玩完一輪飄雪之後，我哋就上番旅遊巴士。導遊話帶我哋去一個大學區行下。一聽到要去大學區，人都精神哂！首爾有一間大學，一直都想去見識一下。
弘益？！咩嚟㗎？！乜唔係梨花園女子大學咩？！天啊！仲諗住見到人山人海嘅女子大學生添。唉…
時間接近下午五點，條街都開始多人。其實嚟這個大學區係有兩個原因。第一，今晚我哋要睇一場表演，劇院就喺呢度附近。第二，鄰近大學，自然有好多為年青人而設嘅店舖可以參觀一下。
飄雪下行街都幾浪漫㗎。不過當地人就會擔遮囉，係我哋先會貪得意，唔理得成身濕哂啫。
我哋就係要行入呢條街。
裡面啲店舖果然好有特色。
除咗商店，呢到仲有好多特色咖啡店，甜品店。而令我感到最出奇嘅係有唔少茶店。原來韓國人都鐘意飲茶，啲綠茶仲要好好飲喎。之後幾日都有機會去試下。
年青人嘅世界，當然唔少得有扮靚嘅地方。姐夫名正言順做咗「帶頭大哥」，帶領一班細路去咗剪頭髮！佢話想剪一個韓國型男頭喎。但剪完一個「快」頭之後，雖然幾好睇，但唔覺得似韓國明星囉。我覺得佢原本嗰個冬菇頭仲似！不過大學區理髮嘅價錢都算相宜，大約港幣 $150 就有交易。
其他人冇嘢做，見仲有大半個鐘先有睇表演，睇完表演先有飯食，於是就四圍行，搵下嘢食。
好紅嘅炒年糕呀！都係唔夠膽試…
好多年前嚟韓國，印象中冇乜街頭小食。試過一啲麵包類嘅物體，唔係咁好食。但咁多年之後，估唔到條街都有得「掃」下喎。呢舊嘢真係好好味。我唔知叫做乜。外圍係啲鬆軟嘅酥皮蛋糕，中間係一個剛剛熟嘅蛋黃。最可惜係我睇唔到佢點樣喺一塊大鐵板上，由生煮到熟。熱辣辣真係好正！大約港幣 $7.5 一舊。
1997 年至今，已經有十幾年歷史嘅表演。大家可以想象為百老匯嘅歌舞劇，長做長有。一個半鐘頭之內，充滿咗：敲擊樂（並非真係好似佢個中文名咁「亂打」）、戲劇、攪笑、性感（如果個個韓國女廚師，都好似台上嗰個女仔咁好身材，制服仲要咁少布，我會極力提議公司去韓國開餐廳！）、傳統國術、魔術等等。唯一冇嘅就係對白！所以全世界嘅人都睇得明。
《Nanta》嘅表演場地唔止一個。而且表演「團隊」有成十隊咁多！據稱不同隊伍都有各自嘅捧場客。真係非常厲害！Jayson 由頭睇到尾，由頭笑到落尾。到今時今日都同我哋講番個表演啲嘢。可想而知，個表演有幾好睇喇。
睇完表演之後，就到附近食燒魚。導遊帶我哋行到呢間得獎老店：「YANG HWI-JA 燉魚（弘大店）」。裡面嘅裝潢非常似飯堂。冇暖氣，只有幾支暖燈。廁所喺室外，我除咗大褸行出去小解，差啲凍到返唔到嚟！
我覺得韓國啲餐廳好得意，賣嗰樣嘢就淨係得嗰樣賣！呢晚晚飯係一人一條燒鯖魚。起初見到一枱十幾條魚都有啲目定口呆，因為我對燒鯖魚嘅興趣不大。點知係超好食！條魚超肥美，好多肉汁！係我有生以來，食過最好味嘅鯖魚！
另一方面，我發現韓國啲米飯真係好好食。一粒粒嘅珍珠米，煮得彈牙之餘仲有飯香。不單只呢碗紅豆飯好味，其他食店煲嘅飯都出奇地好食。點解喺香港食唔到㗎？！
充實嘅一天完結之後，大家都好期待第二日上雪山玩雪。
~ Lindberg
可惜韓國素食好少,所以去了一次啊.
回覆刪除
回覆刪除又真係唔多覺有咩素食喎…