周末車手必備品

自從變咗「周末車手」之後，我經常都會遇到一個情況，就係電池冇電，開唔到車。其實正常嘅情況之下，一兩個星期唔開車都應該冇問題。但我個車房親戚可能太過細心，驚死有人會偷我架平車，所以幫我裝咗三個防盜系統！可能因為咁嘅關系，架車啲電去得好快。大約十日左右就會「乾塘」。每次都要搵人救命。

正所謂：長貧難顧，所以當百貨公司減價嘅時候，我買咗呢舊嘢：「救車寶」（$5XX）。

原理好有趣。只要將「救車寶」嘅插頭插入點煙器內，「救車寶」就會掉轉頭充電到汽車電池入面。大約 10-15 分鐘，汽車電池就會有足夠電力開車。

第一次充電要 60 小時。之後除非有用過，否則就每兩個月充一充，保持最佳狀況。

有一次，架車冇乜電。雖然有電開門開燈，但唔夠力開車。我插舊電落去，一開就著！非常興奮！我估係因為電壓差少少，所以都唔洗等充電都可以著到車。

但之後有兩次當架車冇電，舊嘢完全冇料到！一插就怪叫，指示話充唔到電。最後我上網睇人哋嘅評語，先發現原來大家都話係廢物！可能因為舊電嘅質素唔好，雖然話可以充得起 3,000cc 嘅車電，但 1,500cc 嘅都充唔起！激死我！！！

但即使係咁，以我堅毅不屈嘅精神，都冇放棄過自救嘅念頭。於是，我（冒住生命危險）去咗旺角（因為實在太多人）啲汽車用品店睇下。俾我搵到：

呢個真係可以當「過江龍」用，唯一分別就唔洗搵人哋㗎車幫手。$950 一大舊，仲可以充呔氣。不過我亦都有懷疑過，佢又係外國唔要嘅舊貨。因為喺官方網站搵唔到呢個型號。不過無辦法，買咗先算。

結果：好得喎！夾用正負極之後，開電，就可以立即著車。非常方便！舊電買番嚟已經有啲電，足夠即時著車用。喺兩日之內，我用咗三次都冇問題（因為車電叉未足，就又流走哂）！

唯一一個唔好處，就係大舊。我情願佢賣冇汽泵，300Amp 嘅型號。但鬼叫香港市場細，有得賣已經好好。

現在，車尾箱又多一舊（比較有用嘅）垃圾…。

~ Lindberg