Club Med 布吉 之 精彩表演篇

起初聽到 Club Med 每晚都有由自己啲工作人員做嘅表演，感覺怪怪的。自己人做啲表演會有幾專業呀？第一次踏入劇院，見到一個簡單嘅舞台，頭頂有啲空中飛人嘅設施，對於整件事就更加迷惑。

誰知每晚都睇到拍爛手掌，有晚仲因為出咗去睇大象表演，而錯過 Club Med 嘅表演，令到我哋心中叫笨。Jayson 仲要成日問住幾時去「睇 Show」。

節目由 Crazy Signs 開始，令大家進入亢奮嘅情緒。然後主持就介紹明日主題。有模特兒示範大會指定服式，等大家可以為明天晚飯準備一下。之後大家一齊大叫：「Show Time！」（Jayson 叫得好大聲），各項表演就開始。

歌舞表演嘅演員，好多都係平日幫我哋嘅工作人員。作為一個業餘演員，我覺得佢哋好樂在其中，享受緊自己份工作。所以睇得好開心。

而雜耍真係睇到我哋目定口呆。原來其中有幾位工作人員，都真係接受過專業訓練。

如果唔係，邊到敢做啲高空動作呢？表演真係好有專業水準，非常出色。

Jayson 同我最鐘意睇，就係小丑表演。呢位搞笑巨星來自本地，唔出聲已經可以引人大笑。喺呢到可以睇到咁專業嘅演出，真係喜出望外。

而最精彩嘅就係表演晚晚不同。太陽劇團 Circuit de Sole 都做唔到啦。除咗會喺呢個劇院演出，佢哋仲會移師到室外嘅空中飛人場地，進行更高難度嘅表演。不過好可惜，當佢哋打算到外面表演嗰日，竟然落起雨來。所以只好留喺室內表演啦。

節目由 Crazy Signs 開始，再由 Crazy Signs 結束。睇完之後，意尤未盡的話，仲可以稍移玉步，過隔離酒吧飲番杯（記住，係任飲唔洗錢！），聞歌起舞。每晚都可以咁玩法，難怪 Jayson 都大叫：「It's Show Time!」

（待續…）


~ Lindberg