男生必學的課題 之 三個女仔一個墟

上星期的同學生日會中，最初因為我們早到，Jayson 跟兩位女同學們玩得很開心。後來，同學仔多了，場面開始變得有一點混亂。突然 Jayson 不知為了甚麼事情，自己行到旁邊發脾氣喊起來。

「XXX 同班女仔霸住條滑梯，唔畀我爬上去。」

原來 XXX（一位比 Jayson 高出一個頭的女同學）和幾位女孩子霸占了滑梯，不讓其他人爬上去。之後更聯群結黨，指著一位男同學說：「MMM 好曳呀！星期一番學話畀老師聽！MMM 好曳呀！MMM 好曳呀！MMM 好曳呀！MMM 好曳呀！MMM 好曳呀！」可憐的 MMM，我也不知道他曳在甚麼。氣得他差點要衝上前發爛，幸得他的媽媽阻止並拉到一旁去冷靜一下。

Jayson 一向都不太喜歡這位女同學。雖然我只接觸過幾次，我也有相同的感覺。他曾經跟我們說：

「XXX 好嘈。有次佢仲指住 YYY（一位男同學），鬧佢係『笨蛋（普）』。」即是是用了普通話去鬧人笨蛋，除了對方是陳研希之外，相信沒有一個男孩子會感到好受。

小朋友間的糾紛，理應由他們自己去解決。但因為知道前因，加上是在同學的生日會中，所以 Jayson 媽便主動教他叫人讓一讓，或跟其他小朋友去玩吧。

「幾個女孩子喺埋一齊，就係會自己玩，唔要同尐男仔玩㗎啦。唔緊要啦。」媽咪安慰他說。
之後可能有其他家長留意得到，分別有兩個女同學 AAA 和 BBB 走過來叫他回去玩。Jayson 站在充氣滑梯一旁觀察良久，最後才上去繼續玩。

其實不單只 Jayson，另一位跟 Jayson 一樣斯文的女同學 BBB 也被那班女同學擠了出來。我跟她說，Jayson 也是被擠了出來，叫她去找 Jayson 玩。最後她也是站在一旁，和 Jayson 一樣靜觀其變。

小學生活的確跟幼稚園有大不同，幼稚園的同學都是一張白紙，而且家庭環境接近，所以相處比較融洽。但到了小學，大家來自比較不同的環境，各自有自己的一套，所以人際關系就比較複雜。比起學術上的知識，我覺得這是他們更要好好學習的一課。

這晚「陪訓」的時間，Jayson 跟我說：

「爸爸，我唔鐘意 XXX。」

「哦… 唔好咁啦… 就好似媽咪之前同您講，每個人都有唔同嘅性格㗎嘛…。如果您唔鐘意同佢玩，您咪搵其他同學玩囉。」

其實我們很擔心怕醜的 Jayson 在學校會很難交到朋友，所以媽咪都表現得較為緊張，有時也會「問長問短」。因此，我續說：

「Jayson 呀… 有時爸爸媽咪因為擔心您喺學校識唔到朋友，會表現得好緊張。如果嚇親您，我同您講對唔住呀。但如果真係冇同學同您玩，唔好因為爸媽咁緊張而唔同我哋講呀。知唔知道？」

「嗯…」

「其實當只有 AAA 或者 BBB 嘅時候，我見您同佢哋都玩得好開心呀。係當尐女孩子一多，佢哋就會只顧自己玩，唔會同男仔玩㗎啦。」

「係咩？！」

「係呀。尐女孩子係咁㗎！如果只得 AAA 嘅時候，AAA 好可愛㗎。又或者得 BBB 嘅時候，BBB 都好可愛㗎。係當 XXX 加埋入嚟，三個女孩子咪變咗個墟囉。」

「咩叫做『墟』呀？」

「墟即係好似街市，好多人好嘈嘅地方囉。」

我想了一想，這情況似曾相識。於是我補充說：

「以前爸爸追您媽咪嘅時候，佢又係成日黐住兩個女孩子，當三個人喺埋一齊嘅時候就好嘈，一個人嘅時候就好可愛囉。所以爸爸咪鐘意咗您媽咪囉。」

「真㗎？！」雖然房間一片漆黑，我也感到 Jayson 瞪大雙眼望著我。

「真…」希望隔牆無耳…

Jayson 想了一回兒之後，笑笑口說：

「爸爸… 我好愛您。」

「我都好愛您。」

說完這番說話之後，我感到自己很有智慧，非常滿意。而 Jayson 亦很快就進入了甜蜜的夢鄉。


~ Lindberg