我們搬家了！

終於決定咗三月二十六日進行入伙儀式，之後一日搬。入伙嗰日好似去旅行咁，帶啲簡便嘅衣物，喺嗰到過夜。為咗 Julie，我先帶咗幾件佢常用嘅傢俱（床、玩具、磨爪柱等）到新屋。希望可以預先散發一下佢嘅味道。

而廁所雖然係新嘅，但我搬啲舊沙過嚟。希望 Julie 一聞就會用。

喺入伙期間，舊屋仲進行緊裝箱打包工程。我地應該大約用咗五十個箱。大件野入箱入到我暈，啲細件野就包到 Jayson 媽傻。好彩佢諗到用快啲嘅「排排隊包裝法」：

即使山羊座修羅（左二）嘅「聖劍」都斬唔開啲泡泡膠呀！呵呵呵呵…

入伙儀式，有婆婆幫我地安排。煲個水，開個風扇，期望風山水起，中個六合彩！哈哈哈…

入伙前幾日，搬屋公司見我地舊屋冇地方裝箱，所以預先「免費」幫我地搬咗一轉。入伙嗰日望住推箱，一個頭立即變成兩個大。啲箱唔立即拆唔得，否則之後其他野搬過嚟就會冇位放。

Jayson 超開心。而 Julie 就超驚。頭兩日都匿埋喺主人房嘅窗簾下面。冇乜飲食。但 Julie 好乖女，識得去新廁所！到第三、四日先回復正常。

Jayson 房啲傢俬全部都係宜家買貨色。我超後悔冇叫佢安裝埋。我首先裝張床。有幾十口長螺絲要上。因為冇電批，上完之後，對手廢咗…

之後契爺帶埋支電批嚟幫我裝衣櫃。雖然冇乜螺絲要上，但好多位要對，勁煩。而且因為我有其他野要搞，基本上大衣櫃係契爺一個人裝晒。真係有啲玩謝契爺嘅感覺。不過做得契爺，係要出啲力㗎啦，唔係練到咁大隻做乜？

契爺留低支電批俾我裝個書櫃。點知個書櫃（差不多）一口螺絲都冇！但要鎚捶！捶到人都癲！

不過（唔計勞苦）除咗幾好玩之外，可以親手為阿仔做啲野，覺得做爸爸同契爺都幾威。

另一方面，接駁影音組合都係一件超煩嘅事。只要想象一下，我用咗三個有五個位嘅拖板，先可以插得晒啲器材，就知有幾大工程。

之後幾日，拆箱擺設真係極之煩。其實今次係我第一次搬屋。之前由同阿爸阿媽住，搬去舊居都唔算係搬。因為除咗啲衫，大部份都係新野。今次淨係望住堆公仔書已經好想嘔血。

經過兩個幾星期嘅努力，新屋終於成型。我地亦都終於試過喺新屋開飯。

下次再帶大家參觀一下洛文嘅傑作。但有得參觀之前，可以睇下我地走廊呢兩塊白板。上面有啲我嘅作品，下面係 Jayson 嘅。理論上，佢係可以畫野上去。但我驚我塊牆會凍過水… 都係遲少少先啦… 而下面嗰幅好難黐野上去，因為 Jayson 成日攞晒啲磁石嚟玩。哈哈哈…

~ Lindberg