詐騙電話

最近收過幾次由大陸打嚟嘅電話。因為見喺大陸打嚟，我冇辦法唔聽。

「喂…」一把頗友善嘅男人聲。

「喂…邊位呀？」我答。

「你唔認得我啦？嘻嘻…」

「唔認得。你係邊位呀？」

「我都唔認得？有冇搞錯呀你。哈哈哈…」

「真係唔認得。你打幾號電話呀？」

「有冇搞錯呀你。我呀。哈哈…」

「真係唔認得。你打幾號電話呀？」我見事有古怪，所以用同一個音調，不停重複同一個答案。最後…

「你唔係XX咩？」

我打咗個震，然後好自然咁答：「唔係。」

之後對方立即收咗線。我呆咗一陣。點解對方知道我喺邊個？

我開始研究所有可能性。但大陸有我嘅手提電話，除咗係一個（男性）好朋友之外，就係得一個公司嘅設備供應商。兩者都唔會咁樣打俾我。而且我六年都冇番過大陸，冇可能有其他（咁無聊嘅）人會聯絡我。我甚至諗過會唔會係老豆喺上面搞過啲乜，而唔知點解有我電話。雖然老豆之前有啲生意上嘅問題，但都已經係幾年前嘅事。我真係諗爆頭都唔知點解。

因為百思不得其解，我忍唔住要爆出啦！收咗線冇耐，我同當時一齊燒野食嘅朋友講咗呢件事。誰知當中有位朋友遇過同一個情況！對過來電顯示，發現對方電話有九成相似。所以我極之有理由相信係詐騙電話！

好明顯，我同朋友嘅電話號碼，已經唔知點樣，俾人「出賣」咗去啲唔知咩人手上。呢件事，再一次令我覺得自己赤裸裸咁，暴露於人前。呢啲人正在虎視耽耽，一個唔留神，就向我四方八面下手。而最慘係即使自己幾小心都好，化身為幾十個分身都好，個人資料最終落咗邊，有咩人去保護佢，一啲保障都無。

幾年前，我都收過詐騙嘅電話。電話接通之後，我不停咁話：「喂」，對方都冇回應。當時仲未流行自動打電話做推銷，而且「喂」極都冇人應。但好彩我有睇「警訊」咋。有一次對方再打嚟，我唔出聲，對方就開始講野。當我一應，佢就收線，之後都冇再打過嚟。當時「警訊」提過有一類騙案，對方打嚟錄低你嘅聲音。等有一次唔係你聽電話嘅時候，就向你嘅家人落手。用你嘅「喂喂」聲，扮你已經俾人捉咗，要求贖金。

唉… 有時我都好明白搵食艱難。公司幾乎每日都收到商業上嘅詐騙電話。文具、滅火筒、驗身等等。即使部份唔係完全欺騙，但手法都係非常有問題。你搵食艱難，莫非我就得來容易嗎？每次收到呢啲電話，我真係好想問下對方個良心喺邊，每晚瞓得好唔好？如果佢唔覺得自己有問題，咁莫非係我有問題？到底我係唔要轉行，搵番呢啲人著數呢？我相信如果我要做，一定比佢哋精密好多。但我唔會咁做，因為我只係一個「常人」。

希望「己所不欲，勿施於人」咁簡單嘅做人道理，每一個人都可以放喺第一位。



~ Lindberg