迪士尼兩天團 之 史迪仔反轉大街騷

吃過早餐之後，二哥說他聽聞東涌有個名店倉。我早兩個月曾經到那裡行過，覺得對於他們這班購物狂，都不失為一個去去處。所以我們便向東涌出發！

坐地鐵由迪士尼公園到東涌東薈城名店倉真的很快捷。去到之後，大家分頭四出搶購。其實我都不知道平了多少，但見他們買得高興，就由得他們瘋狂一點吧。

因為吃了一頓豐富的早餐，午餐便簡簡單單在美食廣場解決。

二哥說：「都唔知邊條友，將支匙羹亂咁放。放落啲辣椒醬之後就放落啲蠔油到。搞到我碟油菜辣晒。」

我答：「咁可能人地一時唔小心啫。」

「俾著我知道係邊個，佢就知死…」

「一碟菜啫。唔洗死咁大鑊呀？」

「你做乜係咁幫住佢？唔通…」

「唔係… 我都話可能啫…」

「我覺得似係你喎！」

「唔係… 邊係呢？」

之後我們再回到樂園。回程時，有外國遊客問我們到那裡買這麼多好東西。其實地鐵應該推廣一下，因為對於迪士尼酒店的住客，真的是不錯的行程。

入到樂園，Jayson 兩位姐姐四圍找公主影相和簽名。

然後我們便去看當日才新推出的「史迪仔反轉大街騷」。表演在美國小鎮大街進行。有五輪巡遊車，載著五位卡通人物，率領一眾僂儸，於強勁的音樂之下，跟遊人勁歌熱舞。

而反斗的史迪仔，當然是最好不過的角色。

雖然天氣炎熱，但並無減退大家的熱情。身體每個細胞都跟隨節拍躍動。流一身熱汗，再熱一點也可以吧！

我們很喜歡史迪仔，因為他的頑皮本色，真的很搞笑可愛。我最愛扮 Lilo 說：「San Franciso…」

看完了那個騷之後，我們便回酒店吃晚飯。好萊塢酒店的自助晚餐有特價，成人都只是 $198 一位，有魚生蟹腳等。質素都不錯，只是人手不夠，沒有人收碟倒水。

「我又有包包食！好野！」

晚飯過後，其他人上房休息。而我們便起程回家了。見一家人都玩得這麼盡興，這二天的假期真的過得不錯。在通行證過期之前，一定要再來住一晚。



~ Lindberg

Dancing after The Rain

下雨過後，婆婆屋外的平台總會有些水灘。婆婆就會讓 Jayson 穿起涼鞋，在水中踏步。

自從交了部 f50fd 給公公婆婆之後，我們多了很多小片段看。亦令我們更加明白 Jayson。例如為何一見到水灘，就要跑過去。哈哈哈…

但婆婆說 Jayson 這幾天又不喜歡踏水了。小朋友還真的五時花、六時變。

我們現在還在物色一件雨衣，去配合之前買的水鞋。穿起一套四圍走，一定很有趣。



~ Lindberg

家長講座 x 語言障礙

上星期五晚，我地去咗 Jayson 學校舉辦嘅家長講座。起初以為只係講一啲上課安排，但原來主要係教啲家長，如何幫啲小朋友去適應學校嘅生活。原來起初會有好多變化，家長比小朋友更加難受，真係唔講都冇諗過。講座仲邀請咗個舊生家長上嚟分享，有問有答，都幾有幫助。

而我發現眾家長嘅問題之中，除咗戒片之外，就最關心語言嘅問題。

之前睇咗白雪介紹嘅一篇文章：《馮強父女兵 ABC築起成功路》，然後同郭生討論個學習語言嘅問題。我好贊同郭生所講，小朋友最重要係良好嘅表達能力。有位朋友嘅屋企專登只用單語，小朋友兩歲前已經有人三四歲嘅表達能力。而且父母應該用自己最「舒服」嘅語言，先可以充份表現到對小朋友嘅愛。

其實我唔係有任何偉論要發表。因為實在有太多理論，而且亦都因人（包括四周圍嘅人）而異。而雖然話小朋友對學習語音嘅能力比較強，從班上父母嘅表現，我覺得有啲家長反而忽略咗一啲常識觀察。因此對自己同小朋友產生咗不必要嘅壓力。

學校嘅副校長答問題時亦都有提到，如果父用英，母用中，可以持之以恆，做到咪好囉。但小朋友好醒目，見到爸爸同媽媽講中文，就好自然會轉「頻道」。俾我知你識講廣東話，我都唔會同你講英文啦。而我又覺得（即使係）自己，都做唔到以上文章嘅馮強咁盡，將自己變成一個老外。

家中嘅一個例子，Jayson 表姐對住 Jayson 會講英文。原因應該係 Jayson 係英文名，而且 Jayson 好多時都講外星話。哈哈哈… 所以我覺得啲小朋友好醒目。多觀察，多引導，先係最重要。

對於 Jayson 嘅「八國語言」計劃，我係有啲野想試玩一下。不過要等佢發音再做好啲先可以試。得就得，唔得就算。到時再分享。

「爸爸，您講真㗎？」

「到時您咪知囉。呵呵呵呵呵…」 

之後郭生話：「相信只有香港人先會迫啲小朋友學雙語。」

但我話：「仲有新加坡啦、中國發達嘅城市啦，都應該係一樣。」

「如果係咁，應該係我地中國人嘅問題。」

「但可能依家啲老外都係一樣，學緊普通話呢！」

「咁到頭來，我地咪又講唔明對方！」

「哈哈哈哈…」

要怪，就怪「巴別塔」啦。如果我統治咗地球之後…



~ Lindberg

臂上的秘密

漫畫《風雲》入面嘅步驚雲有麒麟臂。

原來我都唔弱喎。各位觀眾：

睇唔出？再睇真啲：

認唔認得呢？唔認得？睇下下面幅星圖喇：

無錯，就係北斗七星陣！

唔係前幾日 Jayson 媽講我都唔發覺。原來我左臂有七點，連起嚟就正正係北斗七星。其實我一早都知自己骨骼精奇，腰圓背厚，必定係坐卡位嘅好材料。但真係估唔到，原來我係同健次郎一樣，係《北斗神拳》嘅傳人…。

突然間，覺得有一股熱氣喺隻左手湧出嚟！哈哈哈… 細個嘅時候，都幾鐘意呢套卡通。雖然係血腥暴力咗啲，但勝在有創意。健次郎一句：「你已經死了。」真係好型爆！

但希望我唔好生多一粒墨。一陣生多粒喺個「死兆星」位就大吉利是啦。因為傳說中見到「死兆星」，就一定會…

其實我同 Jayson 媽都有好多好多墨。莫講話「北斗七星」，「黃道十二星」都應該搵得到。希望 Jayson 唔好似我地啦。哈哈哈…



~ Lindberg

香蕉盒

果王秘密武器：香蕉盒（$39.90）！

其實一早就知有啲咁嘅野，起初覺得好低能。邊到需要啲咁嘅野。但自從家中多咗個果王之後，我地就經常要隨身攜帶生果。但香蕉喺毫無保護之下，喺個背囊入面撞嚟撞去，搞到又瘀又爛。有時放喺個膠袋入面耐咗，仲焗到熟鬼晒。所以我地買個盒嚟試下。

個盒除咗有保護作用之外，仲有通氣孔，唔驚焗住條蕉。生果會釋放乙烯（Ethylene），一種令生果加快成熟嘅物質。如果焗住啲乙烯，啲生果就好快熟。

但請注意，因為形狀所限，可能一梳蕉，只有一兩條啱放。其他就唯有喺屋企食啦… 哈哈！



~ Lindberg

迷人電眼 Beautiful Eyes

如題：

見到他那雙「電眼」，真的有點無言以對。那是 Jayson 的二嬸和姐姐 Toni 所教的。一對長眼睫毛的眼睛䁪起來，又真的是電力十足。救命呀！哈哈哈…

最近發現 Jayson 的眼睫毛有些開差的現象。不是長得那麼誇張吧？是否應該落一點護髮素呢？



~ Lindberg

網站推介：MyDRDR

當 Kenny 話想全職整一個醫療網站嘅時候，大家都抱一個懷疑嘅態度。因為呢個年頭，真係唔知點樣用網站賺錢。但見佢慢慢搞，都幾有聲有色喎。而最重要係可以幫到人：

http://www.mydrdr.com

呢個網站係一個健康醫療討論區。入面有不同嘅專科醫生為大家解答問題。雖然話有病就應該去睇醫生，但有時當唔知睇好唔睇好，或睇邊個醫生好，一啲專業嘅意見都係好有幫助。

而 Kenny 亦都收錄咗啲有趣嘅兒科問題，放咗喺佢網誌上面。我覺得都幾啱我地父母睇。

http://mydrdr.mysinablog.com/

有時唔係有人問都唔知，原來 Jayson 屁股仔啲藍藍瘀瘀，係啲咁嘅野嚟：

http://mydrdr.mysinablog.com/index.php?op=ViewArticle&articleId=1755787



~ Lindberg

姨姨和姨丈的浸禮

這是幾個月前的事。復活節的星期六，因為 Jayson 姨姨和姨丈要受浸的關系，我們有幸帶 Jayson 參加了逾越節的彌撒。

Jayson 很乖地聽了半小時左右的彌撒。然後我就抱他出外面吃晚飯。回來的時候，姨姨和姨丈便開始排隊受浸。見到他們可以得到神的祝福，我們也覺得很感動。

同場也有很多手抱嬰兒和媽媽一起受浸。我不想去研究受浸的真正原因，但身邊不少朋友也希望自己的子女，可以在教會（學校）環境下長大。大概會乖一點吧。

細心想一想，自己的宗教背景都幾複雜。出世的時候，已經於天主教下受浸。但兒時每星期上的是基督教的主日學。契的卻是觀音娘娘，拜的是車公爺爺。沒有甚麼宗教立場可言。

對於 Jayson，我們都應該會抱著積極但不干與的態度。無可否認，信仰對人生價值觀有一定的影響。試想象一下，如果沒有 Afterlife（來世），現實的世界會變得如何恐怖。所以我們只希望 Jayson 懂得分辨是非，然後行自己選擇的路，那已經很好了。



~ Lindberg

迪士尼兩天團 之 米奇放狗咬人！

玩了一整天之後，那天晚上，我們到了迪士尼樂園的好萊塢酒店住一晚。每次到這間酒店，不禁都會哼起同一首歌：

「荷李活有間大酒店，三個…哎喲！」

「為老不尊呀您！」

「媽媽，張床好大好舒服呀！」

「係呀，今晚仲要得我地兩個瞓添！您爸爸咁鐘意唱歌，就俾佢成晚喺廁所唱啦。」

玩了一整天，大家都需要沖一個靚涼。

「好大個水池呀…」

因為家中的是企缸，所以 Jayson 都是在他的小浴盆中沖涼。有次到白雪家的浴缸沖，因為陌生環境和用花灑，所以被嚇倒。這次開定一大缸水，讓他熟習環境後才下水，再加上家中帶來的玩具，所以沖得很開心。

「Are you happy?」

「Hap-py!」

替他沖完涼之後，我便趕回家餵 Julie 和清理她的便盆。希望留她一個在家，沒有生我們氣吧。

回去之後，Jayson 已經吃完奶熟睡了。我便沖一個靚涼，準備去睡一覺好的。

但那晚 Jayson 不停使出「旋風轉」，對我倆拳打腳踢。不熟悉的床和枕，再加上不習慣和 Jayson 一起睡，令我們都沒有好好休息。而我在出門之前，更因為怕自己開車時打瞌睡，喝了一杯咖啡。弄成我整晚眼光光… 唉…

「Zzzzzz…」

「您就好瞓啦！」

早餐跟大伙兒到「翠樂庭」食自助早餐。見 Jayson 開始不怕那些迪士尼人物，我們也安心去拿東西吃。

「我又要…」

食物種類比上次來還要多。味道很不錯。我還弄來一碗美味的喇沙，湯底充滿蝦味，非常香甜。

而 Louise 和 Toni 兩姐妹便去找卡通人物簽名和影相。

「包包… My Precious…」

正當一切正常之時，陰謀暗地裡開始。米奇師令竟然放他的狗 Pluto 去咬 Jayson！（請留意 Pluto 面部的小動作。）

他還放出另一隻大的，突然偷襲兩老，嚇了他們一跳！

危急關頭，節瓜俠使出絕招：「點石成金」，暫時把米奇收服成銅像。好讓大家逃出這個地方。

待續…



~ Lindberg

五十四日環遊美加 之 美國歷史嘅根源：費城

離開首都之後，我地去咗費城。我相信費城唔係一個香港遊客會常到嘅地方。唔係因為湯漢斯嘅電影：《費城故事（Philadelphia）》，我都唔識呢個地方。

今次選擇嘅旅館都算夠晒經典。我見本《Let's Go USA》嘅介紹，搵咗一間好似幾有特色嘅旅館，不過就好似遠咗少少。上到巴士問過司機，佢問我地想易行啲，或者近啲。以防行錯路，我地選擇咗易行啲嘅路。

巴士離開市中心，越行越遠。最後去咗好似郊區嘅地方。落車之後，孭住一個 60 升嘅背囊，望住一條彎彎長長嘅路，絕到有想死嘅感覺。好兄弟們冇怪我，只係不停爆粗，鬧本《Let's Go USA》。但當我地行咗近半小時，見到間旅館之後，雖然得番半條人命，發覺一切都係值得（雖然都係繼續爆粗）。

旅館興建於 1799 年。就好似睇電影見到嘅美國古老大屋一樣。樓高三層，白色外牆加綠色屋頂。雖然平平無奇，不過有一種好舒服嘅感覺。

間屋好大，住咗好多人，不過只有我地四個中國人。地下有個大廳，可以俾一大班人坐喺到傾計，同埋扮捉棋，彈豎琴。仲有個大廚房，同埋乒乓波檯添。我地住喺頂樓。一入到房，我立即搶咗個靚床位。斜斜嘅屋頂，喺香港一定無，所以覺得好得意。我就喺呢個窗台寫日記。

去到歷史之都，當然要去行下啲有歷史價值嘅野啦。咁我地當然唔會放過真正嘅 Liberty Bell（自由鐘）。叫得真正，因為都有幾個彷製品。呢個鐘係 1752 年，為慶祝移民 50 週年已打造，係自由同公義嘅象徵。美國人真係鐘意自由。上面寫住：「Proclaim liberty throughout all the land, unto all the inhabitants thereof」。

自由鐘上面嘅裂縫，係試音嘅時候已經做成。我自己就唔多覺吉利，不過可以有啲瑕疵先至獨一無二。仲有去睇 Benjamin Franklin 嘅墓穴。唔講都唔知，原來佢發明咁多野。

下面張相真係唔記得係乜。問過家在費城嘅火羽都唔知。我記得當年我地係唔知佢係「9」定「e」，所以先影。火羽話係「e」。信佢！

而最印象深刻，喺一晚嘅正宗唐餐。正宗在由香港人主理，亦即係我地四個。仲記得當我地爆香啲蒜頭，炒白菜仔。鑊氣十足，香味吸引一眾老外。感覺非常自豪。

下一站：昔日的紐約



~ Lindberg

迪士尼兩天團 之 獨闖鼠潭

大約兩個幾星期前，七彩戰隊去了迪士尼樂園受訓。而節瓜俠因為有任務在身，所以決定來一次「獨闖鼠潭」！

「爸爸，今次特訓好爽呀！」

其實今次是因為外地的家人到訪，所以我們跟他們一起，到迪士尼樂園的好萊塢酒店住一晚。這次是 Jayson 第一次在陌生的地方過夜，所以我們都覺得很緊張。

一大清早，我們便到酒店集合。經過 Jayson 媽的精密計算，如果購買最普通的全年通行證，除了於六月份訂酒店有半價之外，再加上一行九人的餐飲折扣，比起買酒店套票更為超值。所以我們買了兩張全年通行證，以後相信會有更多機會到來。

入到樂園的第一件事，就是吃午飯。之後的行程，跟上次沒有太大分別。

Jayson 的兩位家姐，不停逗 Jayson 玩。上次見面是上年十二月。當時細家姐 Toni 還不太懂事，不會愛護小弟弟。但今次已經有明顯的進步了。至少弄喊 Jayson 會知錯。

入到米奇大屋，我偷聽到有工作人員通風報信，說有小朋友要進來。當我們將進入米奇的房間時，米奇突然衝出來。嚇得 Jayson 喊過不停… 真的好心做壞事。哈哈…

可能因為有之前的經驗，今次 Jayson 很快便鎮定下來。之後三姊弟就手拖手四圍走。我們還看了《歌舞青春熱跳速遞》，勁歌熱舞，對看過《Highschool Musical》千百篇的兩姊妹，看得更為投入。

然後我們去看上次來還沒有的《米奇水花巡遊》。這個會噴水的巡遊，真的可以很濕身。

「媽媽，好濕呀！唔鐘意。嗚嗚…」

看完巡遊之後，Jayson 便搶著要去騎木馬。騎完之後，我們打算讓他去接觸一下迪士尼的人物。因為知道他怕那些公仔，所以我們也沒有強迫他去接近。

但竟然有一位，Jayson 不會怕之外，還自動跑過去親近親近。而更加奇怪的是，我們家中並沒有這個公仔。

「Bear！」

Jayson 從遠處見到 Winnie the Pooh，大叫一聲：「Bear」，便飛身走了過去。當行近時，Jayson 發現原來 Pooh Bear 是這麼大隻，有點兒卻步。但最後還是跟他握手影相。果然是一個謎…

之後我們還玩了「小飛象」和「小小世界」。

天待我們不薄，整天的天氣都算不錯。晚上還可以看煙花。因遊人不多，所以可以（第一次）行到前面看。上面放的煙花，下面閃爍的星星（手機和影相機的屏幕）都很漂亮。

待續…



~ Lindberg

Artjamming @ Harbour City

星期日，我地一班網友有幸被海港城邀請，帶埋小朋友去玩 Artjamming。

Artjamming @ Harbour City
地點：海港城馬哥孛羅香港酒店商場三階（近 Dan Ryan’s Chicago Grill）
日期：2009年6月至8月（逢星期日）
時間：3:00pm - 6:00pm

參加辦法：在海港城或 Star City（星光城）消費滿HK$300，憑即日發票（以單一發票計算），另捐款HK$100予「香港公益金」，可即場參加活動。

名額：20人（不須預先報名，先到先得）

Artjamming 喺佢嘅意思，係隨自己所想，呈現喺張畫布上面。而過程可以跟身邊嘅親友分享，所以都幾適合一家大細一齊玩。今次我地出席嘅有：Mavis、Anson、米B、傲衡、同埋皓皓。

其實我好鐘意畫畫，但奈何繪畫技巧只有小六程度，於表達能力極度不足之下，總係提唔起勁。但 Artjamming 唔係需要依特定主題去畫，加上可以同其他人一齊玩，所以真係唔錯。
經過主持人 Betty 簡單介紹過之後，我地就立即「開工」！

「Jayson，醒呀！開工啦！」

因為 Jayson 嗰朝一早就出街，所以需要叉一叉電…

而開工之前，大家都穿上保護嘅圍裙。雖然用嘅係水彩，染咗落啲衫，乾咗之後就好難洗。睇落我同親家老爺，除咗似「雨夜屠夫 」之外，都有幾分似「賣魚勝」。哈哈哈哈…

見到咁多色彩鮮豔嘅水彩，人都零舍醒神啲。主持人話顏色任用，最緊要痛快！

「唔好阻住我呀，大叔！」

大家都好努力咁畫。而 Betty 同其助手們，都不停四圍走，俾意見之餘又鼓勵我地落筆。

而出奇地，Jayson 毫無抗拒。起初用筆，一筆一筆咁畫。媽媽由得佢自己去選擇顏色，之後溝出嚟好似太深色。不過冇所謂啦。

畫畫下，Jayson 就開始用手。估唔到喺學校打死都唔玩水彩嘅 Jayson，喺呢到會畫得咁自在。

同場仲有人氣一家人：MAmiMamA。見 maMa 畫一幅全家福，相比之下，覺得自己好流… 哈哈哈！

「爸爸，您都知自己流呢？」

「咩呀？我…我掛住幫您手咋！」

~ Lindberg