兩週一聚 (23): 假如我有魔法或超能力…

正所謂遲交總好過冇交。今次火羽出題，又點可以唔支持一下呢？

首先，要諗下自己想有乜野魔法或超能力…

作為一個血氣方剛嘅男兒，第一時間就諗起《透明人間》，做一個隱形人！不過科學常識話我知，要做到透明有兩個方法。第一，啲光可以穿過我身體，人地睇唔到我。但我想睇嘅「野」，亦都因此睇唔到。嘥氣！而另一種方法，就係將我背面嘅景象，投射去前面。亦即係我全身都會被覆蓋，又係乜野都睇唔到。真係把鬼…

我亦都諗過要「聖鬥士」是但一種絕招。不過實際用途唔大。威力太大嘅，又驚個地球頂唔順。威力細嘅，又頂多去做一個地盤佬，開山劈石。而其他特別招式又意義不大。例如：

1. 鳳凰幻魔拳 Phoenix Genma Ken 或 幻朧魔皇拳 VISION DEMON IMPERIAL FIST：可以代替 K 仔？但依家推行「不可一，不可再」喎。
2. 異次元空間 Another Dimension：送啲人去另一個空間，可以解決人多地少問題。但會令樓價產生嚴重波動喎，我唔想做「負家產」呀！
3. 積屍氣冥界波 Corpse Underworld Wave：可以送啲人去地府觀光，睇一下自己往生後嘅理想家園。可惜送咗落去，未必帶到佢番上嚟。一陣地府有過多非法入境者，閻羅王問起罪上嚟好大鑊。
4. 六道輪迴 The Cycle Of The Six Ways：幫人除去痛嘅感覺，都可以喺醫學上有一番作為嘅。不過問題都係去除咗，想要番點算？！
5. 深紅毒針 Scarlet Needle：可能可以做新一代針灸術。不過當啲人見到隻蠍子，未必有生意做喎。
6. 亂舞聖劍 SONIC BLADE：把刀咁利，切野真係唔錯。但奈何太利，切到張檯都爛埋。得不嘗失呢。
7. 曙光女神之寬恕 Aurora Execution：呢個係我原本覺得最有用的一個。我以為可以解決全球暖化嘅問題。但大家要記得「等價交換」呢個重點。呢邊放緊冰，另一邊一定放緊熱。為咗美化卡妙，漫畫冇畫到佢嘅後面。其實相信係噴緊火！（邊到噴就自己諗啦。）
8. 血腥玫瑰 Bloody Rose：可以攞嚟賣嘅。不過有血腥味，搵鬼買呀？

所以要再認真諗一諗…

當未出《Death Note》之前，我都有同樣嘅構思。不過我嘅做法比較合乎「大自然定律」多少少。理念係：改變死亡機會比率。令到「該死的」易啲死。不過想法太過負面，同我要以「德望」統治地球嘅方針唔吻合。

統治地球… 無錯啦！我要學摩西，有控制大自然嘅能力！要令所有地球人聽聽話話，就要喺佢地最絕望最需要嘅時候出手。首先利用天氣控制農作物收成，喺期貨市場搵一筆。有咗資本就搵幾個兄弟做「媒」，等我可以好謙虛咁行出嚟，話要救萬民於水火，起個「朵」先。然後，就要暗地裡製造恐慌。

先淋啲紅油落維多利亞港，等大家嚇一嚇。然後利用龍捲風，落啲青蛙、曱甴之類。訓練一堆野獸，只會攻擊政客及銀行家。秘密自行研發新一代流感，令禽畜死亡。再製做無數潮流新玩意，令所有人都患上屁股嚴重痕癢症。然後就落冰雹，等眾人雪上加霜！第八樣就要去買啲蝗蟲去放，越多越有氣勢！

正當人心惶惶之時，就係我企出嚟嘅時候啦！話以上都係啲恐怖份子所為（學習前美國總統做法）。話佢地嘅做法實在太過份啦，我已經忍無可忍。先呼喚厚一厚嘅雲，做成三日嘅烏天黑地。顯示一下我嘅實力。然後買兇殺晒啲恐怖份子嘅長子。仲唔立即受到萬民嘅愛戴？！而人地分開過紅海，就唔好再抄人啦。反而，我要合埋「地中海」！買咗「史雲遜專業護髮」，為所有煩惱嘅男士免費服務。 我簡直可以聽到男士們歌頌我嘅名字！

最後仲可以扮晒野咁，順手解決地球暖化問題。再搵人上寶福山打兩塊石板。禮成！之後唔洗多講，想統治地球，話都冇咁易啦！嘩哈哈哈哈哈哈哈哈哈哈哈哈哈哈哈哈哈…



~ Lindberg