華星冰室 Capital Café

對於冰室呢個名字，我有一份莫名嘅親切感。屋企附近有一間，我細細個嘅時候成日經過。但阿媽一次都冇帶過我入去。可能當時嘅冰室，主要賣小食，阿媽認為冇野啱我食呱。
灣仔前排開咗一間叫做「華星冰室」。睇過餐牌，感覺上係學「澳洲牛奶公司」。牆上有好多歌星唱片、簽名、海報做裝飾，令人懷疑同以前嘅「華星唱片」有冇關系…。

華星冰室 Capital Café
地址：灣仔克街6號廣生行大廈地下B1號舖

午市我行過都幾多人，而且裝修好似有啲拒諸門外嘅感覺，所以通常都會行番去「豪華」。呢晚兩個人去到灣仔，見入面唔多人就入去試下。

當伙計一開口，我立即俾佢嚇呆咗。佢並非不友善，反而係幾專業。就等同喺「澳洲牛奶公司」，以子彈速度，問我個常餐想配啲乜。因為事出突然，一時追唔上，搞到有啲不知所措。哈哈… 但亦因為咁，大家就更會用兩間餐廳作比較。

食物一嚟，賣相都算合格。我要煎蛋、凍檸茶，Jayson 媽要炒蛋、茶走。我嗰碟都算唔錯，但佢嗰碟就完全唔得。凍嘅！睇怕係之前落錯單嘅野。好灰…

湯意冇乜特別。叉燒得嗰幾塊仔，而湯底都係人地好啲。我杯凍檸茶好難做得太差，但熱奶茶就真係普普通通（飲過一次之後，下次除非失憶，否則唔會再叫嗰種）。

睇番個餐牌，我覺得失敗嘅地方有兩個。第一，俾我就唔會用北海道3.6牛乳。同傳統冰室俾人嘅感覺，格格不入。第二，我唔會賣啲新派野：黑松露炒蛋…。除咗少咗一份冰室或茶餐廳應有嘅親民感覺之外，與其做到半桶水，不如唔好做。好明顯係諗多咗，只從想收貴啲去著眼。

結論：都係去番隔離「豪華」安全啲。


~ Lindberg

P.S. 其實都已經係上一兩個月前嘅事。假期後，見好多舖頭結業，所以都係快手寫咗先好…。 （註：我並無特別意思。）