牙仙子 Tooth Fairies

「Jayson，您明年幾多歲呀？」Jayson 媽問。

「六歲囉。」Jayson 回答說。

「咁六歲就要準備換牙啦。您啲乳齒會跌出嚟，然得就會生啲大人嘅牙齒。」

「好嘢！我有錢！」Jayson 手舞足蹈興奮地說。

「您點解會有錢？」我們好奇地問。

「將啲牙放喺枕頭下面咪會變錢囉。」

牙仙子？！小朋友幾時變得這麼市儈呀？

~ Lindberg

迪士尼星級款待「星級怪獸之旅」

之前見過網友參加 迪士尼嘅公主體驗，心裡羨慕之餘，不禁想問點解冇國王王子版。迪士尼可能聽到我嘅心聲，上星期六我哋竟然被邀請，叫我哋去體驗一個全新嘅星級款待：「星級怪獸之旅」。雖然冇得做國王，但做怪獸都幾好呀…

聽到「怪獸」，自然諗起暑假將會上映嘅《Monster University》。我仲記得大約一年前，我同 Jayson 一齊睇《Monster Inc.》嘅影碟。外表兇惡嘅怪獸，其實內裡都係有溫柔可愛嘅一面。Jayson 特別喜歡 Mike，因為佢鐘意佢夠搞笑。事隔一年，估唔到 Jayson 仲記得 Mike，所以   我哋都好期待今次嘅旅程。

今次體驗嘅「星級怪獸之旅」，大約兩小時嘅行程包括：

• 於「火箭餐廳」享用午餐
• 於「動畫藝術教室」繪畫怪獸朋友
• 於「探險世界」及「皇室宴會廳」參與怪獸為主題的遊戲活動
• 與神秘嘉賓會面

首先，我哋到咗「火箭餐廳」。呢間係我哋比較少光顧嘅餐廳，估唔到一嚟就俾我哋遇到…

相信全香港都只有呢間餐廳廚房可以有「寵物」出現。哈！

每位小朋友都會有一份兒童餐，仲有一個怪獸朋友餐盒！大眼仔造型嘅漢堡包好搞笑呀，小朋友們見到都好興奮。除此之外，仲有 Jayson 喜歡嘅粟米。而餐盒裡面就有一支水。

雖然個包係咁可愛，但都要食咗佢。原來係豬柳漢堡包，有生菜同番茄。我之後都偷食咗啖，都幾好味喎。

大人就有餐券一張，自己鐘意食乜都得。食飽飯之後，邀請我哋嚟嘅工作人員，就向我哋介紹呢個星級款待。原來今次樂園嘅主題，係以一眾迪士尼公主及怪獸朋友，讓小朋友學識欣賞別人嘅內在美。然後向心目中嘅 VIP，送上貼心嘅感謝。

所以第一個活動，就係要小朋友製作一張感謝卡送俾今日帶佢哋嚟到樂園嘅 VIP，亦即係爸爸媽媽喇。

Jayson 畫咗一個 Heath Ledger「Joker」版米奇老鼠…。

好彩外面補番一朵花，唔係真係以為裡面會寫住：「小丑打劫！攞哂啲錢出嚟…」。

然後我依指示，叫佢喺入面寫啲嘢，多謝帶佢入嚟嘅人。佢猶疑咗好耐，於是我叫佢快啲手，寫「爸爸媽咪」四個字有幾難啫。誰知，晴天霹靂… 佢問：「姐姐個名點寫呀？」佢指嘅係公關姐姐。唔怪得咁耐都寫唔落手。原來佢記得我之前話係公關姐姐請我哋嚟。要多謝，當然要多謝 Tiffany 姐姐啦。佢又啱喎…

然後節目正式開始。我哋去到「動畫藝術教室」外面集合，領過工作證之後，小隊員立即要受訓成為怪獸新成員。

小隊員分組為「毛毛隊」及「大眼仔隊」。每兩、三位組員就有一位姐姐帶住。帶住 Jayson 嘅係 Ori 姐姐。

然後，我哋就入到畫室。等緊我哋嘅係一位怪獸星級導師：有力士哥哥。有力士哥哥除咗有一個搞笑嘅名字之外，一身造型亦非常趣怪，全身都係眼睛。腰間寫住 CDA，亦即係動畫中嘅 Child Detection Agency。為咗要教導小朋友成為怪獸新成員，有力士哥哥第一件事就係要教大家怪獸咆哮。「嘩…」

小隊員們以最兇猛嘅咆哮作為回應。

之後，佢就介紹 Professor Sai Ho 出嚟，教大家畫大眼仔。雖然我哋嚟過迪士尼好多次，但一次都未入過「動畫藝術教室」。所以一切都對 Jayson 來講好新鮮。

除咗有 Professor Sai Ho 逐步教小朋友點樣畫之外，Ori 姐姐亦細心從旁指導。羨煞旁人（…我）。

哥哥畫得大眼仔好可愛。

而有高人指導之下，Jayson 都畫得唔錯喎！

而奇妙嘅事情就喺呢一刻發生！大眼仔突然現身！

相信呢一刻，大人比班小朋友更興奮。大眼仔真係好搞笑呀。來一幅合照先得！

嚟之前，Jayson 話要請教 Mike 點樣可以吞咪高峰之後吐番出嚟（電影情節）。好明顯太過興奮唔記得咗問… 哈哈哈！

送走咗大眼仔之後，Samuel 哥哥送上「怪獸朋友限量收藏卡一套」。佢話俾 Jayson 知，呢套收藏卡，係佢哋先有㗎。發達！

既然咁高興，咁多位小朋友就嚟一幅合照先啦。而合照都不忘要扮一下怪獸叫喎。

玩完室內遊戲，我哋就去到外面嘅「探險世界」，分組進行遊戲。沿途我哋發現有好多密碼圖像，只要用「星級美麗解碼眼鏡」，就可以睇到隱藏嘅公主或怪獸朋友。

除咗得意之外，大人仲可以借機會讓小朋友了解何謂內在美。

Ori 姐姐真係好識跟小朋友玩。即使係有啲怕羞嘅 Jayson，轉下眼就被吸咗去… （亦可謂：有其父必有其子…）

去到「探險世界」，有力士哥哥又再出現。工作人員圍咗一個幾大嘅地方（有好多鼓打嗰度）俾我哋玩。真係好有貴賓嘅感覺。

然後小朋友分組進行比賽。「星級款待」為呢班小朋友特別而設嘅遊戲，除咗係平時到樂園玩唔到之外，有力士哥哥仲好識搞氣氛，小朋友開心參與之餘，大人們都樂在其中。

玩完兩個遊戲之後，我哋又轉移陣地，去到「皇室宴會廳」嘅後面。每組小朋友都有一塊大白板，到底要嚟做乜呢？

原來係想小朋友們用不同部件，創造一隻全新嘅怪獸出嚟。（不得不讚下 Jayson 後面嘅 Samuel 哥哥，好熱心咁跟小朋友一齊玩。）

小朋友你一句我一句，佢想要呢個頭，佢想要嗰塊面。結果，我哋毛毛組創造咗一隻三頭怪…

因為唔夠時間改名，有力士哥哥就稱之為「小強怪」。睇下有人幾得戚！哈哈哈…

最後，要成為怪獸新成員，有力士哥哥話要考驗一下大家嘅怪獸咆哮及體力。

正當學員喺到跳跳下嘅時候，怪獸公司嘅最優秀員工：「毛毛」就喺遠處出現！

小朋友都立即定格。實物原大嘅毛毛，我哋都係第一次見！小朋友見到會有乜嘢反應？第一秒係呆咗，之後就興奮到彈起。大人就更加搶住去影合照啦。

節目來到尾聲，大家都要跟有力士哥哥合照。不過有女仔話唔要再扮怪獸叫。於是，有力士哥哥就 Chok 咗個樣，然後好嬌俏咁話：「扮公主囉。」哈哈哈… 有力士哥哥真係超掂，大人小朋友都笑到肚痛。

扮完公主之後，當然要迎合主題，扮番怪獸咆哮啦。睇下 Jayson 玩得幾興奮！

活動結束之前，哥哥姐姐們攞出一袋二袋。原來仲有禮物送俾小朋友，係一隻20吋嘅毛毛公仔！

20吋有幾大隻？係好大隻！毛毛非常軟熟，Jayson 攬到佢實一實。

行程完結之後，Jayson 抱住毛毛喺樂園四圍玩，引來不少艷羨目光。更有一位來自內地嘅女士，按不住問我喺邊到買。於是我只好用我流利嘅標准港式普通話答佢：

「鵝聞脖豉埋的，豉撐家鍋洞餸的。」

對方一臉困惑及失望。而 Jayson 媽就笑住望實我。

「山揀忍的普通話鷲是姐魔爛的啦。」鬼叫我係睇電視跟「表哥」學嘅咩。

除咗以上提過嘅禮物，「星級怪獸禮品包」入面仲有一張沖晒 8R 大相嘅換領券。之前有專人幫我哋跟怪獸人物影咗好多相，可以沖晒一張番屋企留念。

今次好多謝迪士尼樂園俾我哋一家一個咁星級嘅款待。相信有好多人都好似我哋咁，買咗「奇妙處處通」，久不久就會到樂園玩。如果想俾小朋友一個獨特嘅體驗，仲有專業演藝團隊嘅招待及一大堆禮品，我會推薦迪士尼星級款待「星級怪獸之旅」。

最後，特別要多謝 Ori 姐姐嘅照顧。希望將來到樂園玩，會有機會再見啦。

今次最開心嘅當然係 Jayson。總括「星級怪獸之旅」嘅收獲：

（20吋毛毛公仔一個、星級怪獸活動畫冊連顏色筆一份、怪獸朋友限量收藏卡一套、8"x10"吋精美照片一張(隨相附送精美相片封套)，及隨午餐附上的怪獸朋友餐盒一個。）

「星級怪獸之旅」於3至5月期間舉行。適合3至11歲嘅小朋友。個人認為，好似 Jayson 咁大嘅小朋友就最適合。有興趣嘅賓客須要兩日前預訂。而除咗「星級怪獸之旅」之外，星級款待仲有其他不同體驗。訂講詳情，請參閱迪士尼樂園網頁。希望大家都會有一個奇妙嘅旅程。

~ Lindberg

「We 嘩!充氣嘉年華」之「復活節環球遊樂園@荃灣廣場」

復活節眨下眼就到，小朋友將會放假兩個星期，正當煩惱搵甚麼節目給 Jayson 時，竟然有幸被邀請到一個由「We 嘩!充氣嘉年華」主辦的「復活節環球遊樂園@荃灣廣場」玩。發達！

我跟 Jayson 一起看以上的短片。看完之後，Jayson 輕輕嘆了一句：「我好想玩呀…」

莫講話小朋友，大人看到都想玩。我看了遊戲的簡介，從短片中看到的各項大型遊戲：

• 全港獨家意大利進口的「We 嘩! 大鯨魚」及「小丑魚奇幻漂流」是自動開合口功能彈跳滑梯。
• 英國進口的「反斗牛牛」是首部小孩機動騎牛牛裝備。有點令我回想起以前「歡樂今宵」見過的西部蠻牛機！
• 美國自家制仿真黑白乳牛「親親乳牛」。
• 「我要做騎師」是其中一個我很想玩的遊戲。親子兼修身！希望牠能承受得到我的重量…
• 「反轉夢幻堡壘」是一個充滿童話感覺的夢幻充氣城堡。

見到有咁多室內及戶外的遊戲，真的很想復活節快點到！

「We 嘩!充氣嘉年華」主辦的「復活節環球遊樂園@荃灣廣場」活動詳情如下：

日期：2013年3月28日 至 4月7日

地點：荃灣廣場

開放時間：中午12時至晚上8時

票價：HK$20 至 HK$60（跟據遊戲收費）

~ Lindberg

家長日：你知道我在想甚麼？

今季的家長日，家長們都被門外的一個小習作所吸引住。班房向走廊的大玻璃，貼上了一條長長的橫額。標題寫著：「你知道我在想甚麼？」

（這張相正好展示 iPhone 5 的功能！）

小朋友的心裡，有很多很奇妙及可愛的念頭。有些小朋友寫出當時的心情，如：「我好眼瞓…」、「正在思考中…」。有些寫了簡單的願望，例如希望媽媽買提子包給他吃（因為他的媽媽跟我一樣，每天新鮮做包。但事實上，童言無忌，自己做的很難比得上外面買的麵包。），有的希望屋企會變大，有的希望去踢足球、去沙灘玩等。有個小朋而還很生性，祈禱希望媽媽早日康復。

有些比較成熟的小朋友，令我感到很欣慰。他們最近會考慮到上小學的問題，熱衷到小學學習新事物。想法非常正面。

而令我最印象深刻的，就是有一位小朋友希望快點長大，跟媽媽一樣出去工作。這些觀念是洗腦也洗不來。父母的態度是如何，小朋友的態度就會如何。如果我希望小朋友要積極面對生活，我就要做好自己的本份。至少在小朋友的面前，我要表現得那樣吧。如果整天都在埋怨上學的問題、自己的工作，小朋友又怎會積極面對未來呢？這個是對父母很好的警惕。

而 Jayson 的心聲，就是…

我回家後，讓 Jayson 看以上這幅相。我微笑沒有作聲，他尷尬的笑一笑，紅著臉說：「唔准睇！」

我笑說：「哈哈哈… 您咪夢想成真咗囉！」

之後我還不停稱贊他，以防他以後不再告訴我們他的心聲。嘻嘻…

家長日方面，老師報告 Jayson 的進度很不錯。兩位中英文老師都是 K2 就開始教 Jayson，他們看到 Jayson 明顯的進步。由以前害羞的小男孩，到現在敢言的小朋友（雖然聲量還是少一點…）。班主任雖然是第一年教他，但當說到 Jayson 平時的表現時，我們也能感到她的雀躍和興奮。她說這一班的進步很平均，各位小朋友都表現得很好，所以作為老師也感到很鼓舞。真的很慶幸能夠升到這一班，否則 Jayson 也未必有這麼大的進步。只要他喜歡上學、喜歡學習，那可算是為未來的挑戰打好基礎。

~ Lindberg

韓國之旅：玩雪篇

呢兩日嘅早餐，Jayson 媽都想食啲熱嘢。於是，我哋就喺前一晚買定啲杯麵。可惜杯麵上只有韓文，除咗睇相之外，都唔知辣唔辣。最後總共試咗四款唔似辣嘅杯麵，只有一款真係唔辣！

今日我哋準備去一個度假村玩雪。家姐有咁嘅安排，令我哋對旅程好有期望。真係好想俾 Jayson 玩下雪。

大約一小時嘅車程，我哋嚟到 昆池巖度假村（Konjiam Resort）。落車嘅時候，大家已經被一片白色嘅景色吸引住。

但興奮還興奮，都要做足禦寒準備。Jayson 今日有兩條褲，長袖底衫、冷背心再加外衣，頸巾大帽，厚羽絨褸再加爪毛風褸！我哋大人都著咗兩條褲、入面三件再加一件厚羽絨褸。

由停車場到大堂雖然只係好短嘅路程，但班小朋友見雪就玩，路邊嘅雪已經玩得好興奮。三分鐘嘅腳程變咗要半個鐘先行得到。

不過莫講話啲細路，年紀最大嗰個都玩埋一份…。

Jayson 可能著得太多衫行得唔慣，所以行得特別小心翼翼。

我哋喺度假村大堂安頓好之後，就去租鞋。我哋並唔打算滑雪，一來唔識，二來冇乜時間。但有啲人對鞋太單薄，又唔防滑，所以都要租幾對鞋著。另一方面，我都去為 Jayson 買咗條有彈性，可以包到面嘅頸巾。

生平第一次到滑雪場，好雄偉呀！見到啲人好型咁滑落嚟，自己都有啲衝動想去學。希望第二時有機會啦。

「Igloo！」Jayson 喝著說。

滑雪場周圍有兩間雪屋。可能因為太多雪唔知點處理，就起幾間雪屋嚟玩下。

我唔知呢度啲雪叫厚定薄，靚定唔靚。白雪雪，唔會厚到舉步難行，但跌落去唔會痛，應該算係幾好呱。

除咗雪屋之外，仲有幾個大雪堆。俾小朋友見到，立即變成小雪滑梯。

登上「雪山」，勇呀！

英威嗎？呵呵呵…

但常言道：「樂極生悲」。幾姊弟玩得太開心，Jayson 就俾啲雪掟咗入眼。對眼好唔舒服之餘，對腳亦凍到入肉，喊話凍到有啲痛。莫講話小朋友，我都覺得有啲赤赤痛。好在呢度有啲溫室，可以俾我哋取暖。Jayson 除咗鞋，仲換咗一對厚襪。企喺暖爐邊休息一陣，咁先至舒服啲。

表哥們都趁機食個杯麵。

休息過後，我哋就前往雪橇場。雪地舉步難行，好在有「運輸帶」送我哋上去。

雪橇好似一個大水泡，小朋友要大人陪伴。我哋買咗一張套票，可以滑五次。

由山上滑落嚟，速度都好快呀。對於我哋呢啲唔識滑雪又冇時間學嘅人，都係一個好好嘅雪上活動。

「好快呀！」Jayson 玩得好興奮。

因為時間嘅關系，我哋只係玩到四次。跟住就要離開。雖然有啲依依不捨，但相信經過今次嘅體驗之後，一定有下一次機會。

離開嘅時候，我哋喺到食咗個快餐，然後就趕去參觀韓國第二大宮殿「昌德宮」。

（待續…）

~ Lindberg