意大利「頹」飯

煮意大利飯其實好簡單，只要有心機，唔難煮得好。煮嘅方法雖然有唔同，但無非都係將生米煮成熟飯。

先講材料：

意大利米
雞湯（食素就可以用蔬菜高湯）
魚切塊（食素可以唔落）
白菌切片
洋蔥一個切碎
蒜頭一小粒切碎
牛油
Parmesan 芝士

（Sorry，無準確份量。依家嘅我，影到相仲寫得出都算係咁。如果真係想知，留言吧。）

先用些少橄欖油炒一炒啲米。我地福建人煮鹹飯都會先炒一炒啲米。炒到透透地明就得，但少心唔好炒燶。炒完啲米，再煮成嘅飯好似會彈牙啲。

之後就可以落洋蔥同蒜頭。另一邊箱要煲熱啲雞湯，我用一盒 500ml 加多 1L 水去煮大概四人份嘅飯。見洋蔥變色就可以落雞湯。

雞湯最好唔要一次過落晒。逐少逐少落比較好。因為每隻米吸水能力唔同，之前乾炒情況又未必次次一樣，所以好難次次落幾多水都咁準。

跟住可以試食下啲米熟唔熟。製成品同我地中國人米飯唔同，應該幾彈牙。如果覺得仲硬硬地，就可以先落魚肉。魚肉我先用鹽、黑椒、同少少香草去醃一下。

見魚差唔多熟就可以放白菌。有白酒的話可以灑些少。

跟住我會放塊牛油。除咗會香啲，個湯都會濃厚啲。我會煮到啲米個心仲有少少硬就收火，到時上枱就啱啱好熟。（所以我頭先咪話啲湯唔可以一次過落晒囉。）

放埋啲 Parmesan 芝士，用餘溫煮溶佢。需要的話，用鹽同黑椒粉調味。食得！

而點解我叫呢個飯做「頹飯」，當然有原因。「頹飯」一詞，據聞係起源於近年嘅大學飯堂。係指嗰啲單手以一隻匙羹可以食完嘅飲。唔洗用刀用叉，單有一羹一羹舀落口就搞掂，另一隻手空出嚟可以睇書（或打 sms）。簡單例子就係免治牛肉飯。上一個禮拜，我想煮餐好嘅嚟食。香草脆煎羊架，放上軟綿綿嘅薯蓉上面，又香又靚。正當準備起動之際，阿仔就喊要食奶。奈何羊架要切，唔可以邊食邊餵。最後只有食又凍又乾嘅食物。所以我決定今個星期要煮「頹飯」！但我覺得頹都要頹得有骨氣，所以就整咗呢個意大利「頹」飯！


~ Lindberg


P.S. 今晚仲勁！打邊爐，自製意式茄汁湯底！一路煲住唔怕食凍野。（死未？！）