韓國之旅：第二日傳統韓燒篇

離開咗首爾搭，家姐安排咗到一間歷史悠久嘅餐廳，享用一頓傳統嘅韓式燒烤午餐。

餐廳名字叫做 Samwon Garden（三元花園），開業三十幾年。據稱店主嘅女，仲係前職業高爾夫球好手朴芷垠（Grace Park）。成間餐廳可以坐 1,200 人！超誇張地大！分新舊兩翼。舊嗰邊裝飾得好有古色古香，而我哋就被安排到新翼嘅大房，非常舒適嘅呢。

可能因為導遊已經預早幫我哋打電話通知咗餐廳，枱面已經放滿咗前菜小食。但除此之外，只見枱面上有一個洞，打開下面見唔到有爐具。雖然大家已經好肚餓，但當遇上有 Wifi 嘅地方，任何嘢都可以拋諸腦後，上網最緊要…

枱面除咗多碟（唔飽肚嘅）前菜之外，就只有一碟洋蔥「沙律」。侍應小姐淋上辣汁，色彩非常鮮豔。但對於一個唔食蔥嘅人，叫我點放入口呢。阿媽成日話我，食蔥先會聰明㗎。可惜對於一個自問已經好聰明嘅人，呢句說話只會帶來反效果。

不過除咗大褸之後，真係有啲飢寒交迫。再冇嘢落肚的話，我唔會排除食咗「家明」。所以我嘗試放一條洋蔥入口。辣汁嘅味道非常醒神，新鮮嘅洋蔥清新之餘，佢嘅辣味仲被辣汁蓋過咗，剩底嘅只有洋蔥嘅甜味。貶下眼，整條洋蔥沙律俾我食哂。好神奇呀！
等咗一陣，房間外面轉來擾攘嘅聲音。嘩…

唔怪得之冇爐具啦！原來係用碳火！喺香港係冇可能見到嘅事。我對餐飯嘅期望又提高咗。

「熊熊聖火…憐我苦痛多…有得食未呀？！」 

碳爐除咗可以用嚟煮食，亦都可以用嚟取暖。

家姐隨意叫咗啲食物。首先有一班「牛魔王」喜歡嘅燒牛肋骨。

碳火燒自然有碳火嘅風味。不過韓國牛肉有啲筋，唔算非常好食。反而香港食到嗰啲牛肉會嫩啲。

反而平啲嘅燒牛肉仲好味。佢個汁真係可以餸幾碗白飯！雖然牛肉比較瘦，但都唔會韌。大家都覺得比燒牛肋骨好味。

生蟹！我唔知呢個叫咩名堂，但對於一個乙型肝炎帶箘者，感覺就好似超人見到氪氣石一樣。大哥自持前排中過甲型肝炎唔會再中，好勇敢地食咗一舊。據形容，滑潺潺蟹肉，隨住辣汁滑入口。味道幾好，但即使有辣汁「殺箘」，大家都無謂「冒險」。佢問過侍應之後，就放喺爐上燒一舊俾我。但燒一舊咁「立體」嘅蟹肉係好需要時間。燒咗好耐之後，我一口咬落去都仲係未煮熟。半生熟嘅蟹，感覺非常曖昧。

石頭飯（粥）。米係用糯米，好香好煙韌。雖然之前啲嘢咁濃味，都仲可以清楚聞到啲飯香。食哂啲飯之後，仲可以倒啲熱水入去，將飯焦煮食粥。冬天食番碗都幾舒服。

甜品係紅豆粥。起初我以為係紅豆沙，心理上覺得佢係甜嘅。其實濃濃嘅紅豆粥係鹹鹹地嘅。據說韓國人傳統會在冬至時煮嚟食。

可能言語不通嘅關系，即使有導遊嘅翻譯，點菜嘅數量重複咗。雖然最後都食得哂，但埋單都幾嚇人，每人平均要大約港幣三百大元。而且呢到除咗牛肉之外，竟然冇其他肉類選擇！冇豬冇雞！搞到細家姐要帶唔食得牛肉嘅姪女去到另一間餐廳食。真係比較遺撼。

午飯後，我哋去番餐廳外面嘅亭園行下。呢到除咗有水池瀑布裝飾，仲有設備供客人戶外燒烤。當日較早嘅時候，呢到就舉行咗一場婚禮。非常有氣勢呢！

成班細路來一張合照先！

由細至大再來一張！

水池都凍到結咗冰。班大細路搵啲石頭掉落水池上，「測試」一下冰塊嘅厚度。作為長輩，好應該喝止佢哋。但事實上，當然係趁未俾人發現，叫啲細嘅去搵舊再大啲嘅石頭嚟啦。

影咗一陣相，突然落起雪來！大家都興奮莫名。我哋係第二次見落雪。好多年前嘅蜜月旅行，我哋上雪山遇過一次。嗰次好大風雪，乜都睇唔到。除咗唔覺得靚之外，仲俾打到有啲痛添。今次見啲雪慢慢飄落嚟，真係好靚呀！

喺我手上，仲俾我搵到一朵完整嘅雪花。真係好靚喎！

「爸爸，雪呀！」小小嘅公園變成咗飄雪樂園，大家都玩到唔捨得走。

「啲雪唔食得㗎！！！」雖然係咁講，但自己都忍唔住學班細路向住個天張開口。好味…

食飽飯之後，我哋就去行街和睇表演。

（待續…）


~ Lindberg

Jayson 的一百個胃

有一晚，Jayson 媽買了一碗北角馳名的牛雜回家。Jayson 問那些是甚麼，我們說那些是牛的肉臟，並借機教他牛有四個胃，消化食物的方法，及吸收營養的重要性。

我們經常笑 Jayson 說他有多個胃。這一刻說已經很飽很飽，下一刻有甜品的時候又突然有空要吃，之後吃生果又可以吃多幾碗飯的份量！哈哈…

這天的午飯，Jayson 突然跟我說：

「我有一百個胃㗎！」

「咁多？！」我扮驚訝地問。

「啲食物呢…首先跌落第一個胃，然後用好似食（迴轉）壽司嗰啲帶，送去第二個胃…。」

「哦，然後一路送到第一百個胃呀？」

「係呀。去到最下面就有部X-光機。」他指著小腹的位置說。

「X-光機？！」

「係呀。不過係假嘅。」他帶著認真得可愛的語氣說，就好似跟我說一個天大的秘密一樣。

「哦…原來係咁。」我已經忍不住笑。

「如果照到係『汁』嚟呢，就會送去我個啫啫到，然後痾出嚟囉。咁其他嗰啲呢…就去到後面…」

「汁？！」哈哈哈… 我當場笑到噴飯。

雖然實在很搞笑，但我很欣賞他有這個X-光機的想法。笑到流完眼水之後，我跟他詳細解釋牛的四個胃是如何運作，裡面並沒有輸送帶。（警告：吃飯時最好不要談反芻。我扮那動作時，險些真的反芻出來…。）

下次煲陳腎湯，再跟他解釋那些「汁」是如何處理吧。哈哈哈哈哈…

~ Lindberg

韓國之旅：第二日觀光篇

第二日，我哋一早起身，開始家姐安排嘅兩日本地遊。呢日天暗暗冇落雪，只係負幾度。希望唔會太凍啦。

但出門之前，點都要著夠衫！防寒底衫、羊毛背心底衫、厚衛衣、一條 Uniqlo 嘅保暖褲、帽（蓋過雙耳）、頸巾、手套、淘寶買嘅鞋（RMB38），再加一件厚羽絨，應該夠暖呱？

聽朋友講，韓國嘅冬天，室外凍但室內熱。所以千祈唔好著得太多好難除嘅衫，否則室內會熱死。入面薄薄地，配一件厚褸就得。但實際情況跟想象中有啲唔同，室內又唔係講到咁暖喎。可能近年注重「減碳排放」，所以除咗酒店房間有 25 度之外，其他都唔會話暖到好熱。旅遊巴士上都唔算好暖，直至冇乜著衫嘅大哥嗌凍，巴士先變成超熱！

落到街，Jayson 冇叫太熱，我估啲衫都唔會太厚。而嗰條所謂保暖褲，我可以話俾大家知，係冇乜用㗎！不過我估都好過著牛仔褲。

第一站係坐纜車上南山公園，參觀首爾最高嘅首爾塔。

落車之後要行一小段路。沿途裝飾用嘅花，竟然發現有椰菜！我極之有理由相信佢有戰略性用途。萬一打起仗上嚟，隨街都可以開餐呀嘛。

難得有一張冇電燈膽嘅合照！

從塔下面望上去都覺得幾高喎。

塔下面有一個小廣場，欄杆上有各式各樣嘅鎖，上面畫滿心心圖案，場面非常壯觀！除咗有多款唔同嘅鎖，仲有好多都係花心思，自己加工嘅呢。

據理解，戀人們嚟到呢到，一齊扣上「愛情鎖」，然後將鎖匙拋向欄杆後嘅山下。咁就可以鎖住對方一世，永遠相愛啦。除咗鎖之外，我仲見有電話殼、單車鏈等…。

一幕幕嘅感人場面，立即呈現眼前。女子為這段戀情，花盡心思去妝飾這個鎖，然後拉著男朋友上山。男子無助地被拖行，在地上畫出的一條條指痕，清楚可以見得到。鎖扣上了，鎖匙被拋到老遠的山下，擊中另一位被拉上山的受害者。寒風中嘅首爾塔，男子面向遙遠的山腳，目睹自由離他而去。

我唔知道呢個「愛情鎖」有冇效，只知道亂拋垃圾係會罰錢㗎（隔離真係有個警告牌）。

可能呢到都真係一個拍拖勝地。除咗有上面咁可愛嘅欄杆，仲有一張供戀人坐嘅特製長椅，但當然唔係佢哋咁坐法啦。

塔入面有一個玩具熊博物館。因為大家都冇乜興趣，所以冇入到去。直接上塔頂觀光。

高速電梯嘅天花係一部大電視，播住直送我哋上太空嘅短片。如果俾宇宙大王見到，佢一定會以為夢想成真。

塔頂好寬敞，仲有賣精品及化妝品嘅店舖。

但上嚟嘅重點，當然係嚟睇風景啦。

「Jayson，香港喺呢邊呀！」

呢日嘅能見度麻麻，乜都睇唔到。不過一大班人去玩，去到邊都可以玩一大餐。而我哋有人照顧 Jayson，所以整個行程都輕鬆好多。

落山嘅時候，我哋選擇自己慢慢行，沿途睇下風景。

啲雪唔知係幾耐之前落嘅。

薄薄一片白雪，都幾靚喎！

點解我姐夫會咁低能㗎…？！但正因為咁低能，所以深得侄仔們愛戴。

離開南山公園，下一個節目係食傳統韓式燒烤，市內觀光，及睇一個好好睇嘅表演。

（待續…）

~ Lindberg

小一面試最終回

上星期六，我們懷著交雜的心情（Jayson 輕鬆，我們緊張）去到某小學，進行最後一個小一入學面試。能夠進行第二次面試，我們都感到非常驚喜和興奮，因為我真的很喜歡這間學校。

雖然都有點著緊，但這兩個月來，我們並沒有替 Jayson 進行甚麼特訓，每天如常作息。只有暗地裡灌輸一點常識，問他一些問題刺激思考，和做一些手工練習。不想讓他感到壓力，臨面試前的一個星期，才給他知道為何爸爸會喜歡這間學校，和將會跟一個很好的校長進行面試。

事實上，校長真的很好人，面試亦很簡單。可惜 Jayson 嚴重失準。

我們坐在會見室門外，可以清楚看見整個會面的情況。校長只是簡單地問他學校和家裡有甚麼玩具。等了很久，Jayson 也答不出來。除了車之外，甚麼也說不出。明明入房前還狀態大勇，叫校長和介紹自己也精神奕奕，為何會答不出來呢？之後校長問他放假時會做甚麼，他說會「陪爸爸媽媽玩」。校長笑他說「唔係倒轉，爸爸媽媽陪你玩咩？」問他玩甚麼時，又是答不出來。其實之前我也問過他這兩條問題，那時也會答玩「飛行棋」、「Monopoly」等。即使他答自製的「Mario Party 9」也好呀。莫非緊張到腦海中一片空白？

最後校長叫他做一些收拾的工作，然後就完結了。憑我的觀察，一切都完結了。

我們掩蓋心中的失望，興奮地從校長接過 Jayson，並稱贊了他幾句，然後轉身離開了學校。

如果因為問題太難，他答不到，我們亦不會太難過。而另一方面，即使明知他比較怕陌生人，也不至於差到這個情況。但我們知道決不能責怪他，因為對他來說，這一切都是超乎一個五歲小孩應該做的事。一路上，只有認同並嘉許他的努力。

但行到了小巴站，我們終忍於不住問他為何答不出這麼簡單的問題。

「我諗緊呀嘛。」Jayson 回答說。

「諗咁耐？屋企有咁多玩具喎。」

「咁我諗緊 Mr. Potato Head 中文係乜呀嘛。」

「天啊！唔識中文咪講英文囉。校長識聽㗎！」

那一刻，我就似「穿牆兄」一樣，向天噴出了十九幾兩血。

「咁屋企嘅玩具唔識得講，學校嘅玩具您都應該識呱？」

「咁 Seesaw 中文係乜呀？」他用精靈的語氣反問我。

小巴上，Jayson 在媽咪大腿上睡著了。媽咪暗暗落淚。希望越大，失望越大。雖然 Jayson 今次可能是「衰得唔抵」，但我也承認他是欠缺一點自信。多一點自信和溝通能力，應該可以刻服得到。這麼跟其他小朋友比下去，也應該甘心。

我經常跟 Jayson 說，機會是留給有準備的人。那今次的失敗，是否我們準備不足？可能是吧。最起碼，我們沒想到他會有這個「語言」的問題。但如果這次面試是早兩個月前舉行，我反而有信心他會勝任。這一、兩個月來，我觀察到進入了另一個階段。學習多了反而多了顧慮，功課上的犯錯也多了。有些方面進步了，但也有些方面退步了。但奈何一時三刻要整體改進，又談何容易呢。只好嘆一聲：時不利兮…

下小巴的時候，我們都已收拾好心情。很多東西都不能強求。希望之後的「大抽獎」會比較幸運吧！

~ Lindberg

韓國之旅：初到貴境

今次韓國之旅，真係可以稱得上係「寒國之旅」。真係從未試過去啲咁凍嘅地方。當年初屋企人話要聖誕後一齊去首爾嘅時候，Jayson 媽十萬個不願意，因為怕 Jayson 會冷親。但經阿哥家姐不停遊說，加上我太少機會陪屋企人，所以我最後都堅持要去。結果，凍係真係凍啲，但真係玩得好開心！

「忌廉哥呀！」（呢間旅行社喺啲咁嘅地方賣啲咁嘅廣告真係收效。）

既然要去，就要好好準備一下。禦寒衣物方面，即使未算係滑雪級裝備，但已經買都買到窮！除此之外，聽朋友嘅提點，因為暖氣好乾燥，護膚保濕用品都帶咗一大堆。

抵埗已經差不多係晚上六點，我哋坐機場巴士去酒店。因為言語非常不通，所以搵到車站嘅時候，剛剛走咗一班車。行出室外感受一下零度以下嘅氣溫，初初都覺得好興奮刺激，但企多一陣就知味道。

既然下一班巴士要等二十分鐘，Jayson 就話要去買個冬甩醫肚。

「我最鐘意朱古力！」

大約四十五分鐘嘅車程，就到達我哋住嘅酒店：「Lotte Hotel Seoul」。上一次嚟首爾（當時叫漢城），已經係二十年前嘅事。印象中比香港落後好多。二十年過後，香港好似都係沿地踏步，人哋就跑過頭好遠好遠。唉…

酒店新翼感覺好高級，櫃台設置喺 14 樓。據稱旅行社幫我哋要求咗高啲嘅層數，入到去又真係唔錯喎！

其實係因為我哋決定得太遲，最後要俾貴機票及房間。但為咗跟屋企人相聚，冇計得咁多啦。

Jayson 見到張大床就最興奮。而我就對個廁所比較有興趣，因為嚟緊五晚都會喺度「辦公」㗎嘛…。

喺入酒店嘅時候，我哋見到地上有啲雪。Jayson 好期待落雪，更期待啲家姐嚟同佢玩。

窗外嘅景色都好靚喎（之後元旦仲發現有煙花睇）！呢間旅行社果然安排得唔錯。

當我哋還未安頓好，大家姐就打電話嚟。佢哋早兩日已經到咗韓國，呢晚大部份人都出咗去食飯行街，未返酒店。於是，我哋就自己去咗酒店附近嘅明洞食晚飯。

我哋選擇咗一間人比較多嘅麵店，打算隨便叫個餃子麵、石頭飯、壽司卷（？）。誰知入到去先見到枱面嗰張落單紙，冇一個字睇得明！但好彩佢有一份翻譯咗成英文嘅餐牌。不過我哋都要慢慢對番個名，然後先可以劃落張單到。正當對到眼都花嘅時候，店員行過嚟，用普通話幫我哋。不禁喺心裡講咗句：「識得中文唔早講！」

餃子麵嘅餃子好味。兩粒唔辣、兩粒辣。壽司卷入面有牛肉，跟五色配搭 （蛋、紅蘿蔔、節瓜等等）。石頭飯都好味。Jayson 每樣都食少少，之後我先落辣，享受一下真正韓國嘅風味。雖然只係一個普通嘅小店，但味道都好唔錯。正當感動可以隨便都食到好味嘅食物之時，其實我仲未發現，呢個只係惡夢嘅開始…。

因為遲出門嘅關系，食完晚飯大概已經十點。大部份店舖已經關門。我哋於是就隨便四圍行下街。

俾我見到有小食賣，當然要入啲貨啦。實行手指指，樣樣試啲。

魷魚好味，栗子好大粒但味道普通，燒八爪魚乾超好味！可恨冇買啤酒呀！

可能身體未真正感覺到啲氣溫嘅關系，第一晚又唔算好凍喎。之後去咗便利店，買咗幾個「希望唔辣但原來點都係辣」嘅杯麵。網友提及嘅香蕉牛奶，呢晚只係搵到士多啤梨版。都幾好味喎！

韓國比香港快一個鐘。返到酒店，洗完白白冇嘢做，就最好上網做功課啦！嘩哈哈哈哈…

舟車勞頓，Jayson 好快就瞓著。跟佢一齊瞓，最麻煩就係佢唔鐘意冚被冚到腳。好彩房間有暖氣，溫度設定咗喺 25C。於是佢就瞓喺被上面，然後冚上大浴巾。如果唔係咁，我哋就一定會凍死囉…

而我去韓國之前已經有啲感冒喉嚨痛。就係靠呢兩支嘢，先確保我有覺好瞓。

 （待續…）

~ Lindberg