事源現在日日都要揸車返工，原本架 Sienta 出現不少問題。趁架車仲值少少錢，於是就打算換架新車。期望安全啲之餘，每日返工都會開心啲。唔想再揸7人車，因為都冇機會坐多過5個人。與其係多兩個位，不如要多啲揸車嘅樂趣仲好…。
其實架 Golf GT 最令我有衝動去買嘅地方，就係廿幾萬一架車（當時售價為港幣$279,880），送 $65,000 原廠車身包圍套裝！感覺就好似娶個老婆，送你一層樓一樣，唔洗諗啦！所以試過車之後，冇睇過其他牌子就去咗畀錢…
架車加咗包圍之後，外型真係真係冇得輸。斯文中帶一點霸氣，典雅中又帶一絲不羈，非常配合我嘅形象。
我架碳灰色可能睇得唔清楚包圍條黑線。陳列室黑色車嘅包圍配上一條紅線，非常搶眼。不過我覺得唔係 GTI 的話就唔好用紅線啦，所以都係我架好啲…
所謂原廠車身包圍，其實係香港車廠自己加上去。好彩都加得幾靚仔。尾翼亦令線條冇咁鈍。而死氣喉亦改為中置。據稱中段會更加有力。但因為我冇得比較，所以只可以話型咗啲囉。
7代頭燈係其中一個我最欣賞嘅地方。靚仔之餘又照射得好集中，唔會照到行人腰位以上嘅起方，咁就唔怕照到行人或其他司機啦。而轉軚嘅時候，該方向嘅輔助燈就會自動亮起。即係轉左嘅時候，左邊嘅路面就會光起嚟，真係一個非常安全嘅設計！
不過音響係一個嚴重嘅敗筆。竟然今時今日，音響都會出唔到中文！日文就更如唔洗指意！如果我一早知道，我真係未必會買。軟件升級之後都係冇，真係灰到爆。最灰係出車之後兩個星期，美國新落地嘅 Golf 已經配備 CarPlay。對於一個蘋果用家，知道有 CarPlay 而唔知有冇機會用得到，真係好似畀人喺喺傷口搽上蜜糖，再放一堆螞蟻上去一樣。又痕又灰！
耗油量方面，雖然引擎講到好慳油，又有 ECO 慳油模式，耗油量其實都係一般。銷售顧問話可以去到 $1 一公里，我話唔開冷氣，唔上落斜，都有可能得嘅…。
Auto Brake 非常方便。一停車就會鎖死架車，唔會流前流後。好用到我已經忘記咗乜嘢係 Hand Brake。停車自動熄匙須要適應一下，不過還算暢順。
之前習慣用泊車鏡頭，但泊車雷達都非常準確喎。除此之外，前後都有雷達，慢車時就會開始感應，穿梭狹窄路段都冇有怕。新手揸的話，一定會感到好安心。
尾箱當然冇7人車咁好用，不過都放到一家大細嘅旅行篋。而且底板仲有兩個高度，須要多啲空間就可以放低塊板。冇須要的話就可以好似我咁，放高一格就唔洗彎低腰攞嘢。
DSG（Direkt-Schalt-Getriebe）波箱亦係其中一個賣點，波箱細之餘又好反應，上落波跟無斷變速差不多。落斜仲識得幫我拖波減慢速度，手動都慳番。雖然前一代有用家話波箱有問題（我識得兩個車主，兩個都要換波箱…），但據稱呢一代已有改善。後來上堂明白咗 DSG 波箱嘅原理，就知道點樣去揸架車。有兩點值得注意：1) 上斜唔好畀小小油，拖到停喺到，因為等同吊極力子，太耐真係會過熱；2) 爬頭唔好靠落一個波拉高轉數，因為 DSG 波箱落波的話就表示要減速，反應會慢啲，依我經驗，轉 S 波畀油，咁就冇人可以喺我前面！
不過架車配上 Bridgestone 嘅濕地胎，我發現好似唔多咬地。試過好幾次起步嘅時候，唔係畀好多油都會響胎。銷售顧問話車胎係公司分配，但維修部又話係銷售顧問揀嘅。激死！
另一方面，可能始終都係歐洲車，避震比較硬。市區路面都行得唔太舒服。最後一樣我唔太高興嘅地方，就係車窗冇得裝雨擋，鮮風唔夠想焗死人咩（落雨唯有開大啲冷氣啦…）！
~ Lindberg
沒有留言:
張貼留言