一生任食創作和食

星期一幫朋友預祝生日，去咗銅鑼灣食日式自助餐。都唔錯喎。

一生任食創作和食
地址: 銅鑼灣百德新街24-32號名珠城1樓
電話: 2808-0384

星期一係假期，黃金時段要 $198 一位。都唔算太貴。

想食野就需要寫點菜紙。張點菜紙有成十萬九幾款食物。睇見都幾開心。佢仲好為客人設想，將食物以益處分門別類。不過點菜要根據人數，每次只可以點一定數目嘅菜式。開頭都唔係好鐘意呢種做法，因為覺得限住晒好小家。我地一行13人，每次可以叫12款，每款最多三碟。聽落好似好多，其實每碟好少野。不過點下點下都成枱野，心理上先覺得好啲。

前菜：有好多款。啲奇奇怪怪嘅都有。有我鐘意食嘅枝豆同納豆。嘻…
刺身：都好新鮮。不過唔好以為佢會一次過俾好大塊你囉。不過小食多知味，唔夠咪叫多兩轉囉。哈！
壽司：一啖一件。細細件都做得幾好。
炸物：食咗炸蠔同天婦羅，炸得啱啱好。
燒物：有個火爐仔俾你自己落手燒。好玩多過好食。
沙律：勁多款！

個姐姐話有張每月推介，不過啲野食無乜特別。

不過最好奇怪都係有個推銷時段。個經理會走出嚟用咪叫賣。例如話五分鐘內叫無酒精飲品半價，或者每人送一碗特制蟹肉麵鼓湯之類。如果想靜靜地食飯，都會覺得幾噪。不過成班人玩就覺得有氣氛嘅。

我地成晚不停咁食，不停咁笑。真係未試過食得咁辛苦。哈！


~ Lindberg