韓國之旅：第二日觀光篇

第二日，我哋一早起身，開始家姐安排嘅兩日本地遊。呢日天暗暗冇落雪，只係負幾度。希望唔會太凍啦。

但出門之前，點都要著夠衫！防寒底衫、羊毛背心底衫、厚衛衣、一條 Uniqlo 嘅保暖褲、帽（蓋過雙耳）、頸巾、手套、淘寶買嘅鞋（RMB38），再加一件厚羽絨，應該夠暖呱？

聽朋友講，韓國嘅冬天，室外凍但室內熱。所以千祈唔好著得太多好難除嘅衫，否則室內會熱死。入面薄薄地，配一件厚褸就得。但實際情況跟想象中有啲唔同，室內又唔係講到咁暖喎。可能近年注重「減碳排放」，所以除咗酒店房間有 25 度之外，其他都唔會話暖到好熱。旅遊巴士上都唔算好暖，直至冇乜著衫嘅大哥嗌凍，巴士先變成超熱！

落到街，Jayson 冇叫太熱，我估啲衫都唔會太厚。而嗰條所謂保暖褲，我可以話俾大家知，係冇乜用㗎！不過我估都好過著牛仔褲。

第一站係坐纜車上南山公園，參觀首爾最高嘅首爾塔。

落車之後要行一小段路。沿途裝飾用嘅花，竟然發現有椰菜！我極之有理由相信佢有戰略性用途。萬一打起仗上嚟，隨街都可以開餐呀嘛。

難得有一張冇電燈膽嘅合照！

從塔下面望上去都覺得幾高喎。

塔下面有一個小廣場，欄杆上有各式各樣嘅鎖，上面畫滿心心圖案，場面非常壯觀！除咗有多款唔同嘅鎖，仲有好多都係花心思，自己加工嘅呢。

據理解，戀人們嚟到呢到，一齊扣上「愛情鎖」，然後將鎖匙拋向欄杆後嘅山下。咁就可以鎖住對方一世，永遠相愛啦。除咗鎖之外，我仲見有電話殼、單車鏈等…。

一幕幕嘅感人場面，立即呈現眼前。女子為這段戀情，花盡心思去妝飾這個鎖，然後拉著男朋友上山。男子無助地被拖行，在地上畫出的一條條指痕，清楚可以見得到。鎖扣上了，鎖匙被拋到老遠的山下，擊中另一位被拉上山的受害者。寒風中嘅首爾塔，男子面向遙遠的山腳，目睹自由離他而去。

我唔知道呢個「愛情鎖」有冇效，只知道亂拋垃圾係會罰錢㗎（隔離真係有個警告牌）。

可能呢到都真係一個拍拖勝地。除咗有上面咁可愛嘅欄杆，仲有一張供戀人坐嘅特製長椅，但當然唔係佢哋咁坐法啦。

塔入面有一個玩具熊博物館。因為大家都冇乜興趣，所以冇入到去。直接上塔頂觀光。

高速電梯嘅天花係一部大電視，播住直送我哋上太空嘅短片。如果俾宇宙大王見到，佢一定會以為夢想成真。

塔頂好寬敞，仲有賣精品及化妝品嘅店舖。

但上嚟嘅重點，當然係嚟睇風景啦。

「Jayson，香港喺呢邊呀！」

呢日嘅能見度麻麻，乜都睇唔到。不過一大班人去玩，去到邊都可以玩一大餐。而我哋有人照顧 Jayson，所以整個行程都輕鬆好多。

落山嘅時候，我哋選擇自己慢慢行，沿途睇下風景。

啲雪唔知係幾耐之前落嘅。

薄薄一片白雪，都幾靚喎！

點解我姐夫會咁低能㗎…？！但正因為咁低能，所以深得侄仔們愛戴。

離開南山公園，下一個節目係食傳統韓式燒烤，市內觀光，及睇一個好好睇嘅表演。

（待續…）

~ Lindberg