鏡，我們帶 Jayson 去吃第一次壽司。之前一直不敢讓他吃壽司，因為怕不衛生。但到了現在，也沒甚麼可怕了。Jayson 對一碟碟在迴轉帶上走動的壽司很感興趣。很久沒有試過這麼的專注地吃飯了。唉…

最初戴眼鏡的幾日，我們也怕他會不習慣或頭暈，所以叫學校的老師幫我們多加注意。過了一星期之後，Jayson  都沒有排斥戴眼鏡。由早上洗完面開始戴，直至晚上睡覺才除下來。比我們預期中好得多。大概是因為身邊的人都稱贊他戴得好看，令他沾沾自喜，而同學們亦沒有令他感到不安。所以真的要謝天謝地。

但最重要的是對視力有改善。問他在學校的情況，他自己也高興地說看得清楚了。真的慶幸可以及早發現他的視力問題。

而另一個意外收獲，就是近兩三個月 Jayson 坐長途車的時候，都會暈車浪。即使短短二十分鐘車程，也很容易嘔。但自從戴了眼鏡之後，情況好似沒再發生！暈車浪可能真的跟散光有關系。

現在看慣了「四眼雞丁」的樣子，當他除了眼鏡下來，反而有點不習慣。哈哈…



~ Lindberg

Club Med 布吉 之 勁食篇

Club Med 嘅其中一個特點，就係包飲包食。而每一間 Club Med 都有自己嘅餐廳安排。有啲有幾間不同餐廳，有啲就做半自助餐。布吉只有一間自助餐餐廳，一個酒吧。自助餐基本上係全日供應。我同自己講：我已經到咗天堂啦…

嚟到 Club Med 嘅第一個節目，就係食午餐。Jayson 為自己精心挑選嘅第一個午餐。 佢都真係幾「重口味」喎…。

因為心情興奮，睇下佢自己食得幾好滋味！

午餐嘅食物比較簡單。但晚餐就特別得多。每晚都有特別主題，所以唔會每晚都對住同一推食物。而兩餐之間，當然最好去飲番杯啦！

所有標準飲品（包括酒精類），都係任飲！喺酒吧豪飲，或者隔離裝飾別緻嘅坐位歎住嚟飲，都一樣咁爽！

行遠啲，到沙灘曬住嚟飲都得！雖然明知自己都唔飲得，但都忍唔住飲咗幾杯！因為我真係以為上咗天堂啦！

「酒保！攞我嘅蘋果汁嚟！」

飲飽之後又去食過！第一晚自助餐嘅主題係海鮮，所以有魚生食。發達！

仲有生蠔！雖然用料唔算非常上乘，不過已經食得好高興！

法國風嗰晚，仲有鵝肝！但嗰晚我個肚已經開始投降，所以真係食唔落。

為咗令大家有一個愉快嘅晚上，除咗喺食物配搭上有心思之外，佢仲會建議客人以衣著配合主題。例如呢晚咁高貴嘅法國風，佢地嘅著裝標準（dress code）係典雅（elegant）。當然未必每晚都配合得到，但如果可以跟住著，相信會玩得更加投入。

雖然上面嗰塊鵝肝令人投降，但配一杯果味白酒，感覺非常清新。

呢度紅白餐酒都係任飲，不過當然只得紅白各一款啦。但亦有幾隻自費嘅餐酒，其中一隻 Rose 聽講幾好飲。Jayson 媽話見啲人去其他 Club Med 極力推薦，又話唔洗錢。我見好多老外都有叫，但我見餐牌明明寫咗價錢。雖然只係大約港 200 元一支，不過因為我唔飲得，想偷飲都飲唔到咁多，所以最後都冇證實洗唔洗錢。

除咗唔同主題，每晚都有一款特色主食。仲要整得非常唔錯。

另一晚有個鋪滿芝麻嘅煎魚，Jayson 媽讚不絕口。

有一晚整西班牙海鮮飯。見 Jayson 主動出擊，就知好唔好味啦。

不過 Jayson 每餐為自己選擇嘅食物，大致都係差不多。都不外乎好多芝士、橄欖、粟米…

嚟到泰國，自然有大量飯後水果。而佢啲甜品都做得好出色喎。每晚都由頭食到落尾，仲要整番個甜筒，真係… 好… 大… 鑊…。

除咗咖啡或茶，呢到仲有蔘茶！我唔知韓國人會唔會飲，但為咗嚟緊每日嘅激鬥，我覺得有補一補嘅需要。

雖然食物質素一定比唔上高級酒店，但都可以睇得出係用心製作。

一覺醒來，發現早餐仲大鑊。除咗有常見嘅早晨全餐之外…。

仲有粥。

同埋納豆！死未？！

可以對住個海慢慢享用一個豐富嘅早餐，人生仲可以想點？

Jayson 每朝都食一大碗雜錦粟米片。

雖然呢到只有一個自助餐餐廳，但有好幾個戶外或室內飯廳。怕熱可以入室內涼冷氣，想同大自然拉近啲，又可以到出面坐下。所以即使喺同一間餐廳，每餐都好有新鮮感。而且啲 GO 仲會坐埋嚟同你一齊食，傾下計，所以每一餐都食得好愉快。

自從返咗香港之後，我一直都唔敢量體重。究竟肥咗幾多？

（待續…）


~ Lindberg