猴棗末

前排 Jayson 有幾聲咳，朝早有一大舊痰。因為見問題唔係好嚴重，所以諗住自己處理一下先。之前 Jayson 咳，都試過食「猴棗末」。但一支要百幾蚊，都幾重皮。通常我有中醫藥問題，我都會問一下郭生。除咗因為佢係前化學家之外，而更重要嘅係：佢屋企有個中醫。

「阿仔有幾聲咳、痰同條喉嚨都幾緊下。我想佢食支猴棗末。佢食開余仁生，但好鬼貴。你個女食開邊隻牌子？」

「「末」就梗係貴啦。「末」係純猴棗。阿女食散咋。有其他中藥成分，一支唔夠力咪食兩支囉。效果都還可以，而且計落化算好多。猴棗末都係放一支喺屋企看門口㗎咋。」

「哦… 明白！咁我去睇下有冇散先。」

「其實你知唔知猴棗係咩嚟？」

「唔知…」

「想唔想知？都幾核突喎。」

「快講！」

原來「猴棗」，並非好似茶葉「馬騮搣 」一樣，用馬騮去採嘅棗。稱之為棗，只因佢嘅形狀似。其實佢係猴子嘅腸胃結石（Bezoar）！我心入面第一個疑問：究竟邊條友會咁變態，走去攞啲猴子嘅腸胃結石嚟食？！神農士嘗百草啫，結石都敢食？！真係要寫個「服」字！

上網一查，竟然除咗中國人之外，仲有其他人一樣咁變態！古阿拉伯人都有用結石嚟治病解毒。不過故事聽落都幾合理。話說啲鹿（唔知點解）會走去食蛇。食完之後，因為全身發熱，會走去浸水。我懷疑情況就好似我哋食蛇羹進補一樣。之後，喺佢哋嘅腸胃中，就會出現擁有解毒嘅功效嘅結石。但究竟邊個會「試食」，真係令人匪而所思…。我相信會係另一個殘酷嘅故事。

而猴棗，出自《藥物出產辨》：「猴棗生於老猿猴之胃及肝膽間，緣猿猴常食各種山果，積年累月，其精液所結成為石者，形如棗，猶如牛之生黃，狗之生寶。故治效亦相類也。猴棗為治熱痰最靈捷之聖藥，功勝西黃八寶散，暨諸祛熱痰藥。」

另見於《飲片新參》：「猴棗味苦性寒有消痰鎮驚、清熱解毒的功能，古代稱之為治熱痰之聖藥。臨床多用以治療痰熱喘嗽、小兒驚癇等病。中藥中的猴棗散就是以猴棗作為主藥。」
望住支猴棗末，真係好難令我相信啲馬騮會結咁多石！更加唔敢諗啲石係點樣「採」番嚟。唯有正面啲去諗，我哋都係幫啲馬騮去除結石啫。一家便宜，兩家著。

所以猴棗末都係有必要時先好食。除咗「心理因素」之外，猴棗仲非常寒涼，不宜長期服用。只係咳嗽痰多的話，可以考慮猴棗散。但猴棗散亦有多種配方，成份效能都唔同，所以要加注意。最後，猴棗嘅粉末會整黑啲牙，所以食用嘅時候最好避免同啲牙接觸太多啦。



~ Lindberg