滿堂彩

復活節假期，我哋過咗澳門，食咗兩餐好野。第一餐：

滿堂彩 Beijing Kitchen
地址：路氹城新濠天地君悅酒店1樓
電話：（853）8868 1234

呢間係由同事介紹。馳名北京片皮鴨！用果木火爐燒嘅片皮鴨，有一種好獨特嘅香味。

同一個爐，我哋仲預訂咗一份叉燒。等緊野食嘅時間，有糖醋小排做前菜。

鴨皮被師父片成三碟：淨皮，淨肉，皮加肥肉。

淨皮真係好脆好香，一滴油都冇。配菜用嘅青瓜同大蔥雖然係切定放過入雪櫃（太凍），但都好新鮮爽脆。即使唔食蔥嘅我，都包咗幾條嚟食。

不過啲鴨肉就好奇怪。雖然啲肉好嫩滑，但一啲鴨味都冇。可能自小家中鐘意煮鴨，所以喜歡啲鴨膻味。隻鴨即使係冇醃過，都未免太過冇味。冰鮮都唔會係咁呱？

之後鴨殼攞咗去㷛湯。可能因為只係煲得一個鐘左右，但個湯都係冇味得出奇。我只係飲到旺菜及胡椒味。可能北京填鴨本身就係咁，不過我都係鐘意鴨有鴨味囉。

叉燒用木火烤過，味道都幾好。不過佢選用嘅部位比較韌，燒嘅時間唔夠長，食起上嚟比較費勁，跟嗰種木香嘅高尚感覺唔係咁配合。我都係比較喜歡「西苑」入口即溶嗰種叉燒。
松子桂魚做得好出色。皮脆肉滑，酸甜適中。而且哥斯拉咁大條魚，都只係 $200。絕對抵食。

Jayson 啲餐具同我哋屋企嗰啲一樣嘅？喺一間五星級酒店入面，確實有啲令人失望。不過我哋嘅侍應嘅服務都幾體貼。佢見 Jayson 媽用膠刀切野好辛苦，立即攞把鋼刀過嚟。

鍋貼做得好靚，不過味道就一般。而且啲皮都幾硬，有啲好睇唔好食嘅感覺。我哋仲叫咗碟芥籣，去晒皮都係唔好食。

是晚四個大人加 Jayson，食咗大約 $1,200。飽到反肚，我覺得都算幾抵。好後悔冇食到雪榚，因為兩球都只係 $50，之後過返酒店商場要 $60！不過呢間餐廳俾我嘅感覺係：用料手工普通，廚具搭夠。環境都好舒服，水滾茶靚（超多款選擇），最適合一大班人，食完之後去睇《水舞間》（喺正隔離）喇。



~ Lindberg

《Harry 哥哥港樂彩虹交響世界》

因為 Jayson 媽這晚要參加好姐妹的婚禮，所以我應 郭生 之約，一起去看：《Harry 哥哥港樂彩虹交響世界》。

「爸爸，唔好影我同第二個女仔一齊啦！想我死咩？！」

「邊會啫。米B 明白事理，唔會咁小氣嘅！」

Harry 哥哥 加上香港管弦樂團，於 Youtube 看過預告片，還頗期待。

當 Harry 哥哥 出場的一刻，小朋友們都尖叫起來。場中大部份的都是五歲以上的小朋友。但也有些兩歲以下，甚至手抱的小朋友。Jayson 當然不明白其他人在歡呼甚麼。我只好在他耳邊簡單解釋。

其實整場表演都很不拘小節。表演歷時大約一個小時，場中的燈光都是亮起的，大家可以自由進出，方便小朋友去洗手間。小朋友可以在輕鬆的環境下（Jayson 又脫了鞋和襪），接觸一下古典音樂。Harry 哥哥 很會營造氣氛，所有小朋友都很興奮。

但我們覺得這個表演跟介紹有些出入。這是絕對不適合三歲以下的小朋友。於表演初段，Harry 哥哥 有些類似小丑的搞笑表演。背景音樂配上了很大聲的大鼓，很明顯欠缺了對幼兒的一些關顧。喊聲四起，不停有父母需要抱小朋友離場。就連 蔚蔚妹妹 也被擊倒。郭生 抱她離場半小時之後，回來沒多久便又要求離開。最後，郭生一家只好提早離開。唉…

除此之外，見到 Harry 哥哥，總是以為會看到魔術表演。但主力卻是那班 QQ Club 的小朋友，甚至有點暄賓奪主的感覺。後面彈奏的是甚麼音樂，我也不能集中聽清楚。

但話雖如此，Jayson 很投入欣賞這場表演。目不轉睛的看著台上的表演者，依著樂團的位置圖，看看不同樂器的分佈。還會跟著打拍子，最後還有跟著大家一起唱他的首本名曲：《I Can Sing a Rainbow》。

因為 郭生 一家一早已經離開了，剩下了我倆。回家的時候，我帶 Jayson 坐船過海。兩父子吃著雪榚，感受著清涼的海風，就此結束了一個愉快的晚上。

~ Lindberg

滅蟲霸王 2000

夏天將到，住喺山邊嘅我哋，就會開始有好多飛蟲嚟探訪。尋晚陪 Jayson 瞓嘅時候，一望上天花板，我「嘩」一聲叫咗出嚟。好大隻不明飛行物體呀！

為免俾 Julie 見到之後發癲，而且更唔想佢趁我瞓著，飛入我個口到。於是，我就攞出「滅蟲霸王 2000」，即手提吸塵機。將佢吸咗去異次元空間。

之前如果吸咗啲烏蠅之類嘅物體，我會好小心咁，向馬桶傾倒。通常佢哋暈暈地，都可以直接送佢哋到西方極樂。但今次捉蟲就真係捉蟲啦。隻不明物體好大隻，唔知仲以為係外太空生物。所以我只好用保鮮紙，包住吸塵機嘅入口，以防佢爬出嚟報仇。然後留番俾…工人姐姐第二朝處置啦。嘻嘻…

聽日，都係要點啲香茅味嘅香薰先得。聽講話會驅蟲喎。



~ Lindberg

蚊赧

「Jayson，您個背脊仲乜花晒㗎？！您又唔係要做黑天鵝，做乜學 Natalie Portman 呀？！等我幫您剪手甲先得…」

每次見到 Jayson 抓傷自己，我都會很勞氣。例如有一晚，他（又）抓損了面上的蚊赧。一粒蚊赧，好得七七八八又被抓損流血，兩個星期也好不過來。我終於控制不住，把他罵了一
頓。因為我見到，心裡真的好痛，比起自己受傷至少痛多一百萬倍。之後，我跟他解釋，爸媽之所以這麼緊張，只因為太過愛您。

未有 Jayson 之前，我也不知道自己的身體（生命），在父母眼中是如何寶貴。不會愛惜自己，總要整個世界圍著我走。遇到挫折，甚至會把責任推到父母身上，為何把我帶到這個世界。看見 Jayson 面上一粒細少的蚊赧，我終於明白到父母的愛是甚麼一回事。

上個星期，我們公司的核數師自尋短見。這個消息令我大受打擊。原本我那天早上要打電話給他，但因為忙著別的東西，第二天找他的時候，已經找不著。之後，他的舊拍檔通知我他去世的消息，看過報紙才知道發生甚麼事。如果那天早上，我有打電話給他，他會否改變主意呢？唉…

經過了解，大概是因為工作和家庭的壓力。三十歲的年青人，頭腦很好，滿腔熱誠。自己想做老闆，但奈何（我也覺得）他自己不是做生意的材料。自己做生意，要承受得起逆境，和擁有解決「不能解決的問題」的能力。要有很堅強的意志，才能殺一條出路。

他的舊拍檔向我提起他的母親，我更是難過。以前我不明白，但現在我懂了。世界不是圍著自己而轉。年青人為何不可以放開一點呢？一躍之後，問題就會自動消失嗎？同樣的問題，濫藥濫交之後，世界就會變得更美麗呀？

心靈上的空虛，其實一早已經被注滿了愛，只是年青人還察覺不到吧。Jayson，如果您有機會看到這篇文章，只要記得那粒蚊赧、背上的花痕，就明白我們對您的愛是有多深。



~ Lindberg

生多一個的原因

事先聲明，我哋諗都冇諗過。只係前幾日排隊買野食嘅時候，聽到以下一段對話：

「我生第二個，都係為咗第一個咋嘛！」一位年輕媽媽用好堅定嘅語氣講。

佢朋友好贊同咁話：「係呢！好似養狗一樣。養得一隻，梗係想養多一隻陪佢㗎啦。」

「係呀係呀。」

我聽完立即打咗個震。雖然我都視 阿威 同 Julie 如己出，但邊到有講得咁簡單㗎？而最大問題係，點可以將生小朋友嘅責任推卸俾人呢？

我覺得如果計劃生小朋友，一定要出自本身嘅意願。唔好話為咗啲乜，或者為咗邊個。責任一定係自己到。否則日後遇到問題，唔通要搵其他人負責任？

「阿媽，我唔鐘意細佬呀。」

「邊有得唔鐘意？！我生佢都係為咗陪你咋！！！」

小朋友夾唔夾得嚟，總係未知之數。有可能某啲配搭，會有正面嘅影響。例如家姐帶住個細路，或者（九型人格中）二加個九，咁就真係天下太平。但幸福唔係必然。朋友中亦有例子，性格孤僻嘅家姐，遇著一個得人歡喜嘅妹妹，性格就變得更加孤僻。

我仲好記得 Julie 初初加入我哋嘅家庭，阿威好唔開心。有一刻，真係好後悔帶咗 Julie 返嚟。雖然我哋當時嘅出發點，都係搵 Julie 返嚟陪 阿威，但唔通我同 阿威 講：「我哋收養 Julie 都係為咗陪你咋！」既然行出咗第一步，就要做一個盡責嘅父母，努力一齊行落去。

其實我想講嘅係，千祈唔好擅自作太多假設。正所謂：「誰家灶頭無煙火」，所以我覺得作為父母，責任心係好重要。只要有責任心，到時意外生一個又好，計畫生兩、三、四個、甚至一打小朋友都好，都可以係一個健康快樂嘅家庭。



~ Lindberg

各適其適香港小食測試

近日見到網上有個問答遊戲，挑戰對香港小食嘅認識。我嘅得分係：

你的等級﹕大點 你有63分，看來你就是那些最普遍最常見的食家，你不抗拒吃小食，但你也不會太沉迷其中。值得讚賞的是，你不會盲目地吃，你知道自己想要吃什麼，知道自己吃過什麼。我想問題中有一兩款食品/飲品是你的心頭好吧﹖你可知道，有不少地道小食的製作技術快要失傳﹖有機會的話不妨去嘗試去學製作小食吧﹗ 各適其適香港小食測試

大點？！掃嘅幾十年街嘅我，竟然只係得 63 分！好明顯，我實在太過大意。雖然我嘅修行可能唔係好足夠，但一底雞蛋仔有幾多粒，未免實在太難啦！一攞到上手都已經食咗啦，邊到仲會得閑數有幾多粒喎？！

如果想挑戰我嘅成績，就按上面嘅連結玩下啦！



~ Lindberg

李小蛇

Jayson 一直都喜歡說自己是蛇。例如當我們笑他是「傻豬」，他會說：「唔係！我係蛇嚟㗎！」如果我接著說：「哦，唔係傻豬，係傻蛇。 」他會氣忿地說：「唔係傻蛇。係一個字：蛇！」哈哈…

到底這條「蛇」是從那裡來的呢？首先，他生肖不是屬蛇。家中也沒有蛇的玩具，或關於蛇的書本、電視節目等。可能是學校那裡發生過甚麼事情吧。

有一天飲茶的時候。Jayson 媽叫他自己食飯。他回答說：

「我係蛇嚟㗎！」

我倆對望一下，已經忍不住笑。

「您係蛇又點呀？」我們問道。

「蛇冇手㗎。」他回答說。哈哈哈哈…

最後，我們當然沒有讓他奸計得呈。我向他解釋說：「Jayson，有種蛇叫做四腳蛇呀嘛！有手㗎！呵呵呵呵…」他一臉無奈的望著我。自己吃多幾啖之後，便…

唉…

註：「四腳蛇」並非是蛇。而本篇文章叫做《李小蛇》，當然不是我們姓「李」，只是那張相令我聯想起一個人吧。嘻嘻…



~ Lindberg

茹絲葵牛排餐廳

情人節之後一日，我去咗參加 Jayson 媽公司嘅長期服務獎頒獎典禮。有獎攞，當然要慶祝一下。睇完戲之後，去咗食佢最鐘意嘅牛扒。

茹絲葵牛排餐廳 Ruth's Chris Steak House
地址：金鐘金鐘道89號力寶中心地下2&3號舖
電話 ：2522 9090

我哋都好耐冇嚟過呢間餐廳。接過餐牌，發現又加咗價。以前三百幾都有塊扒食，依家要四百幾。

但貴咗都係其次，當食緊嘅時候細心觀察一下，以前唔識食就以為係好野，其實呢到煮牛扒嘅方法，幾乎係最差嘅一種。佢以華氏 1800 度嘅高溫，表示可以煎封牛扒嘅表面。如果大家有煎過牛扒，就應該知道係冇「煎封」呢一回事。肉汁始終都會流出嚟。不過煎香咗，一定可以提升牛扒嘅美味。

但煎牛扒嘅重點除咗係活化啲脂肪，最重要係要保存肉汁。後者其實好簡單，只要煎完塊牛扒之後，俾佢攤凍少少，啲肉汁就自然可以保持（鎖）喺入面，入口自然啖啖肉汁。但喺茹絲葵，佢放塊牛扒上一隻預熱到華氏500度嘅高溫陶磁盤，以作保溫之用。一塊唔靚嘅牛扒，用鐵板端上，可以令食客由頭到尾都食到熱辣辣嘅食物，提升美味程度。但如果係一塊 USDA 頂級牛扒，由於脂肪豐富，但肉汁得唔到冷卻，不停流出落隻碟上面。如果塊肉唔係因為咁靚，講真同啲港式鐵板餐廳差無幾。佢仲要喺塊牛扒上面，加上一湯匙嘅牛油，目的係想喺人客面前做到啲「 咋咋」聲，而且仲可以補充牛扒所失去嘅肉汁。但結果係油上加油，食到最後，碟上一大灘油。乜野食慾都冇晒。真係可謂浪費咗一塊頂級嘅牛扒。

其實煎牛扒真係好簡單。喺屋企煎，塊肉唔好太厚，十至十二安士已經好好。牛扒預先放喺室溫半個鐘，煎之前先用鹽同胡椒去調味。大火煎香一面，反轉。然後當牛扒煎到自己想要嘅生熟程度之後，就可以離火。離火等兩分鐘先至上碟。咁就可以享用到一塊美味嘅牛扒啦。



~ Lindberg

Crocs Blogger Event 之 自製 Jibbitz 飾物

Crocs 嘅 Jibbitz，款色多，顏色又豐富。原來除咗可以裝飾對鞋之外，仲可以用嚟自製小飾物。產品介紹完之後，Kawai 姐姐為每人預備咗一盒材料：

佢叫小朋友選擇一個自己鐘意嘅 Jibbitz。Jayson 選擇咗…雪條。

材料可以做幾款小飾物。我哋男仔就整個飾針啦。而做法都好簡單。做個 B 嘅面，A 嘅底，縫合起嚟就得啦。咁簡單嘅工作，就留番俾 Jayson 媽啦。

「係唔係咁呀，媽咪？」

「等我襯下色先…」

隔離個姐姐好熟口面呢？咪網友瀅瀅囉。

睇到以下呢個情景，我突然想諗番一首詩：

「慈母手中線，遊子身上衣。臨行密密縫，意恐遲遲歸。誰言寸草心，報得三春暉？」

（突然覺得自己好有文彩。呵呵呵…）

所有家長都好忙碌。小朋友唔係個個都對做手工有興趣。Jayson 肯玩足全程，真係有賴色彩繽紛嘅 Jibbitz。

Jayson 兩母子嘅作品：

估唔到 Jayson 媽啲針紙都幾好。我幾鐘意佢圍邊啲圈圈，熊貓俠果然並非浪得虛名。

玩完之後，除咗有豐富茶點招待之外，每人仲有一大袋禮物。又玩又食又拎，真係有啲唔係幾好意思。好彩到最後，Jayson 都肯去多謝下啲姐姐。唔係就真係醜死怪喇。

最後，當然要影番張大合照啦。真係好感激 Crocs 嘅招待，同 Kawai 姐姐嘅悉心指導，當然最重要係有 Racepoint Group 嘅 Stephanie 搵我哋參加啦。多謝多謝！

回家之後，我幫 Jayson 對舊鞋裝飾一下。舊鞋果然同 Duet 好唔同。要插個 Jibbitz 入去，就分辨到新款嘅 Duet 係軟熟幾多。最後，即使我用咗佢哋教嘅方法去插，都要用九牛二虎之力先插到入去。

睇嚟遲啲都係買過對新款先得啦。



~ Lindberg

Crocs Blogger Event 之 新鞋介紹

今次好榮幸得到 Crocs 嘅邀請，參加一場介紹佢哋新產品嘅博客活動。上到佢哋嘅寫字樓，俾個維港靚景觀嚇到唔記得影相。喺呢到返工，一定特別醒神。哈哈…

Jayson 唔多需要熱身，但唔係好理會啲姐姐。唉… 但因為近排佢玩 T2-3D，所以我哋都冇佢乎。

Crocs 嘅姐姐首先向我哋介紹佢哋嘅新產品。雖然 Jayson 都有三對 Crocs 嘅鞋，但我哋對佢都冇乜認識。聽聞佢啱腳型，又見幾方便，於是就叫做人著我著啦。原來 Crocs 嘅出發點都幾「高檔次」喎。佢所用嘅物料，喺俾啲人上游艇，鞋底唔怕甩色整污漕架船。嘩…

姐姐都好醒目。為咗安撫班小朋友，攞出一大碗 Jibbitz 俾啲小朋友玩。咁講野嘅時候，就唔怕小朋友叫救命啦。

Jibbitz 可以插入隻 Crocs 入面，除咗係裝飾之外，仲有識別嘅作用。去到泳池學游水，都唔怕同其他小朋友嘅鞋掉亂啦。

新款鞋中，有類似 Converse 嘅款式，好適合大人著。而同 Converse 嘅最大分別，係輕…超輕。

如果 Rick Riordan 喺寫 《Percy Jackson - The Lightning Thief》之前見到呢對鞋，Percy Jackson 著嗰對 Converse 一定變咗 Crocs。對鞋輕到難以致信，Jayson 媽攞咗幾次上手，回眸報以一個必買嘅表情。

之後係主角 Duet。相對舊款「一舊膠」，Duet 變咗「兩舊」。底膠硬，有保護作用。面膠軟，有舒適感覺。

摸上手，有好明顯嘅分別。雖然冇舊鞋喺手作比較，新鞋個面真係軟好多。相信會幾好著。

產品介紹完，就係遊戲時間啦。Kawai 姐姐教我哋用 Jibbitz 整飾物。

（待續…）



~ Lindberg

另外版本的《ABC Song》

都有一段日子，沒表演過 Jayson 的歌聲。因為他來來去去都是唱那兩三首。但為了要跟戰隊其他成員於網上交流，只好獻醜啦。

Jayson 跟韓國的 Wonder Girls 組合一樣，唱來唱去都是同一首歌，只是不同的版本。

小朋友過了兩歲之後，原以為 T2 已經完結，可以有點好的日子過。誰知緊接的，竟然是 T2-3D（Terrible-Two-Three-Devil）。由表達能力不足以致亂發脾氣，變成了堅持己見，不惜歪曲事實的亂發脾氣。每天也活在「砂糖」和「臭屎」之間。

以「四仔」為藍本，我經常跟 Jayson 說，發脾氣是可以。因為沒有地方去宣泄情感，對我們這些「四仔」是很危險。但無理取鬧是不可以接受，因為他已經（大個仔）聽得懂我們的說話，要開始明白事理了。要別人理會您，亦要先學會尊重別人。希望持之以恆，慢慢會步向光明吧。

~ Lindberg

食之無味

我懷疑我同「處女座 」嘅沙加有仇。今年才過咗三個月，每個月都要中佢嗰招「天舞寶輪」。對於唔係好認識《聖鬥士》嘅朋友，黃金聖鬥士仙女座沙加 其中一招絕招「天舞寶輪」，可以用嚟剝奪對手嘅六大感官。而我被佢剝奪咗…味覺。

年頭中咗流感，冇咗嗅覺，只係食到甜酸苦辣。上個月俾炸雞翼入面嘅滾油焯到條脷。起初以為少事，點知足足一個月食唔出鹹甜。剛剛先好番，前幾日又因為公司其中一間餐廳關門大吉，可能清場嘅時候太多灰塵，搞到個鼻又衰咗。再次食之無味。唉…

而另一邊箱，近來工作上，都一樣乏味。業主加租，人工越來越高，又無人願意入行，即使餐廳有生意，但都非常難做。

我記得好耐以前有個業主同我講過，佢話如果俾佢知道可以搾到個租客，有乜理由唔搾到盡呀？如果搾到一萬，個舖位可以賣多五百萬，一千蚊都同你搾到盡呀！望住佢，雖然好無奈，但我都好欣賞佢嘅坦白。結果，佢真係搾得好盡，然後賣咗間舖。新業主同新租客後來先知道中咗招。

有令人乏味嘅業主，亦都有令人乏味嘅租客。嗰個就係我老闆。最近餐廳關門大吉嘅時候，佢貼咗張字條喺門口，大概嘅意思係「業主要我哋俾好多錢，所以我哋無奈地要結業喇。」臨尾攞彩嘅行為，我覺得好幼稚。其實呢個業主嘅要求唔算過份。但奈何舖位太大，我哋點都做唔夠數，唯有交番個舖位俾人。仲要害我之後要同業主解釋點解講啲咁嘅說話，真係樣衰到爆。

慶幸嘅係最低工資對我哋無影響。但近日聽到啲關於休息日及飯鐘嘅爭議，都感到好無奈。其實我唔贊成立法，因為我覺得市場「應該」可以調節得到。而且有啲職位，真係要喺某個低工資水平先可以圍到皮，亦都會有人唔介意用佢哋多餘嘅時間，去換取呢啲比較微薄嘅收入。如果強行要一個最低工資，某啲職位就會無咗。嗰啲人連賺取微薄收入嘅機會都冇埋。要等達到另一個平衡點，呢啲工作先會慢慢走出嚟。但到時可能又要上調最低工資。

但奈何部份工種，市場供求達唔到一個合理嘅調節，咁唯有立法加以干預啦。（所以我係唔贊成，但支持立法。）近日關於某茶餐廳嘅言論，作為資方，我都感到幾有口難言。聽見電台評論員話（如果我冇記錯）餐廳有二千個員工，其中只有四百個員工達唔到要求。做乜唔加俾佢哋，要做啲改合約嘅小動作呢？呢位電台嘅朋友，可能對商業社會唔係好了解。 加人工，永遠唔係一個人嘅事。當呢四百個人加咗人工，佢哋對上嗰四百個一定要加。到頭來，所有餐廳基層員工都要加人工。都咪話唔驚㗎。所以茶餐廳咁樣做，我只可以付諸同情。

正所謂食得鹹魚抵得渴。但我食之無味… 條脷幾時先好番呢？



~ Lindberg