五十四日環遊美加 之 首都 Go 華盛頓特區

離開咗奧蘭多市之後，我地繼續美國文化之旅。去到美國東岸，點都要到首都：華盛頓特區，見識一下。印象中嘅華盛頓特區，係空蕩蕩，因為地方好大。啲主要建築物又白色居多。有好多博物館，唐人街好闊，但乜都冇。唔多似係人住嘅地方。

我地住喺一間 B&B（Bed and Breakfast，床及早餐）。地方唔算好大，亦都有野要同其他人共用。而整個旅程，其中一張我最記得嘅相，就係以下呢張。我喺香港帶咗一個電煲仔過嚟。每次可以煮一兩個麵。然後喺洛杉磯買咗四隻藍色嘅膠碗（蘇忠仲有保存緊），加埋一支「調味霸王 2000」，煮出不少美味嘅麵食。

要遊白宮，就要攞入場券。我地先一日去攞，然後第二日入去行。雖然只係走馬看花，但可以走入國家元首嘅辦公地方，睇下歷代總統留下嘅點滴，都幾好玩㗎。

林肯紀念堂、華盛頓紀念碑、美國嘅獨立宣言，全部都放埋一齊，可以一次過睇晒。林肯紀念堂入面當然有個好大嘅林肯坐喺到。而華盛頓紀念碑就好簡潔，喺任何時代睇，亦唔會覺得不合流。理論上可以上去，但當時話大風，所以唔上得。依家睇怕都唔會俾人上去。另一邊箱就放咗美國嘅獨立宣言。最衰嗰時未拍《National Treasure 驚天奪寶》，否則會睇得更過癮。

阿靈頓國家公墓（Arlington National Cemetery）係另一個我一世都唔會忘記嘅地方。

本身係一個軍人嘅墓園。但難忘嘅原因，唔係廣闊嘅墓園，唔係眾位為國損軀嘅士兵，更加唔係簡單嘅換兵儀式，而係嗰日嘅天氣。起初我地只係覺得好熱，但因為唔似香港咁濕，所以都唔會太唔舒服。國家公墓係一個大公園，冇樹冇瓦冇野遮頭。行上行落，呼吸都幾辛苦。就好似焗桑拿浴一樣，熱空氣差啲會燒著兩個鼻孔，出到一身汗。之後睇晚間新聞先知道，原來嗰日熱浪侵襲首都！仲熱死咗幾個人！返到屋企，睇下個溫度計，四十五度！？！？四個人不停講粗口，鬧邊個白痴冇睇新聞就出門口，冇死到真係皇天保佑。當然，四個人好明顯都係白痴。哈哈哈哈哈…

去完阿靈頓之後，我地去咗參觀五角大廈。因為我地行得太近座建築物，所以只係睇到一面牆，都睇唔到何謂五角。而且四個人經過之前一役，加埋只得番兩條人命（每人半條）。所以我地主力去附近嘅商場降溫，補充水份。

呢張係我地嘅屋企門口。雖然只短短幾日，我好鐘意呢個屋企。

下一站係為美國歷史嘅根源：費城。



~ Lindberg