Jayson 的七歲生日禮物

前個星期，我問 Jayson：

「Jayson，您今年生日想要咩禮物呀？」

「我想要 Angry Bird。」

「Angry Bird？！Angry Bird 咩呀？！」

「我想要 Angry Bird 嘅公仔。」他最近才有機會玩《忿怒鳥》。

「唔好呱… 成屋都係公仔。而且媽咪準備咗樣差不多嘅嘢，您就當有，揀過另一樣啦！」

（媽咪買了一個忿怒鳥的蛋糕）

「…咁我想要 Lego 啦。」

「吓？！成屋都係 Lego 囉喎，我哋仲有兩盒未拆呀。不如我哋開一盒就當係啦。您再揀過另一樣啦！」

「…咁我想去迪士尼住一晚。」

「吓？！我哋嘅年票過咗期啦。媽咪其實都安排咗啲嘢，您就又當有啦。不如咁啦，既然您想要嘅嘢都有代替品，仲有三份咁多添，不如畀爸爸揀一份嘢禮物畀您啦。」

「哦…好啦。」Jayson 當然有點失望。

就係因為好似有得揀而其實冇得揀嘅情況下，我買咗一副「Blokus」畀佢。

諗深一層，雖然每個安排都係為佢著想，亦都比佢要求嘅好，但始終都唔係佢嘅選擇。就當佢食我嘅、住我嘅，只能擁有似有還無嘅選擇權，但畀著我都會唔開心啦。因此，我暗地裡許下承諾。過兩、三年，等佢再懂事啲，我就唔會作篩選，畀佢自己揀。就 2017 年啦！

~ Lindberg

P.S. 今日學校開始學段小休，明天就飛！有人仲未知要去邊。呵呵呵…